ይኮኖሚስስታ አይር እግልታስ ሙሲሲኒ

አምሉ ልማቱ እንፅኺ ይስጛማ ሲፍጝ እጁስ ያኻንኩ ካናኻፅካዋ አግፅጝስ፣ ጝኑ ግንባቲስ፣ ኽብፂውሳ ሻራሻርስትⶓ ካላካልጝጝስታ ኽብፂውሳ አሉምቶ ዴሜክጝሰ፣ ብንካ ካጋቲንታስታ እንፅኺውሳ እድሎ ፌቴርጝስ እንቲታኪ እንሴስካው ኬሌብስ ያኻውሳ ክራሬ አኹኪ ኪዮ ዋግፅጝስ እንዙራኽ እስታቲውሳ ትክሞ እዬ:: እንጚሳጊ ትክሞ ውና ፄውጝስያኽ 2011 ምሬት አሜታዴስ ጉሽፃማ ካስጛውሻው አምሉ ልማቱ ዝማቺ ይሳማ ይስጛማ ሲፍጝስ ካሉኽ::

አምሉ ልማትስ ላምቡሳ ኺስታ ሜዘጌብስትኹ ዋይሚዴስኪላ 48 ቢሊዮንዴስ ጃላ ችግኝ ቴኬልስታ:: አጌራው ዴኑ ሽፋንኪላ 17 ትኩሚ 2 ታፋ ሊኽዴስ እሺኹ 24 ታፋሾ ኬፍንጝ ቶኬምስታ:: ዴኑዴስ ችግኝዴስ ድምክና አቮካዱ፣ ማንጉ፣ ፓፓያስታ አፕሎ ፄጌርጛንኩ ኩፓኩፒኩ አይኔትካ እሳንስ ቴኬልስትካ:: እንጚኪላ ምግቡ ዋስትኒስስታ ይኮኖሚው ልግስስ ታክስስታማኽ:: 2018 ምርቱ ዝቤንዳ 8 ቢሊዮን ችግኞ ቴኬልጝስ ይሴን እንፅኺ አኮሜችሰታማጊያኽ አግስቴ::

አዊ ብሄረሰቡ ቺፅጝፂ አንኪሺ ጉዋጉሲ ወረዳ ቱልቲ ኬቤሊዳ ግብርኒው እንፅኺስ ቺትጛንኩ ዊዛሩ ደመከች መኮንን አውጚ ልግስ ዳዳው ቴርትሊ ፄውኑ እጂጚዳ “ችግኞ፣ ትክልቴስታ ኩፓኩፔ ሊሚፅጝ ዝኩዊኔ ኬሽኹ ፄውጜያኽ” ንካ::

ፅካ አሜታዴስ ቤዴራ ብቲ ቦራቦርስታ ኩሪስ ድጙስትጝስ ትክሞ እያቲው እሺኹ ብቲዳ ዲከረንስ ችግኞ ቴኬልጝስ ድኽትዴስ ፌካማ አብቶ አጌላንታ ቢኪፅⶓ ድኹዌካ:: ኽብፂው አሉምትኪላ ዙራማ ታፌስታ ስንዳዮ አሜሬትጝስ ቢኬካ:: ጋኺ አፋፋ እሺኹ ብቲኪላ ክቼማ ዲኒክፄ ፍትሬቶ ካንትጝስ ካሌካማ ሊሙኽሳ ዙራሙሬ ጄርካስ ዎሬስፅጝስ ፄዋኑ ፅሬትስኪላ ዴስቴንካኽ::

ዊዛሩ ደመከች ናኑውስታጊ ንጙዊኒ ችኽዳ ቴኬላኑሳ ችግኙሳ ፌሎ አኹሳ ፍሮ ግሽካ አኾ ፍሽካማ ሳኑ ወክትዳ ዳላውሳ ፌሎ ቴርስካ:: ናኪኒ ወክትስኪላ ዲከረንስ ችግኞ፣ ጌሾስታ እሊውሳጊ ፌሎ ቴርስካማ ቴኬልካማጊ ጛጛርትጛዴስ ፊቲስጝስ ፌሎ ዋይካማ ሚፄ አግፄካማጊያኽ:: ሴብሎ ዜራቲኑ ፃይኑ ብቲዳጊ ጌሾ አፕሎስታ ቡኖ ቴኬልካማ ይኮኖሜ ኪስጝስ ይስካማ እንፃኽስቴካማጊያኽ::

ዊዛሩ ደመከች ችግኞ ቴኬልⶓ ጄሜራኑላ እሺኑ ቺጊርፂ ዝኩዊኒ ኪስስታማ እሺኑ ክይው አኹኪ ሲቑዊ ጝናዴስ ፌካማ ግዴውሳ ኮርኮሩሳ ጝኖ ግቢቴካማ ቲንዌናስ ዝኩዋውሻና::

