አብጂሊዳ ዝኩኽ ፍት

ንግስቴ ተስፋ

“ሹማጊሌ አጌርዳ፤ ኪሴ ሜንቤርዳ ሴጝፅምባ” ናው ቹዋ ታብሉ ድቕር ኽሳንቴ ኽዮስታ ክርፄ ትምኔቶ እሚኹ አኽጝታጊ ሚንችካው አንዴቤትዴስ ድሳቲው ድቕርያኽ:: ሹማጊሊ ዳቔሩኒዴስስታ አሬክጝፁኒዴስ አጌር አቑ ጋቻስታ ችግርኪላ ሳሴርስ ኽይስቴ እስታማ እምፕልታቑላዳ አምንስቴ::

ጋያኪ አዊ ብሄረሰቡ ቺፅጝፂዳ ዋሺኔኪ ጋቻዋስታ ችግሮ ሹማጊሊ ካንታውላ ፍርድ ጝናስታ ሊሊትጙንኩ እጋዊ ምንግስትካው ኾትካሾ ካስጝኪላ ክችክቻ ጋው እስታማ አምንስታውስታ ችግሮ ኽይጝስኪላ ውትኽትኺስታ ጊዞ፣ ጌንዜቦስታ ግርቦ ባኬንፃው አኽጝስ ጉዳዮ ዙራሙሪ ቺፋ ዝኩንኩ ኬቤርስቱንኩ ሹማጌል አሬክጝፃንታ ፄውጝ እምፕልታቑ ክምንትዴስ ክምንቶ ፌያፌይጙኽ እርኩ ቴርት ያኻማ እጄ::

አማኻሪ ክልልታኪላ ሊሊትጙንኩ ጋቻዋስታ እምፕልታቑሳ ችግሮ ኽይፅካ ሽምግልኒው ሴልካ ዝኩንኩ ያኺኒስጉ ዲጊ ጊዝስ ክልሉ ተክላይ ፍርድ ጝና ፅናቶ ካስጝፅጝስ እጋዌ አቕስቶ እይጝስ እግስስታ ሜሜሪስ ይስጜካማ እንፅኼ አኮሜቻንታ ፄውስቱንኩ ባይላዊ ሽምግልኒው ፍርድ ጝንካዴስ 15 እንፅኼ ጄሜራንታ ፄውስታ::

ባይላዊ ፍርድ ጝንካ ጋቻዋ እርክስ ኽያንኩ፤ ቑሎስታ ብሬ ዙርፅጜ ሻራንኩ አኽጝኪላ አምንስታ:: ጌንዜቦስታ ጊዞ ክብስጝስ ዊፃንቲስታ ዊፅስታንቲ ዝኩዋውላስ እርክስ ሰላሞስታ እንካንጜኪላ ቼሜትጝፃና:: እምፕልታቕ እጉሳ ካራካርጜ ባይላዊ ፍርድ ጝንካሾስ ኽይጝ ጎሌልስታንቲስታ ውኖስታ ክችክቼ እምፕልታቑላዳ ዝኩኽሳ ማቤራዌስታ ይኮኖሚያዌ ጋቻዋ ሳሴርስ ኽይጝስኪላ ካሊፃው አኽⶓ ተክላይ ፍርድ ጝናሱ ማቤራዊ ፍንዴስ አግፅኑኽ ንቫር ቶኬሜ::

