ፍትኽፃው ፉዋፉዋቲ

ታደለ አጋጄ

ትስኪ ፉዋፉዋቲ አዊ ብሄረሰቡ ቺፅጝፂ ዳንግሊ ወረዳዴስ 38 ኪሎ ሜትሩ እቺትዳ አግስታው ማልጛ ዲኒክፂ ቱሪስቱ ጉስፂ ስፍሪያኽ:: ፉዋፉዋቲ ላጛ ኽሳንትካ ብንካዴስ ፌቴርስትኹያኽ:: ሊሊትጙኽ ዳብዚስ እንዜጛንኩ አዊሲስታ ግዛኒ እስታንኩ ብንካ ሊጊሲሜ ዳዶ እንዜጙኒዴስ ፋሌንጋ እምፕልትስ ታምትጛኒስ ትስኪ ፉዋፉዋቴ ፌቴራና:: እኒ ብንካ እምፕልዳ ታምትጜካማ ኽሳንቲ ጋኺሾ ክቤኒስ ዲኒክፂ ፍትሬቱ ቱሪስታ ጉስፄ ስፍሬ ፌቴርካ:: ፉዋፉዋቲ እምፕልዴስ ጌሙስ ኽሳንቴ ድምፆ እንኮኽፄ:: ፉዋፉዋቲው ናቕትዳ ሊሊትጙንኩ ካናኻፅካስ ሾፌንስታማ አምፕዴስ ጌማው ፉዋፉዋቲ ካንትስታው ጉዝማ እንፅኺስ ቼኔኬስትኹሳ አንኩሌ ፍትኽፄ::

ትስኪ ፉዋፉዋቲው ናቕትዳ ሊጊሲሜ ድሜ ቼፍፅኹ ካናኻፂ አግስቴ:: ካዌናኻዳኪላ ሊሊትጙንኩ ካዌንኩ እንሴስካ አግስታኑ ዙራሙሪያኽ::

ትስኪ ፉዋፉዋቲሾ ካስጝስ ላጛ ጉላሌ ዳዶ ቴኬምስትጝስ ካሊስቴ:: ዳንግሊዴስ ትስኪ ፉዋፉዋቲሾ ካፅፃው ያኹስ እሊው ዴሜካ እንጃቢሪ ኬቴምዴስ ክዳማጃ ኬቴሞኺስታ ካስጝስ እንዴስ ፋሌንጋ ክዳማጃዴስ ትስኪ ፉዋፉዋቲሾ ካስጝስ ካሊስቴ:: ትስኪ ጌሬምፃው ፍትኽፂ ስፍሪ ያኹኒውላ ቱስታውሳ ላካሳ አብቶ አግፃማጊ ጋቲዊያኽ::

ዳንግሊ ወረዳው ዝኩዋንቲ መከተ ዋለ ትስኪ ፉዋፉዋቲ ናቕትዳ ዝኩዊኔ ፄውኽ ዎታትያኽ:: እንፃኺቱ ጊዝዳ ፉዋፉዋቲው ናቕትዳ እንሴስካዋ ማንዲጝስ ፌይፃኑ ስፍሪ አኽⶓ ድኹዋ:: ዎታት መከተ ዙሙኹስታ ትስኪ ማልጛ ጊሪምፂ ቱሪስቱ ጉስፂ ስፍሪያኽ:: እሊኩ ፉዋፉዋትካታጊ ማልጛ አቕስታው ፍትኽፂ ስፍሪ እሺኾ:: ያኼስጉ ቱሪስትካስ ጎቤንስታማጊ ጋቲው አኽⶓ ዙማ:: ትስኪ ፉዋፉዋቲ ጛርትስ ኬሌልስታማ ማንዲስቱኒጊ ዎታትካስ እንፅኺውሳ ድሎ ፌቴራማ ሚፄ አግፅጝስ ካሊፃው ስፍሪ እሺⶓ ቶኬማ::  ፉዋፉዋቴ ክንታንትካ ይንቴካማ ጎቤናና:: ኽይስታንኩ አቕ ኻሱሳ ፕሮግራሞ ፉዋፉዋቲው ናቕትዳ ካስጝፃና::

ትስኪ ፉዋፉዋቲሾ አንትጝስ ካላንኩ ጎቤናንትካ ጛጂስ አሜቻው ስፍሪሾ ይንቴካማ ጎቤንጝስ ካላኑ ስፍሪ አኽⶓ ዲብሳ:: እንጃቢሪዴስ ቻግኒሾ ካፅፃው ዳድስ እንዜጛንኩ ክዳማጃዳ ጌሙኒዴስ  ፋሌንጋ ትስኪ ፉዋፉዋቲሾ ካስጝስ ካላንኩ አኽⶓ ድኹዋ::

