“ ሞኔጂ ሞኔው ናታጃ ሞኔው ናታንጃ ”

“ጂሜ ብርፃው ችቭቻቩ አምሌ ኹፃው አሼቩ” እስታው ካል ዙማታጊ ጅሚ እምፕልታቑ ሊሊትፂ፣ አይቱ ካንትፂስታ ክምንቱ ቻቤልጚው ቹዋ ሜሳሪያኽ:: ባይሎ ታሪኮስታ እሴቶ ማንዳማ ክምንትስ እጂፅጝስኪላ ኬፍቲኔ ፍሺ ዝኩኹያኽ::

ካል-ፅንታው ልግስስ፣ ኽምባ ኽይፂ ኮንኪው አብት ሌጌሳታስታ ዋሺኒኪ ካል ፅንታ ክምንትስ እጄታ ፄውጙሳ አይሎኪላ እሜ:: ጅሚ እምፕልታቑ ዴስቲው፣ እዝኑ ቡንካውስታ ድሉ እንኩዋኽስቱ ጊሊፅፂያኽ::

አዋኾዳኪላ ኻስዳ፣ ዴስቲዳስታ ሊሊትጙንኩ እንፅኺው ዜርፍካዳስታ ቴርትካዳ ቻቤልጚስ ጅምስታንኩስታ እንካንስታንኩ ጅምካዴስ ሞኔጂ እምፕሊያኽ:: ሞኔጂዋ እንክርጝስኪላ ላስላሲ ችብቻቡስታ ኪሪዊ ፋይፄ:: ሞኔጂ እምፕልታቕሊ ዝኩኹ ታምትጚኪላ ልቓ ጋቲዊያኽ:: ሞኔጂ እንካኖ፣ ቤዴሎስታ እንፅኼንቶ ጌሌፅጝስ ጅምስቴ::

አዋዋ ሞኔጂ ጅሚው ሴልስ “ሞኔጂ ፍሽኹስ ጅሜ፤ አምላክ ሌጌፃላይ እድሜ” ንካማኪላ ጌቴምካ::

ሞኔጂ ጅሚውሳ ሴሎ ካንትኹስ አውጚው ኮንኪ ዙራሙሬ አንቺኔሱ ራዲዩኑ ቴርትስ ካንቴ እይንኩ ባንጂ ወረዳ አስቑኒ አቡ ኬቤሊው ዝኩዋንቲ አቶ ተፈራ አባየ ኻስዳስታ ድግስዳ ቲሪስታማስታ እንጅኩስታማ ጅምስታው ጅሚው ሴላ ያኻማ አጌላጌላው አኽⶓ ጉሽካ:: “አሪኬስታ ስልኼ ዝቕናናጊ ኪሪዌ እምናና እንክርናው ጅሚያኽ” ናንኩ አቶ ተፈራ ጋያኪ ቹትካ ውፍቼ ፍቻኒስ፦  “ውፍቺ ፍቻላይ ማኪናታ

አፄባዋ ናኪናታ”

“ፍችጝ ፍችጝ ማኪናታ፣ ካሳውቻኻ ቤንስታታ”

ናኒስ ግርብ ይስታ ዚንዝማኒስ ዙርሜ እያንትካ ዴሜካ ግትሙ አይኔትታጊ ዙርፃንኩ አኽⶓ እንክርፄካ::

ሴኔፍቶ ፍቺጝስስታ እንፃኽስስታውላ አላባሊዳ ጊዞ ፌይፅጝ ታምፃውሳ ጉዳቶ ካንትፅጝስኪላ፦

“እንትስታ አንካ ጅምጝኑሲ

ኩሪ ቱኻ ጃቪ ጝናሲ”

ትጜካማጊ ሴኔፍቶ አዌጌዝካማ እንፅኺሾ እላፎ ዙርፃንታ ጁትጝፃውሳ ጅሜ ሞኔጂስ ቻቤልጜካማጊ ጅማንኩ አኽⶓ አቶ ተፈራ እንክርፄካ::