ዚጋሚ ወረዳዳ እምፕልታቑላዳ ፌቴርስታውሳ ጋቻዋ ኽይጝስ ሼሌቻኑላ እርኮ ጌምፃንኩ ወረዳው ሹማጌልካ ክቻዴስ አቶ እንግዳው በላይ 14 አሜታዴስ ጃላ ሹማጌልካማ ሚንችካውሳ ችግሮ ኽይጝስ ታምቦ ፊትጜካማጊ አግስታና:: አቶ እንግዳውስታ እሊኩ ሹማጌልካ ቤዴራ እምፕልታቕ አምኔካማ ሹማጌላንታ እዩኑሳ አዴሮ ፊትጜካማ ናኪኔ ወክቶ ታምፅካ:: ናኪኒ ወክትስኪላ እጋዊ ዳድስ አቕስቲ እይስትኹ ባይላዊ ፍርድ ጝናስ ሹማጌልካ ጎሌልስታኒስ ጛው ኬቤሊዴስ አንኩዋ ሹማጌልዴስ እምፕል አኽጝስ እምፕልታቕስ ጎሌልስትጝስ ሹማጌልቱሳ አዴሮ ቻቤልካማ እንፃኽስስትካማጊ አግስታና::

አቶ እንግዳው እዩኑ ካንቲዳ ቤዴራ ባይላዊ ዳድስ እንፃኽስስታሺኑ እርኩስታ ሹማጌልቱ ቴግባር አቕስቶ አግፃማ ይስጛማ ሲፍጝ ኽስኹስ  እምፕልታቑላዳ ዝኩኽ ችግር ሰላምስታ ዊዳፊስ ኽዮ አግፃታ ካሊፃው አኽⶓ ጉሽካ::

ፍርድ ጝና  ማስረጂዳስታ ምስክርዳ ሞሬኬዝስታማ እያው ውሳኒ ዊፃንቲስታ ዊፅስታንቲ ዝኩኽ አኽጝዴስ ፌይኹስ እምፕልታቑላዳ ዝኩኽሳ ውኖ ማሊጝስኪላ ቼጌርፄ:: እን ኩፅኒ ችግርካ ባስጜካማ ሲፋንታ ዳዶ ብሳው አኽⶓ አቶ እንግዳው ዲብስካ:: ሹማጌል ኩፅኒ ቤዴላንቲሊስታ ቤዴልስታንቲሊ አብርታ ዝኩኽሳ ጉዳዮ ሳሴርስ ማላንኩ አኽጝስ ላንጊሱሳጊ ችግሮ ፍሽካማ እርክ ጌማታ ፄውጙ እድል እሳን አኽⶓ ድኹዌካ::

ጛርት አቑ ጉዳይዳ ፌቴርስታንኩ ጋቻው አይኔትካዋጊ ካንትካማ ሹማጌል አሬክጝፃንታ ባይላዊ ፍርድ ጝናሱ ሜሜሪ ስልታኖ እያው አኽⶓ ቶኬምካ:: ቤዴራ እምፕልታቕ ፍርድ ጝናሾ ካስጝስ ባኬንፃሺኑ ጊዙስታ ጌንዝቡ ክሳሪኪላ ኔኬትጝስ ካላው አኽⶓ ዙሜካ::

አቶ ወርኩ ካሳኪላ ክላጅ ኬቴሙ ዝኩዋንቲ ያኻኒስ 20 አሜታዴስ ጃላ ሹማጌላ አኽጝስ እምፕልታቖ አጌላጌልካማጊ አግስታና:: ፌዩንኩ አሜትካዳ እርኩሳ እንፅኼ እንፃኽስታኒስ ሚንችካዋ ዴኔክፃውሳ ጉዳዮ ኽይጝስ ካሉንኩ አኽⶓ ታክሳና::

ጛ ዜኔጋቲኑ ጉዳይዴስኪላ ላጛሴና ውርሱ ብቲዳ ጌዌስጜካማ ኩትጚስ ፋይጛኑ ጉዳይ እሺⶓ ድኹዌካ:: ተክላይ ፍርድ ጝናሳ ኺስታ ካራካርጜካማ አስሚምጜ አቱኑሳ ጉዳቶ ሹማጌልካማ ሴላምስታ ጉዳዩ እርክስ ዊድካማ ናካዳ ላጛሴንቱ እንካንጚስ ዝኩዋንታ ፄውንኩ አኽⶓ እንክርፄካ::

