ሼውስታያሱ አብት

ንግስቴ ተስፋ

እንሴስካው አብት ልማትስ ኬሽኹሳ ትክሞ አግፃንኩ አሌምኩ አጌርካዴስ ብራዚል፣ አውስትራሊያስታ ኔዘርላንድ ቢዲሪዳ ቶኬምስታና::

ይቶፒያኪላ እሊኩ አሌምኩ አጌርካታ እሳን ብቲስታ ኬፍቲኒ ክምካው ቼፍ ዝኩት አጌራኽ:: ይቶፒያ ጄንጅኩ ክምካው አብትስ አፍሪካዴስ አቾ ብቴ እምቲ::

እሼ ባርኾቼሾ እንፃኽጝስ /ኤክስፖርታ/ ፄውጝስ አግፄው ሚፂ ኩፅኒ 100 ሚሊዮን ዶላርዴስ ኽሳቲው አኽⶓ አሌሙ ባንክ ፍሽኹ ንቫር ቶኬሜ:: እንሳ ዜሬቕቲኔ ፊፂምጜ ኬሽጝፅጝሰ  ዴሜካ ክምካው አብትዳ ትኩት እይስታማ እንፃኽስስታማጊ አግስቴ::

አጌር አቕ ጛርትስኪ ያኻ አችትጜካማ ክምካዋ ሌፍፅጙስታ እሩብፅጙ እንፅኺዳ አሴሜርጜካማ ዜርፍዳ ዋይሜ ሜዜጌብፅካማጊ አግስታና::

ዎታት አዲሱ ሞላ አዩ ጉዋጉሲ ወረዳ ሶስቱ ሰኞ ኬቤሊው ዝኩዋንቲያኽ:: ክምካስ አሜቻውሳ አይር እግልታሳስታ ዙራሙሪዳ ዝኩኽሳ እይስቴ ቴኬምስትጝስ ላጛ ውፋናዋ ጄውጝስ ቤራዋ ሌፍፅጙ እንፅኺሾ ቱⶓ  እንክርፃ::

ሱኺቲ አሜታዴስ ቤዴራ  ብሮ ጉሽታማ ውፋናዋኪላ ጄዋ:: ወክትስ ኬሴሬይ ኻሲ ናው ጅፍንት እሺⶓኪላ ጉሻ:: ያኼስጉ ውማይቴኑሳ ኩስጜስታ ቱስቴ እንክብካቤ ቴግባርዳ እሽፅጝስ 90 ጌርካ ዋኻኒ ኩፅኒ ሌፍፁክሳ ቤራዋ ዋይጝስ ጉሼ ዙርፃማ ፍንሾስ እንፅኺስ ያኻውሳ ፊቴ ብሮ አግፅⶓ ጉሻ::

ዎታት አዲሱ ናውስታጊ እንፅኼ ናካውላስታ ጎሌላውላ እክድስስታ ኩርፄንትስ እንፃኽስትጝ ኬሽኹ አችሾ ካይጝፃው አኽⶓ ዲብሳ:: ልቡስ ልቦ ክምካውሳ ቼፎ ዴሜክጝስ ሌፍፅጙ እንፅኺዳ ይስጛማ ሲፍⶓ ዙማ:: ሹኻ አሜታዴስ ቤዴራ ሶኼታዴስ 12 ኺስታ ውፋናዋስታ ቤራዋ ሌፍፅጝስ ሹኻ አርፋ ቺፋ ጌቤልስ ዲግስጝስ ጚጛርትጛሳ ይኮኖሚስ ኽሳማጊ እጄ:: ጊዝዴስ ጊዞ ዴሜካማጊ ይንቱኽ ክምካውስታ  /ክምካው ኬሌብ/ ኬቤርጝ ኩፅኒ እንፃኽስትጝስ ፅንጋኻ አኽⶓ ታክሳ:: ክምካው ሌፍፂ ጝንኪላ ፄቤብⶓ ቶኬማማ ዜርፎ ኪስጝስኪላ ወሴንⶓ ጉሻ::

ናኪኒ ወክትዳኪላ 70ዴስ ጃላ ታይካዋስታ ሹኻ ቤራዋ ሌፍፃማጊ አግስታው አኽⶓ ዎታት አዲሱ ዲብሳ:: ቤዴራ እሺኹ እንፅኺዴስ ኪቻ ታይካዋ ቡዚስⶓ ሌፍፅⶓ ኪላ ልቓ ብቲዳስታ ካፒታልስ ኬሻንቴ ሚፄ አግፅጝስ ካሊፅⶓ እንክርፃ:: እንጚስኪላ ታይካዋ 90 ጌርካስ እንክብካቤስታ ክትባቴ አግፃንታ ፄውጝስ ትክላሊስ አንኩዋ ታፋዴስ ጃላ ፊቴ አግፅጝስ ካሊⶓ ቶኬማ::

