“ሽብራ እንካኒ አን ክታኒ አኹ ስራዳ ዴፓን ኔ”

“ሼው ዌና ቼሜቴ ዊሪ ዌና ሾሜቴ” እስታው እጂኹ ምሳሊ ዙማ ናኪኒ ዝቤንሊ ካንትጝፅናኒ እንግልቪቺ ያኻማጊ ይንታ:: ዊሪ ይጉዋማ ዝቤን ያጉኽ ሹኻ ኪሎስታ ሲዚ ኪሎሳ እሜው ፔስታሎስታ ኪሪፂቴ  ዋኻማ ሾሜትስቱስ ካንትጝ ሚንችካስ ብርካ ያኻማጊያኽ:: ጌርክ ቺፋሱሳ ኬሌቦ ሾሜትጝሱላ ጌቤል አምፓ ታምባማ እምስታላ ና::

ስልኪስ አሳብ እዩንኩ ዊዛሩ ንብረት ደመላሽ እንጃቢሪ ኬቴምዳ ፃንኩፅጙ ምንግስቱ እንፅኺስ አግፄው ደሞዚስ ዝኩዊኔ ጉስቴ:: አርፊ ቺፋ ኬይስታው ደሞዚዴስ ጝኑሳ ክራዮ ኬይጝዴስስታ አርፊውሳ ኬሌቦ ታፊ ጄውጝዴስ ፌያቲው አኽⶓ ድኹዌካ:: ትራንስፖርትስ፣ እክምኒስ፣ ማቤራዊ ታምትጚስ፣ ጝን አኻሱ ልሻኹዋ ቺዊስስታ ስይስ ያኻውሳ ጌንዜቦ ደሞዚዴስ ፊቲስጝፄካማ ቴኬምስታሺንኩ ያኹኒውላ ጌርክ ቺፋ ድንቤሮ አቱኽ ዴሜኩስ ጃጊ ኔኬቱስ ካንትስታቲው ጌቤሉ ክብርናቲ ኩፅኒ ጛውሳ ዝኩዊኔ ፃንጌኽፃ:: ምሳኾ ኹዌካማ እርባቶ ኹጝስ ጌንዜቦ ቼጌርስታሺኑሳ ጊዞ ፌይፅካ::

“ሽብራ እንካኒ አን ክታኒ አኹ ስራዳ ዴፓን ኔ” ኑንኩ ዊዛሩ ንብረት ናኪኒ ወክትስ አጌርታኪ ያኻ ክልልታ ዝኩኽ ሰላሙ ችግር ጊፁ ልቕልቕቲዳ ቻኒስቶ ፌቴርጝ ዝኩታ ያኻማ ፌይካ ፌይካማ ጌቤሉ ክብርናቲ ባስጛታ ፄዋንኩ ጌፄን ቴሮ እሚጝ ፋይፃው አኽⶓ ዲብስካ:: ውስክሞ ፋያማጊ ዋይሜ ዴሜክጝኪላ ክችክቻ ጋቲው አኽጝስ ትኩታው ቤን እጎ ኬቤርፃማ ክብርናቴ አሬኬዝፅጝ ቱስታው አኽⶓ ቶኬምካ::

እምፕልታቕ ዴሜካ ቱስታ ጋውሳ ዋይሜ ዴሜካንኩ ጌፄን እግስ ካሲስታንታ ትኩታው ቤንስ ትኮሜ እይጝ ማንዲስቴ ንካ::

ዜሬቕቲኒ ሚፂ ዝኩክዳስታ ምንግስትኩ እንፃኽስታንትካዳ ጌቤሉ ክብርናቲ ቻኒስቶ ፌቴራማጊ አኽጝስ ችግሮ ኽይጝስ ግብርኒኩ ምርትካ ሾሜታንትካው ማቢሪሾስ ፌያፌያማ ዲጋንኩ አኽጝስ ቴኬምስትካማጊ ያኹኒውላ ኢንዱስትሪኩ ምርትካው ዋይሚ ኩፅኒ አክምዴስ ጃላ አኽⶓ ዊዛሩ ንብረት ድኹዌካ::

