ውላቱዊ ትቪቪኒ

ግትሙስታ ዜሚው ፃፋንቲያኽ:: አዊ ባይሉስታ ኪነ ትቬቩ ኬችዳ ዴሜካ ጅማንቲያኽ ዎታት ወ/ማርያም ጌታሁን:: ዎታት ወ/ማርያም አዊው ባይል፣ ወግስታ ታሪክ አቕስታታ ፄውጝስ ሊሊትጙንኩ ትቬቭኩ እንፅኽካዳ አሴቴፍጛው ኩሚቺ ትቪቪኒያኽ:: አውጚስ ሊሊትጙንኩሳ ጅምካዋ ጅማ:: አንታጉ ፊልምዳ ቴዌናንቲ ያኻማ እንፃኽስታ:: አዊው ባይሉስታ ኪነ-ትቬቩ ኬች ኬሽኹ አችዳ ታምባታ ጚው ታምብ ኬፍቲኒያኽ:: ዎታት ወ/ማርያም ሊሊትጙንኩ ጅምካስ ግትሞስታ ዜሜ ቴርስጝዴስ ድምክና ልቦለዱሳ ፁፎ ፃፋማ አቴምፅጝስ ቴርታማጊ አግስቴ::  አሚኮ ህብር አውጚው ቴሌብዥንሊ ፄውኽሳ አንቤብፅⶓ ፋኑኻ:: ክርፂ ንባብ ያኽይምባ::

አባላምቲዳ ጅሚሾ ትይኹ አጋቲሚ ዋትጜይ?

እንፃኺቱ ጊዝዳ ዝኮስኩስ ጅሜ ጅምጝስ ማልጛ ፋይ እሺኾ:: ክምካዋ ማንታታጊ ጅምⶓ እንካኔ:: ጅማንቲ አኽጝዴስ ፍና እሊው እንፅኺ እሺኾ:: ፅካንቲ ቤንዴስ ክንቴ ኬውጝፁኒዴስ ፋሌንጋ እምፕሎ አሜቶ ቴክኒኩስታ ውማዩሳ ክንቴ ክንታታ ሜብራት አይሉ ውማይቲኒ አኽጝስ 2 አሜታሳ እንፃኽስታ:: ሜብራት አይሉሳ እንፅኼ ባይፃታ ኩፅኒ ቲሊሊዳ ፋንግ እስታው ባይሉ ኬችዳ አሌቔትጙኻ:: ግትሞስታ ዜሜ ፃፊጝስ ይውሳ ጅሜ ፍሽኾ:: ዱምባ ናው አባላምቲ ጅሙኽ ጅሚያኽ:: አንዴስ ፋሌንጋ ኩፅኒ ጅምጝስ ማልጛ ጁትጙኻ::

አባላምቴ ዱምባ ናውሳ ጅሜ ጅምቱኒዴስ ፋሌንጋ እዝብ ዋትጛይ ቻቤልኹይ?

እዝብ አይሎ እሺኾ እንካንኹ:: አባላምቴ ጅምኹ ጅሚ አኽጝስ ጅምጙ አይኔትጊ ማልጛ ዴስፃው እሺኾ:: እንፃኺቱ አክምስ ጅሙኽ አኽጝስ እዝብ አይሎ እንካንኾ:: ዱምባ ናታ ጅሙኽስኪላ ድምባ ኩፓሪ ንካማጊ እቑዌና:: ናካ ሱኺቲ አሜታ ያኻ ዱምባ ናውሳ ጅሙኽ:: ላንቡሳኺስታ ዜኔግስታያሱ ጅሚያኽ:: ዱምባ ንጝኪላ ሜልካማ፣ ልግዳ፣ ውላ ዋኽትጙት ንጝታኽ:: እሊው ኽይ ዴሜካ “ዱምባ” ክምካው ስምያኽ::

ዱምባዴስ ሲፍፄታ ጁምትኹ ጅሚሳ እንዳራ ናው እሺኹ?

