ወይ ኽምረ ብሔረ እቅ ጭሰጭሰኒል ኻዘዙ ፃጀይል በንሽተውድ ቑጠ ጊቭርሽታየጘ ሲርይቁ እፍርታን ኲንጫቅ የነውድ የጝ ይሽቱ

ወይ ኽምረ ብሔረ እቅ ጭሰጭሰን ታዝቱ እጅር ሰራሸተ ሃይድሮ  ኤሌክትሪክዙ ክትረይዝ ፋጥርሸው ኪዚል ፅበው ኻዘዙ ፃጀድ አሩሸነውዝ እቀ ኽቭርድ ጝ ኹረዙ ወይትነይድ ደድሳየጘድ ሲርይቁ እፍርታንዙ ችግሰድ ፊትናጙ አቐጘ ጋልፅሽቱ።

ታዝቱ እጅር ሰራሸተ ኪዝድ ወይቱ ምፅነ ፃጀዙ ፍልፍለኒስ ላውድ የጝ የነን እብለውዘነ አቓውም፤ ምላሰንድም ታዝት ኪዝድ ዓምረዝ 10 ሽኽ ቶን ኻዘ ጊቭርዘነው ቸለው የጝ። እንም የነት 10 ሚሊዮን ኪሎ ኻዘ ዓምረይዝ ጊቭርዘነው ቸልሸኩ የነት የጝ።

እኔንም ነን ፅበው ወየይዝ ቁርሺዝጎ ላውጥሻንድ 2 ነቁጠ 5 ቢሊዮን ቁርሽዙ ወየ ፊሰኩ የነት የጝ። ታዝቱ እጅር ሰራሸተ ኪዚዙ 80 ናን አቑድ ስሀለ፣ ዝቛለ ስመ አበርገሌ ወረደይል ችጝሸው አቐነውድ ወይስ ኻዘዙ መድ አቕኩ።

ታዝቱ ኪዝድ 18ዝ ንየ ኻዘዙ ዚረ ፃየው አቐጘ አምንሸኩ። አጝክርሰውድ ቈሽ 35 ኪሎይል አሽ ዝቀወው ኻዘ ፃየው ኪዝ አቐነውድ የጝ።

ሰሃላ ሰየምት ወረደ መሸሀ ኻትመይል ኻዘዙ ስየ እፍርትል ውላቕ 20 ፍሪጀኒል አሽ ስየ እቑርነ ፃየው አቐጘዝመ ፈኑ አቐጘ ጋልፀው ውሸብለ ካባው ቲክነው ኻሰቭድ አድልኩ፡፡

“ይነ ጅውነይዙ ውሸብሊዙ ሩሄድ ላውጡ የር አምነኩን” ውሸብለ ካባው 20ዝ ንየ ኻዘዙ ሲየ ቓፅቒሰነ ፍሪጅ ዝመ መኪነዝ ጅቭጘውድ ኻዘ ቅየነውዙ ሰቪል ውላቕጘት ግረ አቐነውድ ጉይጝኩጙ።

ነንም አሽ ጉጉዙ፣ ሽከዙ ችግሰድ እኪረውዝነ እንዝ ንየ ሰራጭ ላውጥሽጭር የው እምንት ፃየቁ አቐነውድ ጋልፅጝኩጙ።

በውግድ ፍሪጀንድ ኻዘዙ ሲየዝ እቻቕጘጙ ዊንጙ የቁድ ኒየረ ካባው፣ ነን መኪን ጒደነዙ ችግሰ ፅበነዊዝ ምላሰን ኻዘ ፃውረቊስ ጅቭን ነሰነውድ ፈተነ አቕኩ ይጝኩጙ።

ላዘ ጋብዝ ታዝ ኪዚል “ሰላም” ይሽተው ኻዘ ፃውረጥ ገረደዙ  አቫል አቕጝ ኻዘ ፃውርጛጙ ችጝሸቍስ ላውድ ውሸብለ ጣፋጭ ቢረሳው የጝ። ኪዝድ ቺተቺተው ኻዘዙ አይንተን ፃየው አቐነውድ ጉይኲ። “ይናይ ነኳን አሽ 4 አይነት ኻዘ ፃውርንኩኑን” የውድ ውሸቭለ ጣፋጭ ሰላም ገረደድ 2 ላዝ 65 አቫለን ፃየው አቐጘ ጋልፅ፤ ንቕፀቁድ ላውጥሽጛጙ አቐነውድም ጋልፅኲ።

ውሸብለድ “ግርየይዝ 10ይስ 50 ኪሎ አሽ ኻዘ ችጝነኩን፤ነን ፅበው መኪን ጒደነዙ ችግሰድ ኻዘዙ ኒግርኒል ነሰው ቘጨድ አጉረው የጝ የውኲ።

“ይናይ ኻዘድ ፃውርነት ግረ ጒደነዙ ችግሰ ፅባንስቅ ጅቨው ብነኩን፤ ጅቨው ችጝሸንድም ዘትለው ወየዝ ቂነኩን” ያንድ ጝ ቓለድ አድል ምጝግስት ትኩርትዝ ሰራሻን አሩሸትነይድ ሊግዝጠ ዊኑ የውኲ።

ሰሀለ ሰየምት ወረደ እንሰስዝመ ኻዘ ፃጀ ጭጝሸተ ፅ/ጝንዙ ዲቈተ አት ደጀን መሰለ 2010 ዓ.ስዝ ኪዚዝ ጣቂል ተሲተው ኻዘ ዊንዘነ ሼድድ (ጝን) አግልግለ ይወጙ አየውም ይጝኩጙ።

