ኻግሩ ምነነ ኻግርት በዊዝጎ ፃጝዘው፣ ኽዝቭድ እፅቁፅቁሰውዝመ እፍርትዝ ከረከረነ አጠ ቸለው እትለዙ ጒደነ የጝ። ኢትዮጵየትል ንቕፀው ኽዝቭዙ እግዘድ ውሸብለ የጝ። እን እጅርዙ ኻይልድ ቴክኖሎጂዝ፣ ፋጥርንዝመ ሰቭዙ ቀንትዝ ቃውሸው አቐውዜ ኽየው ኢኮኖሚዝመ ገረዱ ሊግዝትዝ ሞተር አቐነውዙ ኽየው ምነነ ፅይኩ።
ኢትዮጵየቱ ጂኦ ፖለቲኩ ስፍረድ አፍሪከቱ አቭርት ጎየነ ጝር አቐነዊዝመ ፅይር ፅብረቍ ኽየኽየቊ ኻግሩ ችብረጢል ሲሪሸው አይር ምጝግስትድ በዊዝጎ ፊራንስ ከቨቍ አቐነዊዝ ምነነይዝጘ ቓሊሽትጠ ጥውሸው ገቭ የጝ።
ይና ኻግሩ ፖለቲከዙ ጒዥትን አቒዝ ምጝግስትዙ ሲሪሽን ፃጝሽተነውድ ተረቊ እምተንዝ ቲክነው ኻግሩ ፖሊሲዙ ሚርየድ፣ ኢኮኖሚዝመ ገረዱ ሩሔዙ አቕንትድ ዊስነው ሲጙ እትለ የጝ፡፡ አይር ምጝግስትድ ስልጣን ፅየው ኰሪዝ፣ ኻግሬን ንቕፀቊ ችግሰንጥል ችጝሽረይ ጝር አቐነዊዝጘድ ፖለቲከዙ ከረከርኒስ ከስጘ ኻግሩ ዲቊትነይዝመ ትውፅውፀዙ ሊግዝቲል ምነነ ማልሽትኩ፡፡ ጥቅለዝ ቲክነቊ ቲግቭረንድ አክንውሽጥጘ ጥውሸኩ፡.
- ደርሰው ጊዝዙ ቃውሰ አስልሽትዝመ ምፅነ ፃጀዙ እርጋቕን
ነንቱ ኰሪዝ ኽዝቭድ አይር ምጝግስትዙ ቃውሰ ቲግቭር ፃቭ ኻየውድ ፅብንዙ ኪብርንድ ቀልዘነውዝመ ኢኮኖሚዙ እርጋቕን ዊናንስ ሰራሽተው ሰቭድ የጝ። ፅብንዙ ኪብርንድ እግዝግዘናንስ ኻግር አቒቱ ጊቭርትድ ሊግሰነውዝመ ሰቭዙ ፋጥርንዝ ግልፅዝመ ቃልጥፈው ተግረ ፊሰነው ኻይሽተኩ። ዜገንዙ እልት እልትዙ ሩሔድ እርውዲንቀስ ፃቭሽተው አውማው ፖለቲከዙ ልውጠድ እቻቐው አጠ ቸላውምነ እርውዘነው ተሚሰኩ።
- ኽግዙ ንየትነይዝመ ዲግዙ አቕንት
ኻግሩ እርጋቕንዝመ ዲግዙ ኵንንድ ኻግርዙ ንየትነይድ ኪብርሺንቀስ ደደደድሽትጠ ቸላውም። አይር ሲርሸው ምጝግስትድም ዜገንዙ ዳኽንነይድ ኻየነውዙ፣ እክሰዝመ እርውነይድ ሲፍናንስ ፃቨነውዙ፤ ሽክትንዝመ አድልድልሽንዙ ፖለቲከድ እግልሰነውዙ ኪው የው ሚንውት ዊንጠ ጥውሸኩ። ኻግሩ ምኽርኽረዙ ፃጝትድ አትርዘነውዝ ዊነቊ ቅሬተንድ ዊግሽንዝ እክሰነውዙ ባኽልድ ዲብርዘነውዝ አይር ጭሰጭሰኒዙ አይነተ ኻለይ አቕ ሠራሽትጠ ጥውሸኩ።
3. ችብረጥዙ ሪፎርምዝመ ቀሰው ጭሰጭሰን
አይር ምጝግስት የነት አይር ሰቭዙ ባኽልዝመ ሚንውት ቓሊሰናንስ ሠራሸነው የነት የጝ። ሙስነድ ኪውተዝ ሽሽውደነውዝ፣ ኽዝቭዙ አግልግለ ይወቁ ችብረጥድ ቃልጥፈውዝመ አምንሸቊ አጥጘ ጥውሸኩ። እኒዝጘም ቸልትዝመ ሙየድ ሲርዬ ፃቨው ቃወተዙ ምደበ ቲክነነውዝ ቀሰው ጭሰጭሰንዙ ሲርዩ ችግሰድ እክሰው አጠ ጥውሸኩ።
4. ዜገንዙ ሲትፍሽንዝመ ተረው ኰርዙ ምነነ
አይር ሲሪሸው ምጝግስትዙ ስልጣንዙ ወነድ ኽዝቭ አቐነውድ ልብተነውዝ፣ ውሳኒ ይውንዙ ፃጝት አቒዝ ኽዝቭዙ ሲትፍሽንድ ደደድሰነው ኻይሽተኩ። ፊክርክርሸጥ ፖለቲከዝቍ ፓርቲየንድ፣ ሲቪክ ገረድጥዝመ ውሸብልድ ጥቅልዘው ፃጝት ቲክነነው ኻግሩ ለወንትነይድ አትርዘኩ።
ጥቅለዝ ሲሪሸው አይር ምጝግስትድ ቃልዙ ጊድ ጭቑ አቕ እዳቓየጘ ኻትርሸው ሰቭ ሰራሽታንስ ነንቲስ ኪርምን ኪርመነው ጥውሸኩ። ኽዝቭድ ምጝግስቲስ ኻይሽተው ቲግቭሩ ፈንድ፣ ዲግዙ አየርዝመ ኢኮኖሚዙ ፈወነ ችጛንስ ላብጠ ሰራሸነው ጥውሸኩ። እን ሲጙ አገነድ አርውሸነውዝ ኻግሬት ቺዘው ኢኮኖሚዙ ከረከርኒዝመ ዲግዙ ፈወነይዝጎ ከሰከሰነው አይር ምጝግስቲዙ ቃውሰዝመ ዲቊሽታው ዲቊትነይ የጝ።
ኢትዮጵየቱ ተረው ጊዝዙ ምነነ አቐውድ ፖለቲከዙ እርጋቕንዝመ ዲግዙ ኵንንድ ኢኮኖሚዙ ሪፎርሚጅቅ እርወ ፊርጛንድ የጝ። ዲግድ ደድሰነው፣ ኽግዙ ንየትነይድ ሲፍንዘነውዝመ ውሸብልዙ ግርቭድ ጊቭርት ሰቭል ግሪሰነውዝ ቸልሸውዜ ኻግሬን ምስራቅ (ሲርቀን) አፍሪከዝ ኽይረይ ኻግር ጝር አቐነውድ ደድሰው አቕንትዝ ሰራሸነው ጥውሸኩ።
ወንድሙ ቸኮለ
ሚስኲሩም 30/2019