አቶ ወርኩ ካሳ እዩኑ ካንቲዳ ባይላዊ ፍርድ ጝናሳ ካስጝፃኑ አርፊዴስ ሲዚ ጌርካሳ ቴኬምስትካማኽ:: ሚንችካውሳ ጋቻዋ ሰላማዊስታ ፍታዊ ያኹኽ ዳድስ እዝቦ አጌላጌልካማጊ አኽⶓ ቶኬምካ:: እዝብ ፍርድ ጝናዴስ ኪቻ ባይላዊ ፍርድ ጝና እያውሳ ሹማጌልካውሳ ውሳኔ ቻቤላማ ቴግባርዳ እሽፅጝስኪላ አሱቲኒ ምስክርስታ ብሬ ዙርፅጚው ጉዳይ ኔኬታማጊ አኽⶓ ድኹዌካ:: ወረዳው ፍርድ ጝናኪላ ባይላዊ ፍርድ ጝናሱሳ ሜሜሬ፣ ፋይፃንቶስታ ዋትጜ ቴግባርዳ እሺው አኽⶓ ስልታኔ እያማጊ አኽጝስ ሽምግልኒው ባይል ይስጛማ ሲፍⶓ ዙሜካ::

ዊዛሩ አቨቫ ሽፈራው ኪላ ግምርና ዋግሳት ኬቤሊው ዝኩዋንታ ያኻኒስ ዙራሙሪዳ አቖ አሬክጝፅጝስ አቕስታንኩ ኹን ሹማጌልካዴስ እምፕላኽ::

ዊዛሩ አቨቫ ናኑውስታጊ ጛ አግስታኑ ኬቤሊዳ ሚንች ጊዝስ አራኹናውሳ ጋቻዋስታ ውርሱ ንብሬትዳ ካንትስታውሳ ጌውስጜ ሰላምስስታ ታክስጚስ ኽይስታታ ሹማጌልቱሳ እንፅኼ እንፃኽስታንኩ አኽⶓ ድኹዌካ:: ጋያኪ “ኹን ቤዴልስታኒ ሳቔና ካፃላ” ናንኩ ዊዛሩ አቨቫ ኹኑ ሜብት ኬቤርስታታስታ ጋቻ ፌቴርስታቲታ ሹማጌልቱ እንፅኺስ ሚንችካውሳ ሴንቴ አሴስጝስ ዴስቴንካ አኽⶓ ቶኬምካ::

ዙራሙሪው ባይል ሚንች ጊዝ ኹንዳ ቻኒስቶ ፌቴራው ዳድ እሳን አኽጝታጊ ኹን ቱስት ጋቲታ ንብሬቶስታ አብቶ አታቲንታ ሹማጌልቱ ባይል ቴኬማው አኽጝስ ጛኪላ እዝብ አምናማ እይኹሳ አላፍቶ ቱስቲስ ፊትጜካማጊ አኽⶓ ዙሜካ:: ኹን  ሌዋፃንጌኻ ቤዴሎ ካንትጝስ እምፕልታቖ አስሜምፅጝስ ካላው ትቬቭ ዝኩክ አኽⶓ ድኹዌካ:: እዝቡ ቻቤልጚስኪላ ዴስቴና አኽⶓ ጉሽካ::

ዚጋሚ ወረዳው ፍርድ ጝናሱ ፕሬዝዳንት ሳሙኤል የኃላ ወረዳታ 20 ኬቤልካዳጊ ክምንትዴስ ክምንቶ ፌያፌይጙስ እጂኹ ሽምግልኒው ባይል ወረዳታ ፍቱ እይጚዳ ኽሳንቴ ታምቦ ፊትጛማጊ አኽⶓ አቕፄካ:: ፍርድ ጝናዴስ ኪቻ ሹማጌልካስ እምስትኹ ጉዳይ ውኖ ፍሽጝዳኪ ያኻ ጋቻዋ ኽይጝዳ ኬፍቲኒ ታምብ ዝኩኽ አኽⶓ ቶኬምካ::