ኽታዋስታ ሞኔጂዋ እንክርጙ ባይል ኔኬታማጊ አኽⶓ ታዜብⶓ ጉሹንኩ አቶ ተፈራ ባይሉ ጅሚ ድሳቲታ እንፃኽስትጝ ማንዲስታው አኽⶓ ካንቴ እይካ::

ባንጂ ወረዳ ሳንኪት ልዴታ ኬቤሊው ዝኩዋንታ ዊዛሩ አያልነሽ አስፋው ጛሾስ ጛው ዙራሙሪዳ ሞኔጂ ጅምስታው ሻኼካማ ፉሩኒዴስ ፋሌንጋ አንኬስታ ስልኼ እንቲታኪ እልልቲስ ሼሌምስቱኒስ ኹዌካ ዝቕካማ ሴሜቱኒዴስ ፋሌንጋ እንካንስ ጅምስታው አኽⶓ ድኹዌካ:: ሚንቾ ጊዞ ኹን ቹትካ አሬ ካርጙ ውፍቺስ  ፍቻኒስ፣ ሳኺኔ ሳኺኒስ፣ ትቴ ሴጋኒስስታ እምቤሎ እምቤላኒስ ግርቦ ይስፅጝስስታ ሼውሳ አሳቦ ጌሌፅጝስ ጅማኑ ጂሚ አኽⶓኪላ ዲብስካ::

ዊዛሩ አያልነሽ ናኑውስታጊ ኻስዳኪላ ፂኻዋ ካፅጛ ይንቱንኩ ሚዝካዋ ጋሺጝስስታ ዳንጉኽሳ ጉዳዮ ጌሌፅጝስ ጅምስታው አኽⶓ ድኹዌካ:: ኻስዳ አግስቱንኩ ሌንጌድ እንካንጙንኩ ዝኩኒጊ እንካኖ ጌሌፅጝስስታ አኻቲው አኽⶓ አቕፅጝስ ቻቤልጚስ ጅምስቴ::

“ኩፅጝ ኩፅጝ ቻኻ ኩፅጛ

ፅሌ እንፃዮ ሼዎ ድፅጛ”

አይናያ ሞኔው ሞኔጂ ናማ ጅምጝስ ግትሞ ኽቴ ናቴ ቻቤልጜካማጊ ጅማኑ ጅሚው ሴል አኽⶓኪላ ዊዛር አያልነሽ ቶኬምካ::

ጋዚቲኒ፣ ጅማንቲስታ ጌቴማንቲ ምንይችል እንግዳዋ ሚንችካ ያቓኑ “ላካ ላካያ” ናው ጅሚስስታ ጋዜቴንቱ እንፅኺስ ያኼስጉ ሞኔጂ ጅሚው ሴልስኪላ እሊኩ አርቲስትካሊ ቻቤልጚስ ጅሜካማ እዝብስታ ታምባታ ፄዋ::

አውጚ ኮንኪስ ዲጋው ትቬቩ ቴርትዳ እይኹ አሳብዳ ሞኔጂዋ እሊኩ ጅምካዴስ ሊሊትፃው ዝኩⶓ ጉሻ:: ሞኔጂ ጅሚው ግትም ኬፍንኹሳ ስርኩኔ እሜው ጅሚ እርግ ናማ ጅምስትጝ፣ ጉድቭ እላቲውስታ እንጅኩስታማ ኪሪዊ ልቡ እስታ ኬሬውስታማጊ ኽቴናቴ ኬችስ ቤንጜካማ እምፕልታ ጀምስታው ጅሚው ሴል አኽⶓ ኽይትጝፃ::

