ዶርካውሳ ትክሞ ቴግባርስ

“እንኩላል ልቡስ ልቦ ልኩስ ካሴ” እስታው ምሳሊ ዙማታጊ አቶ ካሳሁን የኔቱ እንዝጚኪላ ልቡስ ልቦስታ ሚንች ፍታኔ ካያማ ናካ አዩ ጉዋጉሲ ወረዳ  ሶስቱ ሰኙ ኬቤሊው አብቱ ባላባቲ አኽጝስ ካሊፃ::

አቶ ካሳሁን እርሺው እንፅኺስ ቺትጛሺኑ ዝቤንዳ እሌታ እርቫቲዴሰ ፊቲሳኑ ጉዳይ እሺያ:: ኪቻካ ቺጊርፂስታ ድኽቱ ጊዝ ፌያማ ዝኩጝስ ሳሲፃውሳ ዝኩዊኔ ፌቴርጝስ ቲኹታና:: ቲኾስታ ትምኔት ውና ያኻታ ኩፅኒ ኩርፂኔ ውሳኔ ካሲ:: እቺሳማ አኬድⶓ ፋዬ::

አቶ ካሳሁንኪላ ፌይፃውሻኑ ድኽቱ ፍታኒዴስ ፊጝስ ጉሽፃ ያኼ ንካማ ታክሱኑሳ እንፅኺውሳ አይኔቶ ቴሌቪጂዴስ ካንትካ:: ካቢትጝፄካማ አሳቦ ቴግቦርሾ ኪስጝስ እታ ጁዌካ:: ጊዝዴስ ፋሌንጋ ኩፅኒ ታክሱኑ እንፅኺሾ ቱጝስ 135 እንኩላልኩ ዱርካዋ ኔፃስ ምንግስትዴስ አሬኬብስትካማ እሩብፅⶓ ጄሜርካ:: ችግርዴስ ፊጝስ ጃጊታ ዋታይ እንፃኽስታው ንካማ ኩፅኒ ፂኒስካያ::

እንጚስኪላ ዱርካስ ኬሌባኑሳስታ ፋይፃውሳ እንክብካቤ እያኑላ ይጉጝስ ዱርካ እንኩላሎ ድርቫኑላ ሊጊሲሚ ጊዝስ እጂካ:: ቴስፌ ኬዋኑላ ውማይቲኒ ኩስጝፅⶓ እምትጜካ:: እንጚ ጊዛይ ኩፅኒ ኪሴ ካንቱና:: እንፅኺ ፍሽጝፃውስታ አብቱ አግፅፂ አኽⶓ ሜሴኬርፁና::

አቶ ካሳሁን ናኑውስታጊ ሲሲቲ አሜታዴስ ቤዴራ አሜሬቱኑሳ እንኩላሎ ጌቤልስ ዲግስጝስ ፍታኒ እሺኹ ያኹኒውላ ጛ ኩፅኒ አዚኒዴስ ቲሊሊሾ እንዝጜ ፄዌካማኪ አሬኬብፃሺካ:: ጌቤሉ ታምትጚኪላ ጊዝዴስ ጊዞ ይስጛማጊ ጛ ዝኩኑሳ ዙራሙሪ ኺሰታ ካስካማ አሬኬብስታንኩሳ እንኩላሉሳ ጌፄኖ አግፅጝስ ካሌካ:: እንጉስታሺኑሳ ዝኩዊኔኪላ አግፅጝስ ይስካማ ሲፍካ:: ቤራዋ ሌፍፅⶓ አኹኪ ቡዚስⶓ እንቲታኪ እርሺውሳ እንፅኼኪላ ኬምፕስ ኬምፖ ካስጝፃና::

አንኩዋ ጄርካ ታላ ያኹንኩ አቶ ካሳሁን አቒ ጄርካስ ድኽቶስታ ችግሮ ወሬስፅጝ ቱስታላኽ ንካማ ሼውዴስ አምናና:: እንጚስኪላ ጄሜሩኑሳ ዱርካዋ እሩብፅጙሳ እንፅኼ እሳንፄካማ እምፕል ኻርኩ ዱርካዋ አሬኬብስትካማ አንኬባኬብካ ሌጌፅካማ 27 ብርዴሰ 30 ብሮ ኺስታ አሬኬብስትካማጊ እፅፍስ ፊቲስጝስ 45 ጌርካ ዋኹንኩሳ ዱርካዋ ጌቤልስ ዲግስⶓ ቹዋ እንፅኻ ፄዌካ::

