ማንዲስትጝ ቱስታው ባይል

ታደለ አጋጄ

ኪቪቪርጚው ባይል ይቶፒያንካስ ሊጊሲሚ ጊዝካስ እምፕልቱ፣ እንካኑ፣ እርዳትጝጚውስታ አብርቱ ጊሊፂዉ እሴቲያኽ:: ኽሳንትካዋ ኬቤርፅጝ፣ ባሎ እምፕልትስ ኬቤርፅጝስ ፌይፅጝ፣ ሹማጌልካዋ ኬቤርፅጝስታ እሊኩሱሳ ሜብቶ ማንዲጝ ኪቪቪርጚ ባይሉ ቹዋ ቹዋ ጌሌፅካኽ:: ክብር  እሊኩ አቕስ እይናው ኽሳንቲ ዋይሚያኽ:: አቔ አቒያኽ እፃው፣ ማይቤራዌ ታምትጜ ይስጝፃው፣ ሰላሞ ሴፌንፃው ኪቪቪርጚው ባይል ዝኩዋኒያኽ:: እሊኩ አቑሳ አይቶ፣ አሳቦ፣ እንኮኽስቶስታ ሜብቶ አቕጝስታ ኬቬቬርፅጝስ እንጛርትጛስ ክብሮ አግፅኔ:: እሊኩስ ክብሮ እይጝ ጚጛርትጛስ ክብሮ አግፄ:: ያኼስጉ ናኪኒ ክምንትዳ ኪቪቪርጚው ባይል ሺሽርስታማጊ አግስቴ::

እን አጌራ ይቶፒያ አሌምስ አቕስቴው እሴትካ ክቻዴስ ቹዋስታ እምፕል ኪቪቪርጚው ባይልያኽ:: አቒያ ጚጛርትጛሱሳ ክብሮ አግፅጝስ እሊኩሱሳ ሜብቶ ኬቤርፅጝ ማንዲስቴ:: እን ያኻኒ ኩፅኒ ኪቪቪርጚው ባይልዳ ዋይሚ ዝኩዌ:: ኪቢቢርጚው ባይል ሺሽርስትጝስ እምፕል ዙሙኽሳ እሊው ቹኒታላ ፤ እንፃንቲ ኽሳንቲስ አዜዝስታላ፣ ዎታትካ ሹማጌልካስ አዜዝስታላ ንጙ አኺኒ ካንትስታማጊያኽ::

ጝን አቕሾ ካኑኒ ጄር ታብሊስ አዜዝስትጝ ይጉዋማ እቑስታኒ አቤት ንጝ ይዝኩዌዉ ክምንት ፌቴርስታማጊያኽ:: አኽጝስኪላ አጌራውሳ እጂኹሳ ባይሎ አቲናናጊያኽ::

ዎታት ወርክነህ ይርዳው አርሲ ጌምቤኽ  ኬቤሊዉ ዝኩዋንቲያኽ::  ጚ ዝኩዋው ዙራሙሪዳ ኪቪቪርጚው ባይልስ ኽሳንትካ አቖ  ጄዌካማ ናውራን ንጝስ አጉዊስ እጅንኩዋንታ ፄዋንኩ አኽⶓ ዲብሳ:: ዳድዳ ሹማጌልካ ታምባኒ አርቴን ንጝስ ኬቤርፃው አኽⶓ ቶኬማ:: ኪቪቪርጚው ባይልዳ ዴሬቱንኩሳ ሹማጌልካዋ እንፅኺስ እርዳትጝስ፣ አክሞ አቱንኩሳ እንፅኼ እንፃኽስትጝስ አጌዝጝ ክብሩ እምፕል ጊሊፂ አኽⶓ ድኹዋ::

ዎታት ወርክነህ ጚ ዝኩዋው ዙራሙሪዳ እምፕል ሹማጊሊ አሬሱስ ዴሬታማ አሬስⶓ አታኒ ቻቤላማ አሬሳይጝስ ሹማጊሌ እርዳትⶓ እንክርፃ:: እሊታዋ ዴሜካ አኹዋቲዳ አኾ ሚፅⶓ አታማ ዴሬታስኩኽሳ ሹማጊሌ ካንትካማ እንፅኼ እርዳትⶓ ዙማ:: ፄውኽ እርዳቲስ ሹማጊሊስ ዳቔርስትጝስ አንኩሊውሳ ዴስቴ አግፅⶓ ዎታት ይርዳው ዙማ::