ምንግስት ይስጙኽሳ ቼፍጜ ካስጝፅጝስ አላፍቶ ቱስቲስ ፊትጛማ እምፕልታቑሳ እሌት ቼፋሱ ዝኩዊኔ ቴስፌ አቲስኹ ጌቤሉ ክብርናቲ አሬኬዛታ ፄውጝ ፋይፃው አኽⶓ ካንቴ እይካ::

እምፕልታቕኪላ ዝኩዊኒውሳ ክብርናቴ ቲሪትጝጝስ  ፊቲ ጊዝስ እንፅኼ ፌቴርካማ ሚፄ ሌጌፅጝስ ዝኩዊኒውሳ ፋዩ ዋኽትጝፅጝስ ካላኑሳ ሴሎ ፌቴርጝ ፋይፃው አኽⶓ  ካንቴ እይካ::

አቶ ስንታየሁ ሽፈራውኪላ እንጃቢሪ ኬቴሙ ዝኩዋንቲያኽ:: ጌቤል ጌርክ ቺፋ እፅፍስ ዴሜካማጊ ካስጝ ማቤራዊስታ ይኮኖሚው ልቕልቕቲዳ ቻኒስቶ ፌቴርጝስ ዝኩዊኔ እክድስ ጉስጝስ ቼጌርስትካ::

“አርፊስ አግስታው ደሞዚ ታፍዳ ልኩዳ ታምባላ፤ ስርኩ ፋይካዋላ ዋኽትጝፅጝስ ካሊፃላ፤ ዝኩጝስ ቓሊፃላ፣ ቴስፌ አቲሴ” ናንኩ አቶ ስንታየሁ ጌፄን ምክንያቶ ፋየካማጊ ዴሜካኒ ዋይሚው ክብርናቲ አጌር አቑ ልቕልቕቲዳ እንዙራኽ እስታቲውሳ ቻኒስቶ ፌቴራማጊ አኽⶓ ዙሜካ::

አቶ ስንታየሁ ጌቤል ኬቤርኾ እናና ድጙትጝኑኒ ቹኒታማ ጌቤሎ አሬኬዛፃውሳ አቲናናጊያኽ ናኒስ ችግሩሳ አቾ ቶኬምካ::

እንዳ አሜትዳ ግብርኒ ምርትካው ዋይሚ አሬኬዝጝስ ሞኬራማጊ ያኹኒውላ ዘይት፣ ሽኩዋር፣ ሳሙኒ ጝንኩ አክኽካስታ ዝኩዊኒስ ፋይፃው ጉዳይጊ ዋይሚውሳ ድምክኔ ፄውጝዴስ ፌይኹስ ኔኬቱስ ካንትስታቲው እምፕልታቑ ፍቱስታ ቺፅጝፂው ኽሳንቲ ችግራ ያኻማ ሲፍⶓ ጉሽካ::

ውትኽትኻ ያኹኽሳ ጊፁሳ ልቕልቕቴ ክቶ እምፅጝስ ምንግስት አጌር አቑ ዝኩዊኒው ሜብትስ አላፍቶ ፊትጛታ፣ እምፕልታቕ ዴሜካ ታምቦጊ ፊትጛንታ አሳቦ ዲግስካ::

አዊ ብሄረሰቡ ቺፅጝፂ እንጃቢሪ ኬቴሙ ቺፅጝፂ ጊፁስታ ጌቤል ልማት ፅ/ጝናሱ አላፊ አቶ በእውከት መኩሪያው ወክት ያጋውሳ ችግሮ ሲፋማጊ ዋይሚውሳ ድምክኔ ካንትፃውሻው ጌቤሉስታ ጊፁ ልቕልቕቲ እምፕልታቑ ፍቱ ካሲ ያኻማጊ አንትⶓ ጉሽካ:: ኬቴሙ ቺፅጝፂኪላ ችግሩ አች ባስጛማጊ ዝኩዊኒው ስጋታ ያኻማጊ አንትⶓ ሲፋማ ጉዳዮ አሬኬዝፅጝስ ትኩቶ እያማ እንፃኽስስታማጊ አኽⶓ አቕፄካ::