አሴሜርጙኽ እንፅኺስኪላ ዴስቲኒስታ ዋይሚስቲ አኽⶓ ጉሻ:: “ዝቤኑ ዎታት ሴያ ግዴኻሳማ አስፓልት ዳሪዳ፣ ፑል ጝናዳስታ ማቤራዊ ሚዲያዳ ጊዞ ፌይፅጝ ጚጛርትጛሳ ይጉዋማ ቤዴሌ ጉዴ ናታ አምኔ” ናው ዎታት አዲሱ እንፃኽስትጝ ኩሪፄ ጃጊታ ናኪፃቲው አኽጝስ አቒ አክምታጊ እንፃኽስትጝ ማንዲስታው አኽⶓ ዲብሳ:: ሚንችካ ወታታካስ ጚውሳ እንፅኺውሳ ዴሶስታ አግፃውሳ ሚፄ ጉሽፃ ፄውጝስ እንፅኼ ኩርፄንትስ እንፃኽስታንታ ኩስጝፃው አኽⶓ ቶኬማ::

ልቓ ጌንዜብስ ክምካዋ ሌፍፅⶓ ጉሽፃ ፄውኽ አዲሱ ናካዳ ሚሊዮንስ ቼፍስታው ካፒታልሾ እንዝጜ ፄዋማጊያኽ:: ሶኼት ቺፋ 30ዴስ 40ኺስታ ሌፉንኩ ታይካዋ ጌቤልስ ዲግሳማጊ ሚፄ አግፅጝስ ኪሲው ዳድዳ አግስቴ::

ዎታት አዲሱ ክምካዋስታ ታይካዋ ሌፍፅጙ እንፅኺስ ይስጛ ሲፋማ እሊኩስጊ እንፅኺውሳ ድሎ ፌቴርጝስ ፄዋው እንዝጚዳ ኩፅኒ እንፃኽፂ ብቲው ችግር ዝኩⶓ ዲብሳ:: እሳንፃማ ዜርፎ ሌጌፅጝስ ካላው እንፃኽፂ ብቲ እይስታታኪላ ካሴ ዲግሳማጊ አኽⶓ ጉሻ::

ዎታት አባይነህ አለም ዎታት አዲሱ እንፅኺው አፄቢያኽ:: “እንፅኺስኪ ያኻ ፅኹርስ ጋሽስትኹ፣ እንፅኼ ጃጊታ ቦልቴስታ ዳዴኾ ፄየፍስታው ዎታት አዲሱው  አፄባ አኽጝ አዴልሰትⶓ ካሲ” ንኹ ዎታት አባይነህ እንጚስኪላ እንፅኼ ጄሜራታ አዲሱ ዴስስታ እንፅኺው ይሴንት ጉሽፃ ያኻይኹ አኽⶓ ዙማ::

እንዳራ እንፃኽስቴስይ ናማ ወሴንጝስስታ እንፅኺሾ ቱጝስ ቼጌርስታሺኹ ዎታት አባይነህ እንፅኺውሳ ሴሎስታ ጉሽፄ ዳዶ ካንፅፅጝስ ዎታት አዲሱ ታምቦ ፊትጛ:: ናካዳ ወታት አባይነህ ኪላ ታይካዋስታ ቤራዋ ሌፍፃማ ጌቤልስ ዲግስጙ እንፅኺዳ አሴሜርጛማ ቴኬምስታንታ ያኻ::

ሊኻ ሹኻፅካዴስ ጃላ ታይካዋ ቡዚሳማጊ አግስታው አኽⶓ እንክርፃ:: አቒ እርዳትጛማጊ እንፃኽስታኒ እንሴስካው አብትስ ኽስኹስ ቴኬምስታንታ አኽጝስ ካላው ዜርፍ አኽⶓ ዎታት አባይነህ ዲብሳ::

ውማይቲኒውሳ ኩስጜስታ ዝቤናዌ እንፃኽስትጜ ሲፍጝዳኪላ አፄብ አዲሱ ሊሊቲ ዴስ ዝኩኽ አኽⶓ ቶኬማ:: ጊዝስስስታ እክድስ እንፃኽስታው አኽጝስ እንዴስ ኽስኹስ ኬፍናማ ካንትስታታ ዎታት አዲሱስ ክርፄ ትምኔቶ እንጉስታ::

