ይትዮፕያ ጉላሊዴስ ፋሌንጋ ምንግስቱ ምስራቴ ካስጝፂኹ እን ታሪካዊ ወክትዳ አጌራዳ ፍንሾ ጌትምጝስ ካላንኩ እድልካዋስታ ፍታንካዋ ግልፅስ ሺሽጝስታ ዳብዜ ይስጝፅጝስ ኬሽኹሳ አጋታሜ ፌቴራ። ስካዊ ምንግስቱ ምስራቲ ስልታኑ ካይጝጚ አኹኪ ሲፍኹሳ አመራርቶ ቼሜትጝፅ ይቢቺ ያኻውላስ እዝብኩ ካስካዋ ይኮኖሚውሳ ይሴንቶስታ አጌር አቑሳ ዴክቶ ስካዊ ጁትጚስ ማንዲፅጝስ ቱስታው ኽሳንቲ ፖለቲካውስታ አንኩሊው ውልያኽ።
ጝሺሱ ወክትዳ ስካዊ ምንግስት ቹዋስታ አባላምቲ ጝን እንፅኻ አኽጝ ቱስታው እዝብካውሳ ሰላሞስታዴክቶ ሲፋንቲ ዝኩኽ አኽⶓ ቼሜትጝፅጚያኽ። አምንጝፃው ሰላምስታ እጉ ሴግቴንት ሲፋንቲ ልማትኪ ያኻ ዲሞክራሲው ቴርት ውና አኽጝስ ካላላኪ። አኽጝስኪ ፍቺትጜስታ ጋቻዋ ጉሽጝፃንኩ ዙሚትጝካዋ ድፅጝስ ኩስጝጚስታ አጌራዌ ቱትጜ ሌጌፅጝ ቢዲሪ ቴግባር አኽጝ ቱስቴ። እሊውሾስኪ አጌራው ይኮኖሚው አኺኒስታ አጌር አቑ ዝኩዊኒው ክብርናቲ እምቢት ንኹስታ ቴግባርስ ካንትስታውሳ ሜፍቴ ፋዬ ። እንፅኺውሳ እድሎ ይስጝፅጝ፣ ጊፁስታ ምግቡሳ ዋስትኔ ቼሜትጝፅጝ ስካዊ ምንግስቱ ፌፄምፃንትካ አካልካ ትኩቶ እይስትጝ ቱስታኩ ቹዋ ጉዳይካኽ። ክርፂ ቺፅጝፄ ክችስጝ ፣ሙስኔ ቡንክትጝጝ፣ አገልግሎቴ እያንትካ ኾትካ ግልፃ አኽጝስታ ካሲስታንቶ ይስጝፅጝ ምንግስቱ ፌፄምጙ አክምስታ እዝብስ አምንስታንቱ ቼሜትጝፅካ ጉዳይካኽ።
ኾትካ ፖለቲካስ አዴልጝ ዝኩዋውላ እዝቡሳ ትክሞ ይቢቼ ማንዲፃንታ ፄውጝ ስካዊ ምንግስት ዲሞክራሲው ልግስስ ዝኩኽ ፍሺ ኬፍ ንኹዊያኽ። አሊዲዳኪ አጌራ ምንግስቱ ይቢቺ አላፍት ጋቲዊያኽ። ፖለቲካው ፓርትካ፣ ሲቪክ ማቤርካ፣ አይማኖቱ ታብልስታ ውላ ይዮፒያው እዝብ ስካዊ ምንግስትሊ ቲቪቪርጚስታ አላፍቱ ጁትጚስ እንፃኽስትጝስ ይጋሪ አጌራው ልግስስታ ሰላም ማንዲስታውሳ ፍሼ ፊትጝጝ ቱስቴ። ስካዊ ምንግስቱ ምስራቲ ኬሽቱት፣ ሰላም ቼሜትጙትስታ ሌጌስቱት ይቶፒያ ስካዊ ፋንቲቲ ያኻታ ውላጊ አካልካውሳ ፍሼ ፄውጞ ፋያውያኽ።