እን አኽጝስ ባይላዊ ፍርድ ጝና ቲሪትጛማ እዝብ አጌላጌልስታታ ፄውጝስ ሜሜሪስታ አዋጅ ቴርታማ እንፅኺ ጄሜርስትⶓ ጉሽካ:: ወረዳታ 18 ኬቤልካዳ እምፕልታቕ አምናኩ፣ ሹማጌልቱ ቴግባርስ አምንስቱንኩስታ ቻቤልስታንታ ያኹንኩ አንኩዋ ሹማጌልካ ኬቤሊቺፋ ጎሌልስትካማ ፍቱሳ ክችክችቶ ቼሜትጝፄካማጊ አኽⶓ ጌሌፅካ::

ሹማጌልካ ጉዳዮ ያቑንኩስታ ውኖ ፍሽጝስ ቼጌርስታቲንኩ አኽጝስ እዝቡሳ ክሬቴ ኽይጝስ ካላኑ እድል እሳን አኽⶓ አቶ ሳሙኤል እርዳትፅካ::

ባይላዊ ፍርድ ጝናስ ዲጋንኩ ጉዳይካ ጛርት አቑ ጋቻ፣ አብት ንብሬትዳ ዲጋውሳ ጋቻዋ ካንታንታ ሜሜሪ ስልታኖ እይⶓ ኽይትጝፄካ::

እምፕልታቕ ላጛ አሜታዴስ ጃላ ክርክሪስ ፍርድ ጝና ዙራዚራኒስ ጉዳዮ ሹማጌልካ ላጛ ጌርካዴስ እንፃያሱ ጊዝስ ችግር ኽይጝስ ካላንኩ አኽⶓ ጉሸካ::

ዊዳፌ ሰላሞስታ እርኮ ጌምፅጝስ እምፕልታቑ እምፕልቱሳስታ ኬቬቬርጛማ ዝኩጙ ባይልስኪላ ባይላዊ ፍርድ ጝና ፋይፃንቲ አኽⶓ ጌሌፅካ::

ምንግስት ባይላዊ ፍርድ ጝና ቲሪትጛታ ፋይኹኪላ ፍርድ ጝና ኽይጝስ ካላቲውሳ ጉዳዮ ሹማጌልካ እጂኹ ቹዋ ታብሎ ሽምግልኒው ሴልስ ችግሮ ኽይጙ ዴስ አጌራስ ኬፍቲኒ ታምብ ዝኩኽ አኽታጊ ግምትዳ ሚፅጝስ አኽⶓ ጉሽካ::

ክልሉ ተክላይ ፍርድ ጝናሱ ፕሬዝዳንት አለምአንተ አግደው አሚኮ ዲጂታልስ እዩኑ ኽይትጝፂዳ ክልልታ 15 ባይላዊ ፍርድ ጝንካስ አቕስቲ እይስታማ ይስጜካማ እንፅኼ ጄሜርⶓ ጌሌፅካ::

ክልልዳ አግስታንኩ 1 ሻይ 170 ኬቤልካዳ 5ሻይዴስ ጃላ ባይላዊ ዳኝካ ጎሌልስትካ:: ጎሌልስቱንክ ባይላዊ ዳኝካዴስ 4ሊኻ ያኻንኩ ኹን ሹማጌልካ አኽጝ ጌሌፅስታ::

ፕሬዝዳንት አለምአንተ ጌሌፁኑውስታጊ ክልልታ ፌቴርስታንኩ ሊኽዴስ 43 ታፋ ያኻንኩ ጉዳይካዋ ባይላዊ ሽምግልኒስ ኽይስታንታ ፄውስታማጊያኽ እንፃኽስትጜ አዋጅስስታ ሜሜሪስ ዴጌፍስታታ ፄውጝኪላ እግስታ ባይል ቴርቴራ እንዜጜካማ እዝቡ ቴኬምስታንትስ እንፃኽስታንታ ፋይፃንቲ አኽⶓ ኽይትጝፄካ::