አውማው እጅርድቅ ዲግዝ ቃውሰ ይውጠ ጡሸኩ ይጛንድ ወይ ኽምረ በሔረ እቅ ጭሰጭሰኒዝቍ ፅበጥ ኻስቭዝጙ።
ብላ ክልሊዙ ዲግድ ድርቘት ጭ ግሪኩ። ኽምዘድም ክልሊዝ ስሪል ችጝሸቍ እጝቅ ዞናኒልቅ ይሽትጠ ቸልሰው ደረጀዝ እስላጙ ችጝሸኩ። ውርም እንኳ ቺተቺተው ምላስን ፃየነውዝ ኽምዘ ፋጥረቍ ፅበነውድ ኻዲሻው አቕሽም ጝ አስጛዊዝ ቈሽ ክልልድ የውም ኢትዮጵየ ዲጊዝጐ ዋጥርዳንስ ሰራሸቍ ችብረጥዝመ አካላን ፅበነውድም አርቕሽተው የጝ።
ክልሊዙ ዲግዝ ማጥን አውቲስቅ ንየ ዲቈትነይ ፊስ ሰብተⶖ ፅበውድ ቈሽ ክልሊዙ ምኽር ጝንድ የጝ፡፡
ክልሊዝጘ ነን ፅበው ዲግዙ ድራቑትንዝ እክሰ ችጘናንስ ምኽር ጝንድ ቺተቺተቊ እቀ ኽብሪዙ አድለኒስ ፊሰፊስሽተው ዲግዙ ኻውነስል ችበችብሰዙ እን ችበችብሽተው ዲግዙ ካውንስል ኮሚቴድም 15 አቫለን ፃየው አቓንድ ካውንስልድም ሲን 2016ዝ ዲግ እጝቅዝቅ፤ እጝቅቅ ዲግዝ” የው ቃወተ ኻሰቭዝ ብላ ክልሊል አጋልደው ኽምዘድ ችብሰናንስ ቸልሰው እክሰዝ ጅሉዘ ቺተቺተቍ እቀ ኽቭርዝቍ ክፍላንጅቅ ባኽርዳር ኻትመይል ሊጘ ግርቅዝ ዊነው ጉቫኤ ፃጝዝኩ። 15 አቫላን ፃየው ዲግዙ ካውንስልድ መሰሪ ጒይጝ ሽሹደቊ ዊግንድ ጣይትንድ ችብሰነውዝ ዲጉ አቕንትዝ ማኽርኽርሸነውዝ ዚልቁነይ ፃየው ዲግ ተራንስ ሰራሽትጠ ጡሸጘድም ኻስቭዝጝኩጙ ።
ብላ ክልሊዙ ኽዝቭድ ላጥ ጝፅን ኢትዮጵይቍ ኽዝቫኒጅቅ አቕ ኻግረ ምጝግስት ኲነነውዝ ጋብዝ አጉረው ችጘር ፃየው አቐነውድ ውንሰው ዲግዙ ካውንስልድ “ነን ፅብነው አድለ ዚምኒዝ ማፅናየው ይናስ ይናስቱ ጣይትንል ጥውን ችጝሽናጙ አቓንስቅ እኔን ችግሰይስ ፈናንስ እንቅቅ ይና ችጘርድ ፍነ ጡሸኩ” የንድ ኻስቭዝኲ።
ወይ ኽምረ ብሔረ እቅ ጭሰጭሰኒስ ችጝሸቍ ቓለነየጥድ ብሔረ እቅ ጭሰጭሰኒል ፅበው ዲግድ አምንሰው አጠ ማጥን አውማው ሚሪሸውድቅ ጝችጘርድ ፍጠጘ ጋልፅጝኩጙ።
