አሬኬዛላ ንኹ ጌቤል ዲቫ

ንግስቴ ተስፋ

እሌት ምግባስ አጌላጌላንኩ ምርትካዳ ጊዝቺፋ ፄውስታው ዋይሚው ድምክኒ አጌር አቕዳ ኬፍቲኔ ዝኩዊኒውሳ ቻኒስቶ ፌቴራማጊ አግስቴ:: ይቶፒያዳ ጊዝዴስ ጊዞ ባስጛማጊ ይንቱኽ ዝኩዊኒው ክብርናቲ ይኮኖሚው ልቕልቕቲዳኪላ ችግሮ ፌቴራማጊያኽ:: ዝኩዊኒ ክብርናቲው ጉዳይ እምፕልታቕ ቴስፊስ ቻዴስ ናካ ኔኬታዊያኽ ንካማ ታክሱኒውላ ጊዝቺፋ ዴሜኩስ ጃጊ ኔኬቱስ ካንትስታላ::

ሊሊትጙንኩ አሌሙ ዙራሙርካዳኪ ያኻ ይቶፒያዳ ካንትስታው ሰላምስታ ዴክቱ ችግር ዝኩዊኒውሳ ክብርናቴ ባስጝፃማጊ አኽⶓ አሌሙ ምግብ አችቱ ኾት ፍሽኹ ንቫር ቶኬሜ::

ዊዛሩ ስመኝ ካሳሁን አዊ ብሄረሰቡ ቺፅጝፂ ዚጋሚ ወረዳ ክላጅ ኬቴሙ ዝኩዋንትካኽ:: ምግብ ጝናሳ ብስካማ አግፃኑ ሚፂስ ዝኩዊኔ ጉሳና::

ዊዛሩ ስመኝ “ናካዳ ዝኩዊኒው ክብርናቲ ሚንችካኾሳ ድኽትስ ታምፃማጊያኽ:: ዜሬቕቲኒስታ ልቓ ሚፂ ዝኩክ አጌር አቕ ዝኩዊኔ ቲሪትጜካማ ጉስጝስ ቼጌርስትካማ ሚንችካው ይወት ፃንጌኽታ፤ ፋብሪኪኩስታ ግብርኒኩ ምርትካ ጊዝዴስ ጊዞ ኬቤርጝስ ቹዋ ታብል ጄርካስ ፋይፃውሳ ዋኽትጝፄካማ ዝኩጝስ ካላቲኑ አችዳ አግስታና” ናኒስ ባስጛማጊ ይንቱኽ ዝኩኒውሳ ክብርናቴ ታምፃማጊ አግስታውሳ ጉዳቶ ድኹዌካ::

ዊዛሩ ስመኝ ምግብ ጝናሳ እንፃኽስታኒስ ሊጊሲሜ አሜቶ ቼፍፁንኩ ያኹኒውላ እንዴስ ቤዴራ ሜቴቴንጙኽሳ ፊቴ አግፃሺኑ እንፅኺ ናካዳ ዝኩዊኒው ክብርናቲ ባስጛኒ ክሳሪሾ ቱⶓ ጉሽካ:: እንዴስ ቤዴራ ምግቦ ሜቴቴንጙኽ ዋይሚስ ዋያኒስ ሚንችካ ቴኬምስታንትካ እሺንኩ ያኹኒውላ ዝኩዊኒው ክብርናቲ ባስጛማጊ ይንታኒ ኩፅኒ ዴንቤንካ ኔኬትካማጊስታ እንፅኺ ቓቔፃማጊ አኽጝስ ዝኩዊኒዳ ቻኒስቶ ፌቴርⶓ ዲብስካ::

“አይጛ እሺኹ ጌቤል ናካ ዴሜኬ፣ ናካ ጌቤል ዴሜኩስ ጃጊታ ኔኬቱስ ካንትስታላ፣ አቒው ፋይስታ ጌቤሉ ክብርናቲ ሜቴቴንጛማ ካስጝስ ካላቲው ወክትዳ አኽጝ ዝኩጝስ ቴስፌ እያላ” ናኒስ ጌርክ ቺፋ ዴሜካው ዝኩዊኒ ክብርናቲዳ ካንቴ እይካ::

