ሰላም ፃንቑንትኹ ኬቴም

ንግስቴ ተስፋ

እን አጌራው እዝብ ድቕርዳኪ ያኻ ዋሺኒኪ ዙሚትጚዳ “ሰላምስ እሽፁኽ ሰላምስ ቺፄምባ” ናውሳ ክርፄ ትምኔቶ አንኩሊዴስ ፍሻላኽ:: እንጚጊ ሰላም አንኩሊስ ጌሜትስታው ዋይሚስ አግስታቲው ሊሊቲ እይስቲ አኽⶓ አምንጜካማኽ::

ሰላሞ ካንትኹስ ሀመር መፅሄትዳ “ዋሺኒኪ አጌር አቕ ፋያውሳ አሳቦ ሲፍጝስ ሰላም ፋይፄ:: እምፕልታቑላዳ ዝኩንኩ ሊሊትጙንኩ ፖለቲካው ታክስጚዴስ ጁኽስ ፖለቲካው ቡንካ ፌቴርስቴ:: ፖለቲካው ቡንካ ካስጛው ዳሜካ ፌያፌያማ እጋዊስታ እምፕልታቑሳ እሴቱ ፄጌርስ ያኹስ ፌያፌያማ ዴሜካ እምፕልታቑ ባይሉ፣ እጉ እምኔቱስታ እምፕልታ ዝኩጙዴስ ዴስ እንግልቪችስ ያኼ” ኑስ ኽይትጝፄ እንኩራ::

አማኻሪ ክልልዳ ፌቴርስትኹ ሰላሙ ችግርኪላ እምፕልታቑ ባይሉ እጉ እምኔቱስታ እምፕልታቑ ዝኩጙ እሴትዴስ ፋማ ሚንችካውሳ ሞራሎ፣ እምኔቶ፣ ቴሰፌ፣ እክዶስታ ዋኾ ዝኩዊኔ ፃንጌኽፃማ ሰላም ዋኒይ ይንታው ናው ትምኔትስ እዝብ አንጌሌትስታታ ፄዋ::

አዊ ብሄረሰቡ ቺፅጝፂዳ አግስታንኩ ወረድካዴስ ጃዊ ወረዳዳኪላ ሰላም ዝኩዋውላ ይጉጝ ሚንችካኾሳ ልምፃ፤ ፌኔኬልጝፃ፤ አብቱ ኩንቹዳ እሺንኩጊ እንኬ ፊቲስጝስ ናኒስ ዙራሙሬ ባይፅካማ ሴዴድስትካ:: ጃዊ ቤሬኺው ገነት እስታሺኹ ናካ ሰላሞ እቺዴስ እንጉስታው ወረዳ ያኻ::

ሰላም እላ አኽጝ ዝኩኒውሳ ቴስፌ አቲሱኩ ወረዳው ዝኩዋንትካዴስ ፈንድካ ኬቴሙ ዝኩዋንቲ ስም ጌሌፅስታታ ፋታያስቲ ካንቴ እያንታ ወረዳው ዝኩዋንትካስ ይጉዋማ እሊው ዙራሙሪዴስ ካሱንኩስጊ አብቱ ጉሽፂ እሺኹ ወረዳ ናካዳ ስኪኪኒውስታ ስጋቱ ዙራሙሪ ያኻማ ላጛ አሜታዴስ ጃላ ቼፍፅⶓ ጉሽካ:: ክንታንትካ ክንቴ ናፌኩንታ ላጛ አሜታስ ክንቲሊ ታምትጛኑላ ፌይፅⶓ ዙሜካ::

ወረዳዳ ሰሊት፣ ለውዝ፣ አኩሪ አቲሪ፣ እንቲታኪ ትክልቲስታ ኩፓኩፒ አሜሬስታማ ድኽት ናኑ ድኪ ችግር እላቲው እሺኹ ናካ እንፅኼ ባይካማ ሰላምስ እሺካማ ቺⶓ ይቪቻ ታክሳኒስ ምርኪስስታ ዝኩዊኒው ክብርናቲስ ፁቕስታንታ ሰላም እላ ቻኒስቶ ፌቴርⶓ ድኹዌካ::

ፈንደካ ኬቴሙ ዝኩዋንታ ናኑውስታጊ ሰላም ካልስ ይቪቺስ ጌሌፅስታቲው ዲብ ኩፅኒ ሰላም ድሳኒ ዋሳላካ ቺጊርፂ አኽⶓ ግልፅስ ካንትካማ ሰላም ኬቤርስታውሳ ጊዞ ማንዲትጜካማጊ አኽⶓ ዙሜካ::

ፈንደካ ኬቴም ሰላም ያኹኒውላ ወረዳ ዋኽስ ዋኾ ሰላማ ያኻውላ ይጉጝ ሲኪኪኒውሳ ዝኩዊኔ ጉሳንታ፣ እንፃኽስቴካማ ኪስስታቲንታ ቻኒስቶ ፌቴርⶓ ቶኬምካ:: ምንግስትኩ ኾትካ ዋኽስዋኾ ዎዴምካማ አግልግሎቴ አግፅጝስ ቼጌርስታሺንኩ አኽⶓ ቶኬምካ:: እንሳ ዜጌቤ ቴርስንኹሳ ወክቶኺስታ ኩፅኒ ምንግስትኩ ኾትካ ልቓሱላ ያኹኒ እንፅኼ ጄሜርⶓ ድኹዌካ::

