ጝጭልዙ አይር ሲጘ

ፃረቊዙ ዝቨይል ኽይጠ ጊዝዝ ዓልምሸን ቃውሽረው ርዕዮተ ዓልሚዝ እጝቅ ገበንድቅ ፃረቍዙ ንየትነይዝ ፃይሸቍ ተከቍ ዊንⶖ።

እኔን አቐነዊዝም አፍሪክቚድ ፃረቚዙ ዝቨይዝጐ ከርጝ ኽየው ገቨ ፃቨነውመ ቺዝጠ ጝታቕመት ዝቨይዝቅ በድ አቐነውዝ ከርጝ ተረቍ ፃረቊዝ(ፈረንጀኒዝ) ቅምሽጘቁ ዚምነን ዲቊጘጘ አርቕሽተኲ።

አነ ጚ ” ሳብጠው ቓልነ” ይሽታንትጘድቅ ክንደውዝመ ናፅነይ ተምዘው እግረ አፍሪካቱ ኹርድ ፋጥረው አብዮቲዝ ጝቕመት መቭትድ ኪብርዘነው፣ ጝቕመት ዝቨድ ጝቕመን አሩሸነዊስ ዲቍ ፃረቍድ አስልጘቍ ኽየቍ መድረከኒል ሲትፍሸነውዝ ፋይራየው ተከው ዊነው ፃረቁዙ ንየትነይዙ ኵነድ ፋዘፋዘነው ኪርምኩ።

ቺተዝም እኔን ጝጭልዙ አትርንድ አትሌቲክሲዝ፣ ልኰ ኳሲዝ፣ ቦክስዝመ ላጥ ስፖርትዝቍ ዚርፈኒል አጉር እትልኩ። ውርቅ እጝኳ ኽፅምስ ኪርም ነንትል አሽ ቃፅለው ፃረቚዙ ኽይነኩን የነውዝመ ጝጭልድ ሳስሽጝ ቓለውዙ ፅውዘድ ቃፅል ፅበው አቐጘን ቓሊሰቚ ገበን ፅብጝሽም ጝጭልድ ግን እርወ ጚ ፅጓይንም የው ኽነዝ “ፃረቍል መውርሸው ጥላ እጀው ዚረዙ ፅወዘድ” ጝታ ቸልትድ ቓሊሰነውዝ ቅርስጝ ፃየፃይሽጝኩጝ።

አበበ ቢቂላታግስመ ላጥ አፍሪከትቍ አትሌተኒዝ ጉልምደው አትሌቲክሲዙ ዝነድ፣ ድሮግባታግስ እብለወው ልኰ ኳስዙ ጂጘድ፣ ነንቆሽ ላዘ ስፖርትዙ ዚርፍዝ አፍሪከትቍዙ ንየትነይዝ ኻትሽኲ። ጘጝም ፈረንሳይት አቭኑዝንዝ ፃጝሽተው ቱር ዳ ፍራንስ ብስክሌትዙ ቲክርክረይዝ ጝእኹርሽኒዝ ኤርትራቱ አቐውድ ቢንያም ግርማይ ሃይሉ ንየትነይዝ ኻተነውዝ እን ቲክርክረይዝ ኪርመነ ጊዝዝ ቃውሰተ አቕ ኻተው ጝጭር አፍሪኩ አቐነው ቸልኩ።

ቢንያም ግርማይ እኹርሽ ሊግዘውድ ኤርትረ አስመራ አቓንድ ብስክሌተኘድ ኢንተር ማርሽ ብስክሌትዙ ጓነይዝ አቫል አቐጘም ድቍሽተኵ። እድወ እን ስፖርተኘድ እክልትድ ኻተናንስ 5 ሰት 26 ደቂቀዝመ 48 ሰከንድ ፊሰነውዝ ንየትነይዝ ኻታንድ እኒን ድሊሰንድ ዲዝጝሽየው አቐነዊዝ ዓልም አምነነው ቸልየው አቐነውድ ዊግሽነ አቕኲ።

እን ቲክርክረድ ቢንያም ንየትነይዝ ኻትሽም እጝኳ ቃውስ ይውሽተው ኻቐነውዙ ቃውሰ ግምትድ ማርክ ካቫንዴሻትስ ይውሽት ዊነጘ ዚግቭሽኲ። ቢንያም ግርማይት ቲክነነውዝም ኮሎምቢያትውድ ሞቪ ስታርቱ ብስክሌተኘድ ፈርናንዶ ጋቬራ ሊጘትረ ተግድ ፃይ ኻታንድ ቤልጄምትውድ አርናዎልድ ዲሊ ቈሽ ሻቘትረ ተግድ ፃይ ኻትኩ።

ቢንያም ግርማይ ጝአጝክርሰው ድሊስንድ ሚዝግቭሰት ግረ ይወው ቓለይዝም “እፈር ሲጝቀ ኪርም ብስክሌተኘ አቓንስ ኽየው ልቕረ ፃቭሽም ቱር ደ ፍራንስ ቲክርክረድ ኻጭር የነው ኻለይ ግን ፃቅ ዊኒቀርም፤ አቓንስቅም እቀጘ አጝክርጭኩን” የውኲ። እኒንም እጝቅ አፍሪከቍድቅ ጒሰጒስሰውዝመ ፊሊ አጠ ቸለው አቐጘ ዊግትኩ።

እድወ እኒን ድሊስንድ ቢንያም ግርማይትግስ ጭቑ አቒጝቀ እጝቅ አፍሪከትቍዙ አቐጘ ዓልም አምንድረው አቓንስቅ ተረዊዝም እን ስፖርትዙ ዚርፊዝ ይና ኻግር ኢትዮጵየት ቈሽጝ ላጥ አፍሪካትቍ ኻግረንድቅ ሰራሽጥጘ ጥውሸው ሰቭ አቐጘ አምንሽኲ። ቺተዝ ቈሽ ንቕፀቍ ውሽብልድ ሰቭዙ አገነ ብጝ፣ አቅልዝ ጣውርሸቍ አጘይ ይና ኻግርሸንስ፣ ዓልምት ኽዝቭድ ጣምየው ንቕፀው ኻበሸ ናን ጨቨቅ ፅበጘ ሚሪየድ ቓሊስኲ።

ዚግቨተ ፡- ገብረ ሕይወት አካሌ

ሲን 30/2016 ዓ.ስ