አሜትዴስ ሹኺኒ እምፕላኒሱ ዙሪዳ 4 ሻይዴስ 5 ሻይ እምፕል ኻርኩ ዱርካዋ አሬኬብስትካማጊ 45 ጌርካ ዋኻኒ ጌቤልስ ዲግስጝስ እንፃኽስቴካማጊ አግስታና:: አግፃኑ ሚፂስኪላ ኬሽኹሳ ዝኩዊኔ ዝኩጝስ ካሌካ:: አዚኒ ኬቴምዳ እምፕሎ ጝኖ ጄዌካ:: ጛ ዝኩዋኑ ጌፄሩ ዙራሙራዳ ዴሜካ 600 /6ሊኻ/ ዚንጉ ኮርኮሩ ጝናሳ ግቢቴካማ ዴስቲኔስታ ቲን ዌናሳ ዝኩዊኔ ጉሳውሻና::

አቶ ካሳሁን እንክርፃኑውስታ ላጛ ቲሬንቲ እንፃኽስታንትካዋ ኬፄርካማ እንፅኺውሳ እድሎ ብስካ:: “ዱርካዋ እሩብፃው አቒ ይሴንስታ እቺሳማ ታክሳው ቴቬቬርጛውስታ ትቪቪኒ አኽጝ ማንዲስቴ” ንካማ አምናንኩ አኽⶓ ዙሜካ::

ጋያኪ ትንካኬ ካሴውሳ ጉዳዩኪላ ዙማኒስ እንኩዊንቶ ክችሳማ እይጝ፣ ጝን እምብላሳቲታ ቴንኬክስትጝ እንቲታኪ እንፁኒ ላጛ ሶኼታሳ ዋኺኒምባ ኺስታ ኻሮ ጌርኮ አንኬባኬብጝ፣ እኹሜስታ እንኩዋንቶ ሜቴቴንጝፃማ እይጝ ፋይፃው አኽⶓ ጉሽካ:: ቑንዚ ኽቴ ናቴ ፌያፌይጛቲታ ቴንኬክስትጝስ ትንካኪውሳ ስዮ ሴይጝ ዶርካዋ እሩብፃንቲዴስ ማንዲሰታው አኽⶓ ጛው ዴስዴስ ጉሸፃ ፄዌካማ አሳቦ እይካ::

አቶ ካሳሁኑ ፍንሾሱ እክድኪላ እምፕል ኻርኩ ዱርካዋ ሌጌፃማ ዋይጝዴስ ድምክና ቤራዋ ሌፍፅጝ፣ ኹዋሼ ጌቤልስ ዲግስጝስታ ፌቴሩኑሳ እንፅኼ ጄርካስ ወሬስፅካማ ይስጝፄካማ ሲፍፅጚያኽ::

እምፕል ኻርኩ ዱርካዋ ወክትስ አግፃኑላ ይጉጝስታ ዶርካው ኬሌብ ኬቤርጝ ዜርፉ ፍታኒ አኽⶓ ጉሹንኩ አቶ ካሳሁን ትኩታው ቤን ችግሮ ኽያታ አሳቦ ዲግስካ::

