ሶማሊ ላንድ ጝር ዋልጠትረ ፕሬዝዳንት ማርፅች።

ናፀ ኻግር አቐነውድ አውጅረይሸን ሶማሊላንድ ፃቭረው ዋልጠትረ ፕሬዝዳንቱ ምርፀይዝ  ፕሬዚዳንት ሙሴ ቢሂ ታው ቲክርክርሸተድ  ዋዳኒ ይሽተው ፓርቲዙ ቃወተድ  አብዲራህማን ሞሐመድ አብዱላሂ (ኢሮ) ኻቕጙ።

ሶማሊላንድቱ በውገቱ ቢዘ ኻለይ ሚኒስቴርድ   አብዲራህማን ሞሐመድ አብዱላሂ ኻቐነውድ ኻግርሸንቱ ምርፀ ቦርዲዝ አራሰውዝ ጋልፅሽተውድ ዲቍስነው ኽደር 10/2017 ዓ.ስ ኻግርሸንቱ አይነተ ኻትመ ሃርጌሳትል ይውሽተው ጋዜጠዙ ጋልፀነይዝ የጝ።

ፈንድ አርቕሽተነውድ ቲክንም ንቕፀቍድ ጝታ እምጥጘድ ሃርጌሳትቍ ጒደንጢል ጋልፅሽተነውድ ቢቢሲ ስፍረይል ችጝሽ ዚግቭኩ።

“ሶማሊላንድቱ አንክርሰው ምርፀዙ ሲጘድ የውም ዲጉ ስልጣንዙ ከረከርንድ ቀጠነይዙ ቀሰው ተከ ” የነውዝም አሜሪካቱ  ኤምባሲድ ሚዘንዝኩ።

ፈኒዝም ሲርየ ማርፅሽተተ ፕሬዚዳንትድ አብዲራህማን 63.92 ላይስ ድመ ችጘነውዝ ኻቐተ አቓንድ፣ ኩልሚዬ ይሽተው ፓርቲድ ቃወቍ ኻግርሸንቱ ፕሬዚዳንት ሙሴ ቢሂ አብዲ 34.81 ላይስ ድመ ችጝጝኩጙ።

ላየ ወግሽተተ ፕሬዚዳንት ጀስቲስ ኤንድ ዴቨሎፕመንት ፓርቲዙ ደርግቭሸተድ ፋይሳል አሊ ዋራቤ 0.74 ላይስ ድመ ችጘቍ አቐነውድም ጋልፅሽትኩ።

12 እምተንዝ ኻግርሸንቱ ኽዝቭዝቍ ደርግቭሸጥ ምኽር ጝንድ ምጀ ሚቈ አቐነውዝ አግልግልጛጙ ችጝሸቍ ማርፅሽተተ ፕሬዝዳንትድ አብዲራህማን ሞሐመድ አብዱላሂ፣ ጝታ ኻግርት አልም አቅቨ አርቕሽትን ችጝራንስ ሰራሸቍ አቐነውድም ጊድ ጥውጝኩጙ።

ኻግርሸን እንዝ በውግ ሶማሊያቱ ምጝግስቲጅቅ ናፀ ኻግር አቐነውድ ሚሪሸውዝ ፃቭሽተቍ እሩድየቍ ዊግሽንጥድ ዋጥር ይጝ ቓለቍ አጘጘዝመ ሶማሊየጅቅ ጎይጝ ዊግሸነው በነቍ አቐነውድም የጝ ዊግትጘውድ።

ፈንድ አርቕሽተነውድ ቲክንም ሶማሊያ ችጝሸው አሜሪካቱ ኤምባሲድ  ሶማሊላንድስመ ማርፅሽተተ ፕሬዝዳንቲዝ ወዝ እምጥጝርነቱ እፃ ጝታ ኤክስዙ ጋፂዝ ሲፍርዝጝኩጙ።

ሚዝረድ BBC News ችጝሸው የጝ።

ንጉሱ ማሩ

ኽዳር 15/2017