ዲግ እጅር ኹርዙ ሲርዩ ተምዝት እቻዘነ ጭቑ አቒጝቀስ ኻግሩ ሊግዝትዝመ ብልፅግነዙ ዲቪየ የጝ፤ ይና ኻግር ኢትዮጵየ ጝር ሲጘይዝ፣ ጝር ባኽልዝመ ጝር ንቕፅነይዝ አርቕሽትረይ ኽይረይ ኻግር ጚ፡፡
እኒን ዊነው እሴትድ ኻይን ዊንዘናንስዝመ ኹልዝ ከሰናንስ ዲግ ኻይሰነው እንቅ ዜገኒስ ኻይሽተው ቃውሰተ ቲግቭር የጝ፡፡
ነንቱ ሰቲዝ ኢትዮጵየትል ቓልሽትጛጙ ችጝሸቊ ገረዱዝመ ኢኮኖሚው ፍልውልወድ ቺዘው አምርት ዳቕሰቊ ጛይ፤ እፍርትዝቊ ሰበንድ፣ አርሽነይዙ ጊቭርትዝመ ጊቭርዘትነይድ እኒዝጘም ሲርይቊ እፍርትዝቊ ኲነንድ ፈን ፅየው ፃቨናንስ ቲኪሻው ችጘር ፅይኩ፡፡ ዲግ እቻቐው ኻግር አቒል ኽዝቭ ኽዝቭዙ ዲምቅሽንድ አትርዘኵ፤ ላብጠቱ ጥወጥውሽትንም ፅብጠጘድ ፃቨኩ፡፡
አውማው ቺተንድ አቭላይተዝመ ጥወጥውሽትንዝ እክሰነው ዚልቅትነይ ፅየው ዲግዝ ዊስነተ የጝ፡፡ ኻግርዝቊ ሽመቅል፣ ክንደቊ እኒዝጘም ሚድየዝቊ ችብረንጥ ዲግዙ ተሚስነይድ ሲቭከነውዝመ እቀ ኽቭሪዙ ላወንትነይድ አትርዘነው ጋቢዝ ዋርድጘው ችጘርድ አውግረው የጝ፤ዜገንዙ ዳኽንነይዝመ ሚቭትድ ኪብርዝረይ ኻግር ኲነናንስዝመ ዲግዙ አየር እቻቓንስ ፃቨነው ተሚሰተ የጝ፡፡
ብላ ክልሊዙ ዲግድ እምታን እጊስኩ። ኽምዘድም ክልል ስሪል ችጝሸቍ እጝቅ ዞናኒልቅ ይሽትጠ ቸልሰው ተግዝ እስላጙ ችጝሸኩ።
ውርም እኰ ቺተቺተው ምላሰን ፃየነውዝ ኽምዘ ፋጥረቍ ፅበነውድ ኻዲሻው አቕሽም ጝ አስጛዊዝ ቈሽ ክልልድ የውም ኢትዮጵየ ዲጊዝጐ ዋጥርዳንስ ሰራሸቍ ችብረጥዝመ አካለን ፅበነውድም አርቕሽተው የጝ።
ክልሊዙ ዲግዝ ማጥን አውቲስቅ ንየ ዲቁትነይ ፊስ ሰብታⶖ ፅበውድ ቈሽ ክልሊዙ ምኽር ጝንድ የጝ፡፡
ክልሊዝጘ ነን ፅበው ዲግዙ ድርቑትንዝ እክሰ ችጘናንስ ምኽር ጝንድ ቺተቺተቊ እቀ ኽብሪዙ አድለኒስ ፊሰፊስሽተው ዲግዙ ካውንስል ችበችብስ ሰራሻጙ አቓንድ “ዲግ እጝቅዝቅ፤ እጝቅቅ ዲግዝ” የው ቃወ ኻሰቭዝ ዲግዙ ካውንስልድ አጭነ ጒይጝ ሽሹደቊ ዊግንድ ጣይትንድ ችብሰነውዝ ዲጉ አቕንትዝ ማኽርኽርሸነውዝ ዚልቅትነይ ፃየው ዲግ ተራንስ ሰራሽጛጙ ችጝሽጘኩ።
ብላ ክልሊዙ ኽዝቭድ ላጥ ጝፅን ኢትዮጲቍ ኽዝቫኒጅቅ አቕ ኻግረ ምጝግስት ኲነነው ጋብዝ አጉረው ችጘር ፃየው የጝ። ነን ፅብነው አድለ ዚምኒዝ ማፅናየው ይናስ ይናስቱ ጣይትኒል ጥውን ችጝሽናጙ አቓንስቅ እን ችግሰይስ ፈናንስ እንቅቅ ይና ችጘርድ ፍነ ጡሸው ገቨ አቐነውዝ ንጭቱ ይነ ጽፈሽዝ ጅውነይዙ ዲግድ ኻይሰናንስ ኻግሪዝቊ ሺመቅል ጝታ አኩሰድ አንቭቭስነ ቀኑን።
