ቃውሰተ ቦክሰኘ ማይክ ታይሰን

ማይክ ታይሰን መዝየ 30/1966ዓ/ስ ኒው ዮርክ ብራውንቪል ይሽተው ስፍረል እኹርሹ። ጝ ሊግዝኒዙ ሲጘድ  ስⶓነውዝመ እፅ ጅሉዘነው ሰቭል ውላቐው ወንጀለኘዝመ ሺወይልቅ ጋጥመው ዊነጘድ ድቁሽተኲ።

ማይክ ታይሰን ቃውሰተ ጊዝዝ አ.እ 1981 ኦሎምፒክ ጆ ኮርቴዝት ኻቐነውዝ ዊርቀዙ ሜዳሊየዙ ወነ አቐነውዝ ጝ ሲጘድ ላውጠነው ቸልኲ። ጝ እድምድ 20 እምት አቕሽም ሲጘዝ ቀለው ፅገውትዙ ሻምፒዮን አቐነው ቸሉ።

ማይክ ታይሰን 1986ዝ ትሬቮር ቤርቢክት ኻቕ ቃውሰተ ፅገወዉ ሚዘንዙ ወነም  አቐነው ቸልኩ፡፡ ላው ግልወዝመ ላይ እውነ ኹረትም ፃየው አቓንድ ጝውነጅቅ 2003 ዓ.ስ ዳቕርሽኲ። ኦሎምፒክ ቲክርክረይል 8ትረ ሴኮንድዝ ኻቐው ሪከርድድም አውንም አሽ ሚርሻው የጝ።

አሰነይዝም ዩቲዩበርነቲስ ቦክስዙ ቲክርክረዝጎ ጝ ጋፅድ ዊሰው ጃክ ፖል ማይክ ታይሰንት አጉረው ቺተንዝ ኻቐነው ቸልኲ። ታይሰንስመ ፖልት ማኽሊል 31 እምትዙ ቺተን እኲ።

ታይሰን 70 ሽኽ ቦክስዙ አጝክርሰጢዝ ማኽሊዝመ ኔትፍሊክስዝ ቲክንክነጥ ሚሊዮንዝ እጊተቊ ቓለጥ በዊል ቴክሳስ ፃጝሽተው ቲክርክረይዝ ፈራቐው ነቁጠዙ ቺተንዝ ቦክሲዙ ደፈይል ደፈ ማልኲ።

ታይሰን 58 እምት አቓንድ 19 እምታንዝ ሙየይዝ እክልድም ዊንኲ። 27 እምቱ ፖል ግነ ቦክስዙ ኪርመተ አቕሽም  ሰውጠ ጅልወኒዝ ታይሰንት ወቀቊ ፅገወቁ  ድቑልጢዝ ፈራቐው ቺተንዝ  ለጣኩ።

58 እምቱ ታይሰን ቲክርክረ ኰሪዝ እንዝ ሚቅቱ ሳልጥትድ እትልየው አቕንትዝ ዋርደድ አስኲ። ዋርደይዝ ቃውስ ጉለሸዙ ለምረምለርን ፃቭሽት ዊንሽም ፈኑ አቐነው ቸልየውም።

ሊጘ ፕሮፌሽናል ቦክሰኝጢዙ ዋርደይዝ አው ኻቐኲ የው ዋቕረይዝ ንቕፀቍ ሙየ ጉይጥ ታይሰን ኻቐኲ የነውዝ ጊምትጝኩጙ። አነጚ ፈኑ ግን ዊንየውም።

ጄክ ፖውል ነንትል አሽ  ፃቨቁ  10 ቲክርክረኒዝ ላዊዝ ጭቑ ወርሸው አቓንድ  ማይክ ታይሰን ቈሽ ፃቨቊ 56 ቲክርክረኒዝ 50 ኻቕኲ። እንዛግስም  44ድ ዝረረዝ የጝ ኻቐውድ።

ኽዳር 15/2017

ኪሮስ ወ/ተንሳይ