ሜብቶ አቱንኩሱ ድምፅ

“ጝኖ ግቢቲካ ካሜንትካ አጌልቴካማ አቪቬ ካንታን” ናው ቹዋ ታብሉ ድቕር ዝኩታ ያኻማ አቒያሱ ዝኩዊኒስ ፋይፃንኩ ስር ፋዩ ጉዳይካዴስ ዝኩፂ ጝን እምፕልያኽ:: አሌምዳ ዝኩፂ ጝኑሳ ችግሮ ኽይጝስ ሊሊቴ ፖሊሴስታ ስትራቴጄ ፍሽጝስ ምንግስት ክችዳ ቱጝስ አጌር አቑሳ ጝኑሳ ፋዮ ዋኽትጝፅጝስ ካሉንኩ አጌርካዴስ ሲንጋፖር፣ ፊላንድ፣ ኦስትሪያስታ ጀርመን ቢዲሪዳ እቑስታና:: እኒጛ አጌርካጊ ሊሊትጙኽሳ ፖሊሴ ሲፊኒስጉ አጌር አቑ ክርፂ ቺፅጝፂው ችግራ ያኹኽ ዝኩፂ ጝኑሳ ካሴ ኩፅኒ ዙርፅጝስ አጌር አቑ ሜብት ኬቤርስታታ ምንግስት አላፍቶ ፊትጛ::

ጋያኪ ፊላንዱሳ ፖሊሴ ካንትናኒ አጌር አቕ ዋሺኒኪ ጉዳይዴስ ቤዴራ ጝኖ አግፅጝ ቱስቴ ንጝስ አጌር አቑ ቢዲሪ ስሩ ፋይ ፄውታታ እንኩርታ::እሊኩ አጌርካ እምፕል አቒ ጝኖ አግፅጝስ እንፅኼ እሚጝስታ ጛሬ ካሊጝ ናውሳ ቤዴራ ሲፌ እንኩራኒስ ፊላንድ ኩፅኒ አሌምዴስ ሊሊታ አኽጝስ ዋሺኒኪ ማቤራዊስታ ይኮኖሚያዊ ችግሩ ኽይፂ ሴል አጌር አቕ ዝኩፄ ጝኖ አግፅጝ ጉላላ ጋው ጉዳይ ፄውጝስ አጌር አቕስ ጝኖ ዲግስቴ:: ጝን እላትኩ አጌር አቑሳ ቼፎ ድፅጝስኪላ አሌምዴስ አቫላምታ አጌራ ታኻ ኑስ ቢቢሲ ዜጌባ::

እን አጌራ ይቶፒያዳኪላ አይኪ 18 አሜታ ዋኹኽ አቒ ዝኩፄ ጝኖ ግቢትጝስ ካላውሳ ብቴ አግፅጙ ሜብት ዝኩኹ አኽጝ አቕስቴ:: ሚንችካ አጌር አቕኪላ እንጚሱ ሜብቱ ቴኬምስታንትካ ያኺኒስጉ ዝኩፂ ጝኑ ችግር ኩፂ ባስጛማ ሲፋ ማቤራዊውስታ ይኮኖሚውሳ ጉዳቶ ታምፃማጊ አግስቴ:: ጋያኪ ወክት ቺፋ ፌቴርስታው ጋቻስታ ሰላሞ አቲጝ ጝን ኪራያ ዴሜካታስታ ምንግስት ትኩትስ ዝኩፂ ጝኑሳ ካሴ ዙርፅጝስ ካላቲታ ፅንጋኻ ያኼካማጊ አግስታና::

2018 በጀት አሜትዳ አማኻሪ ክልል ሚንች ወክቱ አጌር አቑ ካሲ ያኻማ እጂኹሳ ዝኩፂ ጝኑሳ ካሴ ዙርፅጝስ እንፃኽስስቱኽ እንፅኺ ዞንዴስ ዞኖስታ ወረዳዴስ ወረዳዋ  ዝኩኹ ፊፂምጚ ሊሊትጛው ያኹኒው ሚንችካውሳ ካሴ ኩፅኒ ዙርፃማጊ አግስቴ::