ክልልዙ እቀ ኽቭርድ ኽየው ችግሰዝ አጋልሽት ፅበነውድ ጋልፀውድ ውሸብለ አምባየ መኮነን “ዲግዙ ካውንስልድ አልሰው ጭጝንድ ከምሸ ጒየቊድ ኻይለን ምጝግስቲጅቅ አልተ አልተነውዝ ሽሹደኩን ይጘው እቀ ኽቭርድ ዲግዝ ፍ ጥዋንስ ሚቸው አቕንት ፋጥርጥጘ ጡሸኩ” የኲ፡፡ ክልሊል ኽምዘ ፅበነዊዝ እቀ ኽቭርድ አጉረው ፅብንዙ ኪብርንዝ አጋልሽተጘ ጒየው ውሸብለ አምባየ ኻግርቱ ሊግዝትድ እርውድጠ ጡሸውድ ዛኽለው ዲግ ፅባንድ አቐነውድ ዊግተኲ፡፡ “ጣይተን ቘይዛንድጚ አርዋንድ ቓሊነቅ አቓንስቅ ይናቕመስ ይናንድ ዲግዝ ጋቢል ችብርነ ጡሸኩ” የውኩ።
ሰቊጠ ኻትመዙ ፅበተዝመ ቓለ ነየተድ ክንሰተ ንዋይ ወርቁ ጝታ ጋቢዝ ምጝግስት ዲግዙ ጭጝን አልሰነዊዝ ፍ ከምሸጥድ አልስጘው ዋቕረድ ድምሰነውዝ እክሰዝ አስልሽጠ ጡሸው አቐጘ ጒጘኲ “ቺተዝም ኽምዘዝ ምላሰን አቐቊ ገባንድ ቃውስን ቺዘነውዝ እክሱነይዝ ማጥን ሰራሸጠ ጡሸኩ” የነውዝም ጝታ ቓለድ ነይጝኩጙ።
ወይ ኽምረትጘን አልተቊ እፍርትዙ ዋቕረንጥድ ዊሰ ችጝጛንስ ደግምግመዝ ኽዝቭዙ አቭላይተዝ አልትጘጘ ውንሰቊድ ክንሰተ ንዋይ “ምጝግስት ጒሸቍ ዋቕርጥድ ወሽ ዝም የነው ኻሰቪስ ፍ ቲግቭሩ ዊሰ ይወነውዝ ኽምዘዝመ ቃርዝ ምላሰን አቐቍ ገባንድ ጝታ ስሪስ ይስጠ ጡሸኩ ” ይጝኩጙ።
ዲግዙ ካውንስልዙ ኻሰብዝ ማጥን ላየድ ቓለነየውድ ዝቛለ ወረደ 06 ቀቨሌ ፅበተ ቄስ ምህረት በየነ ጝታ ጋቢዝ “ዲግጅቅ ቺተው እቀ ኽቭር እደረጅቅ ቺቱ የነት የጝ ” ይጘኲ፡፡ እምንት ፃየው አውማው እጅርድቅ ዲግዝ ማጥን ንቒስ ኻስቭጠ ጡሸው አቐጘም ዊግትጘኲ፡፡ “እደረ ይናት ስቑርትዝ ለውርዳንስ ይንም ይናስ ይናይ ስቚርት ፃቨፃቭሽትነ ጡሸኩ” የቍድ ቄስ ምህረት ኢትዮጵየ እቻቕር ቲርፍር ጭተጘ ፃቨው ፃጀ ፃይር ፅብራጙ እጅር ኹር ጝስመ ጝስ ክረክርሽተነው በንዛው አቐጘ ኻስቭዝጝኩጙ።
ክልልድ ዊነው ዲጊዝጐ ዋጥራንስ ክልሊዙ ኽዝቭድ ጒየቊ ዋቕርጥድ የነትም ቀርሸው ሲጘድ እርውዘነው፣ ኽገ መንግስትድ ቺዘቺዝሰነው፣ ድበርዝመ አውትነይቍ ዋቕረጥድ ዊሰ ችጝጥጘ ፃቨነውዝመ እክሱነይ ፃየው ኢኮኖሚዙ አሩሽንድ ደድሰነው ምጝግስት አምርስ ዪጝቀ እርውዝጠ ጡሸው ቲግቭር አቐነውድም ክልሊዙ ዲግዙ ካውንስልድ ኻስቭዝኩ።
ዚግቨተ ፡- ንጉሱ ማሩ
ሲን 30/2016 ዓ.ስ