ዎሬሞ ጉላላ ፄውንኩ አይልካኪ ያኻ ምንግስት እዝቡ ጉዳትስ ናኒስ ሰላምሾ ዙራንታ ምንግስት አጌር አቑ ሰላሙሳ ዋስትኔ ቼሜትጝፅጝዳ ትኩትጝስ እንፃኽስስቱኒ ሰላም ጌሜ ናኒስ ካንቴ እይካ::

ስም ጌሌፅስታታ ፋያያሱ እሊው ወረዳው ዝኩዋንቲኪላ “ሰላም እላ ያኻኒ ጌርክኪላ ልኻኻ ያኼ” ናኑሳ ዝቤኖ እልስ ካንታ ናኒስ ሰላም ኬቤርስታውላ ይጉጝ ታምፅኹሳ ሼው ፅንታውሳ ጉዳቶ ድኹዌካ::

ቻስ ናው ቴስፊው እክድዴስ ኪቻ ናካ ሰላምስ ችኔማ ዋታኮው ጉዳት ታምቤ ናው ሲኪኪኒስ ጌርኮ ፌይፅካማጊ አኽⶓ ጉሽካ:: ንብሬት ወዴሙስ፣ አቒ ግፍስ ኩስቱስ እንቲታኪ ዜሬፍስቱስ ካንትጝ ቻሱ ክምንት እንግርግራ ይጉዋታ፣ አጌራው እንካንስ ምግባር ፅንታስ ሌጌፅጝዴስ ኪቻ ዎሬሞስታ ጋቻዋ እሜማ ሌጌሳታ ሽውፅንታውሳ ቻኒስቶ ፌቶርⶓ ቶኬምካ::

ናኪኒ ወክትዳ እዝቡ አግልግሎቴ እይፅካ ኾትካ ዙርካማ አችትጜካማጊ ያኹኒውላ ሰላሙ ችግርስ ኩፅኒ ዋኽስ ዋኾ ዎዴምⶓ ዙሜካ:: እንፃኽስስቴካማ ኪስስታንኩ ዎታትካ፣ ክንቴካማ ሚንች ውማይ ዌና ያኻንኩ ክንታንትካ፣ ጊፅሴካማ ፊቲሳንኩ ጌፄን እንቲታኪ ውላውጊ ዋስትኒ ያኹኽ  ግብርኒው እንፅኺዳ አሴሜርጛንኩጊ ሰላም እላ አኽጝስ አሴሜርጝጝስ ቼጌርስትካማጊ አኽⶓ ድኹዌካ::

“ጊፁስታ እንፅኺ እድሉ ፊቲርፂ ማይኬል እሺኹ ጃዊ ወረዳ ናካዳ ብስቲ እሼው ጝንዴስ ልምታማ ውዳጅካውሳ ድምፆ ልሻው ጝን ኽሴ” ናንኩ ካንቴ እያንቲ “ክርጝዴስ ሴኔቤትጝ ኬሼ” ናው ታክስጚስ ዙራሙሬ ባይፃማ ፌኔኬልጛው አቒው ቼፍ ልቓ ጋቲው አኽⶓ ጉሽካ::

ናኪኒ ወክትስ ሰላሙ ንፋስ ዝኩኒውላ አምንጝፃው አችዳ ኩፅኒ ታምባያሱ አኽጝስ እምፕልታቕ ሰላምሰ ዜቦ ቲሪጝሰ ጌሌልቴንካ ያኼካማ ጉዳዩ አሬኬዝፅጝስ ታምቦ ፊትጜካማጊ አኽⶓ ዙሜካ:: ዶንጌቱንኩ አይልካ ዴሜካ እዝቦ ጉዳትዴስ ይጉፅጝስ ሰላምሾ ዙርናታ አሳቦ ዲግሳ:: ምንግስትኪላ አጌር አቑሳ ሰላሞ ኬቤርፅጙሳ ግዴቴ ፊትጛታ ካንቴ እይካ::

ጃዊ ወረዳ ሰላሙስታ ዴክት ፅ/ጝናሱ አላፊ ተስራ ኬሴ ገሰሰ ጃዊ ወረዳዳ ዋኽስዋኾ ሰላሙ ችግር ፌቴርስትጝስ ምንግስቱስታ አጌር አቑ አብት ንብሬትዳ ጉዳት ታምብⶓ ጉሽካ:: ወረዳኩ አግልግሎቴ እይፅካ ኾትካ ዋኽስዋኾ ዎዴምⶓ ኽይትጝፄካ::