ወይ ኽምረ ብሔረ እቅ ጭሰጭሰኒስ ጋዝጊቭለ ወረደ አስከተመ ኻትመይል ችጝሸቍ ዲግዙ ካውንስል አቫለን ቓለ ነየጥድ ጅውነይል ፅበው ዲግድ አምንሰው አጠ ማጥን አውማው ሚሪሸውድቅ ጝችጘርድ ፍጠጘ ጋልፅጘኩጙ።
ክልልዙ እቀ ኽቭርድ ኽየው ችግሰዝ አጋልሽት ፅበነውድ ጋልፀቁድ ኪርመነይዝ ዊግስነቊ ጝታ ሽጙድ ጋልጸነው ተምዝየቊ ዲግዙ ካውንስል አቫል “ዲግዙ ካውንስልድ ይናጭስ ነየው እጻድ አጭነ ጒየቊ ኻይለን ምጝግስቲጅቅ አልተ አልተነውዝ ሽሹደኩን ይጘው እቀ ኽቭርድ ዲግዝ ፍ ጥዋንስ ሚቸው አቕንት ፋጥርጥጘ ጻቨነው የጝ” ይጘኩ፡፡
ክልሊል ኽምዘ ፅበነዊዝ እቀ ኽቭርድ አጉረው ፅብንዙ ኪብርንዝ አጋልሽተጘ ጒየቊድ ቃለ ነየተድ ኻግርቱ ሊግዝትድ እርውድጠ ጡሸውድ ዛኽለው ዲግ ፅባንድ አቐነውድ ዊግትጘኲ፡፡ “ጣይትን ቘይዛንድ ጚ አርዋንድ ቓሊነቅ አቓንስቅ ይናቕመስ ይናንድ ዲግ ጋቢል ችብርነ ጡሸኩ” ይጘኩ።
ጋዝ ጊቭለ ወረደ አስከተመ ኻትመዙ ፅበተ አት አበሬ ቢምረው ጝታ ጋቢዝ ምጝግስት ዲግዙ ጭጝን አልሰነዊስ ፍ ከምሸጥድ አልስጘው ዋቕረድ ድምሰነውዝ እክሰዝ አስልሽጠ ጡሸው አቐጘ ጒይጘኲ “ቺተዝም ኽምዘዝ ምላሰን አቐቊ ገባንድ ቃውስን ቺዘነውዝ እክሱነይዝ ማጥን ሰራሽጠ ጡሸኩ” የነውዝም ጝታ ኻሠቭድ ቢንስጝኩጙ።
ይነ ጅውነይዝጘ አልተቊ እፍርትዙ ዋቕረንጥድ ዊሰ ችጝጛንስ ደግምግመዝ ኽዝቭዙ አቭላይተዝ አልትጘጘ ውንሰቊድ አት አበሬ“ምጝግስት ጒሸቍ ዋቕርጥድ ወሽ ስቑ የነው ኻሰቪስ ፍ ቲግቭሩ ዊሰ ይወነውዝ ኽምዘዝመ ቃርዝ ምላሰን አቐቍ ገባንድ ጝታ ስሪስ ይስጠ ጡሸኩ” ይጝኩጙ።
ዲግዙ ካውንስልዙ ኻሰብዝ ማጥን ላየ ቓለ ነየውድ አስከተመ ኻትመዙ ጽበተ አት ውዱ አለነ ጝታ ጋቢዝ “ዲግጅቅ ቺተው እቀ ኽቭር እደረጅቅ ቺቱ የነት የጝ ” ይጘኲ፡፡ እምንት ፃየው አውማው እጅርድቅ ዲግዝ ማጥን ንቒስ ኻስቭጠ ጡሸው አቐጘም ዊግትጘኲ፡፡
“እደረ ይናት ስቑርትዝ ለውርዳንስ ይንም ይናስ ይናይ ስቚርት ፃቨ ፃቭሽትነ ጡሸኩ” የቍድ አት ውዱ ኢትዮጵየ እቻቕር ቲርፍር ጭተጘ ፃቨው ፃጀ ፃይር ፅብራጙ እጅር ኹር ጝስመ ጝስ ክረክርሽተነው በንዛው አቐጘ ኻስቭዝጝኩጙ።
