ሻደይ ገረዱ ዲምቅሽኒስ ከስጘ ኢኮኖሚዙ ዚርፍድ ነቃዘው የጝ

ወይስመ ላስታ ሻደይ፣ ጽሌል አሸንዳ፣ ራያ ስመ ቆቦ ጅውንጢል ሶለል ይሽተኲ። ሰሜን ኢትዮጵየት አድለይል ኪብርሸው እቁንዙ በል የጝ። በሊዙ ኪርምሽንድ ኻይማኖቱ አቐጘ ኻይማኖትዝቁ አቅል ዊግትጘኲ። ሲጘድም ቅድስት ድንግል ማሪያምቱ እርገቲጅቅ ፃየፃይሽተው አቐጘ ጋልፅሽተኩ።

ሻደይ ወይ ኽምረ ብሔረ እቅ ጭሰጭሰኒል ኪብርሸነው ኪርመውድ አውን አቐጘ አርቕሽተው ገቨ እጀው አቕሽም ኽዝቩ በል አቕ ግነ ኹርዝ ኹር ከረከራጙ እን ጊዚል ችጝኩ።

በልድ ፌስቲቫል ሚልክዝ 2000 ዓ.ስቲስ ኪርም ኪብርሸነውድ ኢኮኖሚዙ ዚርፍድ ነቃዘነው ጋቢዝ ንየስ የው ችጘር ፃየው አቐነውድ ሳቁጠ ኻትመዙ ፅበጥ ጋልፅጝኩጙ።

“ሻደይ ችጘው ኰሪዝ ንቕፀቁ ውሸብሊዝ ሰቭዙ አገነ ብዘኩ፤ኒየረም ቀሰው ጥወር ችጘው ጊዝ የጝ” የቊድ ባኽሉ አልብ አስለነው ሰቭል ውላቐቊ አት ወለላ ገብሩ ጛይ።

ናነ ጥቨቭዝቁ ሰቭ ሰራሸናንስ  ምቀተ፣ ጣይሰተ፣ ሳቐተ፣ ጣልፈተ፣ መልጎምዝመ ላጥ ላብጠ ሲርሸቁ ገይፀ መይፀን አስለተይል አሽ ሙየ ጉይጥ ሲትፍሸቁ አቐነውድ የጝ አት ወለላ ጋልፅጘውድ።

ላው ቅምስ ፅቃ ሽኽ አሽ ፊሰው አቐነውድ ጉይሸው አቓንድ ፤ሰቪል ሲትፍሸቁ እጝቅ ጝታ ሰቪዝጘድቅ ችጘር ፃየቁ አቐነውድ ጋልፅሽትኲ።

“ኲቸ ሻደይትጘ አቓን ሰቭ በተ ዊናውም፤ ኻትመሸንት ሲርይቁ እፍርታንድም ኻትመ ጭሰጭሰንድ ንየቱ አካል ኻይንቀት እቻዘነው ቸልጠ ዊኑ” የው ቓለ ነየቁድ ቈሽ ታደሰ ሆቴልዙ ጭሰጭሰተ አቐቊ አት ጣሰው ረዳ ጛይ።

ሻደይ ችጘው ኮሪዝ ቃውስን ሳቁጠት ባኽሊዝመ እሴትድ ማፅንጠ ቸለው ቀሰው አስልሽት ፃቨቁ አቐነውድ ዳቕስጝ፤ አርጪስ ኪርም ሙየ ጉርየይል አሽ አርየዙ አርውሸትነይድ ቀለውዝ ቓልሽተው አየው አቐጘ አት ጣሰው ልብስጘኩ።

“ሻደይቱ በል ወይቱ ጅውነይል ኪነ ጥቨቭዙ ዚርፊል ሲትፍሸጥ አጥጘ ቸልሰው የጝ።  ውሸብል ጝታ ቸልትድ ኽዝቪል ፍጝ አልስጛንስ አገነ ችጚስኩ። እቀኽቭሪዝ ምፅነ ፃጀዙ ሊግዝትዝም ጝ አርወድ ኽየው የጝ” የውድ ሳቁጠ ባኽል ጓነዙ ዋርደተ ውሸብለ ወንድሙ ሞገስ የጝ።

“ሻደይ ገረዱ ዲምቅሽንድ አትርዘነዊስ ከስጘ ኢኮኖሚው አርወድ ንየስ የው የጝ” የቁድ ግርማ ነጋሽ ባሕር ዳር ዩኒቨርስቲዝ ኢኮኖሚክስዙ ክንሰተ ጛይ።

አልምትል አደቫቫይዝ ኪብርሸቁ በል እንቅ ቱሪዝምዙ ዊትረተ አቐነውድ ሚርየቁድ ክንሰተድ፤ እንዝ ቈሽ ጉዥትንዙ፣ ሆቴልዙ፣ ባኽልቁ ጎዘመዘንዙ አርየዙ ፍልውልወድ ንየስ የኩ።

ጅውነይዙ ፃጀድ አርቐ አርቒሰው፣ጥቨቭዙ ሊግዝትድ በርታዘው፣ ፃጀ ጉይጥ ጝታ ፃጀድ ኢንቨስት ፃቭጛንስ ቸልሰው አቐጘ ዳቕሰቁድ ክንሰተድ፤ እንቅ ፃቭሽታንድ ቈሽ ንቕፀቁ ዜገኒዝ  ሰቭዙ አገነ ፋጥረው አቐነውድ ጉይጝኩጙ።

ሻደይትጘ የቁ አደቫቫይዝቁ በልድ አስልሽጛንድ ቱሪስተንድ ዊትረናንስመ ጝታ ዊንተድ ሊጊስጛን ሲርይቁ እፍርተን እቻዘነው ደሚሰኩ።

እንዝጘም ቱሪስተኒስ ሚቸው አቕንት ፋጥረነው ግድ የጝ፤ አነጚ ወይትጘድ ንቕፀቁ ችግሰንጥ ፅበነውድ ቈሽ ዲቈዉዝ ንቕፀቁ ቱሪስተን ለወርዳይጘጘድ ፈተነ አቕኩ።

እክል ሰፍረይል አብን ፊጣቅ የነውድ እንዝሚቅትጘድ ኢኮኖሚዙ ጡወርድ ኪፍ የው አየው አቐጘም ጋልፅሽትኩ።

2000 ዓ.ስ ኪርም ሻደይቱ በልድ ምጝግስትዙ አስልንዝ ኪብርሻጙ ዊንኩ፤ አነጚ ኻግርሸንትል ፋጥርሸው ፃውተዙ ችግሰይዝ ቈሽ ጅውነይዙ እቀ ኽቭሪስ ቢዘ ላጥ አብን አቭኑሰነው ቸልሽየው አቐነውድ ጋልፅሽትኩ።

ኪሮስ ወ/ተንሳይ

ኻምል 30/2016