ቴስፊስ ማንዲስታው ኩስጚው ኮሚሽን

አጌራዊ ኩስጝጚው ኮሚሽን ይቶፒያዳ ፌቴርስትኹ ኔፃ ኾት ያኹስ አላሚኪላ አጌራኻዳ ፌይንኩ ዝቤንካስ አስሚምጜ አቲስኹ ፖለቲካው፣ ታሪኩ፣ እገ ምንግስቱስታ እሊኩ ጋቻው ጉሽፃ ያኻና እስትካማ አምንስታንኩ ቹዋ ጉዳይካዳ ውላዋ አሴቴፍጝፁኽሳ ኩስጜ ካስጝፅጝስ ችግርካዋ ኽይጝስ ካሊፃው ኩልፍ ሜሳርያኽ::

ኮሚሽን ይካቲት አርፊ  2014 ምሬት አሜታዳ ፓርላማዳ አዋጅስ ቲሪትጛ:: ድኬስታ ባኩኔ ፍንስ ፍኖ ዲብስጝጝስ ኩስጚስ ችግሮ ኽይጝስ ካሊፃው ትቤቢያኽ ኪላ እስታ:: ኩስጚው ኮሚሽን ሊሊትጙኽ ብሄርስታ አይማኖት ዝኩክሳ አጌር አቖ አሳብስ አስሜምጛንታ ፄዋው ክርፂ ታሪካዊ ሴሌኽ::

አፍሪካዴስ ኩስጝጚስ ኪሴ ሜዜጌብፅካማ ቱኑ ችግርዴስ ፊጝስ ካላንኩ አጌርካዴስ ቱኒዚያ፤ ደቡብ አፍሪካስታ ሩዋንዳ ምሳሊታ ቶኬምስታና:: እኒጛ አጌርካ ኩስጝⶓ ካስጝፅጝስ አጌርካውስታ እዝብካው ፅኹርታስታ ችግሩ አኺኒታ ኽዮ እንኩርጝስ አጌራዌ እምፕልቶ ፌቴርጝስ ካሊⶓ ንቫርካ ካንትፃና::

እን አጌራ ይቶፒያኪላ 86ዴስ ጃላ ብሄር፣ ሊሊትጙኽ ኮንኪስታ አይማኖት አግስታት ታኹስ አጌራው ታሪክስስታ አጌራ ምንግስቱ ካስትዳ ጉሽፃማ ፌቴርስትኹሳ ውትኽትኼስታ ታሪካዌ ችግሮ ኽይጝስ ካሊፃታ ኩስጜ ይስጝፄት ሲፍታ::

ኬቤሊዴስ ባርኾቼዋ ኺስታ ብሄሩ፣ ኮንኪው፣ አይማኖቱስታ ፆቲው ሊሊታ ጋቲታ አጌር አቖ አሴቴፍጝፅጝስ ኩስጚዳ ዲጋውሳ አሳቦ ቻቤልጝስ ቹዋ ቹዋ ሶኼታ አጄንድካዳ አሊዴ ኩስጝጜ ካስጛታ ፄውታውሽቴ::

ሲዚ አሜታሳ አሳቦ ቻቤልቱስ እጂቲት ይቶፒያ ናኪኒ ጊዝስ ሊሊትጙንኩ አጌራው ቤንዴስ ፊትጙንኩ 4ሻይዴስ ጃላ አጌር አቖ ኩፕፅጝስ አዲስ አበባዳ አሊዴ አጌራዌ  ኩስጝጜ ካስጝፄውሽቴ::

አኽጝስኪ እን ወክትስ አጌራዊ ኩስጚው ኮሚሽን ኩስጝጜ አሌዳማ አጌራስ ቴስፌ እያውስታ ችግሮ ኽይፄ ዳብዜ ግልፅስ ካንትፅጝ ማንዲስታውያኽ ናኒስ ብሄረሰቡ ቺፅጝፂዴስ ጉዳዮ ካንትኹስ አሳቦ እይንኩ ዝኩዋንትካ ጉሽካ::

