ሠቭ ፋጥረነው ጅውነይል ችጝሸው ዊቱ ጻጀድ ፈኑነይዝ ቃወነውዝመ እጅርዙ ኻይልድ ኢኮኖሚይዝጎ ድወነውዝ ጊቭርዘተ ጻቨነው የጝ።
ሚሊዮንዝ እጊተቊ ሰቭ ተምዘጥ ዉሸብል ጽበነውድ አርቒሰው ሰቭዝመ ቸልት ሚኒስቴር ሚሊዮንዝ ሰቭዙ አገነ ፋጥረነውድ ጋልጽኩ።አነ ጚ ዲቈው 2017ዓ.ስ 14 ሚሊየን ሠቭ በጥ ዜገንዝ ሰቭዙ አገነ ፋጥረናንስ ኻሊሽም ሩዘነው ቸልሸውድ 3 ሚሊዮን ዜገኒስ ኽያውም ሰቭ በጢዙ ተምዝትድ ጠራዘናንስም ቸልሽየውም ።
2017-2018 ዓ.ስ ምጝግስ ሰቪዙ አገነ ፋጥርንዝመ ኹረዙ ወይትነይ አጽቨይዝ 1 ነቁጠ 6 ሚሊየንስ ንየ ሰቪ/፣ አገንጥድ ፋጥረነውድ ሚዝግቭኩ፡፡ እንም ኻሊሽተዊስ 88 ላይል አቐጘ ሰቭዝመ ቸልት ሚኒስትሬስ ችጝሸው ሚዝረድ ቓሊሰኩ።ይነ ጽፈሽዝም ጋዝጊቭ ወረደይል ባልትነዙ ሰቭዝ ውላቐቊ ውሸቭልዙ ሚኩርሽንድ አንቭቭስነ ቀኑን።
ገረደዝም አነ ጛሉውዝ ሰቭዙ አገነ ፋጥርሸቊ ውሸብልድ ጥውሸውዝ ፈኑ አጛንድ ቓልሽታውም። እኒዙ አይነተ ምላሰንድ ምጝግስትዙ ከቨይዝመ ቲክንክነዙ ቢተ ጽበነውድ ቓሊሠነ የጝ።
ጋዝ ጊቭለ ወረደይዙ ሰቭዝመ ስልጠነ ጽ/ጝንድ 2018 ዓ.ስትዝ ችቭረተ ሰቭዙ አገነይዝ 160 ኮሩዊዝ ቈሽ 355 ውሸቭልድ ሰቭዙ አገነ ፋጥረነው ቸለው አቓንድ ጝኻለይስም 56 ላይስ አጡድ ሩዘነው ቸለጘ ሚዝረጥድ ቓሊስጘኩ ።
እንዝ ቈሽ ውሸቭል ውላጘው ሰቭዙ ዚርፊዝ አሩሸጥ አጝጥጘ ይውሽተው አስክዘ ኻትርሰነዙ ሰቪስ ከስጘ ጎነ ወረቲስ ሰራሸነ ስፍረ ይውን ሰቪዝጐ ድውሰነው ቸለነውድ ላው ጉጉ አቐጘ ወረደይዙ ሰቭዝመ ስልጠነ ጽ/ጝኒስ ችጝነው ሚዝረድ ሚሪየኩ።
እንዝ ቓሊሠነ አቐው ገረደድ እደሴ ንጭቱ አኮ እምቲስ በውግ ላው ሚሊየን እድወዙ አግልግለ ይውሽት ሰቪዝጐ ጥወው ተማረ ዝናቡስመ ጝጻምጥ ባልትነዙ ገረደ ላውድ አቓንድ ውሸቭል ሰራሽጝ ችጝጘው ጥወሪዝ ጝታቕመት ቀሰው አቕንትዝ ቓወነው ቸለነዊስ ከስጘ ላጥ ሰቭ እጀቊ ውሸቭሊዝም ሰቭዙ አገነ ፋጥረነው ቸልጘጘ ገረደይዙ አቫለኒስ ውሸቭለ ተማረ እንዳለው ምጝግስት ቀሰው ሰቭ ፋጥረጘ ዋርዘኩ”ቀሰው ፍልውልወ ጻቭናጙ ይና ቢንድ ዊስንኩኑን ላጥ ጅውነይል ችጝሸቁ ገረድጢሥም ይን ቺዝነኩን በውግ ሰቭ እጅነቅ አቕን ቕርጘ መውርናጙ የጝ ዊነውድ” የውኩ፡፡
