ጋቻስታ ግባቱ ችግር

ንግስቴ ተስፋ

ምርቶ ዴሜክጝስስታ ምግቡሳ ዋስትኔ ቼሜትጝፅጝስ ግብርኒውሳ እንፅኼ ኬሽጝፅጝስ ምንግስት ግባቶ ዲግስጙሳ አላፍቶ ካፃማ እንፃኽስትጝ ማንዲስቴ:: ወክት ቺፋ ሊሊትጙንኩ አርፍካዳ ችኹ እሪስስታ አኹዋቲስ ሊማው ሴብልስ ወክትስ ጉልሌ ዜሮስታ አቓ ግብሬ ኽብፂውሳ ማዳባሬ እንቲታኪ ኮምፖስቶ ቴኬምስታማ ሴብሎ ሊሚፅጝ እፅፍስ ምርቶ ዴሜክጝስ ካላው አኽⶓ ግብርኒ ምርምሪው  ንቫር ካንትፄ::

አማኻሪ ክልልታ 2018/19 ምርቱ ዝቤንስ 8 ትኩሚ 6 ሚሊዮን ኩንታል አቓ ግብሬ ማዳባሬ አሬሳቻንትካስ ዲግስጝስ አኬድስታማ እንሳ ንቫሮ ቴርስኑኽ ወክቶ ኺስታ 2 ትኩሚ 96 ኩንታሎ ዩኔንካስ ቤንጝፅⶓ ክልሉ ግብርኒው ቢሩዴስ አግፅንኹ ንቫር እርዳትፄ:: እንጚዴስ ዴሜካ 1 ሚሊየን 430 ሻይ 390 ኩንታል አሬሳቻንትካው እምፕልቱ ማቤርካሾ ቱዋማ 799ሻይ 390 ኩንታል ኽብፂው ማዳባሪ አሬሳቻንትካው ታፍዳ ታምባታ ፄውስታ::

አዊ ብሄረሰቡ ቺፅጝፂዳኪላ 2018/2019 ችኹ ምርቱ ዝቤንዳ 17 ትኩሚ 7 ሚሊዮንዴስ ጃላ ኩንታል ምርቶ አግፅጝስ እንፃኽስሰታው እንፅኺዳ አቓ ግብሪ ኽብፂ ማዳባሪውስታ ጉልሊ ዜሩ ዲግስጚ ይስጛማ ሲፉኒውላ ሰላሙ ችግር ዝኩክ ወረድካዳ ኩፅኒ ሼውታ አግፅጝስ ቼጌርስትካማጊ አኽጞ ንቫርካ ካንትፃና:: ልማቱ እንፅኺዳ ፅንጋኻ ያኹንኩ ጉዳይካዋ ኽያማ ዋይሚስቴ እንፅኼ አኮሚችጝስ ኩፅኒ ፅሬት ፄውስታማጊያኽ::

ጉልሌ ዜሮ፣ አቓ ግብሬ ኽብፂውሳ ማዳባሬስታ ኮምፖስቶ ቴኬምስታካማ ዜርጝ ምርቱ ድምክኒስ ዝኩኽሳ ትክሞ አዩ ጉዋጉሲ ወረዳ ጎሪ ኬቤሊው አሬሳቻንቲ እርፅባን የኔአለም ድኹዌካ::

ኽብፂውሳ ማዳባሬ ወክትስስታ ፋይፃው ሜቴንስ ቴኬምስትካማ ዜራኒ ዋጉስኪ ያኻ ኩፔ አፌሩስ ኬሻንቲ አችስ ሰብል ታምባው አኽⶓ  ጉሽካ:: ጉልሌ ዜሮ  ዴሜካ አይር እግልታሊስታ ኽብፂሊ አስሜምጛውሳ ቴኬምስታኒ ዋጉስ ጉሽፃማ ኪሴ ካንትፃው አኽⶓ ቶኬምካ::

ግባቶ ቴኬምስትጝ ምርቶስታ ምርታምቶ ዴሜክጝስ ዝኩኽ ፍሺ ኬፍቲኒ አኽⶓ ቱስቲስ እርዳትስቱኒውላ ፋይፃውሳ ላካሳ ሜቴቴንጙኽ ዋይሚስ አግፅጝስ ኩፅኒ ቼጌርስትካማጊ አኽⶓ አቶ እርፅባን ጉሽካ:: ጋያኪ ጎሪ ኬቤሊ ዋኽስ ሰላማ ያኻውላ ይጉጝ ጉዳይ ባስጛታ ፄዋማጊ አኽⶓ ዲብስካ::

አቶ እርፅባን ናኑውስታጊ እንዴስ ቤዴራ አሬሳቻንትካው ዝኩኑሳ ኬቤሌኺስታ ጉልሊ ዜርስታ ኽብፂው ማዳባሪ ዲጋሺኹ አኽⶓ ድኹዌካ:: ናኪኒ ወክትስ ኩፅኒ አዚኒ ኬቴሞ ኺስታ ካስካማ ጄዋንኩ አኽጝስ ትራንስፖርቱስታ ግባቱ ክብርናቲ ምክንያቲስ ፋይስታውሳ ላካሳ አግፅጝስ ቼጌርስትⶓ ዲብስካ:: እሳኖ ብቴ አሬሴካማ ምርቶ አሜሬትጝስ ግባቱ ዲግስጚ ፍታና አኽⶓ ጉሽካ::