ዎታትካ ኽሳንትካ አቕስ ክብሮ እያንኩ አኽⶓ ቶኬምካማ ኽሳንትካ አቖ ዳዶ ኬዋማ ፌይጝዴስ፣  ዳድዳ ታምባኒ ጛሪዴስ ጌፌፍጝስ ቲኖይን ንጝስ ፌያንኩ አኽⶓ ቶኬማ:: ምንጊዳ እሺኹ ኪቪቪርጚው ባይል ጋቻው ምክንያቲስ ኔኬታማጊ አንትⶓ ዙማ:: ዎታትካኪላ ያኹኒ ጛስ  ጛዋ ኬቬቬርጜካማጊ እምፕልትስ ዝኩዋንኩ አኽⶓ እንክርፃ::

ምንጊሱ ጊዝዳ እሺኹ ኪቪቪርጚው ባይል ኔኬታማ አንትⶓ ዙሚት ዴሜካ አርሲ ጌምቤኽ ኬቤሊው ዝኩዋንታ ዊዛሩ ፊለጉሽ ይስማዊያኽ:: ኽሳንትካ አቖ ኬቤርፅጝ፣ ዳዶ ኬዋማ ፊይⶓ ባይጝ፣ ክብርስ ሰላምቴ እይጝስታ እሊኩጊ ኬቪቪርጚዉ እሴቱ ጌሌፅካ አኽⶓ ቶኬምካ:: ሺሽርስታማጊ ይንትኹሳ ኪቪቪርጚውሳ እሴቶ ሌጌፅጝስ ጝን አቕዴስ፣ ክንቲ ጝንካዴስስታ አይማኖትኩ ታብልዴስ ማንዲስታው ኽሳንቲ አላፍት ዝኩⶓ ዲብስካ:: ኪቪቪርጚውስታ ታክስጝጚው እሴትካ ሺሽርስታቲንታ ጝን አቕ ጄርካዋ ሌጌፃኒስ ኽሳንቴ አላፍቶ ፊትጝጝ ፋይፃው አኽⶓ ጉሽካ::

ኽሳንትካ አቖ ኬቤርፃቲው ክምንት ፌቴርስትጝ አጌርዳ ኬሴትስትኹ ሰላሙስታ ፄትቲው ችግርስ ቹዋ ጉሽፂ ምክንያቲ አኽⶓ ዲብስካ::

ኪቪቪርጚው እሴት ቹዋ ታብልዴስ ዴስስትኹ፣ እምፕልታቑ እምፕልቱ ይስጝፂ ኽሳንቲ አብት አኽⶓ ቶኬምካማ ኔኬታማጊ ይንትኹሳ እንሳ ባይሎ ይስጝፃማ ሲፍፅጝስ ጄርካዋ ምግባር ፅንታሱ ክንቲስ ቢኪፅጝ ቱስታው አኽⶓ ጉሽካ::

እሊው እርሲ ጌምቤኽ ኬቤሊዉ ዝኩዋንትካ መሪጌታ ትግስቱ ካሳሁን ኽሳንትካ አቕስ፣ ሹማጌልካስ፣ አይማኖትኩ ታብልስ ክብር እይስታው አኽⶓ ዙሜካ:: ሹማጌልካ ኩስጝፃኒ እንኮኽጝስ፣ ኽሳንትካ አቖ ኪንክፃውሳ ዲቦ ዲብስጝዴስ ክብስስትጝስ ዎታትካ ኽሳንትካ አቕስ ክብሮ እያንኩ አኽⶓ ድኹዌካ::

ምንጊ እሺኹ ኪቪቪርጚው ባይል ሺሽርስታማጊ አኽⶓ ድኹዌካ:: አቖ ኬቤርፅናኒ ክብርዳ ክብሮ አግፅኔ፣ አቔ ኬቤርፃው እስታኒ አቕስጊ እንካንስታና ንጝስ ክብር አቕስ  ፋይፃዉ አኽⶓ ዙሜካ::

ቹዋ-ታብል ጄርካስ እጂኹሳ ኪቬቬርጚውሳ ባይሎ እሚካማ ሌጌሳንታ ጝናኻዳ ክንትፅጝ ቱስታው አኽⶓ ዲብስካ:: አይማኖትኩ ታብልኪላ ኪቪቪርጚው ባይል ድሳቲታ ብሽታንዳ ክንትፅጝ ቱስታው አኽⶓ ዙሜካ:: ዎታትካ ቹዋ-ታብሉሳ ባይሎ እሚካማ ሌጌሳንታ ጝን አቕዴስ ማንዲስታውሳ አላፍቶ ፊትጝጝ ፋይፃው አኽⶓ ጉሽካ:: ናኪኒ ክምንት ልማቱ እንፅኺዳ ይሳማ እንፃኽስትጝስስታ ቹዋታብሉሳ ባይሎ እሚጝስ ይስጝፅጝ ቱስታው አኽⶓ ጉሽካ::

