አምሉ አሻሪ ዊዳፊ ይኮኖሚው ልግስስ ኬፍንኹ ትክም ዝኩኽ አኽጝ ጌሌፅስትኾ

ታደለ አጋጄ

አምሉ ልማቱ እክድ አጌር አቡቕ አችስ 2011 ም/አሜታዴስ ጄሜራማ አኮሜችስታማጊ ያኹስ ቹዋ አላሚኪላ ዴኑሳ ሜቴኖ ሌጌፅጝስ ዙራሙሪውሳ ባግቶ ኔኬትጝ፣ ፍትሬቱሳ አብቶ ማንዲጝስስታ ኽብፂውሳ አሉምቶ ዙርፅጝስያኽ:: አባላምቲ ዙሪ አምሉ ልማት እንፅኺ “እምፕል አቒ 40 ችግኝካዋ ቴኬልስ” ናው ቹዋ እንፅኼንትስ ካስጙኽ ችግኞ ቴኬልጙ ቴግባርዳ 25 ቢሊዮንዴስ ጃላ ችግኞ ቴኬልጝስ ጄሜርስትጝ አቕስቴ::

ይቶፒያ ቤዴራሱ ጊዝዳ ዴኑ አብትስ አፍሪካኩ አጌርካዴስ ቢዲሪዳ እሽቲኹ ዝቤን ዜኔግስታቲው ያኹኒውላ ጊዝዴስ ጊዞ ዴሜካማጊ ይንትኹ እዝቡ ሚንቺትስ፣ እርሺውሳ ብቴ እሳንጝፅጝስስታ እንሴስካውሳ ክዮ አኹኪ ክራሬ ፋይጝስ ዴኑ አብት ቻፋቻፍስታማ ኔኬታታ ምክንያታ ያኻሼ:: ቤዴራሱ ይቶፒያው ዴኑ አብቱ ልማቱ ካንትፃውስታጊ 120 ሚሊዮን ሄክታር ብቲ ዴንስ ሾፌንስታሺኹስታሼ 60 ታፋ ያኻው ብቲ ዴማካ ዴኑ ልማት እሺኹ አኽⶓ ንቫርካ ምልኻታና:: ያኼስጉ ቤዴራ እሺኹ ዴኑ አብቱ ልማት ኔኬታማጊ አንትጙ ምክንያቲስ ይቶፒያ ቤዴራ እሺኹሳ ዴኑሳ አብቶ ዙርፅጝስ ዝማቺስ ቴኬልⶓ ጄሜርስቱኒዴስ ናካ ሱኺቲ አሜታሳ ቼፍፄታጊ አግስቲ::

እንጚስኪላ ኽብፂውሳ ሺሽርስትⶓ ኔኬትጝስ፣ ብቲውሳ አሉምቶ ኬሽጝፅጝስ፣ ኩፓኩፒውሳስታ እሊኩ ቴክልካዋ ቴኬልጝስ፣ ምግቡሳ ዋስትኔ ቼሜትጝፅጝስ፣ እንፅኺውሳ ድሎ ፌቴርጝስስታ ባግቶ ካላካልጝጝስ አምሉ አሻሪ ኬፍንኹሳ ትክሞ እያማጊያኽ::

2018 ምርቱ ዝቤንዳኪላ “ቴስፌ ቴኬልንስ” ናው ቹዋ እንፅኼንትስ 8 ሊኻ ሚሊዮን ችግኝካዋ እምፕል ጌርክስ ቴኬልጙ ቴግባርዳ ይቶፒያንካ አሴቴፍጜካማ 805 ሚሊዮን ችግኝካዋ ቴኬልጝስ እክድዴስ ጃላ ሳኪትጝፅጝስ አሜት ቺፋ ዋይሚስቲ እንፅኺ አኮሜችስታማጊያ::

ትክላይ ሚኒስትር አብይ አህመድ (ዶ/ር) አጌር አቡቕ አችስ ካስጙኽ እምፕል ጌርኩ አምሉ ልማቱሳ እንፅኼ ካንትኹስ እዩኑ ጊሊፂዳ ይቶፒያንካ ኩርፄንትስስታ እምፕልትስ ቲሬኒ እንዳራ ፄውጝስ ካላንኩ አኽⶓ ናካ ካብስ አሌምስ ካንትፅናኽ ንካ::

“እን ናካ እኖጂ ሳኪትጝፅንኹ ድል ሚንችካ አጌርካስ ታክስስትጝስ ካሌ፤ ሳሴርስ አኮሜችጝስ ኩፅኒ ካሊስታላኽ” ኑንኩ ትክላይ ሚኒስትር አብይ 26 ሚሊዮን አጌር አቕ ዋኾ ጌርኮ ችግኞ ቴኬላኒስ እሺጝ ሳሴርስ ካንትስትጝስ ካሊስታቲው አኽⶓ ቼሜትጝፄካ::

