ይቶፒያ አምሉ ልማቱሳ ቴግባሮ ጄሜርቱስ 20 ሚሊዮን ችግኞ ቴኬልጝስ እክዶ ይፋ ፄውትኹ ወክትዳ “ዋታ ያኻማይ” ኑስ አሌም ዴኔክስታሺኾ ፍሽትኹ እክድዳ ካሴ ዲግስኹ አሌምስ ዴሜካ ታክስትኹሳ ውና ፄውታታ አምሉ ልማትስ ኪሴ ሜዜጌብፅጝስ አሌምዴስ አቕስቶ አግፅጝዴስ እንግርግራ ኒያ
አምሉ ልማቱ ቴግባር ካናኻፅካውሳ ሜቴኖ እፅፍስ ዴሜካ፤ አይር እግልታው ዛቢትጚው ምክንያትስ ይንታውሳ አዳጌ ካላካልጝጝስ ታምቦ ፊትጛማጊያኽ አጌር አቑ ይኮኖሚው ልግስዳኪላ ኪሴ ካንትፃ
ምንግስት ዴጌፋው አምሉ ልማቱ ቴግባር ሳኪትጛታ ሲፍጛው ኮሚቴ ፍሽኹ ንቫርታጊ 2011 ምሬት አሜታዳ ቴኬልስትኹ ችግኝዴስ 83 ትኩሚ 4 ሊኽዴስ እንቲታኪ 2012 ምሬት አሜታዳ ቴኬልስትኹዴስ 79 ታፋ ሊኽዴስ ችግኝ ፄዴካ
አፍሪካዴስ እዝቡ ሚንቺትስ ላጛንቲ አችዳ አግስቴት ይቶፒያ አጌር አቡቑ አችስ ዴኖ ሊሚፅጝዴስ ፌይኹስ ምግብስ ያኻውሳ ችግኞ ቴኬልጝስ ኪሴ ሜዜጌብፅጝ ዋዚታ ካንትስታው ቴግባር ጋቲዊያኽ
ክችክቼ ችግኙሳ ዜሮ ክችክቺ ብቲዳ፣ ክችክቺ አላሚስ ቴኬልጝኪላ ፋይፃንቲያኽ አሌሙ ዙሪዳ ዝኩንኩ ዴኑስታ ግብርኒው ኾትካ ችግኝካ ቴኬልስታኑ አስሜምጛው ብቲስታ አይር እግልታ ምርምሪስ ፂኒስስትኹ አኽጝ ቱስቴ ንካማ ኩስጝፃና
እን አምሉ ልማቱ ቴግባር ይቶፒያዴስ ፌይኹስ አፍሪካው ጄንጁ ኽሳንቲ አምሉ ጅግር ልማቱ ፕሮጄክቱ እክድስኪላ ይቶፒያው ታምብ ኬፍቲኒ አኽⶓ ካንፅፅኹያኽ
እምፕል ወክትዳ 40 ታፋ ሊኽዴስ ጃላ ዴኑ ሽፋን እሺት ይቶፒያ እናጉዝማ እሺኹ ክቶ አቱኽ ፍትሬቱሳ አብቶ ማንዲጙ ችግሩ ምክንያትስ ዴኑ ሽፋን 3 ታፋ ሊኽሾ ዜሬቕናማ ስጋቱ አችዳ ታምባሺኹ አኽጝ ታክስስታዊያኽ
እንጚሱ ምክንያትስኪላ ግብርኒው ምርት ኔኬትጝ፣ አኹ አግስታው ብቲ ዲፒስ ዋኽጝስታ አኹው ሜቴን ኔኬትጝ ፌይጝ ናኒ ዴሜካ አኹ ድኽጝ እምፕልታቕ ባስኹ ባግት፣ ጎርፍስታ ምግቡ ችግሩ ስጋትሾ ቱዋንታኪላ ፄዋሺኾ
እንጚጊ ስጋት ኪስስታታ ፄውጝስ ካሉኽ ኽሳንቲ አምሉ ልማቱ እክድ ቴግባርዳ እሺⶓ ጄሜሩኒዴስ ኩፅኒ ይቶፒያንካ ቴቬቬርጜካማ ታሪኮ ኪስካ
ይኮኖሚስ ሌጌስቱፃስታ አምሉስ ሊሚፃ፣ አይር እግልታስ አሚቼፃ አጌራዋ አሬኬብፅጝስ ፅሊዴስ ኽሳንቴ፣ አሬሳቻንትካዴስ ምንግስቶ ኺስታ ሊሊቲ ትኩትስ እንፃኽስስታማጊያኽ
ፌይንኩ አሜትካዳ ቴኬልስትኹ ችግኝዴስ ድምክና ዊዳፊስ ፅናትስስታ ምርምሪስ ዴጌፍስትኹሳ አምሉ ልማቶ ቴግባርዳ እሽፃማጊ አላፍቶ ቱስቲስ ፊትጝጝ ይቶፒያንካዴስ ማንዲስታው አዴር ያኻ