ሞኔጂዋ እምፕል አቒ ይቢቹ እንክራላኽ ናው ጅማንቲስታ ጌቴማንቲ ምንይችል ሞኔጂ ግርቫ ይስፂ፣ ዚንዝማኒስ ሼውዳ ዝኩኹሳ ቤዴሎስታ ዴስቴ ፍሻኑ፣ እንኩዋኽስቶ ጌሌፃኑ፤ እፅድዳስታ እምቤሎ እንፃኽስስታንኩ ግርባ ይፄ ፄዌካማ እይምሮ ዴስፃኑሳ ግትሞ እሚኹ ዴሬኽዳስታ ኩልዳ ሊሊትታ ጋቲታ እንክርስታው ጅሚው አይኔት አኽⶓ ሼውፃ::

ጅማንቲስታ ጌቴማንቲ ምንይችል እንክርፁኽስታ ሞኔጂ ጅሜ እንክራኒስኪላ አቫላምቲዳ፦

“ሞኒዋ ፍሽኹሳ ጅሜ፣

አምላክ ለጌፃላይ እድሜ” ናውሳ ትምኔቶ እንጉስቴካ::

ኻስዳስታ ድግስዳኪላ፡-

“እንክርኔስ እንክራቲኑማ፣

ዋንቻዋ እንኩራቲኑማ” ትጜካማጊ ጅማና:: ኾ ዝቓማ ዴስቴ ጌሌፃውላ ካስጝ ኔውር አኽⶓ፣ ቴርት ዌናሱ ድግስስታ ኻስ ግዲኹስታ እንጚ አችስ ታምብጙሳ ክርፄ ትምኔቶኪላ ጌሌፅጛኑዊያኽ ኑስ ጅማንቲስታ ጌቴማንቲ አሳቦ እያ::

“ሞናሞን ሞኔው ናታጃ ሞኔው ናታጃ፣/2/ ዜኔካታኽ ባታሽቱኹዊ ሞኔው፣

ወሬኬትስ ዋታሽትኹዊ ሞኔው ናታንጃ” ንጝስኪላ እንካኑሳ ሰላምቴ ሞኔጂስ እይጛና::

ጅማንቲስታ ጌቴማንቲ ምንይችል እይኹ አሳብዳ ሞኔጂው ጅሚው ሴል ሹኻዴስ ሴዛዋ ኺስታ ቤንስታው አኽⶓ ሼውፃ:: እንጚዴስ ሎጊ ሎጊ፣ ሊጋ ሊጋስታ ችኒያጂ አግስታንኩ አኽⶓ ጉሻ::

ጅማዳኪላ፡- “ታኪኒሱካ እንፃኺቲ፣

ናካካ አው ካፄኻ እንቲ”

ናኒስ ኹን ሎጊ ናኒ ምሽታር ዴሜካ፡-  “እንካንጛላ አላባላዳ

ቼርኮ ዊቴን ዴጌሊዳ” ናኒስ አኻቲው አኽⶓስታ እንፃኺቱሳ እንካንጜ ታክስካማ ፌይኹ ችኽስ ጝን ግቢቲስታው አኽⶓ እንክርጛንኩ አኽⶓ ቶኬማ::

ጋዚቲኒ ምንይችል ናውስታጊ ሼውዳ ዝኩኹሳ ማቔቾስታ እዝኖ ጌሌፅጝስኪላ፡- “ኪሪዌካ ኪሪፔኒ ሞኔው ናታና /2/

ይ ሼዋሳ ኪሊፔኒ ሞኔው ናታና” ናኒስ ሼውሳ ችንኬቶ ጌሌፅጝስ እንዳራኪ እንኩዋኽⶓ ፋያቲንኩ አኽⶓ ቶኬምጝስ ጅማንኩ አኽⶓ ኽይትጝፃ::

ዝኩዊኒ ቼግርስትኹ ድኽትስ ፁቕስታው አቒኪላ ጚሪሱላ ምሜ ዜራማ ኹፃውሳ አሬሳውሳ ቢሬ ይማኒ እያላ ናኒስታ፤ ጉሼ ካሴማ አግፅⶓ አታኒ ዝንዝሙስኪላ፡-

