ኦሎምፒክዝመ ሜዳሊያዙ ሚዝረ

ፈረንጀኒዙ 1896 እዝ ግሪክትል ፃጝሽተነው ኪርምሸው ጊዚስ ኪርም ሲትፍሸጢዝመ ቲክርክረዙ ዓይንተንድ ፈራዛጙ ነንት ኰሪል አሽ ችጝኩ።

ንጭቱ ቲክርክረድ ፈረንሳይትወ አይነተ ኻትመ ፓሪስት አቭኑስነይዝ ፃጝሽተው 2024ቱ ዓልም አቅቩ ኦሎምፒክዙ ቲክርክረይል 2 ሽኽዝጎ አልተቊ ድመሽቁ፣ዚቨጥዝመ ላጥም አርቲስተን ሲትፍሽጘኩ።

128 እምት እድም ፃየው 33ትረ ኦሎምፒክዙ ቲክርክረ ፈረንሳይትወ አይነተ ኻትመ ፓሪስትል ኻምል 9-ንኻሽ 5/2016 ዓ/ስ አሽ አክኑሸኩ።

ፈረንሳይም ዊትርቅቲስ ቺተው አቕንትዝ 100 ጀልቨንዝ አትሌተን ጝታ ኻግርዙ ባንዲረድ አውልቭልቭዝጛጙ ዋልጠ ኪሎሜትር ዊዝቅሸቁ አጛንድ ኻግርሸንቱ ፕሬዝዳንት ኢማኑኤል ማክሮ ኦሎምፒክዙ ቲክርክረድ ኪርምሸነውድ ጋልፅጝኩጙ።

33ትረ ኦሎምፒክ 10 ሽኽዝ 5 ላዝ ንየ አትሌተን፣ 2 ሽኽ ብሔሩ ኦሎምፒክ ኮሚቴን፣ 20 ሽኽ ሚድየዙ ሙየ ጉይጥ፣ 45 ሽኽ ቀሰው ፃቨጥ ሲትፍሽጘኩ።

32 ስፖርትዝቁ ዓይንተንዝ፣ 35 ቲክርክረ አክንወነ ስፍል፣ 329 ቲክርክረዝቁ ቲግቭረን፣3 ላዝ 50 ሽኽ ሰት ጭቅተ ቴሌቪዥንዙ ትኒትን ፃቭሽተኩ።

አልም አቅቩ ኦሎምፒክ ኮሚቴ ፕሬዝዳንት ቶማስ ባክ አትሌተን ዓልምት ዲግዝ እፅወእፅወነውዙ ሥነ ስረትዙ አካል አጘጘ ጋልፅጝኩጙ።

ኢትዮጵየ ቶኪዮቱ ኦሎምፒክ ሜዳሊያ ሰንጠረዥል ጥወቁ   70 ኻግራኒዝ 55ትረ ደረጃ ፃይር አሰነውድ ልብሽተው የጝ።

ፓሪስቱ ኦሎምፒክስ ቈሽ  ቶክዮትዊዝ  ዲቈዉ ይና ኻግር ኢትዮጵየ ቺዘው ፈን ነሰች ይሽትም ኻይተሽኩ።

አልም አቅቨ ተግዝ ሜዳሊያዙ ደረጀዝ ቃውሰቁ ኻግራን፦ ጫረዝመ እየዙ ኦሎምፒክ ይሽት አድልሸው አልም አቅቩ ቲክርክረዝ አሜሪካ 3 ሽኽዝ1 ላዝ 5 ሜዳልያን አኽቨነውዝ አልምስ ቃውስረይ አራንድ፤ ጀርመን 1204፣ ፈረንሳይ 1039፣ ቻይና 899፣ ጣልያን 885፣ ሩሲያ 779፣ስዊድን 740፣ ካናዳ 690፣ኖርዌይ 585 ሚዝግቭሰነው ቸለቁ ኻግራን ጛይ።

አፍሪከስ ቈሽ 1-10 አሽ ሜዳሊያዙ ንቕፀድ ቓልናንድ፦ኬንያ 113፣ ደቡብ አፍሪካ 89፣ ኢትዮጵየ 58፣ ግብፅ 38፣ ናይጄሪያ 27፣ ሞሮኮ 24፣ አልጀሪያ 17፣ ቱኒዚያ 15፣ ኡጋንዳ 11 ዝመ ዙምባቡዌ 8 ሚዝግቭስጝኩጙ።

ታንዛኒያ፣ ሞዛምቢክ፣ ኒጀር ስመ አፍጋኒስታን ኦሎምፒክዙ ሲጘዝ ሊጘ ሊጘ ሜዳሊያ ሚዝግቭስጛንድ ኢራቅ ስመ ሱዳንስ ላው ሜዳሊያ ጉይጥ አቕጝ ሚዝግቭሰቁ ኻግራን ጛይ።

ኦሎምፒዲያ ኦርግ ስመ ዋሽንግተን ፖስት ፊሰጘው ሚዝረይዝ ሲሪየ ሜዳሊያ ችጝየቁ  ኻግራን

• አፍሪካስ፦ሪፐብሊክ ኮንጎ፤ ቻድ፤ ሶማሊያ፤ ደቡብ ሱዳን፤ ማዳጋስካር፤ ማሊ፤ ቡርኪና ፋሶ፤ ሩዋንዳ ስመ ማላዊ ጛይ።
• እስያስ፦ ባንግላዲሽ፤ ምንያማር ዊንም በርማ ስመ የመን
• አውሮፓስ፦ አልባኒያ፤ ቦስኒያ ስመ ሄርዘጎቪኒያ ጛይ።
• ላቲን አሜሪካት ኻግራኒስ ቈሽ ቦሊሺያ ጭቑ ሜዳሊያ ችጚረይም።

ሚዝረይዙ ፍልፍለድ፦ ኦሎምፒዲያ ኦርግ፣ ዋሽንግተን ፖስት  አል ዐይን ስመ ebc ቱ የጝ።

ኪሮስ ወ/ተንሳይ 

ኻምል 30/2016