ፌዩንኩ ሚንችካ አሜትካዳ አጌርታ ካይጝኹስታ አሬኬዝኩሳ ቴርቶ ግቢትጝስ ፄውንኩ ፅሬትካጊ ጋት ሳኪትጚስታ ጋት እቲጚ ካንትስትኩ እሺና:: ፖለቲካው ሊክካው ቤንጝጚ አብርትኩ እሴትካው አንቕንጝስታ ሊሊትጝጝካ ኑሮ ጋቻስስታ ባፃባፅጚስ ጉሽፃ ያኻኒስ ካንትስትካ:: እንዳ ዊዳፊ ያኽኹ ጊዛዊ አምኽጚስ ኽይጝስ ሞኬርስቱንኩ ሙኬርካጊ አጌራዋ ባስኹ ሽብርዴስ ይጉፅጝስ ካሌካያ::
ጝሺ ጄሜርንኹ አጌራቡቕ ኩስጝጚ ኩፅኒ እኒዋ ሴጙንኩሳስታ አሜትካስ፣ ክምባብሊንኩ ችግርካዋ ዊዳፊስ ኽይጝስ እምስትኹ ታሪካዊስታ ዎሴናንቲ እድልያኽ:: ምንግስት እንሳ ታሪካዌ ሜድሬኾ አሜችጝፁስ እንዝጚ ዋኽስዋኾ ጌሌልቲኒ አቡቓንቲስታ አምንጝፃንቲ ያኻታ ፄውጝስ ኩርፄንቶ ቴግባርስ፣ ካንፅፃማጊያኽ:: ያኻችጝስጉ ኩስጝጚው ሳኪትጚ እምፕል አካል ይቢቺስ ቼሜትጛው ጋቲዊያኽ:: አጌራቡቕ ኩስጝጚ ውኒቲኒስታ ውላሴጚ ሜፍቲሾ /ኽዩሾ/ እንዜጛታ ውላ ዎጌንካውሳ ጌሬትቶ ሼዊስታ አኽⶓስታ አጌራውሳ ዴክቶ ቤዴርስጙሳ እሴቶ አይላዋ ፋዬ::
እን ኩስጝጚ ፋያኩ ቹዋ ቹዋ ዲብካ ዝኩና:: እኒጛ ክቻዴስ ውንቲኒ ውላዋ አቡቓውስታ እያማ ቻቤልጙ ሜርህ እምፕሌያኽ:: ኩስጝጚ ውላ እምፕልታቕኩ ቤንካዋ፣ ፖለቲካኩ አይልካዋስታ ሲቪክ ማቤርካዋ አሴቴፍጝፅኹ አኽጝ ቱስቴ:: ጛራጛራ ዎጌን ጚውሳ አጄንዴ ይኹቼ ቻኒጝስ ሞኬርጝዴስኪቻ እሊው ዎጌኑውሳ ስጋቶስታ እንጎ /ፋዮ/ ቹኒትጝስስታ አብርቱው ቱትጝጝፂዳ ታምብጝስ ቴርትⶓ ፋይፄ::
ጊዛዊ ፖለቲካው ፊቲዴስ ፊጝ እሊው ቹዋ ዲቢያኽ:: እን ሜድሬኽ እሌት ቺፋ ካንትስታንኩ ፖለቲካኩ ድብልብልትካዋ /አንኽሳኽሳዋ/ ታፋ ፄዋኻስጝስ ትክምዳ እሺጝ ፋይፃላኽ:: ኪቻኪ ሲፋንቲ ክምንትስ አሬኬብፅናፃ አጌራዋ ማሌፍፅናው፣ እጋ ምንግስታዊስታ አይቱ ካስካዋ እጋዊስታ ሰላማዊ ዳድስ ኽይፂ ዳድ አኽጝ ዝኮ:: እንዴስ ድምክና እን ኩስጝጚ እዝቡሳ ጜዌንቶ እሜታ ፄውጝዳ ትኩቶ እይጝ ፋይፄ:: ሊክካው ዙሚትጚዴስ ፌይኹስ ውላ ይቶፒያንካው ድምፅ ድምፅጛውስታ አጌራቑሳ ኩቴ ቴሳትፎ ቼሜትጝፅኹ ፄውጝ ቱስቴ:: እዝብኪላ እንዝጜ ቼሜታማ ሲፍጝጝስታ ድጋፎ እያማጊ ጜዌንቶ ቼሜትጝፅጝ ማንዲስቴ::
አጌራዊ ኩስጝጚ ዊድዊዲ እድል ያኻውሌስ እስካዌስታ ይሴኖ ስሮ እምፅጝስ አኹኪ እንኩርጝስ እይስትኹ ኽሳንቲ ታሪኩው አጋታሚያኽ::