ቴኬልጝ ይኮኖሚው ልግስስታ አይር አግልታስ

አምሉ ልማቱ ቴግባርዳ ቴኬልስታው ዋሺኒኪ ችግኝ ትክልቲስታ ኩፓኩፒ ፄዴካታስታ ትክሞ እያታ ክችክቺስስታ ትኩትስ አንኬባኬብጝ ቱስታው አኽጝ ጌሌፅስትኾ::

ይቶፒያዳ ፌይንኩ አሜትካዳ ቴግባርዳ እሼማጊ አግስታው አምሉ ልማቱ እንፅኺ አሌም አቡቑሳ ትኩቶ ጉሳማጊያኽ::

ትክላይ ሚኒስትር ፅፌት ጝናዴስ አግስትኹ ንቫር ካንትፃውስታጊ አምሉ ልማት ቴግባርዳ እሺⶓ ጄሜሩኒዴስ 48 ቢሊዮን ችግኝ ቴኬልስታ:: 12 ትኩማ 5 ሚሊዮን ሄክታር ብቲ ዴሜካ ጉዳትዴስ ዙራታ ፄውስታ:: ዴኑ /ካዌኑ/ ሽፋንኪላ 17 ትኩሚ 2 ሊኽዴስ 23 ትኩሚ 6 ሊኽሾ ኬፍናታ ቢኪፃ:: ምግቡሳ ዋስትኔ /እውቶ/ ቼሜትጝፅጝስኪላ ታምቦ ፊትጛማጊ አግስታው አኽⶓ ሚንችካ ሜሴኬራና::

አዊ ብሄረሰቡ ቺፅጝፂ ፋግቲ ለኮማ ወረዳው ዝኩዋንታ ዊዛሩ ወርክነሽ ተገኘ ጛው ዙራሙሪዳ አምሉ ልማቱ እንፅኺ ጄሜርስትጝ ሚንችካውሳ ስዴቶስታ ጉዳቶ ካላካልጝጝስ ካሊⶓ ታክስካ::

ብቲው አሉምት ቺንችጙስታማ ብቲ ጌላ አኽጝስ ዋሺኔኪ ዲቮ ዋግፃቲው አኽጝስ ዝኩዊኒስ ቼግርስታሺካ:: ያኼስጉ ፅካ አሜትዴስ ናቴ ኩፅኒ ቴኬላኑ ዲከረንስ ችግኝስታ እሊኩ ትክልቲውስታ ኩፓኩፒው አይኔትካ ጛውሳ ዝኩዊኔ ኪስጝስ ካላንታ ቢኪፅካ::

ችግኛ ቴኬላሺኑ ብቲ ኽብፂው አሉምት ዙራማ ታፌስታ ስንዳዮ እንቲታኪ ክምካዋ ሌፍፅጝስ ያኻውሳ ክራሬ /ክዬ/ አሜሬትጝስ ዝኩዋኒስ ያኻውሳ ጉዳዮ ዋኽትጝፅጝስ ፅሬቶ ፄዋውሻና::

ዲጊ አሜትዴስ ናቴ ኩፅኒ ዲከረንስ ችግኝዳ ቑንዚ ቱጙ ምክንያትስ ቼጌርስትካማጊ አኽⶓ ቶኬምካ:: እሊው ችግኙ ፌልስ ቲኪጝስ ትክልቲውስታ ኩፓኪፒው ምርትስ ቲኪጝስ ፅሬቶ ፄዌካማጊ አግስታና:: ዴሬኹሳ አፕሎስታ አቮካዶኪላ ቴኬልካማ አንኬባኪብካማጊያኽ::

እሊው አሬሳቻንቲ አየነ በዛብህ ጛሾስ ውማይቴንካውሳ ኩስጜ ቴግባርዳ እሽፅጝስ አምሉ ልማትዴስ አግፁኑ ትክም ልቓ ጋቲው አኽⶓ ጉሽካ:: ኬቤሊዴስኪላ ሞዴል አሬሳቻንቲ አኽጝስ እሊኩ ዙራሙርካዳጊ አኮሜችስታውሳ ዴሶ ካፅጝስ ዲከረንስ ችግኞ እሳንስ ቴኬልካማ ኽብፂውሳ አሉምቶ ዙርፅጝስ ካሊⶓ ቶኬምካ::

