ወይኽምረትል ችጝሸቊ ደመደምሽተቊ ቅርሰን ማኽሊስ አበ ፂቅ ( አምባ ፅጌ) ገዳም ኽየውድ የጝ።
ናነ ጥቨቭዙ ሙየጉሪየዝ ኲንሸቁ ተከቊ፣ ጅውነድ ፃለቲስ ኻየናንስ ችብስንቊ ተከቁ ሊጘ አብቕ ማኽሊል ችጝሸው ገዳም የጝ። አበ ፂቅ ኢትዮጵየትል ችጝሸቊ እምጥጝዘቊ አብቒስ ላውድ አቓንድ ጅውነይዝ የውም ኻግርሸንቱ ኻይማኖትዝመ ፖለቲከዙ ሲጘዝ አጉረው እኩሰ እኩሰው አበ አቐነውድም ሲጘ ልብሰኲ።
ገዳምድ ጅሉዘድ ጭቅ የው ንየትጎ ፈው ንየይል ኽየው ዋለ ፃየው አቐነዊዝ ኽፅምቁ አቅለን ኻይማኖትዝ የውም ቅምንዝ ማርፅጘው ስፍረ የጝ። ነንትል አሽም አግልግለድ ይዋንስ ፃብጝ ፅበው ኹሪዝ ከስጝኩⶔ።
አበ ፂቅቱ ሽⶔድ 12ትረ አድለ ዚምኒዝ ማኅሌተ-ጽጌዙ ችጘተ አቐቊድ አባ-ጽጌ ብርሃን/ድንግል ጋብዝ ፈው አቐነውድ ዊግሸኲ።
እን ገዳሚል አባ ጽጌ ድንግል ጝተ ዚምኒዝ አግልግልሽጛጙ ዊንጘጘድ አምንሸቊ ቺተቺተቊ ኽፅምቱ ቅርሰን የነትም፦ ( ኰሪዝ ጛይ ዊግዝጝ ዳዝጘው አየሪል ቀልቀልድ ፅበው ኽየው ቕርጘ፣ ቕርጘይዝ ፊልፍልሸው ገንደ፣ ቀለም ፃይሰነ ግቭር፣ ብራነዝ አቐው ቀለም ፃይሰነ ቕርጘዙ ግቭር፣ ዊርቀዝ ሰራሽተው አፍሮ አይገባ ኽየው ሚስቅልዝመ ላጥ ሚስቅለን ስፍረይል ችጝሽጘኲ።
አቓንስቅም አበ ፂቅ ቱሪስትዙ ችጝሽተትነይዝ አቐው ዝቨ ሚልክ ፃየው ሊጘ ኽየኽይሽታቊ አብቕል ችጝሸው ኽፅሙ ገዳም የጝ።
እንዝም ኢትዮጵየቱ ቃወተ ዊነቊድ አፄ ሐይለ ስላሴ ለውርድጘጘድ ዊግሸኲ።
እን ገዳምድ አንክርሰው ዝቨ ሚልክ ፃየው ተረው ዂሪዝ ሲሪዩ ጝሲጘድ ፃይ ፊርጠጘድ ፃቨቊ ብራነዙ መፃፈን፣ ቅርሰንዝመ ጥቨቨን ቓልሽተው የጝ።
አቕሽም ግነ ቺተዝ ቈሽ ፈነ ጊመነ ጒግድ ቀልቅለ አቐነዊዝመ ሊጘ አብቕድ ዲምቀው ቀልቀልደው ዚወ ሰራሽትየው አቐነውድ ለውርደጥዝ ምችት ዊናየጘድ ፃቭኲ።
ገዳሚል ፅበቊ ማልቘፅድም ጝታሸጘድ ፍጝ ጊምጝ አግልግለናንስ ጅውነይዙ ምዕመንድም ጝጅውነይዙ ቅርስድ ፍ ለውርዳየጘ ጉግድ( ቀልቅለድ) ፅጋ አቕኲ።
ሰቁጠ ወረደ ጂርበ 010 ቀበሊዙ ጽበጢስ አት ደርበው ሳሙኤልስመ አት ውበቱ መኮንን ገዳምድ ንቕፀቊ ዚምናንዝ ጒደነዙ ችግሰይዝ ምላሰን ዲቭሽት ዊነጘድ ጒይጘኲ።
ነንም እምንትዙ ቲክነጥ እቀኽቭርድ ገዳሚል ፍጝ ጝተ አምላክድ ሚዜንዝጝ ፅበው ኻይማኖትዝመ ሲⶔ ቅርሰንድ ለውርድጝ ዋጥረቊ አቐነውድ ሚሪጝ ፍጝ ጊምጘው ጒደነድ ቃነዙ ዝጉዝጉዝ አቐነዊዝ ለውርደጥዝ አጉረው ፅጋ አቐነውድ ሚዝርድጝኩⶔ።
አበ ፂቅ ገዳምድ ሳቁጠ ወረደይዝጘድ የውም ወይትጘድ ቱሪስትዙ ችጝሽተትነይዝመ ጥወርዙ ፍልፍለ አቐቊ ቅርሰኒስ ላውድ አቕሽም ነኳን አሽ ገዳሚዝጎ ችጝዘው ጒደነዙ ችግሰይዝ ምላሰን ጅውነይዙ እቀኽቭርድ እኰ እጝቅም ለውርደነውዙ አገነድ ችጘነው ቸልየቊም።
