ትክማ ሚንቺ እንሴስካው አብት

ይቶፒያ እንሴስካው አብትስ አፍሪካዴስ አባላምቲ አችዳ አግስቴት አጌራኽ:: ያኼስጉ እንሴስካው አብትዴስ አግፄው ሚፂ ኩፂ ዜሬቕቲኒያኽ:: እንስ ምክንያትታ ቶኬምስታው ዴሜካ ኬሽጝጙንኩ እንሴስካው ዜርካ እላ አኽጝ፣ ፃንኩቶ ማንዱኽ እንሴስካው ምግብ /ኹጝ/ ችግር፣ እንሴስካው ቲኑ አግልግሎቲው ዳንጉኒ፣ ዝቤናዊስታ ጌቤልዳ ትኩትኹ እንሴስካው እሩብፂ እሳንጛውላስ ይጉጝያኽ::

ይቶፒያው ማይኬላዊ ስታትስቲክሱ ንቫር ቶኬማውስታ ይቶፒያዳ 61 ትኩሚ 59 ሚሊዮን ክምካ፣ 32 ትኩሚ 85 ሚሊዮን ታይካ፣ 36 ትኩሚ 80 ሚሊዮን ፍያልካስታ 48 ትኩሚ 13 ሚሊዮን ዶርካ አግስታና:: እንሳላካ አብቶ ፃቱት ይቶፒያ እንሴስካው አብትዴስ አግስታው ሚፂ ኔኬትጝስ ሚንችካ ችግርካ ቶኬምስታና::

ዲጊ ጊዝዴስ ናቴ ኩፂ ይቶፒያ ዝኩኽሳ እንሴስካውሳ አብቶ ቱስታው ዳድስ ቴኬምስትጝስ አጌር አቡቑ አችስ ትኩት እይስታማ እንፃኽስስታው ዜርፍ ያኻ:: አጌርታ አኮሜችስታውሻው ልቕልቕቲ ኬሽኹ ኪሲ ሜዜጌብስታታ ፄዋማጊያኽ::  ዲጊስ ጄሜርስትኹ ምሱቡ ቢሪኪቲው እንፅኺዳ ሚንችካ ጛርት አቕ እንሴስካው ዜርፍዳ አሴሜርጜካማ ኬሽኹሳ ትክሞ አግፄካማጊ አግስታና:: ናካስ ልማቱ አምድዳ እንቶጂስ አንቤብፅጝስ ፋኑኽኪላ እንሴስካው አብትዳ አሴሜርጝጝስ ዋይሚስታ ያኹኽሳ ጛርት አቔያኽ::

አውጚው አቭኑ ቴርትሊ እጄጜ ፄውኽ ዳንግሊ ወረዳው አሬሳቻንቲ አቶ መለሰ ፀሃይ እንሴስካዋ እሩብፅጙስታ ሌፍፅጙ ዜርፍዳ አሴሜርጝጝስ እንፃኽስታና::