ፍንሾስኪላ ይስጝፄካማ ሲፍጝስ አምሉ ልማትስ ኬሽኹሳ ይኮኖሜ ሜዜጌብፅጝስ እክዶ እሚካ::

አሬሳቻንቲ መዝገቡ ገረመ እንዳ አሜትዳ ፌልሱኑሳ ትክልቴስታ ኩፓኪፒውሳ ችግኞ አንኬባኬብካማጊያኽ:: ጌሾ፣ ዊሬ፣ አቮካዶስታ አፕሎ ቴኬልጝስኪላ ቤዴራ ቴርቶ አሌድካማ እንፅኺሾ ቱዌካ::

ፌይንኩ አሜትካዳ አሉምት ችንችጙስትኹሳስታ ቦራቦርስትኹሳ ብቴ ሊሚፅካማ ትክሞ አግፅⶓ ጄሜርካ:: አንኩዋ ኩፃ አኹኪ ውጋቢ ብቲ  አሬ ዋግፃላ ናማ ድንብሩ ቻሺኹ ብቲዳ ዲከረንስ ችግኞ ቴኬልካማ ጛውሳ ይኮኖሜ ኪስጝስ ካሊⶓ ድኹዌካ:: እርሺ ቤራ ጋንኩ እሺንኩ ፅምዳ ቤራዋ አጌሌካ:: ኹዋሺስ ያኻንኩ ክምካዋ እሩብፄካ:: ክምካውሳስታ አቑሳ ዝኩፂ ጝኖ አግሌልጝፄካማ ግቢቴካማ እንካንስቲስታ ቲን ዌናሳ ዝኩዊኔ ዝኩካማጊያኽ:: እሌታ እርባቴ አቴካሺንኩ ናካዳ አብቶ አጌሌካማ ጄርካስ ዎሬስፃኑሳ አብቶ አጌልጝስ ዴስቴንካ አኽⶓ ድኹዌካ::

ፍንሾስኪላ አምሉ ልማቶ ሊሚፅካማጊ ኬምፕስ ኬምፖ እንሴስካዋ እሩብፅጝዳስታ ሌፍፅጝዴስ ፌይኹስ ቲንዌና ዝኩዋኒስ ያኻውሳ ትክልቴስታ ኩፓኩፔ እሳንስ ሊሚፅጝስ አኬድካ::

ቱልቲ ኬቤሊ ግብርኒ ፅፌት ጝናሱ አላፊ ሞላልኝ ባንቴ ኬቤሊታ አምሉ ልማትስ ሊሊቲ ትኩት እይስትⶓ ጌሌፅካ:: ኬቤሊው ኽብፂው አይኔትስታ ብቲው እንኩሪ ቺጊርፂ አኽጝሊ እምትጛማ ፅክራ ላጛ አሜታዴስ ቤዴራ ሲጊፃው አችዳ ታምባሺኹ አኽⶓ ጉሽካ:: ያኼስጉ እምፕልታቖ ችግርዴስ ፍሽጝስ አኮሜችስትኹ ቴግባርስ ኩፅኒ ኬፍቲኒ ኪሲ ሜዜጌብስታ:: እንጚስኪላ ካጋሺኹ ብን ዙራታ ያኻ:: አሬ ዋግፃቲው እሺኹ ብቲው አሉምት ዙራማ እልስ ሳሲፃው ዙራሙሪ አኽⶓ ጉሽካ::

ዲከረንስ ችግኞ ሊሚፅጝስ ጄሜርስትኹ አምሉ ልማቱ እንፅኺ ናካዳ ኬፍቲኔ ይኮኖማውሳ ሚፄ አግፅፃንኩስታ ዊዳፊስ ትክሞ እያንኩ ችግኙስታ ኩፓኩፒው አይኔትካዳ ትኩት ፄውስታማ አሬሳቻንትካው ዝኩዊኒ ኪስስታታ ፄውስታ:: ዙራሙሪዳ አግስታው ሴብልኪ ያኻ እንሴስካዴስ አግስታው ትክም ዜሬቕቲኒ እሺኹ አኽጝስ ሚንችካ ስዴቶ ጎሌላሺንኩ ያኼስጉ ናኪኒ ወክትስ ኩፅኒ ፌይኹ ድኽቱ  ታሪክ ኪስስታማ አሬሳቻንትካ ኬሽኹሳ ዝኩዊኔ ዝኩካማጊ አኽⶓ ቶኬምካ::