አዊ ብሄርስብ ቺፅጝፂ ቻግኒ ኬቴሙ ቺፅጝፂው ዝኩዋንትካኪላ ሜብቶ ቴኬምስትጝስ 2010 ምሬት አሜታዳ ጄሜርካማ እጋዌ አቕስቶ አግፃችኹኒውላ ካሴኑ ካሲ ኩፅኒ ዙርሜ አግፃማጊ ጋቲውያኽ:: አጌር አቕ ጛውሳ ጝኖ ግቢትካማ ጝን ኪራያው ቻኒስትዴስስታ ሊሊትጙኽ ይኮኖሚው ችግርዴስ ፊጝስ ፄዋኑ ፅሬትስ ኩፅኒ ምንግስት ዙርሜ እያውላ ይጉጝ ዝኩዋንትካዳ ክሬቴ ፌቴራ::

አሚኮ አውጚው ራዲዮኑ ቴርት ቤናስ አሳቦ እይንኩዴስ አቶ መለሰ አለነ ዝቤንካስ ጝኖ ግቢትጝስ ካላኑሳ ብቴ አግፅጝስ እጋዊ ዳድስ አቺትጜካማ ማንዱኒውላ ምንግስቱ ዙርሚ ኩፅኒ እንግርግራ ንጝስ ዝኩዊኒውሳ ቴስፌ አቲሳማጊ አኽⶓ ጉሽካ:: ዴክት ማንዲስትኹ፣ ፕላንስ ጉስስታው፣ ፅንኩት ዝቒው አኹ፣ ሜብራትስታ ፃሜ ክብፂ ብቲ  ቴርቱኽ ኬቴሙ ዙራሙሪዳ ዝኩጝስ እግ እይኹሳ ሜብቶኪላ አቴካማጊ አኽⶓ አቶ መለሰ ዙሜካ::

ጋያኪ ሜቴቴንጛያሱስታ ምክንያታ ጋቲታ ወክት ቺፋ ዴሜክስታው ጝን ኪራያው ዋይሚኪላ ዝኩዊኔ ይዝኩሳማጊ አኽጝስ ምንግስት አጌር አቑሳ ፋዮ ዋኽትጝፅጝስ ኩርፄንትስ እንፃኽስትጝ ማንዲስታው አኽⶓ ቶኬምካ::

አቶ መለሰ አይኑ ካንቲዳ ቻግኒ ኬቴምታ ሚንችካ ጝኖ ግቢታኑሳ ብቴ ካሴንትካ ዝኩዊኒስጉ ምንግስትሾስ ዝኩኹ ኩርፄንት ኩፅኒ ዜሬቕቲ አኽጝስ አጌር አቑ ሜብቱ ካሲ ኬቤርስታቲታ ፄዋማጊ አኽⶓ ዲብስካ:: እምፕልታ አኽጝስኪ ያኻ ፌቴርስታው ሜንድሬኽዳ ካሴ ዲግሱኒ ዙርሜ አቲⶓ ድኹዌካ:: ፍንሾስኪላ ያኹኒ ምንግስት እዝቦ ቹኒታማ ካሴ ዙርፃታ አሳቦ እይካ::

ክንትፃንታ እብስት አየነ ኪላ ቻግኒ ኬቴሙ ቺፅጝፃዳ ክንትፅጙ ውማይስ አጌላጌልታታጊ ዝኩዊኔ ፄውታ:: አግፄው አርፊው ደሞዚዴስኪላ ልቓዋኪላ ያኹኒ ክብስታታጊ ጝን ግብራስ ያኻውሳ ጌንዜቦ እንኩርቴስጉ ቴስፋ ፄውቱኽ ጉዳይ ኩፅኒ ዙርሜ አግፃማጊ ጋቲው አኽጝስ ዝኩዊኒዳ እሊው ፍታና ያኻ:: ፅካ አሜታዴስ ጃላ ጝኑ ማቤርካዳ አቺትጝታታ እጋዊ ዳድስ ጝኖ ግቢቴውሳ ብቴ ካስቲስጉ ካሲ ኩፅኒ ዙርሜ አግፃያ:: እንጚኪላ ዝኩዊኒስ ቼጌርፃ ያኻማጊ አንትⶓ ክንትፃንታ ዲብስታ:: ምንግስት አጌር አቑሳ ስሩሳ ፋዮ ዋኽትጝፅጝስ ቢዲሬ እያማ እንፃኽስታታኪላ ካሴ ዲግስታ::