አበ ፂቅ( አምባ ፅጌ) ገዳሚዙ ጭሰጭሰተ አባ ተክለ ስላሴ 12ትረ አድለ ዚምኒስ ኪርም ዊነው እን ገዳምድ ንቕፀቊ ሲⶔ ቅርሰን ጝ አቒዝ ጥቅልዘው አቐነውድ ዊግትጘኲ።
አቕሽም ፅበቊ ቅርሰንዝመ ሲጘንጥድ ጅውነይዙ ኹሪዝ ከሰናንስ ለውርድንዝ ምቸው ሲሪዩ እፍርትዙ ሰቭ በንዘው አቐነውድ ጋልጽጝኩⶔ።
እን ኽፅሙ ገዳምዝመ ወይሽመን ጝተ ኻግርት ኻየናንስ ጝተ ፅበነ ፃቭጝ ዊንጘው አበዴት ቀሰው ቱሪስትዙ ዊትረነዝመ ለውርደጥዝ ምችት ፃየው ስነ ምህዳር ፋጥረናንስ ጉግዙ እፍርትዝመ ቀልቀልደቊ አጭነዙ ዚወ ተሚሰው አቐነውድ የጝ ኻስቭዝጘውድ።
ገዳሚል ችጘናንስ ኽየው ሲጊነዝመ ቀልቅለድ ፈነው ግድጝ የጝ። እንዝጘም ነኳን አሽ ዲምቅሽጝ አርቓቊ ማንጥ አብቕድም ዲምቅሽጝ ኽዝቪዙ ለውርደነ ፃቨናንስ ኽየው ቀልቀልደው አጭነዙ ዚወ ተሚሰው የጝ።
እኔን ቈሽ ቱሪዝምዙ ዚርፊል ብጭቕ ሰራሽትየቊ ሰበን ፅብጘጘድ የጝ ሚሪየውድ።
ገዳሚል ቀልቀልደው አጭነዙ ዚወም አነ አጭነዙ ዝጉዝጉ ኲነናንስ ወረደይዙ ምኽር ጝንድ በጀት ፊቅደነውድ ዊግተቊድ ቈሽ ሳቁጠ ወረደ ባኽልዝመ ስፖርት ጽ/ጝኒል ቅርስ ኻይንዙ ጓነ ቃወተ አት ምስጋናው መስፍን ጛይ።
ገዳሚዙ ጒደነድ ሩዘነውዝ አበ ፂቅ ገዳምድ ለውርድንዝ (ቱሪስት) ዊትረነ ፃቨናንስ ሰራሽታጙ አቐነውድ ሚሪጝ 1 ነቁጠ 9 ሚሊዮን በጀት ገሪየነውዝ ጉግድ እፍርዘናንስ ኻሊሽት ሰራሽታጙ አቐነውድ ልብስጝኩⶔ።
ቃነዝ ፈነው ዊነው ገዳሚዙ ጒደነድ አጭነዙ ዝጉዝጉዝ ፃቨናንስ ኪርምሸው ሰቭ ፅበነውድ ሚሪጝ ላው ላው ማሽነንዙ እጅጝት ፋጥርሸነዊዝ እኔንት ሩዘናንስ ፍልውልውሻጙ አቐነውድ አርቒስጝኲⶔ።
ቺተዝ ቈሽ ገዳሚዙ ሲጘድ ዘጋቪ ፊልምዝ፣ ቢረተ ወረቂትዝ፣ ገረዱ ሚዲየዝ ፋጥርሻጙ ፅበው አርቕትድ ገዳምድ እፍርዘናንስመ አርቕሽታንስ ከቫጙ አቐነውድ ጋልፅጝኩⶔ።
እኒስ ከስጘም ወረደይል ፅበቊ ቅርሰንድ ኻየናንስም አቚ ፅራረናንስ እቀኽቭሪስ ጥወር አኽቨነውዝመ 6 ላ ሽኽ ቁርሻን ወረደዙ በጀቲስ ገሪየነውዝ ሰራሽታጙ አቐነውድ ልብስጝኩⶔ።
ቱሪስትዙ ዚርፍል ትኩርት ይውን ሰቭተነው ጅውነይዙ ኢኮኖሚዝመ ፖለቲኩ ሊግዝትዝ ፃየው እኩሰ የጝ። ጅውነይዙ ቅርሰንዝመ ቱሪስተኒል ቃውስን ሰራሽናንስ ፊስነዊስ ንየ ጝታጊስ ችጝነው ፈንድ አጉረው አቐኲ።
ላው ናንዝ ይውን ሊጘ ናንዝ ለምርነኲን። አቓንስቅም አበ ፂቅቱ ገዳምድ ወይቱ ኽዝቭድ የውም ላጥ ለውርደጥዝ ምቸው ፃቨናንስ ወይቱ እኹርሸጥም አጝነ አቨርደቊ አካለኒዙ ሲትፍሽንድ ተሚሰው የጝ።
ግንቭት 15/2018
ሳምራዊት ግርማይ
