ላጢዝ ተከ አቐው ውሸብለ

ኢትዮጲቊ ልኰ ኳስ ቀነቁ እቀ ኽቭር አድላን ፃየቊስ ላይሸን ጚ፤ አነጚ ፈንድ ቓልሽታንድ ዝላቐቊ ይሽተቊስ ቃውሰዝ ቓልሽተች።

እንዝም ምላሰንዝ ጉይሸውድ ተግ ጨቨቅ ፅበቊ ሊገንዙ ቃወጥ እንዝጘም ምጝግስት ሊግዘጢዝ ትኩርት ይዋቅ የነውድ አቐጘ ጉይሸኲ።

ንጭቱ ይና ሚርየይዝ እን ፈተነይልም አቕ ምነነ ቀቫቅ የነውዝ አጉረቊ ሊገንል ስረንተነው ቸለው ውሸብለዙ ሲጘድ እጅጝዝ አንቭቭስነ ቀኑን።

ወይ ኽምረ ብሔረእቅ ጭሰጭሰን ዝቋለ ወረደል እኹርሽ ሊግዘውድ ልኰ ኳስዙ ዋርደተድ ዮናስ ንጉሴ ኢትዮጵየ ቡና ልኰ ኳስ ጓነይል ዲምቅሸነውዙ አገነ ችጝኲ። 18 እምቱ ሊግዘተ ጠቃዘተድ ዮናስ ንጉሴ ሃሌታ ሊግዘጥዙ አካዳሚል ሊጘ እምቱ ዊንተ ጻቨው አቓንድ ቓሊሰው ቸልትድ ቲክን ኢትዮጵየ መድን ልኰ ኳስ ጓነ ሊግዘጥዙ ጓነይል ስረንተነው ቸልኩ።

መድንስ ቓሊሰው ጥቨቪዝ አንክርሸው ኢትዮጵየቱ ሊግዘጥዙ ብሔሩ ጓነድ እስራኤልቱ ጝመቸይጅቅ ጻጝዘው ዋርደይል ሲልፍሸነው ቸልኲ።

ኮሪዝም ቓሊሰው ቸልትድ ቲክን CGTN ንስ የውም ላጥ ሚድየዝ ዊግሸነ አቐነዊል አሽ ችጝኲ።

ኢትዮጵየ መድንቱ ሊጘትረ ጓነይል ሲልፍሽ ሊግዘጥዙ ፕሪምየር ሊግዝ ዋርደነው ቸለውድ ዮናስ ንጉሤ ኢትዮጵየ ቡናቱ ሚልምለጢዙ ቓለይል ጥወነው ቸልኲ።

“ወይ ኽምረቱ ኽዝቭድ ጭጝሰነው ይምነነ የጝ” የውድ ዮናስ ንጉሤ እትለዝ ኢትዮጵየ ቡናቱ ሊጘትረ ጓነድ ስረንተነው ቸልኲ።

“ይምነነድ ኻግር ቢዘ ፈነውዝ ፕሮፌሽናል ልኰ ኳስ ዋርደተ አቐነው የጝ” የውድ ኳስዙ ጥቨቨኘድ ኽየው ደረጀይል ችጘነዉዝ ወይ ኽምረቱ ሊግዘጥዝ ጉግ ብዘነው ጝኒቪ አቐጘ ኽምጣጘ አስለ ክፍሊጅቅ ስልኪዝ ጻቨው ዊንተይዝ ጋልፅኲ።

“ኢትዮጵየ ቡና ኽየው ክለቭ የጝ። ኽየው ክለቪዝ ፊርመነዊዝ እምጥጝኲን “የውድ ዮናስ ንጉሤ ክለቪዝ ቸለዉድቅ ፃቨው አቐነውድ የጝ ጉየውድ። ሚስምርዙ ጠቃዘተድ ዮናስ ንጉሤ ሊጘ እምታንዝ ዊንዘው ፊርመ ፊርመው አቓንድ ተረው ሸወጪዝ ኢትዮጵየ ቡናቱ 23 እምቲዝ ሳ አቐው ጓነድ ደርግቭ ኪርመነዙ ዋርደድ ኢትዮጲየት ሊግዘጥዙ ፕሪምየር ሊግዝ ዋርደው አቐኲ። አስለ ክፍልድም ሊግዘተ ጠቃዘተይዝ ጭሩ ቲክርክረዙ ዚምን አቓንስ ምነንደኲ።

ኪሮስ ወ/ተንሳይ   ጥቁምት 30/2017