ክንትፃንቲ ገነቱ አስረስኪላ 2010 ምሬት አሜታዴስ ጉሽፅካማ አቺትጜካማ ቻ ሹኻቶ እይስታዊያኽ ናኒስ ላምቡሳ ኺስቴ ቴግባርስ ካንትስትኹ ጉዳይ እላቲው አኽጝስ እንኩዋኻንቴ አቴካማ ቼጌርስትⶓ ቶኬምካ::

ጊዝቺፋ ብቴ እያንታ ጉዳይ ካንታኩሳ ኾትካዋ ካሴ ካሲኒኪላ ቱስታውሳ ዙርሜ እይጝዴስ ኪቻ ቻ ሹኻቶ ናው ኬፄሩስ ኬቴሙ ዝኩዋንትካው ካሲ ዙራያሱ አኽⶓ ጉሽካ:: ወክት ቺፋ ጝና ግቢትፄ ብቴ ፋያንኩ እጎስታ ሜሜሬ ዋኽትጝፁንኩ አጌር አቕስ ብቴ አሬኬብፃውላ ይጉጝ አጌር አቕዳ ታምባው ይኮኖሚውስታ ማቤራዊ ቻኒስትዴስ ጃላ እጋፊ ጝኑ ግንባቲሾ ኪላ ቱጝስ ጌዴድፃው አኽጝስ ምንግስት ትኩትስ እንፃኽስስትጝ ጉላላ ጋው ጉዳይ አኽⶓ ቶኬምካ::

ኬቴሙ ጝኑ ግቢትፂ ብቲ ዝኩጝ ኬቴሙ ዝኩዋንትካስ፣ ኬቴሙ ግድስስታ ይኮኖሚው ልግስኒስ ቹዋ ጉዳይ አኽጝ ዜኔግስትጝ ቱስታላኽ:: እጋፌ ጝኑሳ ግንባቴ ካላካልጝጝስ፣ ኬቴሙ ስሩ ልማቶ ሳሴርስ ታምብስታንታ ፄውጝስ፣ አብቱ ጉሽፂስታ እንፅኺውሳ እድሎ ፌቴርጝስ ክርፄ አጋታሜ ፌቴራው አኽጝታጊ ቢዲሬ እያማ እንፃኽስስትጝ ምንግስቱኪ ያኻ ታምብዌን አካልካው አላፍት አኽጝ ፋይፄ::

ቻግኒ ኬቴሙ ቺፅጝፂው ዝኩዋንትካ ዲግሱኑ ክሬቲስ ዙርሜስታ ኽይትጝፄ እይንኩ ቻግኒ ኬቴሙ ቺፅጝፂው ብቲው ፅፌት ጝናሱ አላፊ አሰፋ ብሩ ኬቴሙ ቺፅጝፂዳ ፌይንኩ አሜትካስ አቺትጙንኩ 117 አባልካ ይቪችካስ 2017 በጀት አሜትዳ ጝና ግቢትፄ ብቴ አሬኬብፅⶓ ጌሌፅካ::

10 አሜታዴስ ጃላ ካሲ ዙርሜ አግፃታ ማንዲትጜካማጊ አግስታንኩ ኬቴሙ ዝኩዋንትካው ክሬቲ ኽይስታውላ እጂጝ ሜብቶ ኔፌግጝ አኽስ ችግር ክችክቺስ ኽይስትጝ ቱስታው አኽⶓ ቶኬምካ:: ችግር ኽይስታውላ አሜትካስ እጂጝስ ካሉኽኪላ ፅካ አሜት ቺፋ ግቢትስታው ኬቴሙ ፕላኑ እንፅኺ እንግርትጙ ምክንያትስ አኽⶓ ሼውፅካ:: እጋዊ ዳድስ አቺትጜካማ ጝና ግቢትፄ ብቴ አግፅጝስ ማንዲትጛንኩ ውላ ማቤርካው አባልካስኪላ ብቴ አሬኬብፅጝስ ፅንጋኻ አኽⶓ ቶኬምካ::