ብሄረሰቡ ቺፅጝፂዳ አንኪሺ ጉዋጉሲ ወረዳ ግብርኒ ፅፌት ጝናሱ አላፊ አስፋው አጌር አቑሳ አብቱሳ ሜቴኖ ሌጌፃው አምሉ ልማቱ ቤዴራ ቴርት ካስጝጜ አቕፄካ:: አሜት ቺፋ አምሉ ልማትስ ያኻው ሊሊትጙኽ ዜር  ዝኩኽስታ ኽብፂውሳ ሺሽርስትⶓ እንቲታኪ ብቲውሳስታ አይር እግልታውሳ ሚንዛኖ ማንዳው ዴኑ ችግኝ ኾት ቺፋ ቴርታንኩ አኽⶓ ቶኬምካ:: ቡን፣ አቮካዱ፣ አፕልስታ ሙዝ እንቲታኪ ይኮኖሚስ ቴኬማንኩ ችግኙ አይኔትካው ፌል አሬሳቻንትካስ ታምባታ ፄውስታውሻው አኽⶓኪላ ቶኬምካ::

2018/2019 ባጄት አሜትዳኪላ አምሉ ልማቱ ቴግባርስ አይር እግልታሊስታ ኽብፂው አይኔትሊ አስሜምጛው 130 ችግኙ ኾትካዳ 8 ሚሊዮን ችግኝዴስ ጃላ ችግኝ ቴኬልስትጝስ ቴርታ:: ሻይ 340 ሄክታር ብቲ ቴክልስ ጎሌልስታ:: እንጚዴስኪላ 859 ሄክታር ብቲ ጂፒኤስስ ጎሌልስታማ ቴርትⶓ ቶኬምካ::

ቴርትኹ ችግኝኪላ ማሲው አኹኪ አሊቪው ድንቤርዳ፣ ቦራቦርስትኹ ብቲዳ፣ ብንዛቫያ፣ እምፕልቱ ሻቲ ብቲዳ፣ ሊሊትጙንኩ ኾትካዳስታ ቴጋኑ ዙሪዳ ቴኬልስታንኩ አኽⶓ አላፊ ኽይትጝፄካ::

አቶ አስፋው እያኑ ኽይትጝፂዳ ኬቤሊዴስ ወረዳዋ ኺስታ አግስታንኩ ውማይቴንካ አሬሳቻንትካስ ክንቴ እይካማጊያኽ:: አይር እግልታው ኪሲ ታምፃውሳ ጉዳቶ ካላካልጝጝስስታ ግብርኒውሳ ዜርፎ ዝቤንፅጝስ ምርቱሳ ድምክኔ ሳኪትጝፅስ አምሉ ልማት ቲኪስታቲው ታምብ ዝኩኽ አኽⶓ ጌሌፅካ:: እንጚስኪላ አምሉ ልማቶ ቱስቲስ አንኬባኬብጝስታ ዊዳፊስ ሊሚፅጝ ውላዴስጊ ማንዲስታው አላፍት አኽⶓ ታክስፅካ::

አማኻሪ ክልሉ ግብርኒ ቢሩዳ ፍትሬት አብት ልማቱ ዳይሬክተር አቶ እስመለአለም ምህረት በኩር ጋዚቲሊ ፄውኑ እጂጚዳ አማኻሪ ክልልዳ 77 ሻይ 959 ችግኙ ኾትካዳ እምፕ ትኩሚ ላጜታ ቢሊዮን ችግኞ ፌልጝጝስ እክድ እምስታማ 1 ትኩሚ 6 ቢሊዮን ችግኝ ቴርትⶓ አቕፄካ:: ችግኙሳ ፌሎ ቴርስጝዴስ ፌይኹስ ቴኬልስታውሳ ብቴ ሺሽጙ እንፅኺ ትኩትስ አኮሜችስታማጊ አኽⶓ ዳይሬክተር እርዳትፅካ:: እንጚስኪላ 260 ሻይ ሄክታርዴስ ጃላ ቴኬልስታው ብቲ ጎሌልስታማ እንፅኺሾ ቱስትⶓ አቕፄካ::

ችግኞ ፌልስጙ እንፅኺ ጛርት አቑ ማሲዳ፣ ማቤርካዳ፣ ምንግስቱ ኾትካዳ ፣ምንግስታዊ ያኼካያስኩ አቺትካዳስታ ኾትካዳ አኮሜችስትⶓ ጉሽካ::

ዳይሬክተሩ ኽይትጝፂታጊ ችግኝካው ፄዴክጙሳ ሜቴኖ ኬፍፅጝስኪላ ጉንቤት ኪንዲዴስ ጉሽፃማ ሊሊቲ ሲፍጚስታ ሳይንሳዊ እንኬባኬብጚ ፄውስቱስ እጂⶓ አቕፄካ::

ክልልዳ ፌይንኩ አሜትካዳ አኮሜችስትኹ ችግኞ ቴኬልⶓ ቴግባርስ ዴኑ ሜቴን ዴሜካ፤ ፍትሬቱ አብትስታ አይር እግልታ ማንዲስታ፤ ኽብፂ ሺሽርስታቲታ ካላካልጝጝስ ምርቱ ድምክኒ ይንታታ ኬፍቲኔ ታምቦ ፊትጛ::

ንግስቴ ተስፋ