እን እንፅኺሾ ቱጝዴስ ቤዴራ እሊው እንፅኺው ዜርፍዳ እንፃኽስታሺካ:: ያኼስጉ እንፃኽስታሺኑ እንፅኺው ዜርፍዳ ኬሽኹሳ ሚፄ አግፅⶓ አታኒ ኩፅኒ እንሴስካዋ እሩብፅጙስታ ሌፍፅጙ እንፅኺሾ ቱዌካ:: 2007 ም/አሜታዳ ልቓ  እንሴስካዋ እሩብፅጝስ ጄሜሩኑ እንፅኺው ዜርፍ ናካዳ ኬሽኹሳ ይኮኖሚውሳ አክሞ አፌራታ ፄዋ:: ሚንችካ ኾሺኩ ክምካዋ እሩብፃና:: ሹኻ አርፋሳ ቡዚሳማ ዋያኩ ቤራዋጊ አጌላ:: አቶ መለስ ዙሙኑውስታ እን እንፅኺው ዜርፍዳ አሴሜርጙኑ ዎክትዳ ኬሽኹሳ ሚፄ አግፃሺካ:: ዲጊስ አማኻሪ ክልልታ ኬሴትስትኹ ፄትቲው ችግር ኩፅኒ አሴሜርጙኑ እንፅኺውሳ ዜርፍዳ ኬሽኹሳ እንፃኽስታቲታ ፅንጋኻ ያኻ:: አቶ መለስ ናኑውስታ ናካዳ ሊኽዴስ ጃላ ያኻንኩ ክምካዋ ፃይካ:: ሹኻ ሹኻ አርፋሳ ቤራዋ ቡዚስካማ ዋያና:: ሚንችካ ኾሺኩ  ክምካዋ ኪላ አጌላና::እኒ ክምካዴስ ጌርክስ 350ዴስ400 ሊትሮ ኺስታ ኾሼ አግፃና:: ኾሺዴስ አግስታው ሚፂስ እሌቱሳ ዝኩዊኔ ጉሻና:: ጛጛርትጛስ ምግብስ እሽፃና:: ሚንችካ ጛርት አቕስ ኾሼ ቤንጝፃና:: ያኻማ ኩፅኒ ክልልታ ፌቴርስትኹ ፄትቲው ችግርስ ዳድ ልምትጝ  አሜሬትስታው ኾሺ ጄዋንቴ አታማ ክቬ:: እንኪላ እንሴስካስ ዳላው ምግብ ዲጋቲታ  ቻኒስቶ ታምፃ:: ሚንችካ እንሴስካዋ ዋይጝስኪላ ጌዴድስትካ:: ጌርክ ቺፋ አግፃሺኑ ሚፂ ኔኬታ:: አቶ መለስ ዙሙኑውስታ እንሴስካው አብትዳ አሴሜርጝጝ ሚንችካ ዎታትካስ እንፅኺውሳ ድሎ ፌቴራ:: ጌርክ ቺፋ ሚንችካ እንፃኽስታንትካዋ ኬፄርጝስ እንፃኽፃና:: 8 ያኻንኩ ቲሬንቲስ እንፅኺው ድል ፌቴርስታይኩ ዎታትካ አግስታና::

አቶ መለሰ እንሴስካው አብትዴስ ኬሽኹስ ቴኬምስታንታ ያኻንታ ካሊፅኹ ግብርኒው ውማይቴንካው እርዳቲ አኽⶓ ቶኬምካ:: እንሴስካው ውማይቴንካ ጊዝ ቺፋ ውማዩሳ እርዳቴ ፄውጝስ ኬሽኹሳ ዋይሚስታ ያኻታ ቢኪፅⶓ ድኹዌካ::እሊኩኪላ እንሴስካው አብትዳ አሴሜርጙኒ ኬሽኹሳ ሚፄ አግፅፃው ዜርፍ አኽⶓ ቶኬምካማ እንዴስ ጃላ እሳንጝፅጝስ እንፃኽስታንኩ አኽⶓ ጉሽካ::

ዊዛሩ ፍሬህይወት ጌትነት አቶ መለስ ፀሃይቓኽ:: እንሴስካዋ እሩብፅጙስታ ቡዚስጙ እንፅኺዳ ጛራሊ እምፕልታ እንፃኽስታና:: ጛራ እላቲው ጊዝዳስታ እንሴስካስ ምግቦ ጄውጛ ካስኹ ዎክትዳ እንሴስካዋ አንኬባኬብጝስ እንፃኽስታና:: እንዴስ ቤዴራ ጊፁ እንፅኺዳ አሴሜርጝጝስ እንፃኽስታ ሺንኩ አኽⶓ ቶኬምጝስ ዲጊስ ኩፅኒ እንሴስካዋ እሩብፅጙ እንፅኺሾ ቱዌካ::

እሊኩ እን እንፅኺዳ አሴሜርጝጝስ ፋያንኩ አቕስ ምሳላ አኽⶓ ቶኬምጝስ እንሴስካዉ እሩብፂዳ ሚንችካ እንፃኽስታንትካዋ ኬፄርጝስ እንፃኽፃንኩ አኽⶓ ዲብስካ::

አይኪ አቒ ይሳማ እንፃኽስታኒ እንፅኺስ ዋይሚስታ አኽጝስ ካሌ ኑንኩ ዊዛሩ ፍሬህይወት እንሴስካው ዜርፍ ኬሽኹሳ ሚፄ አግፅፃው እንፅኺ አኽⶓ እርዳትፅካ::

