ኮሪደር ልማት ኬቴምካዋ ዝቤናዋ ፄውጝስ አኮሜችስታው ቴግባርያኽ

ዲጊ ጊዝዴስ ናቴ እን አጌራ ይቶፒያዳ አዲስ አበባዳስታ ክልልኩ ቹዋ ቹዋኬቴምካዳ ቴግባርዳ እሽፅጝስ ኪሴ ካንትፅኹ ኮሪደር ልማቱ እንፅኺ ናካዳ ዞንኩስታ ወረዳው ኬቴምካሾ ጌምጝስ ኬቴምካዋ ግዲፅጙ እንፅኺ አኮሜችስታማጊያኽ:: ኮረደር ልማት ኬቴምካዋ ግዲፅጝዴስ ፌይኹስ ዝቤናዊስታ ዝኩዋንትካስ አሜችኹሳ ኬቴሞ ፌቴርጙ ካስት እንፃኽስስታማጊ አግስቴ::

አዊ ብሄረሰቡ ቺፅጝፂዳ አግስታንኩ ሊሊትጙንኩ ኬቴምካዳ ኮሪደሩ ልማቱ እንፅኺ አኮሜችስታማጊያኽ:: ዳንግሊ፣ እንጃቢሪስታ ቻግኒ ኬቴሙ ኮሪደር ልማቱ እንፅኺ አሊዲ አችዳ ታምባ::

ቻግኒ ኬቴምዳ ግቢትስትኹ ኮሪደር ልማቱ እንፅኺ ኬቴማውሳ ግዶ ዴሜክጝስ ዝኩዋንትካስ አሜችኹ ያኻታ ፄውስታማ እንፃኽስስትⶓ ቻግኒ ኬቴምኩ ዝኩዋንትካ ዙሜካ:: አቶ ደረጀ አባቴ ቻግኒ ኬቴሙ ቺፅጝፂዳ 01 ኬቤሊው ዝኩዋንቲ ያኹስ ቻግኒ ኬቴምዳ ግቢትስትኹ ኮሪደር ልማቱ እንፅኺ ኬቴምኩ ዝኩዋንትካዋ ማልጛ ዴስቴና ፄውⶓ ዙሜካ:: ኮሪደር ልማት ኬቴምዳ ግቢትስትጝ ዜርፋ ሚንቼ ትክሞ እያው አኽⶓ ዙሙንኩ አቶ ደረጀ እንዝርናንትካስ፣ ብሽክሊሊታስ፣ አካል ጉዳቴንካስስታ ልኩቴንስ ጛራ ጛራ እንፃኽስትኹ ዳድ እምፕልታቕዳ ታምባሺኹሳ ትራፊኩሳ ኬሴቶ ይጉፃው አኽⶓ እርዳትፅካ::

እምፕልታቕ እንዴስ ቤዴራ ዳድስ እንዜጛኒስ ዳድ ፄቤብጝስ ትራፊኩ ኬሴትስ ጉዳት ታምባሺⶓ ቶኬምካማ ናካዳ እምፕልታቕ እንዳርማኪ ችግራ ጋቲታ እንዜጝጝ ካሊፃው አኽⶓ ዲብስካ:: ዝኩዋንትካ ኬቴሙ ግድ ዴሜክⶓ ጉሽካ::

ቻግኒ ኬቴሙ ዝኩዋንትካ ኮሪደር ልማቱ እንፅኺስ ጛውሳ ታምቦ ፊትጝⶓ ቶኬሙንኩ አቶ ደረጀ ምንግስት እልስ ካንትስታውሳ ልማቱሳ እንፅኼ እንፃኽስታማ ካንትፅጝስ እምፕልታቕ ልማትስ ጁትጛንታ ፄውⶓ ዙሜካ:: እንዴስ ጌና እንፃኽስስታው ልማቱ እንፅኺስ ኩርፄንትስ ምንግስቱ ኬምፕዳ አኽጝስ እርዳቴ ፄዋንኩ አኽⶓ ዲብስካ::