አውጚ ቴርት ቤና ራዲዮኑ ዙሚትጝኔስ ቴርትሊ እጂጜ ፄውንኩ ዊዛሩ ታየች ዘለከ እይኑ ካንቲዳ ኽሳንቴ ታሪካዌ አዴሮ እሚኹስታ ይቶፒያዊንካስ አጌራዊ እምፕልትስስታ ሰላምስ ቲኪስታቲውሳ ኪሴ ሜዜጌብፄ እስታ ቲሪትጙኽ ኮሚሽን ሲዚ አሜታስ ሊጊሲሜ እንዝጜ ካስጝፅⶓ ጉሽካ::

ኹን፣ አይማኖቱኪ ያኻ እምኔቱ ሲፋንትካ፣ ወታትካ፣ አካል ጉዳቴኖስታ ሊሊትጙኽ ታክስጚ ዝኩክ ሲቪክ ማቤርካዋስታ ፖለቲካው ፓርትካዋ አሴቴፍጝፅጝስ ፄውስቱኽ ፅሬትኪላ አጌራዌ ኩስጚ ታሪክስ ሊሊታ ፄዋው አኽⶓ ቶኬምካ::

ዊዛሩ ታየች ኑኑውስታጊ አሜትካስ እጂኹሳ ሰላሙ ችግር ኩስጚስ ኽይስታታ ዳምባ ያኻው፣ ይኮኖሚውሳ ፍታዌ ቴኬምስታንቶ ቼሜትጝፅጝስ ካላው ዳብዚ እንኩርስታውስታ አጌር አቑሳ አስሚምጚስ አብርታ ዝኩጙሳ ባይሎ ይስጝፃው ታሪካዊ ኩስጚ ንካማ አምናንኩስታ ቴስፌ ፄውንኩ አኽⶓ ሼውፅካ::

አጌራዊ ኩስጝጚዴስ ፋሌንጋ እንኩርስታውሳ አስሚምጚውሳ ውሳኔስታ አጄንዴ ትንካኪስ እሜማ ይቶፒያዉያንካውሳ ቴስፌ ቴግባርስ ካንትፅጝስ ኮሚሽን ፄዋውሳ አምንስታንቶ ይስጝፃማ ሲፍፅጝዴስ ፌይኹስ ትኩታው ቤንጊ አምንጚስስታ ሰሌቴንኹ ዳድስ ኩስጚውሳ አቪቬ ኩፔ አፌራማ እንጎ ሳኪትጝፃታ እንፃኽስትጝ ማንዲስታው አኽⶓ ታክስፅካ::

ክንትፃንቲ ወንድም ጌታሁን አጌራዊ ኩስጝጚ ሴዛጊ ይቶፒያው ዳብዚዴስ ፊትጙንኩ ኩስጚው ጉባይቴንካ አጌራውስታ አጌር አቑ ጉዳይዳ ፍንፍና ኩስጝጝ ታሪክስ አቫላምቲ አኽጝዴስ ጃላ ይቶፒያዊያንካው እጂኹ ታሪኩ፣ ፖለቲካው አይማኖቱስታ አጌራዊ ጉዳይዳ ዲጋንኩ ክሬትካዋጊ ኽይጝስ ጊሊልቲኒ፣ ኔፃስታ አምንስታንቲ ኾት ቲሪትጛማ አሊዲ ቤንዳ ታምብጝ አጌራዋ ፍንሾ ካይፅጝስ ካሌ እስታ ማንዲስታው አኽⶓ ኽይትጝፄካ::  ኩስጚ ወክት ቺፋ ካንትስታው ብሄሩሳ ጋቻዋ ኽይጝስ ካሊፃው ሴል ዝኩኹ ንካማ አምናንኩ አኽⶓ ጉሽካ::

ፍታውቱሳ ካሴ ዙርፅጝስ፣ ካሊትጜስታ አስሚምጜ ቼሜትጝፃውሳ አጌራዌ እምፕልቶ አግጝስኪላ ኩስጚ ኬፍቲኒ ታምብ ዝኩኹያኽ:: ምንግስትኪላ አጌራዊ ኩስጚዳ ጚውሳ ታምቦ አሴቴፍጝጝስ አጌራዌ ግዴቴ ፊትጝጝጙ ኩስጚው ጉዳይዳ ክችዳ ቱጝስ ችግሮ ፌቴርጝዴስኪላ ቴንኬክስትጝ ኩስጚ ዋይሚስታ ያኻታ ፄውጝስ ካላው አኽⶓ ቶኬምካ::