አማኻሪ ክልሉ ፄትቲው ችግር ፌቴርስቱኒዴስ ናቴ ስፍሪሾ ካሳንኩ ጎቤናንትካ ኔኬትⶓ ቶኬምጝስ ዙራሙሪ ኬሽኹ አብቱ አግፅፂ ያኻታ ወረዳ ትኩትስ እንፃኽስትጝ ቱስታው አኽⶓ ዲብሳ::

ፉዋፉዋቲ ፍትኽፅጝዴስ ፌይኹሳ ኤሌክትሪኩሳ አይሎ ፍልቕፅጝስ ካላው አኽⶓኪላ ጉሻ:: ጅሚውሳ ክሊፓ እንፃኽስታንኩ ኽሳንትካ አርቲስትካ ጅሚውሳ ቪዲዮ ኬሬፃኑ ስፍሪ አኽⶓኪላ ድኹዋ::

ወረዳው ባይሉስታ ቱሪዝሙ ፅፌት ጝና ዎታትካዋ አችትጝፅጝስ ጎቤንፃንታ እንፃኽስትጝ ፋይፃው አኽⶓ ድኹዋ::

ትስኪ ፉዋፉዋቲሾ ካስጝስ ዳድ ግቢትስትⶓ ዙሙኽ ዎታት መከተ ፉዋፉዋቲው ናቕትዳ ብርክካ እንሴስካስታ ጌዳሞ ዝኩጝ ቱሪስትካስ ማልጛ ፋይስታንቲ ስፍሪ አኽⶓ ጉሻ::

እሊት ዳንግሊ ወረዳው ዝኩዋንታ ትግስት አበራ ትስኪ ፉዋፉዋቲ እንዴስ ቤዴራ ሊሊትጙንኩ ዙራሙርካዴስ ይንታንኩ ጎቤናንትካስ ጎቤንስታሺኹ ስፍሪ አኽⶓ ዲብስካ:: ዲጊዴስ ናቴ ኩፅኒ ጎቤናንትካ ፄትቲው ችግርስ ጎቤንስታማጊ ጋቲው አኽⶓ ጉሽካ::

ችኸ ዎክትዳ ፉዋፉዋቲ ማልጛ አቑሳ አንኩሌ ፍትኽፅጝስ ካሌ:: ሳኑዳ ኩፅኒ እምፕልታቕ ብኖ አኹዋቲስ ቴኬምስታኑ አኽጝስ አኹ ሜቴን ኔኬታው አኽⶓ ዲብስካ::

ዳንግሊ ወረዳው ባይልስታ ቱሪዝም ስፖርት ፅፌት ጝናሱ አላፋ ዊዛሩ ቦጋለች ፈንታሁን ዳንግሊ ወረዳዳ ሊሊትጙንኩ አቓ ግብርካስታ ፍትሬትኩ ቱሪስትኩ ጉስፅካ ስፍሪካ አግስታኑ ወረዳ አኽⶓ ጌሌፅካ:: እኒጛ ፍትሬትኩ ቱሪስታ ጉስፅካ ስፍርካዴስ ሚንችካስ ጎቤንጝስ ጎሌልስታው ትስኪ ፉዋፉዋቲ አኽⶓ ቶኬምካ:: ክልልዳ ፌቴርስትኹ ፄትቲው ችግርስ ቱሪዝሙ ልቕልቕቲ ማልጛ ኔኬታማጊ አንትⶓ ድኹዌካ::

ዊዛሩ ቦጋለች ፈንታሁን ጐቤናንትካ ትስኪ ፉዋፉዋቲሾ ካስካማ ጎቤናንኩ ዝኩኒጊ ፖሊሱ ሲሊቲንፂ ዝኩኽ አኽጝስ እንዳርማኪ ስላሙ ችግር እላቲው አኽⶓ ጉሽካ::

ዎታትካዋ አችትጝፅጝስ ጎቤንፃንታ ፄውጝስ ባይልስታ ቱሪዝሙ ፅፌት ጝና እንፃኽስታያሱ እንፅኺ ዝኩⶓ እርዳትፅካ:: ፉዋፉዋቲ ዳንግሊዴስ ፅሌ እቺት ናው ስፍሪ አኽጝስ ፄትቲው ችግርስ ጎቤናንትካ ስፍሪዳ ካስጝስ ቼጌርስታንኩ አኽⶓ ቶኬምካ::

ይንታውስ ፉዋፉዋቴ ኬሽኹሳ አቕትጝፅጝስስታ ዎታትካዋ አችትጝፅጝስ እንፃኽስታንኩ አኽⶓ ዲብስካ:: አብት ዌንካ ፍትሬትኩስታ አቓግብርካ ቱሪስትኩ ጉስፅካ ስፍርካዋ ሊሚፅጝስ ኬሽኹሳ ሚፄ አግፃንታ እንፃኽስትጝ ቱስታኩ አኽⶓኪላ ጉሽካ::