ዙራሙሪዳ ሰላሙሳ ችግሮ ፌቴራው አይል አግስታው አኽጝስ ጛዳ ዝኩኽሳ ብቴጊ አሬሴካማ ምርትስ ሾፌናቲንታ ኬቤሊዳ ሰላሙ ስጋት ዝኩⶓ ዲብስካ:: ሰላሙ ስጋት ግባቱ ዲግስጚዳኪ ያኻ ግብርኒው እንፅኺዳ ቻኒስቶ ፌቴራማጊ አሬሳቻንትካ አሜሬታኑላ ችኽካማ ድኽትስ ፂኪስታቲንታ ምንግስት አሬሳቻንትካው ኬምፕዳ ቴሬማ ችግሮ ዴዴጝ ጊዝስ ኽያታ ካሴ ዲግስካ::

አቶ እርፅባን እንዴስ ቤዴራ ቕፂስ እንቲታኪ ጉሽስ ጄዋሺኑ ኽብፂው ማዳባሪ ናካዳ ኬቤርጝስ  ፋያኑሳ ላካሳ ጄውጙ አክም እላቲኩ አኽጝስ አሬሳኑሳ ማሴ ኔኬታንታ ጌዴድስትⶓ  ዲብስካ::

ዊዛሩ ብርሃኔ ፍካዱኪላ ጎሪ ኬቤሊው ዝኩዋንትካኽ:: ቤዴራ ሹንቢውሳ ሴብሎ ይቪቼ ሹኻ ሄክታራዴስ ጃላ ዜራሺኑ ወክት እሺⶓ ጉሽካ:: እንጚዴስኪላ ግቦቶ ቱስቲስ ቴኬምስታኒ እምፕል ሄክታርዴስ 50 ኩንታልዴስ ጃላ ምርቶ አግፃሺኑ ወክት እሺⶓ ታክሳና::

ዊዛሩ ብርሃኔ ናኑውስታጊ ይኮኖሚስ ሌጌስጝስኪ ያኻ ኬሽጙኽሳ ዝኩዊኔ ዝኩጝስ ቤዴራ እሳንስ አሜሬታሺኑ አሊቢ ናኪኒ ወክትስ ኩፅኒ ግባቱ ዲግስጚስታ ክብርናቲ እንቲታኪ ዙራሙሪዳ ዝኩኽ ሰላሙ ስጋት ምክንያታስ አኽጝስ እሌታ እርባቲስ ያኻውሳ አግፅጝስ ሊፋንኩ አኽⶓ ቶኬምካ::

ኽብፂው ማዳባሪውሳ ችግሮ ኽይጝስ እንቲታኪ ኽብፂውሳ አሉምቶ ማንዲጝስ ኮምፖስቶ ቴርሴካማ ቴኬምስታሺካ:: ዊዛሩ ብርሃኔ ናኪኒ ወክትስ ኩፅኒ ዙራሙሪዳ  ሰላሙሳ ችግሮ ፌቴራንኩ አይልካስታ ወክቱሳ ሰላሙሳ ችግሮ አጋታሚታ ቴኬምስትካማ ዳዴኽዳ አሴሜርጙንኩ አይልካ እንሴስካዋ ዜሬፍካማጊ ቼጌርስትካ:: እንሴስካዋ ዋይካማ ኮምፖስትስ ያኻውሳ ግባቶ አግፅጝስ ቼጌርስታኒ ኮምፖስቶ ቴርሴካማጊ ጋቲው አኽⶓ ጉሽካ::

እንጚጊ ችግር እምትጛማ ኩፅኒ አሬሳቻንትካው ግብርኒው እንፅኺዳ እንዙራኽ  እስታቲውሳ ችግሮ ፌቴራማጊያኽ ምንግስት ችግሮ ኽያማ አሬሳቻንትካ ልማቱ እንፅኺስ ይስጛንታ ፄውጝ ፋይፃው አኽⶓ ዊዛሩ ብርሃኔ ካንቴ እይካ::

አዩ ጉዋጉሲ ወረዳው ግብርኒ ፅ/ጝናሱ አላፊ አቶ እምቢያለ አማረ ጛሾስ ሴብሉሳ ምርቶ ሜቴንስኪ ያኻ ፃንኩትስ ኬሻንታ ፄውጝስ እንቲታኪ ምግቡሳ ፋዮ ዋኽትጝፅጝስ እርዳታውሳ ግብቶ ቴኬምስትጚውሳ ሴሎ ሳይንሳዊ ዳድስ አኮሜችጝስ ትኩትስ እንፃኽስስታማጊ አኽⶓ ጌሌፅካ::