አቶ ካሳሁን የኔትስ ጛቓ ዊዛሩ ደመኩ ቢረስውኪላ እምፕል ጌርኩ ቹንችካዋ ሌጌፃማ ጌቤልስ ዲግስጝስ ቹትካው ልፍት ሚንች ያኹኒውላ አግፀኑ ሚፂስ ኩፅኒ ዴስቴንካ አኽⶓ እንክርፄካ:: ፃንኩቶ ወክትስ ማንዳና፤ ቑንዚስ ፂኪስታቲንታ ውማይቴንካውሳ ኩስጜ ቴግባርዳ እሽፃና:: እንጚስያኽ ዋይሚስታ አኽጝስ ካላኑ::  ጛው ኬቤሊዳ ዱርካዋ እሩብፅⶓ ጄሜርካማ ዲብ ኩፅኒ ቱስታውሳ እንክብካቤ ፄዋኑላ ይጉጝስ ሚንችካ ኬሴሩንኩ ዝኩንኩ አኽⶓ ጉሽካ:: ያኼስጉ እንፅኼ ክችክቺስ እንፃኽስታኒ ዴሜካ አቒውሳ ይዎቶ ክችክቺስ ኪስጝስ ካላው አኽⶓ ቴግባርስ ካንትካ::

አንኩዋ ጄርካ ቹ ዊዛሩ ደመኩ ጄርካስ ሜቴቴንጙኽሳ ምግቦ ዲግስጝዴስ ጃላ ጄርካስ እንፅኼ ፌቴርካያኑ ዜርፍ አኽጝስ ዴስቴንካ ያኼካማ እንፅኼ ሲፍፅካማጊ አኽⶓ ዙሜካ::

አቶ ካሳሁንስስታ ዊዛሩ ደመኩስ ጚራ ያኹኽ 20 አሚቲ ወታት ሙሉጌት ካሳሁንኪላ 12ንቴ ቤኖ ኺስታ ክንቴ ሲፍጜስጉ ጝን አቑሳ እንፅኼ ሲፍፅጝስ ዱርካዋ እሩብፅጙ እንፅኺዳ አሴሜርጛ:: ናካዳ ጛሬ ካላማ 4 ሻይ እምፕል ኻር ዱርካዋ አሬኬብስታማ ቹዋ ታብልዴስ ክንቱኽ ይሴን እንፅኺው ሴልስ እንፃኽስታውሼ:: “ወታትካ እንፅኼ ናካኑላ ኩርፄንትስ እንፃኽስትጝስ ጛጛርትጛሳ ኪስጝስ ካላና” ናማኪላ አምኔ:: አቒ ክንቱኽ ክንቲስኪ ያኻ አግፁኹ ዴስስ እንፃኽስታማ ድኽትዴስ ፊጝስ ዴስቲውሳ ዝኩኔ ዝኩጝ ማንዲሰቴ ናውሳ ታክስጜኪላ ቹዋታብልዴስ ወሬሳማ ይሴን እንፅኼ እንካናንቲ ወታት አኽጝስ እክዶ እሜ:: ናካዳ እምፕል ኻርኩ ቹንችካዋ 130 ብርስታ አንኩዋፅካ ሳንቲምስ አሬኬብስታማ 45 ጌርካ ዋኻኒ ቱስቴ ክትባቴስታ እንክብካቤ አግፃንታ ፄውጝስ ቲን ዌና ቹንችካዋ 270 ብርዴስ 300 ብሩ ይሳብስ ዋያማጊ እፅፍስ ፊቲሳማጊ አግስቴ:: እንፅኼኪላ ፍንሾስ ይስጝፃማ ዝቤናዊ ዳድስ እሩብፃማጊ ኽሳንቴ ኾቶ ብስጝስ እክዶ እንኩራ::

ሶስቱ ሰኙ ኬቤሊው እንሴስካ አብት ልማቱ ውማይቲኒ አቶ ይግዛው ብርሃን ኬቤሊታ እንሴስካው አብት ልማቶ ሌጌፅጝስ ትኩትስ እንፃኽስስታማጊ አኽⶓ አቕፄካ:: ዶርካዋ እሩብፅⶓስታ እንኩላሉሳ ምርቶ ሌጌፅጝሾስኪላ ዋይሚስቲ ቴግባር አኮሜችስታ::

ዱርካዋ እሩብፅጙሳ ትክሞ እርዳትስትጝስ ዜርፍዳ አሴሜርጛንኩ አቑ ቼፍኪላ ጊዝዴስ ጊዞ ዴሜካማጊያኽ::

