ክንቲው ጄሜርጝጚ

ክንትጝ ክንትፅጙ ካስት ጄሜርጝ ክንታንትካስ፣ ክንታንትካው ቾ ታብልስ፣ ክንትፃንትካስስታ ክንቲ ጝንካስ እስካዊ ክንቲው ዝቤኑ ብስፂያኽ:: እስካዊ ክንቲው ዝቤን ዋይሚስታ አኽጝ ሊኪስታው  ዴሜካ ክንትጝ ክንትፅጙ ካስት ጄሜርጝስ ይቪቺ ዎሴንስታላኽ:: ክንትጝ ክንትፅጙ ካስት ጄሜርጝዴስ ቤዴራ አኮሜችስታንኩ ቤዴራ ቴርትኩ እንፅኽካ ዝኩና ::ክንትፂ ቤንካው ቴርትጝ፣  ክንትጝ ክንትፅጝስ ያኻንኩ ኮርሻማርሽካ ዋኽትጝⶓ፣ ክንትፃንትካውሳ ቴርትⶓስታ ቾ ታብሉሳ ቴሳትፎጊ ካሴዊያኽ::

2019 ክንቲው ዝቤኑ ክንትጝ ክንትፅጙ ካስት ጄሜርጝዴስ ፍና ክንታንትካው ምዝጋቢስታ ክንቲ ጝንካው ቤዴራ ቴርት ትኩትስ እንፃኽስስትጝ ቱስቴ:: ክንታንትካ ዎክትስ ሜዜጌብስታኑላስ፣ ክንቲጝንካ ዳላውሳ ቤዴራ ቴርቶ ፄዋውላስ ክንቲው ዝቤኑ አባላምቲዳ ሚንችካ ችግርካ ጌቴምጝስ ካላና:: ክንታንትካው ምዝጋቢ ይቪቺ ያኻውላስ ክንታንትካ ዋታኮው ዳድስ ማዜጌብስቱን፣ ክንቲ ጝንካ ክንታንትካዋ ቻቤላማ ክንትፅጝስ ዋታኮውሳ ቤዴራ ቴርቶ ካስጝፄካ ናው ጉዳይ ክችክቺስ ካንትስትጝ ቱስታዊያኽ::

ክንታንትካው ምዝጋቢ  ክንታንትካ ክንቲ ጝና ካስጝስ ሜዜጌብስትጝ አባላምቲ ካስቲያኽ:: ምዝጋቤ ቤዴራማ ካስጝፅጝ ክንታንትካስ ያኻ ክንትፃንትካስ ሚንች ትክም ዝኩኽያኽ:: ክንቲ ጝና ክንትፅጝስ ካላውሳ ክንታንትካውሳ ቼፎ ማሊጝስ፣ ክንትፂ ቤንካ ዳላንኩ አኽⶓ ቼሜትጝፅጝስስታ፣ ክንትፂ ሜፃፍካስታ እሊኩ ሜሳርካዋ ቴርስጝስ ኬፍንኹ ትክም ዝኩኽያኽ::

እንጃቢሪ ኬቴሙ ቺፅጝፂዳ አግስታንኩ ክንቲ ጝንካ ክንታንትካውሳ ምዝጋቤ ካስጝፅጝስስታ ክንቲጝንካዋ ክንታንትካስ አሜቹንኩ ያኻንታ ፄውጝስ ሚንችካ ቴግባርካዋ አኮሜችካ:: አንቕሽ እምፕላንቲስታ ክቻክቺ አች ክንቲጝና እንጃቢሪ ኬቴሙ ቺፅጝፂዳ አግስታው ክንቲ ጝናኽ:: 2019 ክንቲው ዝቤንዳ ክንታንትካዋ ቻቤላማ ክንትፅጝስ ዎታኮውሳ ቤዴራ ቴርቶ አኮሜችⶓ ስፍሪዳ አግስትጝስ ካንትጝስ ካሊና:: ናሲ ኪንዲዴስ ጉሽፃማ ክንታኒስ ችኹንኩ ክንታንትካዋ ሜዜጌብጝስ እሊው ስፍሪዴስ ሲፍስትካማ ይንታንኩሳ ክንታንትካዋ ቻቤላማ ሜዜጌባኒስ ካንትና::