ዎታት አንድነት ገነቱ እንሴስካዋ እሩብፅጙስታ ቡዚስጙ እንፅኺዳ ኬፄርስታማ እንፃኽስታው ዎታትያኽ:: እንፃኺቱ ጊዝዴስ ጄሜራማ ክንቴ ክንታማጊ ኬምፕስ ኬምፖ እንሴስካዋ እሩብፅⶓስታ ቡዚስጙ እንፅኺዳ ኬፄርስታማ እንፃኽስቴ:: እን እንፅኺዳ አሴሜርጛማ አግፃው ሚፂስ ጝን አቖ ቺፅጝፄ:: እንታኮው እንፅኺዳ አሴሜርጝጝስ እንፅኺዳ ዝኩኽ ፍታኔ ዋትጛ ፌይጝስ ካሊስታው አኽⶓ ክንታ:: እንፅኺዳ ጌቴማዉሳ ዋሺኔኪ ችግሮ ቲሪትጛማ ፌይጝስ ካሊስታው አኽⶓስታ እንፅኺዳ ይሳማ እንፃኽስትጝ ዋይሚስታ ፄዋው አኽⶓ ዴሳ::

እንሴስካዋ እሩብፅጙስታ ሌፍፅጙ እንፅኺዳ እንፃኽስትጝ ፍንሾስ ጛርቱሳ እንፃኽስትጝስ ካሊፃውሳ ዴሶ አግፅⶓ ቶኬማ::

ዳንግሊ ኬቴም ቺፅጝፂው ግብርኒው ፅፌት ጝናሱ አላፊ አቶ መልካሙ ወረዳ እንሴስካው አብቱ ልማትስ ማልጛ አሜቻው ዙራሙሪ አኽጝስ እንሴስካው ዜርፍዳ አሴሜርጙንኩ ጛርት አቕ ዋይሚስታ አኽⶓ ዙሜካ:: ሚንችካ ጛርት አቕ እንሴስካው ዜርፍዳ አሴሜርጝጝስ ኬሽኹሳ ኪሲ ካንትፅⶓ ቶኬምካ:: እንቲታኪ ሚንችካ አሬሳቻንትካ አብት ዌና አኽጝሾ ኪስስትⶓ ድኹዌካ::  እንሴስካዋ እሩብፅጝስስታ ቡዚስጝስ እንፃኽስታው አቶ መለስ እሊኩ አቕስ ምሳላ ያኻው አኽⶓ ጉሽካ አላፊ:: ሚንችካ ጛርት አቕ እንሴስካዋ እሩብፅጝስስታ ቡዚሳማ ዋይጝስ ኬሽኹሳ ቴኬምስታንታ  አኽⶓ እርዳትፅካ::

እንዴስ ድምክና ግብርኒው ፅፌት ጝና እንሴስካው አብትዳ አሴማርጙንኩ ጛርት አቕስ ውማዩሳ እርዳቴ ፄውጝስ ኬሽኹሳ ትክሞ አግፃንታ ፄዋማጊ አኽⶓ አላፊ ኽይትጝፄካ:: አቶ መልካሙ ኑኑውስታ እንሴስካው አብትዳ አሴሜርጛንኩ ጛርት አቕስ ኬሽኹሳ ብቴ ጎሌልጝዳ፣ ጝኖ ግቢትጝዳስታ ሜቴቴንጙኹሳ ሜኖ ዲግስጝዳ እንቲታኪ እንሴስካው ቲን ማንዲስታታ ፄውጝዳ ውማዩሳ እርዳቴ ፄዌካማጊያኽ::

ኾሺው ልማትዳ፣ እንሴስካዋ ቡዚስጝዳ፣ ዱርካዋስታ ፅኻራዋ እሩብፅጝዳ ሚንችካ  አቕ እንፃኽስታንኩ ዝኩⶓ ቶኬሙንኩ አላፊ ዙራሙሪ ውላ ዜርፍስ አሜቻው አኽጝታጊ እንሴስካው አብትስ ኬሽኹስ ዋይሚስታ አኽⶓ ጌሌፅካ::

ትክላሊስ እንሴስካው አብቱ ልማት እምፕልታቕስ ይኮኖሚ ኬሽጝፂው ዜርፍያኽ:: እንፅኺውሳ ድሎ ፌቴርጝስ፣ ምግቡሳ ዋስትኔ ቼሜትጝፅጝስስታ አጌራውሳ ይኮኖሜ ሌጌፅጝስ ካላው አኽጝስ አጌርታ እንሴስካው አብትዳ ሊሊቲ ትኩት እይስታማ እንፃኽስትጝ ቱስቴ ኪላ ንካ::

ታደለ አጋጄ