ምላሰንድ ጋልፅጘውድ ቈሽ ኻዘድ ዊርቨይስ ሼዲል አሽ ፃንን ፊሰነንስ ቸልሰው መኪን ጒደነ ተሲትየው አቐነውድ የውም ሼድድ ኤሌክትሪክ ዝመ አቑዙ አልስን እጀው አቐነውድ የጝ ይጝኩጙ።

ዲቈተድ”አቐውድቅ አቕ ግን ይነ ቸልነዊዝቅ እን ዓምረይዝ 1 ሽኽ ቶን ኻዘ ጊቭርዘነንስ ኻለይ ፃይን ሰራሽነጙ የጝ” ይጝኩጙ።

እንዝ ጅልውዘ አስለ ክፍሊጅቅ ዊንተ ፃቨቁድ ብሄረእቅ ጭሰጭሰኒዙ አይነተ ጭሰጭሰተ አት ሀይሉ ግርማይ “ኻዘዙ ፃጀይል ውላቕጝ መኪነ ጅቨቁ፣ ጝን ተሰቁ፣ ጝተ ቅምዙ ፃጀድ ሊጊሰቁ ዜገን እኩጙ፤ ችዘው ፃጀ ፃጉዘቁ ዜገን ቓልነጙ የጝ፤ ኻዘ ፃውረነንስ በን ፃየቁ ዜገኒዙ እግዘድም ቈሸጙ ተርኩ” የነውዝ ወይቱ ኻዘዙ ፃጀይዝ ማጥን ዊግትጘኩ።

80 ላይስ አቐው ክትረይዙ አቑ ችጝሸነድ ወይ ኽምረ ብሔረ እቅ ጭሰጭሰኒል አቐነውድ አርቕሽተው አቓንድ ኪዚል ችጝሸቊ 8 ኻዘዝቊ አይንተኒስ 4 ጭቑ ጊቭርሽተቊ አቐነውድ ብሔረ እቅ ጭሰጭሰኒዙ አይነተ ጭሰጭሰተድ ጋልፅጝኩጙ።

ሰሜንቱ ጣይትኒስ በውገ አምረዝ ፅቃ ሽኽ ቶን ጊቭርሽተው ዊነጘ ጉየቊድ ጭሰጭሰተድ ኽግዝ ቢዘትቊ ፃውረጥድ ቈሺንቀት 4 ሽኽዝ 5 ላ ቶን ኻዘ ጊቭርሽታጙ ዊነጘም ጉይጝኩጙ።

ሰሜንቱ ጣይትኒስ እግርገ 2016 ዓ/ስዝ  7ላዝ 50 ቶን ዊንም 7 ነቁጠ 5 ላይስ ጭቑ ጊቭርሸተነውድም ንቕፀው ቢተ ፅበነውድ ቓሊሰው የጝ ይጝኩጙ።

እንዝም ጅውነድ ሊግዘው ኰርዝ ጣይትንዝ ዲቁሰነዊዝመ ነንትል አሽ ፃውተዙ ችግሰ ፅበነው፣ ጉግዝመ ኤሌክትሪክዙ እጅጝት ቢተዝ ዊንም ሰቪዝ ፅጋ ጛይ ይጝኩጙ።

ስሀላ፣ ዝቛለስመ አቨርገሌትል ኻዘ ጥቅለነ ሼድ ክልሊዙ ምጝግስቲዝ ኲንሸነውድ ጉየቊድ ጭሰጭሰተድ ኢሌክትሪክዝመ ጉግዝቍ  እፍርት ተሲትየቍ አቐነውድም ደድስጝኩጙ።

ላዘ ጋቢዝ ቈሽ ኻዘዙ ጊቭርትድ ማኽሉ አርየል አልሰናንስ ክልሊዙ ምጝግስትዝ ጅቭሸቊ ፍሪጅዝቁ መኪንጥድ ጣይትኒዝ ኰር  ዝቛለት ዊስመ አቨርገሌቱድ ፊስሽተቊ አቐነውድ ጝተ ጋልፀነይዝ ጉይጝኩጙ።

ታዝት ኮሪደር እፍርቲዝ ንቕፀቊድ አሩሽጛጙ አጘጘ ዳቕሰቁድ ጭሰጭሰተድ ጅውነይዙ እቀ ኽቭርድ ኻዘዙ ጊቭርትድ ኾነውዙ ዲዝጝትድ ሊጊሰነው፣ ኻዘዙ እፍርቲል ውላቐናንስ እንቅም ደምዝት ቓሊሰነዊዝመ አርየዙ እፅቁ እፅቈን ፋጥረነውድ ቀሰው ጋብዝ ቓልሽተቁ  አጘጘ ጋልፅጝኩጙ።

ፃይሸው በጀት አምረይዝ ታዝ ድወቁ ጉገንድ መሽሀስ-ታዝ፣ ኒየራቑስ -ታዝ አሽ 21 ኪ.ሜትር ሰቭ ኪርምሸቊ አጛንድ፤ ዝቛለስ-ታዝ 27 ኪ.ሜትር ሰቭ ኪርምሽየው ግን ኻለይዝ ፃይሸው የጝ ይጝኩጙ።

ጣይትኒዝ ፊረቁ መኪንጥድም ቲክየናንስ ክልሊዙ ምጝግስትድ ፃጀ ደምዝምዛጙ አቐጘም አት ኃይሉ ጉይጝኩጙ።

ኪሮስ ወ/ተንሳይ

ለካቲት 15/2017