እንኬ ፊቲሳውኾት ዲጊዳ

ታደለ አጋጄ

ቲኑ ጉትፕ ግቢትስትጝ እምፕልታቑ ቲኑ አገልግሎቲው ታምብስታንትስ ፣ቹትካዉሳስታ ስራስሪውሳ ክርⶓ ኔኬትጝስስታ ፌያፌይጛንትካ ቑንዝካዋ ቼፍጝጝስ አኮሜችስታው ስር ልማቱ እንፅኺያኽ:: ይቶፒያ አች ቺፋ አግስታንኩ ኬቴሙስታ ጌፄሩ ዙራሙርካዳ እስካውካ ቲኑ ጉትፕካዋ ግቢትጝስ ሊጊሲሚ ጊዙ ካሲ እሺኹሳ እምፕልታቑ ቲኑ አግልግሎቲው ካሲስ ዙርሚ እይስታማጊ አግስቴ::

ውላ ዙራሙርካስ ቲኑ ጉትፕካ ታምብስታንታ ያኻታስታ ጛራ ጛራ ዎሴንስትኹ እዝቡ ቼፍስ አጌላጌላታ ፄውስታማ ግቢትስታው ቲኑ ኾት ልቓ እክምኒዉሳ አግልግሎቴ እምፕልታቕስ እያታ ፄውስታማ ቲሪትጝጜ:: እምፕል ሚዲቢኒ ቲኑ ጉትፕ 25 ሻይዴስ 40 ሻዮ ኺስታ ታምባው እዝቡ ቼፍስ አጌላጌላንታ እስታማ ግቢትስታው አኽⶓ ቲኑ ሚኒስቴሩ ንቫር ቶኬማ:: ጌፄሩ ዙራሙርካዳ ዝኩዋንኩ እምፕልታቕስ ሚንቹኒ 5 ኪሎ ሜትሩ እቺትዳ ቲኑ ጉትፕ ግቢትስትጝ ፋይፃው አኽⶓ ቲኑ ሚኒስትሩ  ንባር ቶኬሜ::

እዝቡ ቼፍ ሚንቻማጊ ካስጝ፣ ቑንዚው እሳንጝጚስታ እምፕልታቑ ቲኑ አገልግሎቲስ ዝኩኽ ፋይ ዴሜካማ ካስጝ እክምኒኩ ኾትካ ግቢትስትጝስ ፋይፃንቲ ያኻማ አግስታ:: እንስኪላ እምፕልታቑ ቲኑሳ ዋስትኔ ቼሜትጝፅጝስስታ ዲጊዳ እክምኒውሳ አገልግሎቴ አግፃንታ ታክስስታማ ጌፄሩስታ ኬቴሙ ዙራሙርካዳ ሊሊትጙንኩ ቲንኩ ጉትፕካ ግቢትስትጝስ እምፕልታቕስ እክምኒውሳ አገልግሎቴ እይካማጊያኽ::

አንኪሺ ጉዋጉሲ ወረዳዳ ፅርባ ኬቤሊዳ እምፕልታቕስ እክምኒውሳ አገልግሎቴ እይጝስ ታክስስታማ ግቢትስትኹ ቲኑ ጉትፕ ዳቔርስታማ አግልግሎቴ እይጝስ ቴርታማጊያኽ::

ፅርባ ኬቤሊው ዝኩዋንቲ አቶ አምሳል እንግዳ ኬቤሊዳ ቲኑ ጉትፕ ግቢትስታማ ዳቔርስትጝ እምፕልታቕዳ ታምባሺኹሳ ቲኑሳ ችግሮ ይጉፃው አኽⶓ ዲብስካ::