ክንታንታ ሙሉነሽ አብዬ ሹኻንቲ ቤንቲ ክንታንታ ታኹስ እሊው ዙራሙሪዴስ አንትጝስ ክንትጝ ክንትፅጙ ካስትስ ምዝጋቤ ካስጝፄ:: ክንታንታ ዙሚኹስታ ክንቲው ማቴሪያልካዋ ዋኽትጝፅጝስ ክንትጝ ክንትፅጙ ካስትስ ቴርትⶓ ድኹታ:: ክንቲጝና አንትጝስ ምዝጋቤ ካስጝፅጝስኪላ ማልጛ ዴስቴና አኽⶓ ዙሜ::

ሳምሶን ዘሪሁን ዴሜካ ጚራሳ ክንታንቴ ደብረ ማርኮስ ኬቴምዴስ ሲፍስትካማ  ያጋማ አንቕሽ እምፕላንቲስታ ክቻክቺ ክንቲ ጝናዳ ሜዜጌብፁስ እሺኾ ታምትጝንኹ:: እንዴስ ቤዴራ እን ክንቲ ጝናዳ ክንትፃሺኹ አኽⶓ ቶኬምጝስ ክንታንትካዋ ቤዴራማ ሜዜጌብፅጝ ክንትኩ ሜፃፍካዋ ክንታንትካስ ቤዴራማ ታምባታ ፄውጝ ትክም ዝኩኽ አኽⶓ ዙሜካ:: አቶ ሳምሶን እምፕል ክንታንትካው ታብሊታ ክንቲ ጝናስ  ፋይፃዉሳ እርዳቴ ፄውጝስ ቴርትⶓ ጉሽካ::

አንቕሽ እምፕላንቲስታ ክቻክቺ አቹ ክንቲ ጝናዳ ይሳቡ ክንትፃንቲ ግርማው ቦጋለ 2019 ክንቲው ዝቤንስ ክንታንትካዋ ሜዜጌብጝስ ክንትጝ ክንትፅጝስ ቤዴራ ቴርቶ አሌድⶓ ድኹዌካ:: ክንቲ ጝና እሊው ስፍሪዴስ ይንታንኩ ክንታንትካ ሚንቻኑ አኽጝታጊ ክንትፂ ቤን ፄቤብጝስታ ክንትፃንትካው እንፂጝ ጌቴማው ችግር አኽⶓ ድኹዌካ:: እምፕል ቤንዳ ሚንችካ ክንታንትካ ክንታንኩ አኽጝስ ክንታንትካዋ ቢኪፅጝስ ችግሮ ፌቴራዉ አኽⶓ ዙሜካ::

አንቕሽ እምፕላንቲስታ ክቻክቺ አች ክንቲ ጝና ክንታንትካዋ ቻቤላማ ክንትፅጝስ ቤዴራ ቴርቶ አሌዳ:: ክንቲ ጝናሱ ካቫኻዳ ዋጉኽ ክይ እንሴስካስ ኹስታማ ድኻ:: ክንታንትካ እንክራኑ ልኩ ኩታው ውታኺ ክቼማ ክንታንትካውሳ አንትⶓ ልሼ:: ካቫኻዳ ዝኩንኩ ካናኻፅካ ዎኬዝስትካማ ግዲትካ:: ፃርኪ ሳንክ፣ ዎንቤርስታ ክንትፂ ቤን ፃንኩታማ ክቼ:: ሊሊትጙንኩ እስካውካ ክንትፂ ቤንካጊ ግቢስትካ::

አንቕሺ እምፕላንቲስ ክቻክቺ አች ክንቲ ጝናሱ ዎኬልስታንቲ አዳራዉ አለነ እሊው ስፍሪዴስ ይንቱንኩሳ ክንታንትካዋ ቻቤልጝስ ምዝጋቤ ካስጝፁስ ስፍሪዳ አግስትናና ካንትና :: አቶ አደራው ዙሙኑውስታ ክንታኒስ ችኹንኩሳ ክንታንትካዋ ዋኽስ ዋኾ ሜዜጌብካ::

“ሚንችካ ክንታንትፅካ ሸኝስ ይንትጝስ  ሜዜጌብስትጝስ ፋያና፤ ሲፍስትካማ ይንታንኩሳ ዉላ ሜዜጌብጝስ ካሊስታላ::  ክንቲው ፅፌት ጝና ፌኬዱክሳ ይቪችካዋ ሜዜጌባኔ” ናኒስ ክንታንትካዉ ምዝጋቢዳ ዝኩኽሳ ችግሮ ዲብስካ::  ክንቲ ጝና ውላ ሜዜጌብስትካማ ክንትጝስ ፋያንኩሳ ክንታንትካዋ ቻቤላማ ሌንጌድፅጝስ ካላቲው አኽⶓ ዙሜካ::