ደባርክ ዩንቨርስቲዳ ፎክለሩ ክንትፃንቲ ሙሉሰው አየነው ኪቪቪርጚው ባይል ክምንትዴስ ክምንቶ ፌያፌይጛማጊ ይንትኹ አጌርታ እምፕልትስ ቲሪናታ ፄዋው ቴርት አኽⶓ ዙሜካ:: ኪቪቪርጚው ባይል ዴስስ እጂንኩ ቹዋ ታብልዴስ ካይጛማጊ ይንቱኽ አጌርታ እምፕልትስ ዝኩናታ እምፕልቶ አግጝስ ማልጛ ፋይፃንቲ አኽⶓ ጌሌፅካ::

ኪቪቪርጚ እላ ያኹኒ ሰላሞ አቲጝሾ ካፃው አኽጝስ ናካዳ አቲንኹ ኪቢቢርጚው ባይል እምፕልታቖ ጛስጛው ጋቻሾ ሚፅኹ አኽⶓ ዲብስካ:: “አቕስ ክብሮ እይናው ዙርፅናና ኬቤርስትጝስ ፋናኻ አኽጝሲያኽ” ኑንኩ ክንትፃንቲ ሙሉሰው እምፕልታቑ እሌት ቹፋሱ ዝኪዊኒዳ ኪቪቪርጚው ባይል ማልጛ ፋይፃዉ አኽⶓ ዙሜካ::

“ናኪኒ ክምንትዳ ኪቢቢርጚው እሴት አንቕናማጊ ይንታ” ኑንኩ ክንትፃንቲ ሙሉሰው ቴክኖሎጂው ቻኒስት፣ ጋቻስስታ ዝቤናውትስ ኪቪቪርጚው ባይል ኔኬታታ ምክንያት አኽⶓ ቶኬምካ:: እሊው አጌርዴስ ይንቱኽሳ አቔ እምፕልታቕ ማልጛ ኬቤርፃሺና፤ ናካ ድባን ሌንጌዳ ናማ ቻውሳ ዎንጄሊኒታ ካንትጝስ ኬቤርፅጙ አኺኒ ኔኬታማጊ አኽⶓ እርዳትፅካ::

አጌርታ እጂንኩ እሴትካዋ ቴክኖሎጂ ቻኒስቶ ቺፅጝስ ሺሽርስታታ ፄውⶓ ቶኬምካ:: ማይቤራዊ ታምትጝፂ ፍንካዳ ፌያፌይጛንኩ ክብሮ ዝክፃንኩ ዙሚትጝካ፣ ፎቱስታ ቪዲዮ ኪቪቪርጚው ባይሉ እሴት ኔኬታታ ፄውⶓ እርዳትፅካ::

እጂንኩ ኪቪቪርጚኩ ባይልካዋ ማንዳማ እጂፅጝስ ጝን አቕዴስ ኽሳንቴ ፍሼ ፄውጝ ቱስታው አኽⶓ ጉሽካ:: ጝንአቕ ስራስሬ ሌጌፃኑ ዳድ፣ ኽሳንትካ ይንታኒ ታፎ ቑሲፅጙ፣ ጁዋማ ቻቤልጙ፣ ግርቦ ኩፅጝጙሳ እሴቶ ስራስሪ እሚካማ ጁዋንታ ክንትፅጝ ቱስታው አኽⶓ ዙሜካ:: ክንቲ ጝንካ ክንታንትካ ምግባር ፅንታሳ እሚካማ ሌጌሳንታ ፄውጝ ቱስታው አኽⶓ ጉሽካ::

ሚዲያ ኪቪቪርጚው ባይል ይሳማ ሲፋታ ኽሳንቴ ፍሼ ፄውጝ ቱስታው አኽⶓ ታክስፅካ:: አይማኖትኩሳ ታብሎስታ ኽሳንትካ አቖ ሚዲያስ ዲግስጝስ ኪቪቪርጚው ባይል ዋትጛ እሳንጝጝ ቱስታው አኽⶓ ካሲጝስ እሴቶ ማንዲፅጝ ፋይፃው አኽⶓ እርዳትፅካ::

አጌር አጌርታ ቲሬታ ፋይስቱኒጊ እምፕል ብሄር እሊው ብሄርሊ ዝኩኽሳ ባይሉሳ እሴቶ ኬቤርፅጝስ ቱስታው አኽⶓ ጉሽካ::

“እኖጂ ቴንኬክስትናውላስ ይጉጝስ እንጛርትጛሳ አቲናናጊያኽ” ኑንኩ ክንትፃንቲ ሙሉሰው ጝን አቕ፣ ክንቲ ጝንካ ሚዲያ፣ እምኔትኩ ታብል፣ ባይልስታ ቱሪዝሙ ፅፌት ጝንካ ባይልኩ እሴትካ ማንዲስታንታ ታምቦጊ ፊትጝጝ ቱስታው አኽⶓ ቶኬምካ::