አቶ አምሳል ዙሙኑውስታጊ ኬቤሊዳ ሚንችካ እምፕልታቕ ዝኩዋኑ አኽጝስ ዲጊዳ እክምኔ አግፅጝስ እምፕልታቕ ቼጌርስታሺካ:: ቑንዳስትኹ አቒ ኻግስ ቡስታማ ግምጃቤት ሆስፒታሎ ታምብምባ ኺስታ ዳድዳ ክርጝ ጌቴማሺኹ አኽⶓ ዲብስካ:: ካሜናንትካዋ እምቢታማ እክምኒ ጝና ካፅጝስ ዳዱ ችግር እሺⶓስታ እንዝርናንትካ ቱጝስ ቼጌርስታኑ ዳድ አኽⶓ ዙሜካ::

ቑንዳስትኹሳ አቔ አኪም ጝና ታምፅጝስ ላጛ ሳታሱሳ ዳዶ እንዜጝጝስ ቲኑሳ አግልግሎቴ አግፃሺንኩ አኽⶓ ድኹዌካ:: ምንግስት እምፕልታቕዳ ታምባሺኹሳ ችግሮ እርዳትስታማ ቲኑሳ ጉትፕ ኬቤሊዳ ግቢትስትጝስ ማልጛ ዴስቲ እንኮኽስትኹ አኽⶓ ዲብስካ:: ኬቤሊው እምፕልታቕ ቲኑ ጉትፕ እምቢታማ አሌድስታታ አክምስ እርዳቴ ፄውⶓ ቶኬምካማ ቲኑ ጉትፕ ፋይስታው ዲብ ዋኽትጛማ እምቢታማ አግልግሎቴ ጄሜራያታ ካሲካ::

ካሜናንትካ እክምኒውሳ አግልግሎቴ አግፅጝስ ኻግስ ቡስትካማ እንዜጛኒስ ዳድዳ ካሜንጝስ ቹትካዳስታ ስራስሪዳ ታምባ ሺኹሳ ክርⶓ ይጉፃው ቲኑ ጉትፕ ግቢትስትጝስ እዝብ ማልጛ ዴስቲኒ አኽⶓ ድኹዌካ::

ቲኑ ጉትፕ ግቢትስቱኒውላ ዋኽትጙኽሳ እክምኔ እይጝስ ኩፅኒ አኹስታ ሜብራት እላ አኽጝስ ቲኑ ጉትፕ እክምኔ ሳሴርስ እያቲታ ፅንጋኻ  አኽⶓ ቶኬምካ::

እሊት ፅርባ ኬቤሊው ዝኩዋንታ ውበቴ አምሳል ኬቤሊዳ ቲኑ ጉትፕ ግቢትስታማ ዳቔርስትጝ ቹትካዳስታ ስራስሪዳ ታምባሺኹሳ እክምኒውሳ ችግሮ ይጉፃው አኽⶓ ዙሜካ::

ፌዩንኩ ጊዝካዳ እምፕልታቕ ዲጊዳ እክምኒውሳ አገልግሎቴ አግፅጝስ ቼጌርስታሺንኩ አኽⶓ ድኹዌካ:: እክምኒው ኾትሾ ታምብጝስ እምቢቴካማ እክምኔ አግፅጝስ ኬሻንኩ እሺንኩ አቕ ክርጝስ ታምባሺንኩ አኽⶓ ዊዛሩ ውብቴ ዙሜካ:: “አቕ ታክሲል ቑንዛስ ቑንዳስታኒ አኪም ጝና ታምብጝስ ሳሴርስ እክምኔ አግፅጝስ ካላና::” ናኒስ ቲኑ ጉትፕ ግቢትስትጝ እምፕልታቕስ እያውሳ ትክሞ ዲብስካ::

እንዴስ ቤዴራ ቑንዳስቱንኩሳ አቖ እክምኒ ኾትሾ ታምፅጝስ ቺጊርፄ ዳዶ እንዜጛሺⶓ ታክስጝስ እንሳ እምፕልታቑሳ ችግሮ እርዳትስታማ እዝብ ፋያውሳ ቲኑሳ ኾቶ ግቢትጝስ ኽሳንቲ ዴስቲ እንኮኽስትኩ አኽⶓ ድኹዌካ::