ኬቤሊዳ አቺትጜካማ እንኩላሉሳ ዱርካዋ እሩብፃንኩዴስ ድምክና ሳይንሳዌ ሴሎ ሲፍካማ እንፃኽስስታንኩ ጎሌልስቱንኩ አንኩዋ አሬሳቻንትካ አግስታንኩ አኽⶓ ቶኬምካ::

እምፕል ኻርኩ ቹንችካውሳ ዜሮ አግፅጝስ ችግር ዝኩኒውላ እንፅኺዳ አሴሜርጙንኩ ምሳላ ያኻንኩ አሬሳቻንትካዋ ይስጝፁጙ ቴግባር ኩፅኒ ይስጛማ ሲፍⶓ ቶኬምካ::

ዱርካው ምግቡ ክብርናቲው ምክንያትስ እንፅኼ ቲሪፃቲንታኪላ ፋይፃውሳ ውማዩሳ ድጋፎ እይካማጊ አኽⶓ አቶ ይግዛው ጉሽካ:: አቶ ካሳሁን የኔትታ ምሳላ ያኻንኩ አሬሳቻንትካው ዙራሙሪዳ እሳንጝፅጝስ ቴኬምስታንቶ ቼሜትጝፅጝስኪላ ውማይስ ቱኑሳ ካሎ ቴግባርዳ እሽፄካማጊ አኽⶓ ጌሌፅካ:: ወረዳኪላ አሬሳቻንትካ ዲግሳኑሳ ክሬቴስታ ካሴ ዋኽትጝፃታ ውማዩሳ አላፍቶ ፊትጝጝስ ፅሬቶ ፄዌካማጊ አኽⶓ ጉሽካ::

አዩ ጉዋጉሲ ወረዳ እንሴስካው አብት ልማት ፅፌት ጝናሱ ወኬልስታንቲ አላፊ ተመስገን ደሴ ጛሾስ ወረዳዳ እሳን እንሴስካው አብት አግስታው አኽጝታጊ ዜርፋስ ሊሊቲ ትኩት እይስታማ እንፃኽስስታማጊ አኽⶓ ጌሌፅካ::

ወረዳዳ ዶርካዋ እሩብፅጝ እሳንስ አኮሜችስታው ዜርፍ አኽⶓ ቶኬሙኑኩ አቶ ተመስገን  ፍታና ያኹንኩ ጉዳይካዋ ኾት ጎሌላማ ኽይጝስ እንፃኽስስታማጊያኽ ንካ::

ብሄረሰቡ ቺፅጝፂታ እምፕል አችት ይቪቺ እምፕል ጌርኩ ቹንችካዋ ዲግሳማጊ አኽⶓ ቶኬምካ:: እንጚሱ ምክንያትስኪላ ወክትስ ዲጋቲው ወክት ዝኩⶓ ጌሌፅካ::

ፌይኹ አሜትዳ 28 ሻይዴስ ጃላ እምፕል ጌርኩ ቹንችካዋ እሩብፃንትካስ ዲጋታ ፄውስታ:: ፋዮስታ ዲግስጜ ሜቴቴንጝፅጝስኪላ ትኩታኩ ቤንካሊ ዙሚትጜካማጊያኽ::

ቱስቲስ እንኬባኬብካማስታ እክምኔ ዊድካያስኩሳ ዱርካዋ እጋፊ ዳድስ ዲግሳንኩ አካልካዋ ቼፍጝጝስኪላ ፄውስታው ፅሬት ይስጛማ ሲፋው አኽⶓ ቶኬምካ::

እምፕልታቕኪላ እጋዌ ፍካዶ ካሲካማጊ 45 ጌርካስኩሳ ቹንችካዋ ጄዋኒስ ቴንኬካንታ እቑዌ ዲግስካ::

አቶ ተመስገን እይኑ ኽይትጝፂዳ ዱርካውሳ ዜርፎ ኬሽጝፅጝስስታ ዜርፍዳ አሴሜርጙንኩ ኪሴ ሜዜጌብፃንታ ካሊፅጝስ

ሊሊቲ እክድ እንኩርስታማ እንፃኽስስታማጊ አኽⶓ ቶኬምካ::

ንግስቴ ተስፋ