ናኪኒ ወክትዳ ኩፅኒ ወረዳው ሰላሙ አኺኒ ልቓሱላ ያኹኒ ዙራማጊ አኽⶓ ጉሽካ:: እምፕልታቑ ካንቲኪላ ኬሽጛማጊ ሰላሙሳ ትክሞ እርዳትስትጝስ ንቫሮ እይጝስስታ ወንጄሌን እግስ ካሲስታንታ ፄውጝስ ታምቦ ፊትጜካማጊ አኽⶓ እርዳትፅካ::

ወረዳዋ ዋኽስ ዋኾ ሰላማ ፄውጝስ ፃምርትጙኽሳ አይሎ ቲሪትጝፅጝስ ሰላሞ ኬቤርፅጙ ቴግባር ይስጛማ ሲፍⶓ አቕፄካ:: ምንግስቱስታ ምንግስታዋ ያኻያሱ ልማቱስታ ጊፁ አችትዳ ጉዳት ታምባቲታኪላ ፄትቲው አይል ትኩትስ እንፃኽስስታማጊ አኽⶓ ጉሽካ::

እዝቡ ታክስጚዳ ኪሴ ሜዜጌበፅጝስ ኩስጚውሳ ሜድኾ ቴርስካማጊ እንፃኽስስቱኑ እንፅኺስ እዝብ ሰላምስ ዜቤና ያኻታ ፄውጝስ ካሊⶓ ጉሽካ::

አችትጙኽሳ አይሎ ይስጝፅጝስ ሰላሞ ኬቤርፅጙ ቴግባር ይስጛማ እንፃኽስስታው አኽⶓ አቕፄካ:: ወረዳው እዝብ ዴሜካ ፄትቲው አይልካሊ ይጋሪስ ሰላሞ አግጝስ ታምቦጊ ፊትጛንታ እቑዌ ዲግስካ::

ጃዊ ወረዳው ቹዋ ቺፅጝፃንቲ አማኑኤል አዳነ ጛሾስ ወረዳዳ 25/ላጛርጛ አንኩዋ/ ኬቤልካ ዝኩኒውላ አንኩዋ ኬቤልካ ይቪችካ ምንግስቱ ሜዋክርስ ቺትጛንኩስታ አገለግሎቴ አግፃንኩ ያኻኒስ ይጉዋንትካ 20 ኬቤልካዳ ኩፅኒ ሰላሞ ኬቤርፅጝስ ካሊስታያሱ አኽⶓ ጌሌፅካ::

ላጛ አሜታዴስ ጃላ ምንግስቱ አገልግሎቴ እይጚ ኬውጛሺኹ ያኹኒውላ ናካዳ ጛርት አቑሳ ጝኖ ክራይትጝስ አጌር አቕ አገልግሎቴ አግፃንታ ፄውስታማጊ አኽⶓ ኽይትጝፄካ::

ወረዳው ዝኩዋንትካው ሰላምስ ዝኩጙ ሜብት ታሲስታማ ቺጊርፄ ጊዞ ፌይፅካ:: ናካዳ ብሄረሰቡ ቺፅጝፂኪ ያኻ ክልልስታ ፌዴራል ወረዳው ሰላም ኬቤርሰታታ እዩኑ ትኩትሰ ልቓሱላ ያኹኒ ሰላም ኬቤርሰታማጊ አኽⶓ ጉሽካ::

ሰላሞ ኬቤርፅጝስ ወረዳዳ ሚንቾ እንፅኼ ፋይፃው ያኹኒውላ አንኩዋ ኬቤልካዳ ኩፅኒ ዋኽስ ዋኾ ማቤራዊ፣ ይኮኖሚያዊስታ ፖለቲካዊ ልቕልቕቲ ካስጛማጊ አኽⶓ ቶኬምካ::

ሰላም ያኻውላ ይጉጝስ አዴስኪ ጃላ ጉዲስታው እዝብ አኽጝታጊ ወረዳታ ጄሜርስትኹ ዳዱ፣ ክንቲ ጝናሱ እንቲታኪ እሊኩጊ ልማቱ እንፅኽካ ጉዲስትⶓ ጉሽካ:: ወረዳዳ አግስታው 73 ክንቲ ጝናዴስ 57ዴስ ጃላ ክንቲ ጝንካ ክንቴ ጃሜርካያስኩ አኽⶓ ቶኬምካ::

ዜርፋ ሚንቺ ያኹኽ ቻኒስት ታምባማጊ አኽጝስ ሰላሞ ኬቤርፅጝስ ምንግስት እይኹ   ትኩት ይስጝፃው አኽጝስ ወረዳዋ እሺኹ ሰላሙ ልቕልቕቲሾ ዙርፅጝስ እንፃኽስስታማጊ አኽⶓ አቕፄካ::

ጉዳት ታምብኹሳ ኾቶኪ ያኻ እምፕልታቖ ቲሪትጝፅጝስ ክልሉኪ ያኻ ፌዴራሉ ምንግስት ትኩትስ እርዳታማጊ አኽጝስ እዝብኪላ ምንግስቱ ኬምፕዳ ቲሬታ እቑዌ ዲግስካ::