“አን ጅማውካ አሱ ጅማ

ባያውጃማ ካሳውጅጛ” ኑስ ሼውሳ ባሶ ሞኔጂስ ጅማማ ፊኹጝስ ካላው አኽⶓ ዲብሳ::

“እንዜጛን ካንስ ድስናና /2/

ክራሬኽ ኹኔ ትስናና” ንጝስ ሴዴድስትⶓ ካንትኹስ ሞኔጂስ ዝንዝማው አቒስኪላ ዙርሜ እያኒስስታ ክራሪ ኹስታቲው አኽⶓስታ ድኽት ፌያው አኽⶓ እንጎ ጌሌፃኒስ ዴሜካ፡-

“ክራሪ ኹስታው ያኹኒ

ድኺ ክምስታውማኺኒ” ናኒስ ሞኔጂው ዜሚስ ሞጌትጛንኩ አኽⶓ ቶኬማ::

ሞኔጂ ጅሚው ሴልካዳ ዝኩኹ ልቕልቕቲ ይስጝፃው ያኹኒውላ እምፕል ጅሙኽሳ ሴሎስታ ምስሉሳ አኺኔ ካቢጝዴስ ኪቻ ትቤቡስ ፊቲሬ ቴኬምስትጝ ፋይፃው አኽⶓ ታክስፃ:: እሊውዴስ ድዋማ ጅምⶓ ባያማ ኬፍናማ እሊው ካንቲስ ጅሜ ቴርስጝ ማንዲስታው አኽⶓ ቶኬማ:: ክንቲ ጝናዳኪላ እሳንስ  ቴግባርዳ እሽፃውሳ ሴሎ ፌቴርጝ ትኩታኩ ቤንካዴስ ማንዲስታው አኽⶓ እንፅኼንቶ ዲግስካ::

እንጃቢሪ ዩኒቨርስቲዳ ፎክለር፣ ኮንኪስታ ፁፍ ፅንታው ክንትፃንቲ እሱባለው ክንዴ እይኑ ኽይትጝፂዳ ዋሺኒኪ እምፕልታቑ ባይላዊ ጅሚ  ስሮ ባይፃውላ ፍንሾስ ሲፋታ ይስጙኽሳ ፅናቶ ካስጝፅጝ፣ ክንቲው ካሪክለምዳ ቴርትዳ ትኩትስ እንፃኽስትጝ ፋይፃንቲ አኽⶓ ጌሌፅካ::

ባይላዊ ጅሚ ክምንትስ ምግባር-ፅንታሳ ክንትፅጝስ፣ እንፅኺውሳ ባይሎ ይስጝፅጝስ፣ ኔውሮ አዌጌዝጝስስታ አቒ ክችዳ ፌቴርስታውሳ እንካንጜ ጌሌፅጝስ ኬፍቲኒ ታምብ ዝኩኹ አኽⶓ ኽይትጝፄካ::

ጋያኪ ባይልዴስስታ እሴትዴስ ፊጝ ናንኩሳ አቖ ዎኬስጝስ እንቲታኪ እምፕልታቑሳ ዴስቴስታ ቤዴሎ እርዳትስትጝስ ካላኑሳ እንኩዋኽስቶኪላ ጌሌፅጝስ ቴኬማው አኽጝስ ጅሚውሳ አብቶ አንኬባኬባማ እሚጝ ቹዋ ጉዳይ አኽⶓ ቶኬምካ::

ጅሚ እምፕልታቑ አይቱ፣ ታሪኩ፣ ባይሉስታ ኮንኪው ጌሌፅፃ ያኻማ አጌላጌላው አኽጝታጊ ዝቤን ካሴውሳ ጉዳዮ ዋኽትጝፃማጊ ጅሚውሳ አብቶ ሊሚፅጝ ውላዴስጊ ማንዲስታው ቴግባርዳ አኽⶓ ክንትፃንቲ እሱባለው እንፅኼንቶ ዲግስካ::

ንግስቴ ተስፋ