ጣይትኒዝጎ ፊሰቊ ጒደንጥድ እንቅ ዳብሽትጝነ!

ላው ጣይትኒስ ላዬይዝጎ ፃቭሽተው ውጠድ ቃዝየውዝ ችብሰነው ቸልሽየው አቐነውድ ነንም አቕሽ ኢትዮጵየት ዝቨይል ኻደገ እትላጙ የጝ፡፡ እኒስ ሚቅ ፅልየ ክልሊል ኪርምሽ ብላ ክልሊልም ቃፅል ንቕፀው እጅርዝመ ጥፍትዝ ድሰው ጣይትንድ ፕሪቶሪያቱ ቲስመምኒዝ ምላሰን አሰነ ችጘው ምነነ አጠ ቸለው አንፃሩ ዲግ ተርሽም ነን ቆሽ ፅልየ ክልሊል ፅበቊ ቃወጥዝ ምላሰን ደግመዝ ብር ቅብሰው ጣይትን ፃቨናንስ ሳዝመ ንየዝ የነው ኪርምሽኩ፡፡ ሰሜን ኢትዮጵየት ድሰው ጣይትንድ ፕሪቶሪያቱ ቲሰመምንዝ ችብረነ ችጝ ዚልቀው ዲግ ነስጥጘ ቸለቊ ሰበንድ እግርትጝኩጙ ጂዝትጝ ጥውሸው ሰቭ ሰራሽቲንቀስ እዳቐነዊዝ ምላሰን ፅልዬ ክልልም አቑ ብላ ክልሊል ቺተዝም ወይ ኽምረት ደግመዝ ቖይዝጠ ቸለው ቲግቭር እትላጙ የጝ፡፡ አርቕሽተዊዝጘድ ቃውስ ያንድ ጣይትኒዝ ምላሰን ላ ሽኽዝ እጊተቊ ዊግነን አቢትጝኩጙ፡፡ ሚልዮንዝ እጊተቊድ ቈሽ ግድርዝመ ፊንቅልሽንዝ አጋልሽትጝኩጙ፡፡ ንቕፀው ሽኽዝ እጊተቊድም አካልዙ ቖጨል ሊቭጝኩጙ፡፡ ዲፍርሸቊዝመ ስነ እዘኑ ሊቭልንዝ አጋልሽተቊድ ጝታ እግዘድ ቀለው አየውም፡፡ ነንም ችግሰል አቕጝ ከቨው እጅር ተምዘቊ እቅዙ እግዘድ ንቕፀቊ ጛይ፡፡ ኽዝቭድ ማኽል ፃቭየው፣ ኽዝቭዙ ሹጙዝ ኒግርሸው ፖለቲከዙ ቁማርድ ችብርጠ ጥውሸኩ፡፡ ኹረ፣ ጥላ፣ ዲግዝመ ፈውን ሰራሸነው ተምዘው እጅርዝ ቦምብዙ ፅፅረ ማለናንስ ፍርግርገነው ተሚሰው ቲግቭር አየውም፡፡ ቺተቺተቊ ብላ ክልልዝቊ ጅውንጢል ዲዝጝሻጙ ተረው ቅውንዝመ እጅር ፅይን ቁርሻን ለምረነውዙ ቲግቭርድ ችብርጠ ጡሸኩ፡፡ ነንት ሰቲዝ ጣይትንዙ ዋለ አቐቊ ጅውንጢስ ቈሸዝ እንቅ ኢትዮጵየቱ ጅውንጢል ችጝሸቊ ዊግነንድ ዲግዝ ፍን ጥወነው በንጘት ጭጝ ግሪይጝኩጙ፡፡ ዲግዙ ብሽትንዝ ምላሰን ሩሔል ችጘው ቖጨይስ ቈሸዝ ፅብንዙ ኪብርንዝ ምላሰን ሚልዮነኒዙ ሩሔድ ችግርዘው ተግል የጝ ችጝሸውድ፡፡ እኒስ ዲቊ ኢትዮጵየ ላየ ጣይትንዙ ጅልወል ጥውረይ አረውዜ ጝር ኽዝቨንድ ጥማል ጥወቊዝመ ፅበናንስ ቺግርዘው ተግል ማለው አቐነውድ እዳቓውም፡፡ ኢትዮጵየት ላው ችግሰይስ ላዬ ችግሰይዝጎ ትክቨቊ ኻደገ ፃየቊ ገበንድ እክሰናንስ እማንትዝ ሰራሸነውዝመ ልውጠዝ ልቕርደነው ተሚሰው ቲግቭር አጠ ጥውሸኩ፡፡ ጣቅል ችጝሸቊ የነትም ሱዳን፣ ሊቭየዝመ የመን እኒዝጘም ሶሪየት ተከቊ ኻግረንድ አቒቱ ችግሰዝ ምላሰን ፋይርጛንድ ቓልንኩኑን፡፡ ይንም ኻግሪዝጘ ችግሰል ማልጥጘ ቸለቊ ችግሰንድ ውር ጛይ ይን ቓለነውዝ እክሰ ነስጠ ቸለው ጒደነዝ ጅልውዘ ምኽርኽረ ፃቨነው ተሚሰኩ:: ወይ ኽምረ ብሔረ እቅ ጭሰጭሰንድ ውርም ኰ ኢትዮጵየቱ ለወንትነይዝም አቑ ዲግ ተራንስ ጝ እኩሰድ ፃቨው ኽዝቭ አቕሽም ሰሜንቱ ጣይትኒዝ ምላሰን እቀጘዝ ቖይሸው ጅውነ የጝ፡፡ እን ጣይትንድም አቑ ጅውነይል ፍልውልወናንስ ተምዝት ፅየቊ ከምሸጥድ ኽውከ ፋጥራይጘጘ ክንድሸው ዲግ ኻይሰነዙ መለድ አርውሸነው ተሚሰኵ፡፡ እኒስ ቈሸዝም ገጫሽን ፋጥርሻንድ አይነተ ቖይሸተ ጅውነ አቐነዊዝ ምላሰን እንጎይስም ፃቭሽተው ፍልውልወድ ነቃቕን ኻየነውዝ አጋልዝጠ ቸለው ፅገወው ቈጨድ ቃፅቨናንስ አስልሸነው ጡሸኲ፡፡ ጣይትኒዝጎ ፊሰቊ ጒደንጥድ ችብሰነውዝ ጝ እኩሰድ ፃቭጠ ጥውሸኩ፡፡ እንጎይስም ፃብሽተው ፍልውልወድ ነቃቕን ኻየነውዝ አጋልዝጠ ቸለው ፅጋወው ቈጨድ ቃፅቨናንስ አስልሸነው ጡሸኩ፡፡

ወንድሙ ቸኮለ

መጋቪት 15-2017