እርዳትጚው ባይል

እርዳትጝጚው ባይል እምፕልታቑ ዝኩዊኒው ስር፣ እንካንጝጚውስታ እምፕልቱ ጊሊፂያኽ:: ችግር ታምባኒ እርዳትጝጝ፣ ዴስቲዳስታ እዝንዳ እምፕልትስ ፌይፅጝ፣ አክማ ጋንኩስስታ ቼጌርስቱንኩስ እርዳቴ ፄውጝ ቹዋ ቹዋ እርዳትጝጚው ካንትፅካኽ::

ይቶፒያዳ እርዳትጚው ባይል ባኩ ፋዩ እንፅኺዴስ ጃላኽ:: እርዳትጝጚ ይቶፒያንካስ እጂኹስታ ውላቱዊ ልቕልቕቲዳ ዴስስትኹ እሴቲያኽ:: አቓ አኽጝ ጄሜራው ጚጛርትጛዴስ ፌያማ እሊኩስ እርዳቴ ፄውጝስ ያኹስ እምፕል አቒ ቼጌርስትኹ አቒውሳ ሴንቴ አሴሱስ፣ አቔ እቱኽዴስ ጉሽስ ጚውሳ አቒ አኽጙሳ ክብሮ አግፄ:: አንኩሊውሳ ዴስቴኪላ ፌቴሬ::

ድርዳ፣ ኩብዳስታ ዎፌልዳ ካንትስታው እርዳትጝጚው ባይል ናካዳ ቴክኖሎጄ ቴኬምስትጝስ ሊሊትጙንኩ ማይቤራዊ ታምትጝፂ ፍኖ ቴኬምስትጝስ እሳንስ ዴስስታማጊ ይንታ:: ሊሊትጙንኩ ኬቴምካዳ አግስታንኩ ዎታትካ ባኩ ፋዩ እንፅኺዳ አሴቴፍጜካማጊ እርዳትጝጚውሳ ባይሎ ይስጝፅጝ ቼጌርስቱንኩስ እርዳቴ ፄዋኒስ ካንትስቴ::

ዎታት መሰረት መኮነን እንጃቢሪ ኬቴሙ ዝኩዋንቲ ያኹስ ማይቤራዌ ታምትጝፄ ቴኬምስትጝስ ቼጌርስቱንኩስ እርዳቴ ፋይጝፅጝስ ባኩ ፋዩ እንፅኺዳ አሴቴፍጛውሼ:: ቼጌርስቱንኩሳ እርዳትጝስ አንኮሊውሳ ዴስቴ አግፃው አኽⶓ ቶኬምኹ ዎታት መሰረት አክሞ አቱንኩስ፣ ታክሲሉ አዲጊ ታምቡክስስታ ቼጌርስትካማ እርዳታውሳ ጋቲንኩ ጛርት አቕስ ሊሊትጙንኩ እርዳታንትካ ጛርት አቕዴስ እርዳቴ ፋይጝፃማ ቼጌርስቱንኩስ ታምባታ ፄዌ:: ዲጊስ ክዳማጃዳ ማኪናው ኬሴት ታምባማ ሱኺቲ አርፋ ጄራቹ ክርጙ ኬሴት ታምብጝስ ኬሴትዴስ ፊቲትስ ስራስ ሊሊትጙንክ ጛርት አቕዴስ ጌንዜቦ ፋይጝፃማ እርዳቲ ታምባታ ፄዋ:: ጛርቱሳ ማይቤራዊ ታምትጝፂውሳ ፍኖ ባኩ ፋይ እንፅኺስ እንፃኽስስታማጊ አግስታው ዎታት መሰረት እሊኩ ዎታትካሊ አኽጝስ ባኩ እርዳቲው ማቤሬ ቲሪትጝፅጝስ ታክስⶓ እንክርፃ:: ዎታት መሰረት ዙሙኽስታጊ “እምፕልካ እምፕልካ አቕ ጛርትስ ኩፕፃውስታ ካንታና:: እርዳታንትካው ስምስ ጌንዜቦ ኻሳውስታ ልዋና:: ያኼስጉ እን ኩፅኒ እርዳቴ ፋያንቲ አቒው አካውንትስ እርዳቲ ኩፓታ ፄፓታጊ አግስቴ” ኑስ ባኩ ፋዩ እንፅኺስ ፄዋውሻውሳ ቴሳትፎ እንክርፃ::