ክንቲ ጝናዳ 3 ሻይ 175 ክንታንትካዋ ሜዜጌብጝስ አኬድካማ 3ሻይ 54 ክንታንትካ ሜዜጌብስትካ:: እኒጛ ክቻዴስ 997 ክንታንትካ ያኻንኩ ዴሜካ ቤዴራ ሚዲቢኒስታ እምፕላንቲ ቤንኩ ክንታንትካ አኽⶓ ጌሌፅካ:: አሜት ቺፋ ክንታንትካው ቼፍ ዴሜካማጊ ካስጝ ክንትፂ ቤን ፄቤብጝስ እምፕል ቤንዳ ሚንች ክንትፂ ቤንካዋ ግቢትጝስ ዝኩኽሳ ችግሮ ኽይጝስ ፅሬቶ ፄዌካማጊ አኽⶓ ዙሜካ::

እንጃቢሪ ኬቴሙ ቺፅጝፂው ክንቲው ፅፌት ጝናሱ ትክትላ አላፋ ስንታየሁ ንብረት 2019 ክንቲው ዝቤንዳ ክንታንትካውሳ ምዝጋቤ ካስጝፅጝዴስ ፍና ሊሊትጙንኩ ቤዴራ ቴርትኩ እንፅኽካ አኮሜችስትⶓ ዙሜካ:: ችኹ ዎክትዳ ክንቲ ጝናታ እንፃኽስታንኩ እንፅኽካዳ እክድስ ጉስስትጝስ ክንቲ ጝንካ ክንታንትካስ አሜችኹ ያኻታ ፄውጝስ ሚንችካ ቴግባርካ አኮሜችስትⶓ ዙሜካ::

ናሲ 14/2018 ም/አሜታዴስ ጉሽፃማ ክንታንትካውሳ ምዝጋቤ ካስጝፅⶓ ቶኬምካማ እንስኪላ 23 ሻይ 926 ክንታንትካዋ ሜዜጌብጝስ አኬድካማ 21 ሻይ 510 ክንታንትካዋ ሜዜጌብⶓ ዙሜካ:: ፌይኹ አሜትዳ ፄትቲው ችግር እሺኹ እንጉዋኒ ክንቲ ጝናሳ ዴሜካማ 19 ክንቲ ጝንካ ምዝጋቤ ካስጝፅⶓ ቶኬምካ:: ውላ ታምብዌንካ አካልካዋ አሴቴፍጝፅጝስ ሳኪትጙኽሳ ክንታንትካውሳ ምዝጋቤ ካስጝፅⶓ ዲብስካ::  ዊዛሩ ስንታየሁ ኑኑዉስታ አገው ምድር ላጛንቲ አች ክንቲ ጝናዳስታ አንቕሽ  እምፕላንቲ  ክቻክቺ አች ክንቲ ጝናዳ ክንታንትካ ሚንቻኑ አኽጝስ እሊውዴስ ሲፍስትካማ ይንታንኩ ክንታንትካዋ ክችክቼ ንቫሮ ቼሜትጝፁኒዴስ ፋሌጋ ሜዜጌብስታንታ ፄውⶓ ጌሌፅካ::

አክም እላቲንኩ ክንታንትካ ማቴሪያሉ ችግርስ ክንቲዴስ ሴጋ ያኻቲንታ ግባቶ ኩፕፅጝስ ክንታንትካስ እይስትⶓ ጉሽካ:: እንጃቢሪ ኬቴም ሰላም ዝኩኹ ዙራሙሪ አኽጝስ እሊውዴስ ይንታንኩ ክንታንትካዋ ሜዜጌባማ ክንትፅጝ ክንትፂ ቤኑ ፄቤብጙ ችግር ካንትስትⶓ ዙሜካ:: እስካዊ ክንትፂ ቤንካዋ ግቢትጝስስታ ፅሮቲስ ፉንኩ ክንትፃንትካስ እሊኩሳ ክንትፃንትካዋ ኬፄርጝስ ክንትጝ ክንትፅጙሳ ካስቶ ካስጝፃንኩ አኽⶓ ጌሌፅካ::

ታደለ አጋጀ