ዶናልድ ትራምፕ ሻቘን አሜሪካቱ ፕሬዚዳንት አቐናንስ ሚኩረ ፃቨነዊስ በውግ አሜሪካስ አርቕሽተውዝመ ጂጝሽተው ቢሊየነር፤ የውም ቴሌቭዥንዙ ምሽኹቲስ ድዛቍ አንክርሰቍ ፓለቲከኘ አቐነውድ ድቍሽተኩ።
(Make American great again) “አሜሪካት ዊስ ኺረይ ኻግርት ፃቨኩን” የው ኻሰቪዝ አርቕሽተቍድ ትራምፕ አውሮፓቱ እግዝግዝኒዝ 2016 ምርፀይዝጎ ተርጘውድ ሪፐብሊካን ፓርቲዙ ወግሽተተ አቐነውዝ የጝ ዊነውድ።
2016 ምርፀዙ ቅስቀሰይዝም ጝታ ግዘ ኻግር ሜክሲኮትቍ ዕፅ ጅልዉልዉዘቁድ አሜሪካስ ጎውት አቐነውድ ዳቕስጝ ሊጘ ኻግራንድ ቺዘው ኽየው ኲነ ሰራሸናንስ ኻለይ ፃየቍ አጘጘዝመ ሰቪዝ ፈው ጊንዝቭድም ሜክሲኮ ሺፍንተ ፃቭሰቍ አቐነውድ ቃል ጥውጝ የጝ ቲክርክርሽጘውድ::
ጝታ ቲክርክርሸጥድ ችጘው አጋሊዝቅ ምጀ ዲቭሰነውዝ አርቕሽተቊድ ዶናልድ ትራምፕ ሂላሪ ክሊንተንት ኻቕጝ አሜሪካቱ 45ትረ ፕሬዚዳንት አቐነው ቸልጝኩጙ።
2016- 2020 አሽ ሲዘ እምታንዝ ዚልቀው ጝታ ስልጣንዙ ዚምኒዝም አሜሪካት አየር ንቭርትዙ ልዉጠይስመ ኒግርንዝቊ ቲስመምንጢስ ፍተ ፃቭጝኩጙ።
ትራምፕ አሜሪካትቍ ፕሬዚዳንታንዙ ሲጘይዝ ስልጣንል ፅብጛጙ ኪስሽተነዊዝ ሻቘትረ ፃቨኩ። 2024 ምርፀዙ ቲክርክረ ኮሪዝ ኪስሽትጝ ቀተ ፃይረር ጘጝ ይሽትጝ ጊንዝቭዝ ቓፃሸነዊዝም አፍለቱ አሜሪካቱ ፕሬዝዳንት ፃቨኩ።
ጆ ባይደንታጅቅ ቲክርክርሽጝ ፃረው ጝነ ምጝግስቲስ ፈቍድ ትራምፕ ክታ ሊጊሰው ኒግርኒል ጥዉጥቍ ይሽትጝ ኻይሽተቍ አጝሽም፣ ሲዘ እምታንድ ኻይጝ 2024ቱ አሜሪካቱ ምርፀይል ” አሜሪካት ዊስ ኺረይት ፃቨኩን” የው ጝታ የነየንድ ፃይጝ ምርፀል አልትጝኩጙ።
አንክርሰው ገቨድ ትራምፕ 2024ዙ አሜሪካቱ ምርፀይል ሊጘትረ ጊዝዝ አሜሪካቱ ፕሬዚደንት አቐናንስ ቲክርክርሽጘውድ ሲዘ ቺተቺተቍ ክስዝቍ መዝገቫንዝ 91 ክስ አልት ፅባጙ አቐነውድ የጝ።
ምርፀዙ ቅስቀሰል ፅብጛጙ ቁወነውዙ ልክን ፃቭሽተቁድ ትራምፕ ዲሞክራታኒዝወ ወግሽተተ ካማላ ሀሪስን 223 ትራንፕ 279 ድመ ችጘነውዝ ፃረው ጝነ ምጝግስቲል ዋጥር ጥዉኩ።
ትራምፕት ኻቐተ ፃቨቁ ፓሊሲያኒስ ቈሽ ስድትኝጥዙ እግዘድ ይናግስ ንየ አቕ ይናኻግርሸንት እግዝግዝጛንስቅ ቃፅቨኩን የዊዝመ ዩክሬንስመ ሩስያስ ጥዉጘው ጣይትንድ ችብሰናንስም አርወኩን የቍ ፖሊሲያንድ ጛይ።
47ትረድ ዶናልድ ትራምፕ 19ትረ አድለ ዚምኒዝ ስልጣን ፃይጝ ግሮቨር ክሊቭላንድታት ቃፅልጝ ቲክንክነጥ አየቊ ኋይት ሀውስቱ ምርፀድ ኻቐነው ሲጘዝ ሊጘትረ ፕሬዝዳንት ጛይ።
ንጉሱ ማሩ ጥቁምት 30/2017