እሊው ባኩ ፋዩ እንፅኺዳ አሴቴፍጝጝስ ሊሊትጙንኩ ቼጌርስቱንኩ ጛርት አቕስ እርዳቴ ታምፃውሻው ዴሜካ አርቲስት ደሳለኝ መኩሪያዊያኽ:: አገው ግምጃቤት ኬቴምዳስታ ዙራሙሪዳ አክማ ጋንኩስ፣ ቼግርስቱንኩስ፣ እርዳቲ ፋይፃኩ ጛርት አቕስ ማቤራዊ ታምትጝፂ ፍኖ ቴኬምስትጝስ እርዳቴ ታምፃማጊያኽ:: አግስቴ:: እርዳትጝጚ ምንጊሱ ጊዝዳ ጄሜራማ እጂኹ ይቶፒያንካው ባይሌኽ ንኹ አርቲስት ደሳለኝ ቼግርስቱንኩስ እርዳቴ ፄውጝ አንኩሊውሳ ዴስቴ እያው አኽⶓ ዙማ::

አገው ግምጃቤት ኬቴምዳ ባኩ ፋዩ እንፅኺ ሚንች አሜትዴስ ጉሽፃማ ዝኩክ አኽⶓ ቶኬምጝስ ዎታትካ እምፕልቴካማ ቑንዳስትኹሳ ካሴና፤ ቼግርስቱኹስ እርዳታና:: አጌርስ ሚንቾ እንፅኼ እንፃኽስታማ ዴሬትኹሳ እርዳቴ ፄዋንኩ አኽⶓ እንክርፃ::

ባኩ ፋዩ እንፅኺስ ሚንችካ ዎታትካ አሴቴፍጜካማጊ አኽⶓ ቶኬምኹ አርቲስት ደሳለኝ ያቑኽ ያኻ ያቔካያስኩ ማይቤራዊ ታምትጝፂ ፍንዳ ባይስታው ንቫርስ እርዳቴ ፄዋንኩ አኽⶓ ቶኬማ::

አሜት ቺፋ ክንቲውሳ ሜሳርካዋ አቱንኩ ክንታንትካስ ዴብታሮ ጄውጝስ ክንቴ ሲፍጛንታ ፄውጝ፣  ጝኖ ግቢትⶓ አቴካማ ቼጌርስቱንኩሳ እርዳቴ ፄውጝ፣ ሊሊትጙንኩ ምክኒያትካስ አዲጊ ታምብኹስ እርዳትጝ፣ አሜት ባሎ እሺጝስ ቼጌርስታንኩስ ባሎ ዴስቴንካ ያኼካማ እሼንታ ፄውጝስስታ እሊኩ እንፅኽካዳ ባኩ ፋዩ እንፅኺስ እርዳታንኩ አኽⶓ ሼውፃ::

እንፃኽስስታው ባኩ ፋዩሳ እንፅኼ ካንትካማ እሊኩ ዙራሙርካዳጊ እሳንጛማጊ ይንትኹ ባኩ ፋዩ እንፅኺ ማይቤራዊ ታምትጝፂው ፍኖ ቴኬምስትጝስ እርዳቴ ፄውስታማጊ አኽⶓ ቶኬማ:: ውላ ዙራሙርካዳ ቼጌርስታንኩስ እርዳቲ እይስቱኒጊ ቼጌርስታው አቒ አግስታላኽ ኑስ ዝኩኽሳ እርዳትጝጚውሳ ባይሎ ታክስፃ:: ባኩ ፋዩ እንፅኺ አቒ አቓ አኽጝስ ይቪቺስ ፄውስታው እርዳቲያኽ::

እኖጂ አቕዴስ ቻቤልጝስ አቕስ እይጝ አኽጝስ ዳምብታ ያኻማ እንፃኽስትጙሳ ቴግባሮ አኮሜችካማጊ አኽⶓ እርዳትፃ:: ማይቤራዊ ሚዲያስ እርዳቴ ፋይጝፅኑ ማልጛ ባሳማ ቼግርስትኹስ አኽⶓ ቶኬምጝስ ውላ ቼጌርስቱንኩስጊ እርዳቲ እይስታቲው አኽⶓ ዲብሳ:: አክምታ ናቕትዳ ቼጌርስታውሳ አቔ ዙርጝ እናና ካንትጝስ እርዳቴ ፄውጝ ቱስታው አኽⶓ ጉሽካ::