ላየ ዊግስነው ውሸቭለ ዝናቡ ጌታወይ ሰቭዝመ ስልጠነዝ ፊስጘው ስልጠነይዝ ሲሪየም ሰቪዝጎ ውላቐነውድ ሚሪየነውዝ ጻቭሽተው ከቨይዝ ፈኑ አቐነው ቸልጘጘዝመ ጝታ ቢንድ ዊስጝ ትርፍ ቲርፍዘነውዝ ጝታ አቒዝም ሰውጠ አጥጘ ሰቭ እጀቊ ውሸቭሊዝ ኮሩ ሰቭዙ አገነ ብዘነው ቸልጘጘ ያንድ ዋርዝኩ።
”ያን ይቕመ ትጘ ሰቭ እጀር አቕ ይአቅሊዙ አልተተ አቕ ቺግርዛጙ ንቕፀው ኮር ጐይ ዊኑን ምጝስት ሰቭጀቁ ውሸቭልድ ተገተግሳንድ ይጻምጢጅቅ አቐነውዝ ተገተግሽትን ላው ሚሊየን ቊርሽ እድወ ፊሥን ባልትነዙ ሰቭድ ኪርምን ፈኑ አቕን ይነ እድወድም ዊስን ሰውጠ ውሸቭሊዝም ኮሩዊዝም አቕሽ ሰቭ ፋጥርን ኩኑን”ያንድ ዋርዝኩ።
ነንቱ ሰቲዝ ፊስጝ ዊንጘው እድወድ ዊስጝ ጝታ አቅልድ ከቭስጛጙ ጽብንድ ላውጠነውዝ ሰቪዝ አርወዉ ጥረምረ ዛቐው እጒስ ከስጘ ሽርዝመ ቢርብር ዛቐው እጉ ጅቭጝ ጝታ ሰቭድ አትርዝጝ ሰራሽጛጙ ችጝሽጘጘም ውሸቭለ ዝናቡ ጌታወይ ቈሸነውዝ ጋልጽኩ።
ጋዝጊቭለ ወረደ ሰቭዝመ ስልጠነ ዲቈተ አት ጣፈጠ ባየ ጝታ ጋቢዝ ወረደይል ችብረተዝም አቑ ኮሩ ሰቭዙ አገነይዝ ውሸቭል ውላጘው ሰቪዙ ዚርፊዝ ፈንቊ አጝጥጘ ማጥን ከቨዝመ ቲክንክነ ይውሽታጙ አቐጘድ ጋልጽጝ “እናጊስም ተማረ ዝናቡስመ ጝጻምጥ ባልትነዙ ገረደ ኪርመነይዝ እዱርጘው ላው ሚሊየን ቊርሽድ ኪፍልጝ ላየ ቈሺተተ እድወ ፊሰነውዝ ጥርዙ እጒስ ቈሽተተ ቢርብርዝመ ሽርዙ እጉ ጅቨነው ቸልጝኩጙ። ሰራሽጘው ሰቪዝም ጝታቕመቲስ ዲቊ ጅውነይዙ እቀ ኽቭሪዝም አሩሰው ሰቭ ሰራሽጛጙ አቐጘድ ቲግቭርዝ ደድሰነው ቸልጝኩጙ” ይጛንድ ዊግትጝኩጙ።
ጻይሸው አምረይዝ160 ችብረተዝ 355 ውሸቭልዝ ኮሩ ሰቭዙ አገነ ችጘጘ ሚሪጝ እኒስ ሚቅ ቺተቺተቊ ችግሰንጢዝ ፈኑ አቐነው ቸልየቊዝ ዚልቀውዝ ፈኑ አጛንስ አኮ እምቲስ ላጝጠ ምቲዝጎ ዊንተድ ሊጊሠነው ቸልጘጘ ጋልጽጝኩጙ።
ጥቅለዝ ወረደይዝጘ ውሸቭልድ ሰቭ ጉሬ ጻቨናንስ ጅውነይል ልተቊ ፕሮጀክተኒዙ ኢንተር ፕራይዘኒዝ ይውሽተቊ ፕሮጀክተንድ ውሸቭልድ ፈኑ አጛንስ ቃውሸነድ ቲክንጝ ሰቭትጛጙ አቐነውድም ጋልጽጝኩጙ።
ኢትዮጵየዝመ ንቕፀቁ አፍሪከት ኻግረን አውግረው ችግሰይል ጛይ። እን ችግሰድ እክሰናንስም ምጝግስትቁ ሴክተረን፣ ክንድጝዝቊ ችብረንጥዝመ ውሸቭል ለወንትዝ ሰራሸነው ጡውሸኩ።
አቐነዊዝም ሚሪሸቁ አካለንድ ሰቭ እጀቁ ውሸቭልድ ሰቭ ጉሬ ጻቨናንስ ሰራሸነው ጥውሸኩ የውድ ይነ እጻ ጻቭኑን!
አመልማል ተድላ
ሲን 15/2018