እሊው ቻግኒ ኬቴሙ ቺፅጝፂው ዝኩዋንቲ አቶ ታመነ ወልዲ ቻግኒ ኬቴም ሀይለስላሲው ዝቤንዳ ቲሪትጝቱት ኬቴማ ታኹኒውላ ሚንች አሜቶ ልማት እንፃኽስስታውላ እጄቲት ኬቴማ አኽⶓ ዲብስካ:: ያኼስጉ ዲጊስ ግቢትስትኹ ኮሪደሩ ልማቱ እንፅኺ ኩፅኒ ኬቴማ ግዲፅጝስ እሊኩ ኬቴምካሊ ልኺትጛንታ ታኻታ ፄውኹ አኽⶓ ጉሽካ:: ኮሪደር ልማት 01 ኬቤሌ ማልጛ ግዲፅኹ አኽⶓ ዙሙንኩ አቶ ታመነ ኬቴም ኬሽኹስ ሊሚጝስ ዴስቲኒ አኽⶓ እርዳትፅካ::

ኬቴምኩ ዝኩዋንትካ ኮሪደር ልማቱ እንፅኺ ግቢትስትኹ ዎክትዳ ጌንዜብስ ያኻ ግርብስ እርዳቴ ፄዉንኩ አኽⶓኪላ ቶኬምካ:: ይንታውስ እንፃኽስስታው ልማቱ እንፅኺስ እምፕልታቕ ምንግስቱ ኬምፕዳ አኽጝስ እርዳቴ ይስጝፄካማ ሲፋንኩ አኽⶓ ጉሽካ::

ቻግኒ ኬቴሙ ቺፅጝፂው ትክትሊ ከንቲባስታ ኬቴሙስታ ስር ልማት ፅፌት ጝናሱ አላፊ አቶ ገበየሁ አልማው ቻግኒ ኬቴምዳ ግቢትስትኹ ኮሪደሩ ልማቱ  እንፅኺ አሌድስታማጊ አግስታው አኽⶓ ዙሜካ::

ኮሪደር እንፃኽስስቱስ ችክችክንኹሳ ዲቦ ፃንኩፅጝስስታ ኬሌሞ ስንክጙ እንፅኺ አኮሜችስታማጊ አኽⶓ ዙሜካ:: አባላምቲ ዙሪ ኮሪደር ልማቱ እንፅኺስ 1 ትኩሚ 6 ኪሎ ሜትር ሌጌሴምት ዝኩኽ ኮሪደር እንፃኽስስትⶓ ቶኬምካ::

103 ሚሊዮን ጌንዜቡ ፍሺስ ግቢትስትኹ አኽⶓ ዙሙንኩ አቶ ገበየሁ ኮሪደር ልማቱ እንፅኺስ እምፕልታቑ ቴሳትፉ ኬፍቲኒ እሺኹ አኽⶓ ታክስፅካ:: እምፕልታቕ ኮሪደር ልማት ኔክፃውሳ ጝኖ ፌሬስፅጝዴስ ፌይኹስ እምፕል አቒ 500 ሻይዴስ ጀላ ጌንዜቦ እርዳትጝስ ኬፍንኹሳ ታምቦ ፊትጝⶓ ቶኬምካ::

ኮሪደር ልማት ምንግስትስ ይቪቺስ እንፃኽስስታው ጋቲዊያኽ ኑንኩ አቶ ገበየሁ እምፕልታቑሳ ቴሳትፎ ካሴው አኽጝስ ፍንሾስ ግቢትስታው ልማቱ እንፅኺስ ምንግስቱ ኬምፕዳ አኽጝ ቱስታው አኽⶓ ጉሽካ:: ኬቴማ እሊኩ ኬቴምካሊ ልኺትጝታታስታ ዝኩዋንትካስ አሜችኹ ኬቴም ያኻታ ፍንሾስ እሊው ኮሪደሩ ልማቱሳ እንፅኼ አኮሜችጝስ እክድ እምስትⶓ ቶኬምካ::

ታደለ አጋጄ