ሰመራ ዩኒቨርስቲዳ ክንትፃንቲ ዲያኮን ዳንኤል ጌትነት አሚኮ አውጚ ዲጂታልስ እይኑ ኽይትጝፂዳ ኮሚሽን ወረዳዴስ ጉሽፃማ አጌራ አቖ አሴቴፍጛንታ ፄውጝስ እንፃኽስስቱኽ ቴግባር ልቓ ጋቲው አኽⶓ ጉሽካ::

ኩስጚ አች ቺፋ ካስጛማጊ ኬፍቲሾ እንዜጝጝ እዝባኻዳ ዝኩንኩ ክሬትካዋስታ አጄንድካዋ ፌካማ ጉባይስ ዲጋንታ እድሎ እይኹ አኽⶓ ጌሌፅካ::

ክንትፃንቲ ኑኑውስታጊ ኩስጝጚ ካስጝጝ ብሄራዌ አስሜምጜ ጌምፄ:: ሊሊትቶ ግድታ ጃጊ ሊሊትታ ቴኬምስታማ ችግር ፌቴርስታቲታ ካሊፄ:: አጌርታ “አን ዊፄ፣ አንዊፄ” ናው ፖለቲካው እንዝጚዴስ ፊጝስ እምፕልትስ አጌራዋ ሌጌፅጝስ ካሊፃንኩ ጉዳይካዳ ፄውስቴ እስታማኪላ ጌሜትስታው አኽⶓ ጉሽካ::

እዝብኪላ ምንግስትዴስ ይንታውሳ ዳብዜ ማንዲጝ ይቪቺ ያኻውላስ አጌራው እምፕልትስታ ሰላምስ ኩስጝጚ ፋይፃንቴኽ ናውሳ ሼውንጝ ማንዲስታው አኽⶓ ክንትፃንቲ ታክስፅካ::

አጌራዊ ኩስጚዳ አሴቴፍጛውሻንኩ አቶ ካሃሊ አንተነህ ናካዳ አሊዲ አጌራዊ ኩስጚ አጌራዳ ፌቴርስታንኩስ ችግርካዋ ዲሞክራሲያዊስታ ፍታዊ ዳድስ ኽይጝስ አጌራዊ ኩስጚው ኮሚሽን ኬፍንኹሳ ታምቦ ፊትጛው ሰላሙስታ ዙሚትጚው ሜሳሪ አኽⶓ ኽይትጝፄካ::

እገ-ምንግስትዳ ዲጋው ክሬቲስታ ካሲስጊ ኬሽጝጝስስታ ክቺጝስ ካላውሳ ውሳኔ አሜሜችጝፅጝስኪላ አጌራዊ ኩስጝጚ ቲኪስታቲው ፍሺ ዝኩኹ አኽⶓ ጉሽካ:: ወሺኒኪ አቒ ይቶፒያዳ ኔፃኔትስ ዝኩጝስ ኪቪቪርጚስስታ ቲቪቪርጚስ ካሊፃውሳ አጄንዴ ኬሬፃማ ፍሽጝስ አጌራዋ ፍንሾ ካይፅⶓ አላፍትኪላ ኮሚሽንዴስ ማንዲስታው ዋይሚ አኽⶓ ዲብስካ::

እዝብኪላ ይቶፒያኩ ባላንጋርካስታ ምኬኔንካ ፍሻኑሳ አሱሳ ንቫሮ ሲፍⶓ ባያማ ኮሚሽንዳስታ ጉባይቴንካዳ ዋኾ እምኔቶ ቺፃታ ታክስፅካ::

ኮሚሽንኪ ያኻ ምንግስት አጌር አቕስ ቱኽሳ ካሎ ቴግባርዳ እሽፅጝስታ ጉባይዳ ዲጋውሳ ዋሺኔኪ ውሳኔስታ አዴንዴ እዝብስ አቕፃማ ኩስጚውሳ አላሜ ሳኪትጝፃማ ኪቢሪስቲፃስታ እዝብካ እንካንጜካማስታ ቴቬቬርጜካማ ዝኩዋንትፃ አጌራዋ ፌቴርጝ ፋይፃንቲ አኽⶓ ሼውፅካ::

