ውላጊ ታምቦ ፊትጝኔስ!

አውጚ ሚዲያው ኮንኪ ያኹኒዴስ ልቓ ጊዝ እስትጝስ ካላቲውሳ ድሜ ቼፍፃ:: ራዲዮንስ 20 አሜትዴስ ጃላ፣ ጋዚቲስ 15 አሜትዴስ ጃላ ፣ቴሌቪጅንስ 10 አሜታስታ ዲጂታል ሚዲያስ ዴሜካ ዲጊስ አውጚውሳ ኮንኬ ዙማንትካስስታ ቹኒታንትካስ ንቫሮ ታምፃማጊያኽ::

አውጚ ቴለቪጅንስ ፌያፌይጝⶓ ጄሜርኹ ጊዝዴስ ጉሽፃማ ኮንኪው ልግስስ፣ ባይል፣ ወግስታ ታሪክ ድሳቲታ ፄውጝስ፣ ባይልኩ እሴትካ ክምንትዴስ ክምንቶ ፌያፌይጛንታ፣ እምፕልታቖ ክንትፅጝስስታ ፍትኽፅጝስ ኬፍቲኔ ታምቦ ፊትጛማጊያኽ:: ጌና እንፃኺት እንዝጛዳ አግስታው አውጚው ቴሌቪጅን 10ንቴ አሜቶ ቼፍፃ::

አሚኮ ህብርዴስ ፌያፌይጛው አውጚ ቴሌቪጅኑ ቴርት ቤና ናካ ሚንችካ እምፕልታቑ ንቫሩ አግፅፂያኽ:: ፅካ አሜቱ ቴሌቪጅኑ እንዝጚዳ ባይሉስታ ኮንኪው ልግስኒዳ እምፕሎ ፋንቲቴ ፍንሾ እንዜጛታ ፄዋ::

“አውጚው ኮንኪ ብኖ ካይፃላ” እስታማ ኮንኪዳ እሺኹ ቻኒስት ኔኬታ ንጝ ካሊስቴ:: አኽጝስኪላ ሚንችካ ዋታትካስ ኮንኪ እሳንስ ዙሚስታማጊ አግስቴ:: ግትም፣ ልብወለድ /ሼው ፊቲሪ/ ፁፍስታ እሊኩ ፅፍ ፅንታኩ እንፅኽካ እሳንስ ፃፊስትካማጊያኽ:: ዎታትካ ኮንኪው ልግስስ ኩርፅስ ጁዌካ:: አውጚስ ፊልሞ እንፃኽስስታ:: ክንቲዳኪላ ያኹኒ ዩንቨርስቲው አችስ ዲግሬኺስታ  እይስታማጊያኽ:: እንሳ አቾ ታምብጝስ ሳሴር ፅሬት ፄውስትኹ ጋቲዊያኽ:: እኒጛ አጉዊዳ ዛራዛርስቱንኩ ዲብካጊ አውጚ ሚዲያው ኮንኪ አኽጝስ ይንቱንኩ ኪስካኽ ናማ ዲብስጝስ ዴፌርፄ::

ያኼስጉ ሚዲያስ እምፕልታቑ ፋይ ኩፅኒ ዴሜካማጊ ይንታ:: አውጚው ፕሮግራምካ እሳንስ እንፃኽስታንታ ፋዬ፤አይሩ ሳት ዴሜካታ ካሴ፤ አቕስትካያስኩ ስፍርካዋ አቕትጝፅጝስ እንፃኽስትጝ ቹዋ ጉዳይ ያኻጝ ቱስታዉ አኽጝ ካሲስታ::

ኮንኪው፣ ባይሉስታ ታሪኩ ልግስኒስ ሚዲያ ይቪቺ እንፃኽስታው እንፅኺ አኽጝ ቱስታላኽ:: እምፕልታቕ ጛጂዴስ ማንዲስታውሳ ቴግባሮ ፊትጝጝ ዝኮ:: ስራስሪ ኮንኪስ ዙማንታ ፄውጝ ቱስቴ፤ ባይሎስታ ታሪኮ አቕትጝፅጝ ፋይፄ:: ውላጊ ታምቦ ፊትጛኒ ቴሌቪጅኑ ልግስኒስ እምፕልታቑ ፋይታ ዴሜካማጊ ካሴ::

ትክላሊስ አውጚ ቴሌቪጅን እምፕልታቕስ ሚንችካ ትክምካዋ እዬ:: ፖለቲካው፣ ማይቤራዊውስታ ይኮኖሚው ጉዳይካዳ እሳንስ እንፃኽስትጝስ ፅሬቶ ፄዋማጊያኽ:: አኽጝስኪ አውጚው ቴለቪጅኑ ልግስስ ውላጊ እኑሳ አላፍቶ ፊትጝጝስ እምፕልታቑ ውላቱዊ ልግስ ቼሜትጛታ ታምቦጊ ፊትጝኔስ!