ዱምባ ናው ጅሚዴስ ፋሌንጋ ሰሜኑ አጌሩ ቤንዳ እሺኹሳ ጋቻ ካንትኹስ “ሀገሬ ሚስጢሬ ይቶፒያ” ናውሳ አማኻርጚውሳ ጅሜ ጅሙኻ:: ላንጊጊ ኮንክካ ዙሚስታው ዙራሙሪዳ ሌጌሱኻ አኽጝስ አማኻርጚ ኮንኪስ ጅምጝስ ቼጌርስታያ:: አማኻርጚው ኮንኪስ አጌራውሳ አኺኔ ካንትፃውሳ ጅሜ ጅምጝስ ካላ:: ይቶፒያ ናው ጅሚዳ አጌራ ጋቻሾ ትይኹ እሊኩ አቕስ አኽⶓ ካንትፅጝስያኽ:: ይቶፒያ ቲሪትጝትኹ ስርኩኒ አቕስታቲው አኽጝስ ጋቻስ ይቶፒያ ፌሬሳቲት አጌራ አኽⶓ ጌሌፅጝስ ፋታታ ጅምኹ እሺኾ::

ዲጊስ ዴሜካ አይሞሎ ናውሳ ጅሜ ጅምታ:: አይሞሎ ኔታ ጅምትኹሳ እንዳራ ካንትፅጝሲይ?

አይሞሎ ናውሳ ጅሜ ጅምጝስ ሚንቾ ዴሬታ:: እንጃቢሪ ዩንቨርስቲስ፣ ታሪክኩ ምሁራንካስጊ ጋማጋምስታማ ሚንችካ አቕ አሴቴፍጙኑ ጅሚያኽ:: አኽዳ ካንትፅጝስ ፋትኹ እሚኪላ ላኹኪ ባይሎ ካንትፅጝስያኽ:: ላጛኒ ዴሜካ ፌሬስቴንካው ባይል ኬቤርስቱስ አይሞሎ ንጝስ ጋሼስታ ዜንጎ እሚጝሰ ፄውስታውሳ  ቴርቶ እዝብስ ካንትፅጝስያኽ:: አገው እዝብ ሚንቾ ታሪኮ እንፃኽስትኹ፣ ሚንች ጌድል ዝኩኽ አኽⶓ ካንትፅጝስ እንፃኽስትኹያኽ::

አይሞሎ ዋትጛ ቲሪትጙኽይ?

ፌሬስቴኑሳ ማቢሬ ቲሪትጝፁኑሳ ጄግንቶ ካንትፅጝስ እንፃኽስትኹያኽ:: አቖ ካሲጝስስታ ታሪኮ አንቤብጝስ ጅምጝስ ካሉኽያኽ:: አይሞሎ ናው ሚንችካ ጅማንትካስ ጅምስቱኒውላ እንክሬ ካንትፃዉጃማ ምንጊሱሳ ታሪኮ ካንትፅኹ እላ እሺኾ:: አይሞሎዳ ቶኬምስቱንኩ ኽሳንትካ አቑ ታሪክ፣ ዎሬሞ ጉሱንኩ ጄግንካዋ፣ ክሩንኩ አቑሳ ስሞ ታክስጝስ ጛው ስም እቑስታታ፣ ፊሪሲሊ ካስጝስ ዎሬሙ ግንባርዳ ክሩንኩሱሳ ታሪኮ አቕፅጝስ ጅምስትኹያኽ:: አገው እዝቡ ታሪክኪላ ላጜታ ደኪካው ጅሚስ ዊድስታላ::

አዊው ባይሉስታ ኪነ ትቬቩ ኬችዳ አሌቔትጝታታ እንዳራይ እንፃኽስቲኹ?