ዲግዝቊ ካውንስል አቫለንድ ውሸቭሊዝመ ኻግርቊ ሽመቅሊስ ጅውነይዙ ዲግዝ አውግረው ችጘር ጻየቊ ጛይ የቊድ ቈሽ ወይ ኽምረ ብሄረ እቅ ጭሰጭሰን ጋዝ ጊቭለ ወረደ ዲግዝመ ዳኽንነይ ጽ/ጝንዙ ዲቈተ ጽቃ ኻልቀ እንዳየነ ደርበው”አጭነ ጉይጝ ጅውነድ ኻሚጠ ጻቨቊድ ማኽረነውዝመ ቺተዝም ጝታ ችግሰድ አልትጝ ድምሰነውዝ ጝታ ሚቭትድ አሩሽጝጥጘ ማጥን ጻቭጘው ልቕረይዝ እን ሲዝነ አምረይዝ እኳን 22 በረኸል ዊነቁ ከምሸጥ ስቑርት ዋቕረነውዝ ተርጝ ይናጅቅ አቐነውዝ ይናት ከቭሰነውዝመ ቺተቺተው ሰቢል ውላቐነዊዝ ጥፍት ፍርዝጛጙ ችጝሸቊድ እክሰቊድ ጛይ” ይጝ እኒዙ አይነተ ፈንድ ተርጠ ቸለውድ ቈሽ ኻግርዝቊ ሺመቅልድ ይናጅቅ አቐነውዝ ችጝነው ፈን የጝም ይጝኩጙ።
ንቕፀቁ ከምሸጥድ ዲግዙ ጭጝንድ ለምረነውዝ ጝታ ጅውነይል እፍርትዙ ሰቪዝመ ዲግ ኻይስን ሰቪል ውላቐቊድ ንቕፀቁ ጝታ አቐነውድ ጽቃ ኻልቀ እንዳየን ቈሽጝ ዊግትጝኩጙ።
ክልልድ ዊነው ዲጊዝጐ ዋጥራንስ ክልሊዙ ኽዝቭድ ጒየቊ ዋቕርጥድ የነትም ቀርሸው ሲጘድ እርውዘነው፣ ኽገ ምጝግስትድ ቺዘቺዝሰነው፣ ድበርዝመ አውትነይዝቍ ዋቕረጥድ ዊሰ ችጝጥጘ ፃቨነውዝመ እክሱነይ ፃየው ኢኮኖሚዙ አሩሽንድ ደድሰነው ምጝግስት አምርስ ይጝቀ እርውዝጠ ጡሸው ቲግቭር አቐነውድም ኻስቭዝጘኩ። እንዝም ምላሰን ይና ጅውነድ ኻየነውዝመ ዲግድ ኻደገል ድውጥጘ ቸለቊ ገባኒስ እክልደነውዝመ ሽሹደነው ተሚሰኩ።
እኒዙ ቓሊሰነ አቐውድ ነንቱ ሰቲዝ ቺተቺተቊ ኻትምጢል ፃጝሽተው ዲግዙ ሰልፍድ እቅ ውር ቑጠ ዲግዙ ተምዝትዝመ ሚንውት ፅየቊ አቐነውድ ልብተነው ቸልሸኩ።
ጥቅለዝ ዲግ እጅር ኹርዝ ተሚሰውዝመ አይነተ ገቨ አቐነውድ ልብትን ተሚሰው እኩሰድቅ ፃቨነው ጥውሸኩ።
ኢትዮጵየቱ ኽዝቭድ ዲቈው ኰሪዝ ችጘው ቘጨድ አስክዘነውዝመ ዲዝጝት ፊሰነውዝ ለወንትነይድ አትርዘቊ ገባኒዝ ጅልውዘ ትኩርት ፃቨነውዝመ ዲግዙ ፊልየድ ቲክነነው ተሚሰተ አቐነውድ ልብተነው ጥውሸኩ፡፡
ለወንትዝመ ቸለቸልሽን ይና ኻግርቱ ጋልፅሽተነ ጛይ፤ ነን ፅበው ኻግሩ አቕንትድ ለወንትዝ ማኽርኽርሸነውዝ፣ ድመድምሽተነውዝመ ኻስቨ ኻስቭሸነውዙ ዲዝጝትድ አትርዘነውዝ እርጋቕንዝመ ዚልቅትነይ ፅየው ዲጉ አየር ቲንፍሰናንስ ቸልሰው አቕንት ፋጥረነው ተሚሰኵ፡፡
አቐነዊዝም ላብጠቱ አርውሸትነይዝመ ዲግዙ እሴትድ ቃውሰነውዝ ይና ኻግርት ቺዘው ብልፅግነዙ ፈወነይዝጎ ከሰከሰናንስ እንቅ ዜገንድ አውግረው እኩሰ ፃቨነው ተሚሰኩ፡፡ ዲግዙ አየር ይና ኻግር አቒል ዚልቅትነይዝ ሲፍናንስ ይና እንቅም ልቕረ ፃቭነ ጥውሸኩ ዲግ አጥን፡፡
አመልማል ተድላ
ጥቅምት 15/2019