አሌም አቡቕታኪ ያኻ ክልልታ ፌቴርስትኹሳ  ብብራንቲውሳ ድምክኔ ምክንያታ ቴኬምስትካማ አክምዴስ ጃላ ኢንዱስትሪኩ ምርትካዳ ዋይሚውሳ ድምክኔ ፄዋንኩ ጌፄንካዋ ቼፍጝጝስ አኮሜችስትኹ ቴግባርስ ልቓሱላ ያኹኒ ጌቤል አሬኬዛታ ፄውጝስ እንፃኽስስትካማጊ አኽⶓ ጌሌፅካ::

ኬቴሙ ቺፅጝፂታ ሾሜታንትካው ማቤርካ ሊሊትጙንኩ ምርትካዋ ቴኬምስታንትካዋ ዲግሳንታ 600 ሚሊዮንዴስ ጃላ ጉሼ ምንግስት አሜሜችጝፃማ ጌቤሎ አሬኬዝፅጝስ ሞኬርⶓ ጉሽካ:: ሾሜታንቲስታ አሜሬታንቲ ኩቲስ ኩታ ታምትጜካማ ደላልካ ክችዳ ቱዋኑላ ጌቤልታንታ ፄውስታው ቴግባርኪላ ይስጛማ ሲፍⶓ እርዳትፅካ::

14 ሻይ ኩንታልዴስ ጃላ ሽኩዋር ሾሜታንትካው ማቤርካሾስ ዲጋማ ኬቴሙ ዝኩዋንትካ ቴኬምስታንታ ፄውስትⶓ ጉሽካ:: ጅምላ ዲግሳንትካ ጌፄንስታ ሾሜታንትካኪላ ኩቲስ ኩታ ጌቤልትጛንታ ፄውስታማጊ አኽⶓ ቶኬምካ::

ብሄረሰቡ ቺፅጝፂታ ኬፍቲኒ ጌቤሉ ክብርናቲ ካንትስትኹ ኢንዱስትሪኩ ምርትካዳ አኽጝታጊ ችግሮ ኽይጝስ እጋፍካዋስታ ዋይሜ ዴሜካንኩሳ ጌፄኖ ቼፍጝጝስ እርምጂስታ ክፃት ካፅስታማጊ አኽⶓ አቶ በእውከት አቕፄካ::

2018 በጀት አሜትዳ 600ዴስ ጃላ እጋፊ ጊፁ ልቕልቕቲዳ አሴሜርጙንኩ ጌፄኖ እጋዋ ፄውጝስታ እጎ ታሳኒ ዴሜካ ኪፃማ እርምጄ ካፅጝስ ጌቤልትጚውሳ እጎ ኬቤርፅጙ ቴግባር አኮሜችስትⶓ ጌሌፅካ::

አቶ በእውከት እዩኑ ኽይትጝፂዳ ጌቤሉሳ ክብርናቴ አሬኬዝፅጝስ ድንኩዋኑሳ ጌቤሎ ጄሜርፅጝስስታ 400 ካሬ ብቲዳ አድጉዊ ጌቤላስ ጄሜርፅጝስ ቤዴራ ቴርት አሌድስትⶓ ቼሜትጝፄካ::

ፍንሾስ ዴሜካ ክልሉስታ ብሄረሰቡ ቺፅጝፂው ቲቪቪርጚስ ግቢትስታው ጌቤሉ ማይኬልዳ አሜሬታንትካስታ ጅምላ ዲግሳንትካ ምርቶ ዲግስካማ ሾሜታንትካስ ታምፃኑ ኽሳንቲ ችግርስ ኽይ ያኻው ፕሮጀክት ጄሜርስታማ ሜስኬሩሞ ኺስታ ግንባቲ አሌድስታኒ እንፅኺ ጄሜርስታው አኽⶓ አቕፄካ::

ንግስቴ ተስፋ