አቶ አሰፋ እይኑ ጊሊፂዳ ፅካ አሜታዴስ ጃላ አቺትጙንኩ ዝኩዋኩኒስ ወክት ቺፋ ጌፄርዴስ ኬቴምሾ ፌሌሳው እዝብ ዴሜካማጊ አንትጝሊ እምትጛማ ዝኩፄ ጝኖ ግቢትጝስ ካላኑሳ ብቴ ታምብስታንታ ፄውጝስኪላ ቼጌርስትካማጊ አኽⶓ ቶኬምካ::

ኬቴሙ ቺፅጝፂታ ችግሮ ኽይጝስ ኬቴሙሳ 10 አሜታሱሳ ማስተር ፕላኖ ክችሳማ እንፃኽስትጝስ አማኻሪ ክልሉ ፕላንስታ ኢንስትቲዩት ቢሩሊ ቲቪቪርጚስ እንፃኽስስታማጊ አኽⶓ ሼውፅካ:: ኬቴሙ ዝኩዋንትካውሳ ካሴኪላ 2018 አሊዴ ኺስታ ዙርፅጝስ ትኩትስ እንፃኽስስታማጊ አኽⶓ አቕፄካ::

ዝኩፄ ጝኖ ግቢትጝስ ካሊፃውሳ ብቴ አግፅጝስ ማቢሪስ አቺትጙንኩ ኬቴሙ ዝኩዋንትካ ካሲስ ዙርሜ አግፅጝስ ፄዋኑ ፅሬት ዝኩታ ያኻማ ኬቴሙ ቺፅጝፂ አጌር አቑሳ ሜብቶ ኬቤርፅጝስ ሊሊቲ ትኩትስ እንፃኽስስታማጊ አኽጝስ አስቴዌልጝስ ማንዲትጛንታስታ ብቴ አግፅጝስ ያኻውሳ ጌንዜቦ ክብስⶓስታ ቴርስⶓ ይስጝፄካማ ሲፍፃንታ አላፊ ታክስፅካ::

ብቲዌንካስ ኬይስታው ካሲስ ያኻውሳ ብሮኪላ አቺትጙንክ ማቤርካ ቤዴርካማ ቴርሴካማ ማንዲትጛንታ እንፅኼንቶ ዲግስካ::

ቻግኒ ኬቴሙ ቺፅጝፂዳ 448 ዝኩፄ ጝኖ ግቢትፄ ብቴ አግፅጝስ ጝኑ ማቢሪስ አቺትጙንኩ ዝኩንኩ ያኹስ እኒጛዴስ 164 ማቤርካስ አቕስት እይስታማ ጝና ግቢትፄ ብቴ አግፅጝስ ልሻውሻንኩ አኽⶓ ኬቴሙ ቺፅጝፂው እምፕልቱ ማቢሪው አቺትጝፂው ፅፌት ጝናሱ ንቫር ቶኬሜ::

ኬቴሙ ዝኩዋንትካስ ጝኖ ግቢትጝስ ካላኑሳ ብቴ ወክትስስታ ጊዝስ እይጝ እጋፌ ጝኑሳ ግንባቴ ካላካልጜ፤ ስሩሳ ልማቶ ዋኽትጝፅጝስ አሜቼ፤ እዝቡሳ ቺኒኒኪጜ ኔኬቴ፣ አዲጌ ኔኬቴ፤ ይኮኖሚው ልግስስ አሜቼ፤ አጌር አቕ ጌንዜቡሳ ጉሼ ባንክዴስ አግፄካማ እንፅኼ ፌቴርጝስ ካላኑሳ እድሎጊ ፌቴራው አኽጝስ ስሩሳ ፋዮ ዋኽትጝፅጝስ ትኩትስ እንፃኽስስትጝ ማንዲስቴ::

ንግስቴ ተስፋ