ባርዳር አሌም አቡቑ ስታድየም ልኩ ኩታውሳ እንክሬ ሌንጌድፄ

2027ው አፍሪካው ዋንቺ ታሪክስ አባላምቲ ጊዝስ ሹኻ አፍሪካኩ አጌርካ ንጝኪ ኬንያ፣ ኡጋንዳስታ ታንዛኒያ እምፕልትስ ሌንጌድፃና::

አፍሪካው ዋንቺ ሴኒ 12ዴስ አምሊ 10 ጌርክ 2019 ኺስታ ካስጜ:: አፍሪካው ዋንቺው ልኺትጚስ አፍሪካኩ አጌርካ ኬችስ ቤንስቴካማ ፃንኩፄ እንክሬ ካስጝፄካማጊያኽ:: ፃንኩፂ እንክሪስ 48 አፍሪካኩ አጌርካ አሴቴፍጛንኩ ያኹስ ምድብዴስ እምፕላንቲስታ ላጛንቲ ያኻማ ዊዳው ብሄራዊ ኬች 46ንቲ አፍሪካው ዋንቺዳ አሴቴፍጜ::

ቤዴራ ፃንኩፂ እንክሪዳ ሳኦ ቶሜስታ ፕሪንሲፔ ትክላሊ ዋይሚስ ሴዛ ናኺሲስ  ዊፃማ ፃንኩፂ እንክሪሾ ፌይኹ ይቶፒያ ልኩ ኩታው ኬች ምድብ 10ዳ ዳላዳልስታ:: ሴኔጋል፣ ሱዳንሊስታ ሞዛምቢክሊ ዳላዳልስታማ እንክሬ ካስጝፄ::

አባላምቲ ፃንኩፂ እንክሪ ሜስኬሩም 15ስ ሱዳንሊ ካስጜ:: ሜስኬሩም 19 ጌርክስ ዴሜካ ሴኔጋልሊ ባርዳር አሌም አቡቑ ስታዲየምዳ ፄዌ:: አንኮ አሜትካስ ልኩ ኩታው ወታኮው /እንክርፂው/ ችግርስ እሊኩ አፍሪካኩ አጌርካሾ ካስጝስ ልኺትጜ ካስጝፃሺኹ ይቶፒያው ልኩ ኩታው ኬች አፍሪካው ልኩ ኩታው ኮንፌዴሬሽን እይኹ ጊዛዊ ፍካድስ ባርዳር አሌሙ አቡቑ ስታዲየምዳ  ላጛንቴ ፃንኩፄ እንክሬ ሴኔጋልሊ ፄዌ::

አፍሪካው ልኩ ኩታው ኮንፌዴሬሽን እይኹ ጊዛዊ ፍካዶ ቴኬምስትጝስ ይቶፒያው ብሄራዊ ኬች ልኩ ኩታው ዴጌፋንትካው ፍንዳ /ዝኩኑውዳ/ እስካዌ ታሪኮ እንፃኽስትጝስ ዴስጝጜ ፄዌካማጊያኽ::

ባርዳር አሌም አቡቑ ስታዲየምዳ ይቶፒያው ልኩ ኩታው ኬች ሚንችካ እንክርካዳ ዊፅስታያ:: ብሄራዊ ኬች ሌሴቶ፣ ኬንያ ፣ ይሴና ኮትዲቮሮስታ ማዳካስካሮ ባርዳር አሌም አቡቑ ስታዲየምዳ ካስጙኽ ልኺትጚዳ ዊፃ :: ፌይኹ አፍሪካው ዋንቺው ፍፃሚው ልኺትጛንቲ  ሴኔጋል ልኩ ኩታው ብሄራዊ ኬቾ ሜስኬሩም 19 ባርዳር አሌም አቡቑ ስታዲየምዳ ዊፅጙሳ ታሪኮ ሲፍፅጝስ እንክሬ ፄዌ::

ታደለ አጋጄ