ንጙዊኒ አምሉ ልማቱ እንፅኺስ 6 ትኩሚ 5 ቢሊዮን ችግኝካ ቴኬልስትካ:: ይጉኽ 1 ትኩሚ 5 ቢሊዮን ችግኝ ዴሜካ ይጉንኩ አርፍካዳ ቴኬልስታዊያኽ::

አምሉ ልማቱ እንፅኺስ አሜት ቺፋ ሚንችካ ችግኝካ አዊ ብሄረሰቡ ቺፅጝፂዳኪላ ሊሊትጙኩ ወረድካዳ ቴኬልስታና:: ችግኞ ዝማቺስ ቴኬልጝዴስ ቤዴራማ ችግኝስ አቕስታው ፋግቲ ለኮማ ወረዳው አሬሳቻንትካ ችግኞ ቴኬልጝስ ኬሽኹሳ ትክሞ አግፅጝስ ኪሴ ሜዜጌብፁኒ ወረዳኽ::

ብሄረሰቡ ቺፅጝፂታ ፋግቲ ለኮማ ወረዳ ዲከረንስ ችግኝስ  አቕስታዊያኽ:: ፌይንኩ አሜትካዳ  ዎታትካ እንፅኺውሳ ድሎ ፌቴርጝስ ችግኞ ፌልስጝዳ፣ ቴኬልጝዳስታ ኬሴልፅጝዳ አሴሜርጝጝስ ሚፄ አግፃኑ ዙራሙሪያኽ::

ፋግቲ ለኮማ ወረዳው እንዳኹዊ ኬቤሊው ዝኩዋንትካ አምሉ ልማቱ እክድስ እንዴስ ቤዴራ ጄሜርካማ ትክሞ አግፃሺንኩ አኽⶓ ቶኬምካማ ግብርኒው ውማይቴንካው እርዳቲስ ዙራሙሬ ሊሚፅጝስ ዝኩዊኒዳ ኪሲ ካንትፅⶓ ድኹዌካ:: አሬሳቻንትካ ጛርቱ ብቲዳ ሊሊትጙንኩ ቴክልካዋ ቴኬልጝስ ኽብፂው አሉምት ዙራታ ፄውጝስ ምርት ዴሜካታ ፄውⶓ ዙሜካ::

ቴኬልስትኹ ችግኝ ኬሽኹሳ ትክሞ እያታ ፄውጝስ ቱስታው ዳድስ አንኬባኬብካማ ትክምዳ ታምባታ ፄዋንኩ አኽⶓ ቶኬምካ::

ቴኬልስትኹ ቴክልዳ ማንዳንቴ ኬፄርጝስ አንኬባንኬባንኩ አኽⶓ ቶኬሙንኩ ዝኩዋንትካ ጛው ዙራሙሪዳ ቴኬልስታው ቴክልስ ጛውሳ ዝኩዊኔ ሌጌፅጝስ ካሌካ:: እምፕልትስ  ችግኞ ቴኬላኑ ብቲዳ አቭርቱ ልማትስ ቴኬምስትካማጊ አኽⶓ ዙሙንኩ ዝኩዋንትካ አምሉ ልማቱ እንፅኺዳ እምፕልትስ ያኼካማ ቴኬልጙሳ እክዶ ቴግባርዳ እሽፅጝስ ፅሬቶ ፄዌካማጊያኽ::

ወረዳዳ ፌዩንኩ ላጚቲ አሜትካዳ 32 ሚሊዮንዴስ ጃላ ችግኝ ቴኬልስትⶓ ፋግቲ ለኮማ ወረዳዳ ግብርኒው ፅፌት ጝናሱ አላፊ አበባው አማረ ዙሜካ:: 420 ሄክታር ብቲዳ 4 ትኩሚ 2 ሚሊዮንዴስ ጃላ ችግኝ ቴኬልስትⶓ ጌሌፅካ::

ትክላሊስ ይቶፒያ አምሉ አሻሪ ሜርሃ ግብርስ እንፃኽስታታጊ አግስታው እንፅኺስ አሌማ አቡቑ አችስ አቕስቴ አግፄታ ፄዋ:: አኽጝስኪ እምፕል ጌርክስ ችግኞ ቴኬልጝ ይቪቺ ያኻውላስ ቴኬልስትኹሳ ሲፍጝጛማ አንኬባንኬብጝስ ትክምዳ ታምባታ ፄውጝ ቱስቴ:: አምሉ አሻሪስ ቴኬልስታንኩ ቴክልካ ይኮኖሚውሳ ትክም እያንኩ፣ ምግቡሳ ዋስትኔ ቼሜትጝፅጝስ ካላንኩሳ አቮካዶ፣ ማንጐ፣ ፓፓያስታ ቡኖ ፄጌርጛንኩ ቴክልካዋ ቴኬልጝስ ምርቶስታ ምርታምቶ ዴሜካታ ፄውጝስ ዊዳፊ ይኮኖሚው ልግስስ እንፃኽስትጝ ፋይፄ::