ዝኩዊኒው ክብርናቲ ባስጛማ ይንቱኽ እሊው ምክንያቲ ምንግስቱ እንፅኺኩ አላፍካ ቱስቲስ እጎ ኬቤርፃኑላስ ይጉጝስ አኽⶓ ቶኬምካ:: እጋፌ እንፃኽስትጜ ቼፍጝጝስ አላፍት ዝኩክ ውማይቴን  አላፍቶ ፊትጝጙኒ ዝኩዊኒውሳ ክብርናቲ አሬኬዝጝስ ካሌ ናውሳ አሳቦ ዲግስካ::

ዊዛሩ ስመኝ እዩኑ ካንቲስ ቱስታ ጋቲታ ዋይሜ ዴሜካንኩ ጌፄኖ እግስ ካሲስታንታ ትኮሜ እይጝ ዴስስታያሱ ያኹኒውላ እምፕልታቕኪላ ታንቦ ፊትጝጝ ማንዲስታው አኽⶓ ጉሽካ::

እሌት ቺፋ ቼርኮ ሳኻማጊ አግፃው ሚፂስ ዝኩዋኔ ጉሳው እሊው ወረዳው ዝኩዋንቲ አቶ እስቲፋኖስ ሙሉጌታ ምክንያቶ ፋያማጊ ጊዝዴስ ጊዞ ዴሜካው ዝኩዊኒው ክብርናቲ እሌታ እርባቲዴስ ፊጝስ ፄዋኑ ፅሬትዳ ፍታና አኽⶓ ድኹዌካ::

ሊሊትጙንኩ አጌራኩ ቤንካዳ ካንትስታው ሰላሙስታ ዴክቱ ችግር ዝኩዊኒው ክብርናቲ ባስጛታ ፄውⶓኪላ ዙሜካ:: አጌር ሰላማ ያኻኒ ኩፅኒ ዋሺኒኪ ዙራሙሪዴስ ምርት ዲጋማ አጌር አቕ ሜቴቴንጙኽ ዋይሚስ ጄውጝስ ካላንኩ እሺⶓ  ጉሽካ::

ናካዳ ዝኩዊኒው ክብርናቲ ታምቡኽ አች እምፕልታቑ ይሉንቲ ድሳማ ቱስታ ጋቲታ ዋይሚውሳ ድምክኔ ፄዋኒ ጛጛርትጛሳ ካዱኑውስታ ቼፍጝፋያው አኽⶓ አቶ እስቲፋኖስ ቶኬምካ:: እምፕልታቑ ታክስጚውስታ እርዳትጚው እንቲታኪ ችግሩሳ ወክቶ አርቴን ትጛማ ፌይፅጙ ሼው ፅንታ ድሳቲታ አይማኖቱ ታብልስታ አጌር ሹማጌልካ ታምቦ ፊትጙኒ ጌቤሎ አሬኬዝፅጝስ ካሊስታው ኽይ አኽⶓ ቶኬምካ::

ምክንያቶ ፌቴራማጊ ዋይሚውሳ ድምክኔ ፄውጝስ አጌር አቖ ችግርሾ ቱዋንታ ፄዋውሳ ጊፂኔስታ ምርቱሳስታ ሼኬትካውሳ ዲግሳንቴ አካሎ ዴሜካ ምንግስት እርምጄ ካፅጝ ቱስታው አኽⶓ ዲብስካ:: ምታኒ ሃብቱ ክንትፃንቲ አምሳሉ አጋጄ ዝኩዊኒው ክብርናቲ ልክዴስ ፌይኹ፣ ቼፍጝጚስ ካሊስታያሱስታ አጌር አቕ ጌርክ ቺፋሱ ስሩ ፋይካዋ ዋኽትጝፅጝስ ቺጊርፂ አችዳ ታምቡኽ አኽⶓ እርዳትፅካ::

ዝኩዊኒውሳ ክብርናቴ ባስጝፃንኩ ምክንያትካዴስ አጌራዳ ዝኩኽ ጋቻስታ ዎሬም፣ አቑ ምርቶ ፋይጙ ሜቴን ዴሜክጝስታ ጌንዜብ እሳንስ አቴምስታማ ጌቤልሰ ዲግጝ ቶኬምስታንኩ አኽⶓ ጉሽካ:: እን አጌራታ ኩፅኒ ምክንያቶ ፋየካማጊ ዋይሜ ዴሜክካማ ዋይጝስ ምርቶ ቤፍፄካማ እንኩርጝስስታ ሰላም ኬቤርስታው ይጉጝ ቹዋ ምክንያታ አኽⶓ ኽይትጝፄካ:: ዝኩዊኒው ክብርናቲ ባስጛማጊ ካሳኒ አጌራውሳ ይኮኖሜ ጉዲጝዴስ ፌያማ አጌራው ስጋት አኽጝስ ካላው አችዳ ታምባውላስ ምንግስት እጎ ኬቤርፅጙ እንፅኺዳ ትኩትስ እንፃኽስታታ አሳቦ ዲግስካ::