ኽብፂውሳ አሉምቶ ዴሜካውሳ ግባቶስታ ጉልሌ ዜሮ ቴኬምስትጝ ግድ አኽጝታጊ ወረዳታ ፋይፃውሳጊ ዋኽትጝፅጝስ እንፃኽስስታማጊ አኽⶓ ጉሽካ::

2018/2019 ምርት ዝቤኑ ችኹ እርሺስ ያኻውሳ ግባቶ ቤዴራዴስ ኽስኹስ ዲግስጝስ እክድ እምስታ:: እንጚስኪላ 196ሻይ 652 ኩንታል አቓ ግብሬ ማዳባሬ ወረዳሾ ሚፅጝስ አኬድካ:: ዜጌቤ ቴርስኑኽ ወክትዳኪላ 47ሻይዴስ ጃላ ወረዳሾ ቱዋማ ዲግኹዴስ 77 ታፋ ሊኽዴስ ያኻውሳ አሬሳቻንትካስ ታምባታ ፄውስትⶓ አቶ እምቢያለ ጉሽካ:: ምስሊ እንኩዋጚኒ ወክትሊ ካንትጛኒኪላ ኬሻንቲ ፊፂምጚዳ አግስታው አኽⶓ ቶኬምካ::

ወረዳታ ቤዴራማ ዜርስታው ሹምቢው ጉልሊ ዜርኪላ  ላምቡሳ ኺስታ 1ሻይ 800 ኩንታል ሊሊትጙኽ አይኔት ሹምቢው ዜር ዲጋማ 1ሻይ 220 ኩንታሎ አሬሳቻንትካ ካፃንታ ፄውስትⶓ እርዳትፅካ::

ጋያኪ አምቢሊ፣ ጎሪ፣ ድኩና ደረብ፣ ችባስባሳ፣ አምቢሪስታ እሊኩጊ ወረዳኩ ኬቤልካዳ ዝኩኽ ሰላሙ ችግር ምክንያታስ አሬሳቻንትካስ ኬቤሌኺስታ ግባቶ ዲግስጝስ ቺጊርፂ አኽⶓ ጌሌፅካ:: አኽጝስኪ ወረዳዋኺስታ ይንቴካማ ካፃንታ ፄውስትⶓ ጉሽካ:: እን ዴሜካ አሬሳቻንትካው ግብርኒው እንፅኺዳ ቻኒስቶ ፌቴራማጊ አኽጝስ ትኩትኩ ቤንካሊ ኩስጝጝስ ጉዳዩ ኽይጝስ እንፃኽስስታማጊ አኽⶓ አቕፄካ::

ጋያኪ ጎሪ ኬቤሊኩ አሬሳቻንትካ ዲግሱኑሳ ካሴ ኽይጝስ ቺጊርፂ ያኹኒውላ እንዴስ ቤዴራ ግባት ጉሺስ እይስታሺኹ አኽጝስ ጉሼ ዙርፅካያስኩስ እይጝስ ካሊስታያሱ አኽⶓ ቶኬምካ::

አዊ ብሄረሰቡ ቺፅጝፂው ግብርኒ ሜምሪዳ ግባቱ ቼፍጝጚው ውማይቲኒ አቶ ሰለሞን አንተነህ ብሄረሰቡ ቺፅጝፂታ 412ሻይ 480 ሄክታር ብቴ ችኹ ወክትዳ ሴብልስ ሾፌንጝስ 17 ትኩሚ 78 ሚሊዮን ኩንታል ምርቶ አግፅጝስ እክድ እምስትⶓ አቕፄካ::

ብሄረሰቡ ቺፅጝፂታ ችኹ ምርቱ ዝቤንስ 841 ሻይዴስ ጃላ ኽብፂውሳ ማዳባሬ ትክምዳ እሽፅጝስ ቴግባርሾ ቱስትⶓ ውማይቲኒ ኽይትጝፄካ::

ጉልሊ ዜሩ ዲግስጚዳኪላ ትኩትስ እንፃኽስስታማጊ አኽⶓ ቶኬምካ:: ጉልሊ ዜር ክብናቲ ዝኩኒውላ ፋይስታው ዜሩ አይኔት ፋይስታው ሜቴንስ ዲጋማጊ አኽጝስ አሬሳቻንትካ ወክትስ ቴኬምስታንታ አሳቦ ዲግስካ::

2018/2019 ምርቱ ዝቤንስ ግባቱ ዲግስጚ ብሄረሰቡ ቺፅጝፂታ ክርፂ አችዳ አግስታው አኽⶓ ጉሽካ:: ብሄረሰቡ ቺፅጝፂታ ብብራንቲው ችግር አሬሳቻንትካ ግባቶ ካፃኒስ እሊውሳጊ ፖለቲካውስታ ማቤራዌ ጉዳዮ ፊፂምፄ ብሮ ኬታን እስትካማ ጌዴድስትጝስ ግባቶ ወክትስ ካፅካማ ቴኬምስታቲንታ ፄዋው ቻኒስትዴስ ኔፃ ያኼካማ ካፃንታ ፄውስታማጊ አኽⶓ  አቶ ሰለሞን ቶኬምካ::