አሬሳቻንቲ አግፁኑሳ ትክሞ ጌሌፃኒስኪላ ጌፄሩሳ ዝኩዋኔ ኬሽጝፄካማ ቼግርስታኑላ ጄርካዋ ክንትፅጝዴስ ፌይኹስ ኬቴምዳ ጝኖ ጄዌካ:: ቤሬኻ ያኻሽኹ ዙራሙሪውሳ አይር እግልታሳ ኬሽጝፅጝስ ታምቦ ፊትጜካ:: ካንቲስ ቓሊፃውሳ ዙራሙሬኪላ ፌቴርካማ ይኮኖሚውሳ ትክሞ አግፃሺካ::

አሬሳቻንቲ አየነ ናኑውስታጊ ሹኻ አሜታዴስ ጉሽፃማ ዲከረንስ ችግኝዳ ፌቴርስትኹ ቑንዚ ኩፅኒ ቴስፌ አቲሳውሳ ስጋቶ ፌቴርⶓ እንክርፄካ:: ዲከረንሶ ኬውካማ ብቴ ናኼስፄካማ እጂንኩ አኽⶓ ጉሹንኩ አሬሳቻንቲ እን አሜትዳ ኩፅኒ ፌል ኬሽጛማ ዲጋኽ ናው ካንቲስ እንፅኺሾ ቱⶓ ቶኬምካ::

ናኪኒ ወክትስኪላ ዲከረንስ ችግኝዳ ይቪቺዳ ትኩቶ ፄውⶓ ባይካማ እሊኩ ምግብስ ያኻንኩስታ አይር እግልታሊ አስሜምጛንኩ ችግኙ አይኔትካዋ ቴኬልጝዳ ትኩቶ ፄውⶓ ድኹዌካ:: እንጚስኪላ ዴሬኽስ ያኻውሳ አቮካዶስታ አፕሎ ቴኬልካማ ቴኬምስትካማጊያኽ:: አፕልዴስኪላ ሊኽ ሻይዴስ ጃላ ብሮ ሚፄ አግፄካ ቢኬካ::

አሬሳቻንቲ አየነ እዩኑ ካል ዙርማዳ ሙዙስታ ፓፓያው ፌል ዴሬኽ አይር እግልታሊ አስሜምጝስ ካላው ዲጋያታኪላ ካሴ ዲግስካ:: ቴኬልስትኹሳ ችግኞ እምፕልታኪ ያኻ ጛርትስ አንኬባኬባማ እሚጝዳ ዳማኪ ስጋት እላቲው አኽⶓ ቶኬምካ:: እንዴስ ቤዴራ ኬቤሊው ዝኩዋንትካ ሊሚፃሽኑ ብቲዳ ናኪኒ ወክትስኪላ ዝኩዋንትካ አብርትስ ቴኬልካማ ቴኬምስትጝስ ካላኑሳ ሴሎ ውማይቴን እርዳታንታኪላ ካሴ ዲግስካ::

ደብረ ብርሃን ዩኒቨርስቲ ግብርኒ ኮሌጅዳ ክንትፃንቲስታ ማራማርጛንቲ  ኪስ ሃይሉ ተረፈ (ዶ.ር) አሚኮ ዲጂታልስ እዩኑ ኽይትጝፂዳ አምሉ ልማት ጋያኪ ቺንችጙስትኹስታ ፉራ ያኻማ አሉምት ድኽኹሳ ብቴ ዙርፃማ አሉምቶ ፃያታ ፄውስ ካንትስታውሳ ኪሴ ሜዜጌብፃማጊ አግስቴ::

ቴግባር እሳንስስታ ትኩትስ እንፃኽስስታውላ እጂኒውላ ዲጊ ጊዝስ ጄሜርስትኹ ቴግባርስ ኩፅኒ ኪሲ ሜዜጌብስትⶓ ሼውፅካ:: እንፅኺስኪላ ድኻኻ ንኹ ብንስታ አኹው አሊ ዙራማ አኾ እያታ ፄውስታ:: ዙራሙሪ ቺፋ አሉምት ቺንችጙስታማ ኪዮ /ክራሬ/ ዋግፃላ ናሺኹ ናካዳ ሶኼንታማ ካንትስትⶓ እርዳትፅካ::