ሶስቱ ሰኞ ኬቤሊው እንሴስካ አብት ልማቱ ውማይቲኒ ይግዛው ብርሃኑ አሬሳቻንትካ ግብርኒው እንፅኺዴስ ኬምፕስ ኬምፖ እንቲታኪ ዎታትካ አችትጜካማ እንሴስካዋ ሌፍፅጙስታ እሩብፅጙ እንፅኺዳ ዋይሚስታ ያኻንታ ሶኼትዴስ ላጚኒ ውማዩሳ ድጋፎ አግፃንታ ፄውስታማጊ አኽⶓ ጉሽካ:: እንጚስኪላ ኬቤሊታ 150 ዎታትካስታ አሬሳቻንትካ ክምካዋ ሌፍፅጙ እንፅኺዳ አሴሜርጜካማ ኪሴ ሜዜጌብፅⶓ ጉሽካ::

ክምካውሳ ዜሮ ኬሽጝፅጝስ ኬሽኹሳ ሚፄ አግፅጝስ ካላንታ ፄውስቱኽ ቴግባርስኪላ 20ዴስ ጃላ አሬሳቻንትካ እንፅኺዳ አሴሜርጝጙ ቶኬምካ:: ክምካዋ ሌፍፅጙ እንፅኺዳ አሴማርጙንኩ ኬሌቡ ክብርናቲሊ እምትጛማ ጉሻኑሳ ክሬቴኪላ ኽይጝስ ክዩሳ ዜሮስታ ዙራሙሪዳ አግፃኑሳ ሹምቢውሳ፣ ዳጉፂውሳስታ እሉውሳጊ ጊሊቤ አሉምሊ ክችክቺ ፃንኩትስ እንኩሬካማ ሜቴቴንጝፄካማጊ ኬሌባንታ ውማዩሳ ድጋፎ እይካማጊ አኽⶓ አቶ ይግዛው ጌሌፅካ::

አቶ ይግዛው ጊሊፂታጊ ኬቤሊታ ክምካዋስታ ታይካዋ ሌፍፅጙ እንፅኺዳ አሴሜርጙንኩ ጌቤሎ አቲጝስ ቼጌርስታቲንታ ሆቴልካሊስታ እንጃቢሪ ዩኒቨርስቲሊ ታምትጜካማ ጌቤልትጛንታ ፄውስትⶓ ቶኬምካ:: ክምካዋስታ ታይካዋ ሌፍፅጙ ዜርፍዳ አሴሜርጝጙ ፋይስታ ዋይሚስታ አኽጙ አክም ይስጛማጊ አንትጝሊ እምትጛማ እንፃኽፄ ብቴ አቴካማ ቼጌርስታንኩ ዎታትካስታ እንፅኼ ፌቴራንትካስ ብቴ እይጝስ ትኩታው ቤን ቴቬቬርጛታ ካንቴ ዲግስካ::

አዩ ጉዋጉሲ ወረዳ እንሴስካ አብት ልማት ፅ/ጝናዳ ዎኬልስታንቲ አላፊ አቶ ተመስገን ደሴ ወረዳታ 2 ሻይ 661ዴስ ጃላ አሬሳቻንትካስታ ዎታትካ ክምካዋስታ ታይካዋ ሌፍፅጙ እንፅኺዳ አሴሜርጜካማ አግስታንኩ አኽⶓ ጌሌፅካ:: 2018 ምሬት አሜታዳ ዴሜካ 41 ዴስ ጃላ ዎታትካ እስካዊስ ዜርፍዳ አሴሜርጛንታ ፄውስትⶓ ጉሽካ::

2018 በጀት አሜትዳ ወረዳታ 37 ሻይዴስ ጃላ ጄንጅኩ ክምካዋ ሌፍፅጝስ ጌቤልስ ዲጋንታ ፄውጝስ እምፕልታቑ ዝኩዊኒ ኬሽጛታ ፄውስታው ፅሬት ይስጝⶓ  ቼሜትጝፄካ:: ክምካውሳ ዜሮ ኬሽጝፅጝስ እንፃኽስትኹ እንፅኺስኪላ ኪሲ ሜዜጌብስትⶓ ቶኬምካ:: እንጚስኪላ እንዳ አሜትዳ 62ዴሰ ጃላ ኬሽኹኽ ዜር ዝኩክ ጄንጅኩ ክምካዋ ሌፍፅጝስ ቴኬምስታንትካ ያኻንታ ጂሚርፂ ዴስ ካስጝⶓ እንስ ዴሜካ ዋይሚ ሜዜጌብስትኹ አኽጝስ ይስጝፄካማ ሲፍፃንኩ አኽⶓ ጉሽካ::

ብቴ አግፃንታ ካሴኑ ካሲስኪላ ዙርሜ እይጝሰ ትኩታኩ ቤንካሊ ኩስጜካማጊ አኽⶓ ኽይትጝፄካ:: እሳንጝፂውሳ ፕሮፖዛሎ ዲግስካማ ማንዲትጛንኩስ ብቴ አሬኬብፅጝስ ትኩታው ቤንስ ካሴ ዲግስካማ ክርፂ ዙርሚ እይስትⶓ ቶኬምካ::