አውጚው ራዲዮንሊ እጂጜ ፄውንኩ እንጃቢሪ ዩንቨርስቲዳ ፎክለሩ ክንትፃንቲ እሱባለው ክንዴ እርዳትጝጚ ፅሊዴስ ኽሳንቴ ኺስታ ዴስስትኹ ባይሉ እሴት አኽⶓ ዲብስካ::

እምፕልታቕ ዴስቲዳኪ ያኻ እዝንዳ እርዳትጝጛና፤ አቕ እርዳቴ ፋያኑ እላቲው አኹ ቼጌርስትኹ ይቪቺ ያኻውላ ዋሺኒኪ ማይቤራዊ ኩምችንካዳጊ እርዳትጝጚ ፋይፃው አኽⶓ ዙሜካ::

እርዳትጝጚው ባይል ይቶፒያንካዳ ማልጛ ዴስስትኹ አኽⶓ ቶኬሙንኩ ክንትፃንቲ እሱባለው እርዳትጝጚዳ ዲጋቲውሳ አቔ ችግሮ ካሲካማ እምፕልትስ ዝኩዋታ ፄዋንኩ አኽⶓኪላ ቶኬምካ::

እርዳትጝጚ ጌንዜብስ ይቪቺስ ያኻውላስ ግርብስ፣ አሳብስስታ እሊኩ አኺንካስጊ እርዳትጝጝ ቱስታው አኽⶓ ኽይትጝፄካ::

አጌራ ሉዋላውቱ ችግርዳ ትይኹ ወክትዳ አጌራውሳ ሉዋላውቶ ኬቤርፅጛ ካስኹ ጛርት አቒውሳ አብቶ አንኬባንኬባማ ማንዲጝስ ምርቶ ኩፕፅጝ ዴስስትኹ እርዳትጚው ባይል አኽⶓኪላ ቶኬምካ::

ባኩ ፋዩ እንፅኺዳ እርዳቴ ፄውጝ አንኮሊውሳ ዴስቴ እያው አኽⶓ ጉሹንኩ ክንትፃንቲ እሱባለው አዊው እዝብ እድር፣ ፌሬስቴኑ ማቢሪ፣ ዎታትካው ማቢሪስታ እሊኩጊ ባኩ ፋዩ እንፅኺዳ አሴቴፍጝጝስ እንፃኽስታንኩ አኽⶓ እርዳትፅካ::

እምፕልታቕስ እርዳቲ ፄውስቱስ እርዳትስትጝ ቱስታንኩ ጉዳይካዴስ እንዳርማሱ እርዳቲ ፋይፃው አኽⶓ ሺሽጝስ እርዳቴ ፄውጝ ቱስታው አኽⶓ ጉሽካ:: እርዳቲ ኹሉ ቺፋ ታፎ ማንዴካማጊ ዝኩዋንታ ፄዋው አኽጝስ እርዳቴ አግፁንኩ እርዳትስትጝዴስ ፌካማ እሊኩስ እርዳቴ ፄውጝስስታ ጛጛርትጛሳ ጛሬ ካላንታ ፄውጝ ፋይፃው አኽⶓ ዙሜካ::

ባኩ ፋይስ ማይቤራዊ ታምትጝፂ ፍንስ ፄውስታው እርዳቲ አሜት ባል ታምባኒ ይቪቺ ያኻውላስ ፋይፃው ጊዝዳ እርዳቴ ፄውጝ ፋይፃው አኽⶓ ጉሽካ::

ምንግስትኩ ኾትካጊ ቴቤቤርጜካማ እንፅኼ ፌቴራንታ ፄውጝስ ኬሽኹሳ ዝኩዊኔ ጉሳንታ ፄውጝ ቱስት አኽⶓ አሳቦ ዲግስካ::

ማይቤራዊ ጉዳይዳ እንፃኽስታንኩ ኾትካ ማይቤራዊ ሚዲያዋ ባኩ ፋይስ ቴኬምስታንኩ ዎታትካዋ ይስጝፅጝስታ ኬሽኹሳ እንፃኽስታንታ እርዳቴ ፄውጝ ፋይፃው አኽⶓ ሼውፅካ::

ታደለ አጋጄ