መላከ ህይወት ሀብተማርያም አለምረውኪላ አሊዲ ጊዝስ አዲስ አበባዳ ካስጛው ትክላሊ አጌራዊ ኩስጚው ጉባይዳ ታምቦ ፊትጜካማጊ አግስታና:: ካስጛውሻው ጉባይኪላ ዝቤንካስ ይቶፒያዳ ካንትስታው ወሬምስታ ጋቻ ፍሽጝፃቲት ክምንቶኪ ያኻ አጌራዋ ድፃው አኽጝታጊ ኩስጚስ ዋሺኔኪ ችግሮ ኽይጝ ፋይፃንቲ አኽⶓ ቴግባርስ ካንትⶓ ጉሽካ::

ሴሌቴንኹ አሌምሊ ካስጝስ ኩስጚ ቢዲሪዳ እንኩርስታው አኽⶓ ቶኬምካ::

እዝቡሳስታ ምንግስቱሳ ችግሮ ጎሌላማ ሺሽጝስኪላ ካሊፄ ንካ:: አጌራዊ ኩስጚ ዋሺኒኪ ይቶፒያው ቤንዴስ አጌር አቖ አሴቴፍጝፅጝስ ወኬላማ ይንቱኽሳ ዙራሙሪውሳ ካሴ፣ ቤዴሎስታ ሜብቶ ካንትኹስ ካሴ ዲግስጝስስታ አጄንዴ እምፅጝስ ሜብቶ እያው አኽⶓ ጌሌፅካ:: ኮንኪው ድንቤሩ፣ አይቱስታ አይማኖቱ ቢዴልስታ ክሪቲ ዝኩክጊ ድምፆ እንኮኽፃኑ አኽⶓ ሼውፅካ::

አብታሚ ድኺ፣ ሚንች ልቓ፣ ፅሊ ኽሳንቲ፣ አካል ጉዳቲኒ አካል ጉዳቴና ጋው፣ ስልታንዌና ስልታና ጋው ናውላ ይቶፒያዊያንካ ኩችንካማ አቭርታ ዙሚትጛንታ ሜብቶ ካሴንታስታ ኬቤርፃንታ ፄዋማጊ አኽⶓ መላከህይወት ሀብተማርያም ቶኬምካ::

ይቶፒያ እምፕል እምፕሎ ሺንካማ ዝኩዋቲት አጌራ ታኻታኪላ ትኩትስ አጄንዴ እሚካማ ኩስጜካማጊ አኽⶓ ድኹዌካ:: እምፕልታቕኪላ አሱ ንቫራዴስ ጛጛርትጛሳ እቺሴካማ ኮሚሽንዳ እምኔቶ ቺፃንታ እቑዌ ዲግስካ::

ትክላሊ አጌራዊ ኩስጝጚስ አርፊዴስ ጃላ ጊዝ እይስትኹ ያኹስ አጌራዊ ኩስጝጚው ኮሚሽኑ ኮሚሽነር ፕሮፌሰር መስፍን አራያ ጛሾስ ችግርካ ኽይስታኑ ግርብስስታ ሜሳሪስ ያኻውላስ ሰላማዊ ዳድስ ይቪቺስ አኽጝስ ዝቤንካስ እጂኹሳ ፖለቲካውሳ ክሬቴኪ ያኻ ዋሺኔኬ ጉዳዮ ኽይጝስ ካሊስታው ታሪካዊ ኩስጚ ካስጛውሻው አኽⶓ አቕፄካ:: ሊሊት ኬቤርፅጝስ ችግሮ ዴሜካ አቭርታ ኽይጝስ አጌራዊ ኩስጚ ዳዶ አሌዳማጊ አኽጝስ አሊዴ ዋይሜ ኺስታ ይቶፒያዊያንካ ቴቬቬርጛንታ እቑዌ ፌያፌይጝፄካ::

ይቶፒያው ታሪክዳ ሳሴርስ ካቢስታቲውስታ ይቶፒያዊያንካውሳ ፍንሾሱሳ ቴስፌ ውና ፄዋው፣ አግስታው ዋይሚስ ዴሜካ አጌርታ ዲጋንኩ ችግርካዋ ኽያው አጌራዊ ኩስጚው ሳኪትጚስ ኩርፄንትስስታ አጌራዊ እንኩዋኽስትስ ቴግባርሾ ኪስጝ ማንዲስታው አኽⶓ ሼውፅካ::

ንግስቴ ተስፋ