አዊው ባይሉስታ ኪነ ትቬቩ ኬችዳ አሌቔትጙኽ 2014 ም/አታዳኽ:: ኬችዳ አሌቔትጙኒዴሰ ፋሌንጋ ይጛርትጛሳ ሚንቾ ኪሳ:: ባይሉ ኬችስኪላ ካሊስታውሳጊ ፄፓታጊ አግስቴ:: አዊው ባይሉስታ ኪነ ትቬቩ ኬች እሊውዴስ ሊሊትታው ግትሞስታ ዜሜ ፌቴርጝስ እንፃኽስትጝሲያኽ:: ይው አክምታጊ አውጚስ ያኻ አማኻርጚስ ግትሞስታ ዜሜ ቴርስጝስ ጅሜ እንፃኽስቴ:: ላንቡሳኺስታ 10ዴስ ጃላ ያኻንኩ ሜድሬኽኩ እንፅኽካ ዝኩና:: እሊኩስ ግትሞ ፃፋያኒ እንፃኽስትኹጊ ዝኮ::

ትቬቩ እንፅኺዳ ውላዳ አሴቴፍጝⶓ ፋቴ::  ግትሞ ፃፌ፤ ፊልምዳ ቴዌናንቲ አኽጝስ እንፃኽስቴ:: እንፃኺቱ አንኩሊዳ ኬሬፅስትኹ ዲብ ዝኮ:: አክሞ አግፃኒ  አቴምፃዉ ልብወለድ ዝኮ ::

ሉላ ናው ጅሚዳ ጌሌፅጝስ ፋትኹ ቹዋ እንፅኼንት እንዳርማይ?

እንጃቢሪውኪ ዳሙቴ ቱዋውላ

ሚቲኪሊውኪ ጎንዴራ ቱዋውላ

ማርኮሱ አቒ አዋኾ ይንታውላ

ዳር ድንግራይ ያኼ

ውላማ ድኼ::

ናንኩ ግትምካዳ እንዴስ ፍና እሺኹ እምፕልት፣ ታሪክ ዋትጛይ ድኼ:: አስሜምጝናና ዝኩንስ ናውሳ እንፅኼንቶ ፌያፌይጝፃዊያኽ:: “ሉላ” ማልጛ እዝብሰ እንካንስታው ጅሚያኽ:: እዝቡሳስታ ይውሳ ግትሞ ጅምጝስ እዝብ እንካናውሳ እዝብስ ዲግሳ::

ሼዉ ፊቲሪ/ልብወለዱሳ/ ፁፎ እትሜትስ ቢኪፄማ?

ልብወለድ ፃፊስትኹዴስ ሚንች ጊዝ ያኻ:: ፃፊስታማ አሌድስታ:: እንጃቢሪ ዩንቨርስቲው አገው ፅናቱ ኢንስቲትዩትስ ጋማጋምስታማ እንኩርስታ:: ፍንሾስ አክሞ አግፃኒ አቴምፃዊያኽ::

ፍንሾስ እንዳር እንፅኻስ ማንዲንሲይ?

ፍንሾስ ሚንቾ እንፅኼ እንፃኽስትጝስ አሴፓታጊያኽ:: ናካ ክንታንቲ አኽጝታጊ ቼጌርፃንኩ ዲብካ ዝኩና:: ክንቴ ዊቱኒዴስ ፋሌንጋ እንፃኽስታኩ ሚንችካ እንፅኽካ ዝኩና::

አሜሴጌንታኩ አቕ ዝኩኒ ዲግስጝስ ካሊ?

ቹዋ ታብል ክንትፁንኩስ  እን አችዳ ታምባታ ፄውንኩ ጝን አቕስ ኬፍንኹ ምስጋኒ ታምባይሰ:: ሲፍፃማ ዴሜካ አሳብስኪ፣ ጌንዜብስኪ እርዳቱንኩስ ምስጋኔ ዲግስⶓ ፋቴ:: ውላዴስጊ ጃላ ዴሜካ አድማስ ዩንዬንኩ እንፃኽስታንትካስ ምስጋኒ ዲጋይሰ:: አይሞሎ ናውሳ ጅሜ ፍሹስ ሚንቾ እርዳቱንኩያኽ:: አቶ መሰረት ወርኬዋስታ ፃፋንቲ አብዩ ቻኔያለውስ ኬፍ ንኹ ምስጋኒ ዲጋይስ::

ሊንጊዳ ታኹኽስ አይሎ አሜሴጌኔ?

አንኪላ ማልጛ አሜሴጌኔ::

ታደለ አጋጄ