እምፕልታቕ እሌት ቺፋ ፋያንኩ ምርትካዋ ቤፍፃንኩስታ ቱስታ ጋቲታ ዋይሜ ዴሜካንኩ ጌፄንዳስታ ቴቬቬርጛንትካ አካልካዳ ምንግስት ክንትፃውሳ እርምጄ ካፃውላ ይጉጝ ጊዝ ቺፋ ዝኩዊኒው ክብርናቲ ባስጛማጊ ካስጝስ አጌር አቑ ስጋት  አኽⶓ ምታኒ አብቱ ክንትፃንቲ ጌሌፅካ::

እን አኽጝስ ምንግስቱ ቢዲሪ ቴግባር እጋፌ ጊፁሳ ልቕልቕቴ አሬኬዛታ ፄውጝስታ አጌር አቑሳ ይኮኖሚውሳ ዋስትኔ ዋኽትጝፅጝስ ትኩትስ እንፃኽስትጝ ማንዲስታው አኽⶓ ክንትፃንቲ ኽይትጝፄካ::

ዚጋሚ ወረዳ ጊፁስታ ጌቤል ልማት ፅ/ጝናሱ አላፊ ያዘው በለተ ወረዳታ ግብርኒው ምርትካዳ ጌቤሉ ክብርናቲ ካንትስታያሱ ያኹኒውላ እሊው እሌቱ ምርትካዳስታ ሼኬትካዳ ኩፅኒ ዋይሚ እፅፍስ ዴሜካማጊ አኽጝስ እምፕልታቑ ስጋት አኻቲታ እንፃኽስስቴካማጊ አኽⶓ ቶኬምካ::

አቶ ያዘው እዩኑ ኽይትጝፂዳ ጌቤሉሳ ክብርናቴ አሬኬዝፅጝስ እምፕልቱ እንፅኺው ማቤርካዋስታ ሾሜታንትካውሳ ማቢሬ አችትጝፅጝስ እሌት ቺፋ እምፕልታቕስ ፋይፃውሳ ምርቶ ዲግስጝስ አኮሜችስታው ቴግባር ይስጛማ ሲፍⶓ ጉሽካ:: እንጚስኪላ ሽኩዋር፣ ዘይት፣ ሳሙኒስታ ግብርኒው ምርትካ ዲጋንታ ፄውስታማጊ አኽⶓ ጌሌፅካ::

ወክት ፌቴራውሳ ሰላሙሳ ችግሮስታ ጌቤሉሳ ልቕልቕቴ አጋታሚታ ቴኬምስትካማ ጌቤሉ ክብርናቲ ባስጛታ ፄዋንኩ 56 ጌፄንዳ እርምጂ ካፅስትⶓ አቕፄካ:: ሴዛ ጊፅኩ ኾትካዳ ዴሜካ ይሴን ክፃት ካፅስትⶓ ቶኬምካ::

አቶ ያዘው ናኑውስታጊ ናኪኒ ወክትዳ ጌቤሉ ክብርናቲ ባስጛታ ፄዋንኩ  ጉዳይካዋ ጎሌላማ ኽይጝስ ፅ/ጝና ትኩትስ እንፃኽስስታማጊ አኽⶓ ጌሌፅካ:: ሼኬቶስታ ምርቶ እሊው ዙራሙሪዴስ ቻኔካማ ትራንስፖርትስ ያጋንኩ ጌፄን ብብራንቲ እላኽ ናው ምክንያቲስ ጌቤሉሳ ክብርናቴ ባስጝፄካማጊ አኽጝስ ችግርስ ኽያ ያኻው ክብርናቲው ማደይ ግቢትስታማጊ አኽጝስ ዲጊ ጊዝስ እንፅኼ ጄሜራኒ ችግር ኔኬታው አኽⶓ ኽይትጝፄካ::