አምሉ ልማቱ ማንዲጚ ፄውስታይኩ ዙራሙርካዳኪላ 12ዴስ 22 ታምባንኩ አጌራኻስኩ ችግኝካ ጛው ታፍስ ዋግⶓስታ ሶኼንትⶓ ጄሜርካ::

እንፅኺ ኽስኹስ ዊዳፊስታ ዋይሚስታ  ያኻታኪላ ፖሊሲውሳ ጉላሌ ቴርስጝ፣ ጜዋንቱሳ እንኩዋኽስቶ ፌቴርጝ፣ አጌራኻስኩ ችግኝካዳ ትኩቶ ፄውጝ፣ ችግኝኩ ኾትካዋ ዲጊዳ ቴርስጝ እንቲታኪ እምፕል ጌርኩ አምሉ ልማቱሳ እክዶ አርፊሾ ሌጌፅጝ ፋይፃው አኽⶓ ክንትፃንቲስታ ማራማርጛንቲ ቶኬምካ::

ዋሺኒኪ አጌር አቒ ኽሳንቴ አጌራዌ እክዶ ሳኪትጝፅጝስ ጜዋንቱ እንኩዋኽስትስ እንፃኽስስታማ ቤሬኽትዴስስታ አይር እግልታው ስጋትዴስ ኔፃ አጌራዋ ክምንትስ ዎሬስፅጙሳ አላፍቶ ፊትጛታ ሼውፅካ::

ፋግቲ ለኮማ ወረዳ ግብርኒ ፅፌት ጝናሱ ትክትሊ አላፊ የኔው አንተነህ ወረዳታጊ እዝብ አምሉ አሻሪው ዴስዋና አኽⶓስታ ትክሞ አቕጝሰ 2018/2019 ምርቱ ዝቤንዳ 24 ሚሊዮንዴስ ጃላ ችግኞ ፌልስጝስ ቴኬልጝስ ካሊፃውሳ ቤዳራ ቴርቶ አኮሜችⶓ አቕፄካ::

ወረዳታ ኽብፂውሳ አሉምቶ ዙርፃንኩሳ ቴክልካዋ ቴኬልጝዴስ ፌይኹስ ክምካ ኬለባሳ፣ ቡኑሳ፣ ዲከረንስ ችግኙሳስታ ኩፓኩፒውሳ ፌሎ ቴርሴካማ ቴግባርሾ ቱⶓ ጌሌፅካ::

አምሉ ልማቱ ቴግባርስ ወረዳው እምፕልታቕ ኽስኹስ ዲከረንስ ችግኝስ ቴኬምስታሺንኩ አኽⶓ ቶኬሙንኩ አላፊ ፌይንኩ አሜትካዳ ኩፅኒ ችግኝዳ ኬሴትስትኹ ቑንዚ ስጋቶ ፌቴራማ ፌልፅⶓኪ ያኻ ቴኬልⶓ ኔኬትካሺንኩ ያኹኒውላ እንዳ አሜትዳ ኩፅኒ ቑንዚ ኔኬታማጊስታ ድሳማጊ አንትጝሊ እምትጛማ እስካዊስ ፌሎ ቴርሴካማ ቴኬልጝሾ ቱስትⶓ እርዳትፅካ::

አምሉ ልማቱ ቴግባር ኪሴ ሜዜጌብፃታኪላ እንፃኽስስታው እንፅኺ ሜሜሪስ ጉስስታማጊ እምፕልታቑ ዝኩዊኒ ኬሽኹ አችሾ ታምባታ ፄውጝስ ካላው ይሴን ትዛዝ እይስታማ አኮሜችስታማጊ አኽⶓ ጌሌፅካ::

ዴኑስታ ኩፓኩፒው ቴክልዳ ውላጊ ትኩቶ ፄውጝስ ጚውሳ ታሪኮ እንፃኽስስታታኪላ እቑዌ ዲግስካ::

ይቶፒያዳ አምሉ ልማቱ ቴግባርስ ፌይንኩ አሜትካዳ ቴኬልስትኹ 48 ቢሊዮን ችግኝዴስ ድምክና 2019/2019 ምርቱ ዝቤንዳ ዴሜካ 8 ቢሉዮን ችግኞ ቴኬልጝስ አኬድስታማ ቴግባርሾ ቱስታ::

ንግስቴ ተስፋ