እምፕልታቕ ኬሽጙሳ ቲኑሳ አገልግሎቴ አግፃንታ እሊኩ ዲብካ ዋኽትጝጝ ፋይፃው አኽⶓ ዲብስካ::

አንኪሺ ጉዋጉሲ ወረዳ ቲን ፅፌት ጝናዳ ቲን ኤክስቴንሽኑ ኦፊሰር ቢረሳው ቢተው ወረዳታጊ ግቢትስትካማ ዝኩንኩ ኮምፕሬ ሄንሲቭ ቲኑ ኬላ እምፕልታቑ ቲኑሳ አግልግሎቴ ኬሽጝፅጝስ ኬፍቲኒ ትክም ዝኩኽ አኽⶓ ጌሌፅካ:: ፅርባ ኬቤሊ ግምጃ ቤት ኬቴምዴስ እቺታማ አግስታው አኽጝስ እምፕልታቕ እክምኒውሳ አገልግሎቴ ዲጊዳ አግፃንታ ፄውጝስ ፍሺ ኬፍንኹያኽ:: ምንድራሺው ወረርሽኝስ ማልጛ ቼጌርፃው ዙራሙሪ አኽጝስኪላ እምፕልታቕስ ጌና አግልግሎቴ እይⶓ ጄሜራውላ ኽሳንቴ ቴስፌ እይኹ ቲኑ ኾት አኽⶓ ዙሜካ::

ፅርባ ኬቤሊዳስታ እሊኩ ዎሌን ኬቤሊስጊ አገልግሎቴ እይጝስ ታክስስታማ ግቢትስትኹ አኽⶓ ቶኬሙንኩ አቶ ቢረሰው ግንባቲ 40 ትኩሚ 8 ሚሊዮን ብሩ ፍሺስ ግቢትስትⶓ ጌሌፅካ::

ግቢትስትኹ ኮምፕርሄንሲቭ ቲኑ ኬላ 2019 ም/አታዳ እክምኒኩ አክኽካዋ ዋኽትጝፅጝስ እንፅኼ ጄሜራው አኽⶓ ቶኬምካ:: ክልል እንፅኺ ጄሜርስታታ ፍካዶ እያኒ እምፕልታቕስ አገልግሎቴ እይⶓ ጄሜራው አኽⶓ ጌሌፅካ:: እክምኒው ሜሳርካዋ ባጀቶስታ አቒውሳ አይሎ ዋኽትጝፅጝስ ዴዴጝ ጊዝዳ አግልግሎቴ እይⶓ ጄሜራው አኽⶓ ዲብስካ::

ፅርባ ኬቤሊው ዝኩዋንትካ እክምኒውሳ አግልግሎቴ አግፅጝስ እቼ ዳዶ እንዜጝጝስ ቼጌርስታሺንኩ አኽⶓ ቶኬምካ::  ምንግስት እምፕልታቑ ቲኑ አግልግሎቲ ኬሽጛታ ሊሊትጙንኩ ቲንኩ ኾትካዋ ዲጊዳ ግቢትጝስ አግልግሎቴ እያታ ፄውስታማጊ አኽⶓ ዙሜካ::

ቲኑ ኾት አገልግሎቴ እያታ አኹስታ ሜብራት ፋይፃንቲ አኽⶓ ጉሹንኩ አቶ ቢረሳው እኒጛ ዋኽትጛንታ ጉዳይ ካንታኩ ኾትካሊ አብርታ እንፃኽስታንኩ አኽⶓ እርዳትፅካ::

ዳድ ኩሪስ ሺሽርስታማ አቤሌሽስትኹ አኽጝስ ዳድ ፄፂር ክቬማ እንዝርናንትካ እንዜጛንታ ፄውስትጝ ቱስታው አኽⶓ ቶኬምካ::