ወክትስ አኬምስትⶓ ፋያው

ታደለ አጋጄ

አሌሙ ቲኑ አችት ይፋ ፄውኽ ፅናት ካንትፃውሰታ አውሮፓው እዝቡ ቼፍታ 2022ዳ አሌም አቡቑ አችስ 20 ሚሊዮን ያኻንኩ አቕ ካንሰርስ እምስትካ:: እኒጛ ክቻዴስኪላ ኪንዴ ያኻንኩ አኹኪ 9 ትኩሚ 4 ሚሊዮን ያኻንኩ ካንሰርስ እምስትካ:: አንጉ ካንሰር ፆቲስ ካንትስታኒ ዴሜካ አሌምዴስ ኹንዳ  ኬሴትስታው ካንሰሩ አይኔት ክቻዴስ አባላምቲዳ ቶኬምስቴ::

ካንሰር ይቶፒያው አችስ ካንትስታኒ ዴሜካ አዲስ አበባ ኬቴምዳ ቲሪትጙኽ ካንሰር ሬጅስትሬሽን እስታው ኾት 2015 ም/አታዳ ፄውኽ ፅናት ካንትፃውስታጊ 62 ሻይ ያኻንኩ አቕዳ  አግስታ::

ስልኪስ ካንቴ ታምፂት እንጃቢሪ ከቴሙ ዝኩዋንታ ዊዛሩ የኔነሽ አበጀሁ ካንሰሩ ቑንዚው ጉሽፅካ ምክንያትካስታ  እክምኔ ካንትኹስ ሼውቲ እላቲት አኽⶓ ድኹታ:: አቕ ካንሰርስ ቑንዳስትካ እስታኒ “ኬሽጝስ ካሊስታቲው ቑንዚ” ናኑ ካንቲ እምፕልታቕዳ ዝኩⶓ ዲብስካ:: አይኪ አቒ ቑንዳስታኒ እክምኒ ጝና ካስጝስ አኬምስትጝ ፋይፃው አኽⶓ ዙሚጝስ እክምኒ ጝናዳ እይስታውሳ እጆ ኬውጝፅⶓ ባያማ ዊድጝ ቱስታው አኽⶓ ዙሜካ::

እንጃቢሪ ዩንቨርስቲዳ ቔድፃማ አኬምጙ ክንትፃንቲ ዶ/ር እንየው መብራቱ ካንሰር ንጝ አቒውሳ አካላቶ ግቢቱንኩ ሴልካ ጛጂሱ ልግስኒው ሜቴንዴሰ ጃላ ሚንቺጝስ ቑንዚ ኬሴትስታው አኽⶓ ዲብስካ:: እምፕል ስፍሪዴስ ጁዋንኩ ሴልካ ሚንቼካማጊ  ካሳኒ አካላቶ ቤዴልካማ አካላትዴስ ፋይስታውሳ ምግቦ ኹጝስ አቕዳ ቤዴሎ ታምፃንኩ አኽⶓ ቶኬምካ:: አንጉ ካንሰር ዴሜካ አንጉዳ ዝኩንኩ እንኪቴንካ ዴስስታያሱ ዳድስ እሩባኒስ ኬሴትስታው ቑንዚያኽ::

ካንሰር ቑንዚው ጉሽፂው ምክንያቲ እንያኽ እስታማ ድኹስታቲው አኽⶓ ቶኬሙንኩ ዶ/ር እንየው ቑንዚስ እምፅጝስ ካላንኩ ሚንችካ ዲብካ ዝኩⶓ ጉሽካ:: እንጎ ፃኹፄካያስኩ ቹትካዳስታ ካሜንካያስኩዳ  ኬሴትስትጝስ ካላው አኽⶓ ቶኬሙንኩ ዶ/ር እንየው ጝን አቕዳ ቑንዚስ እምስቱንኩ ዝኩኒጊ ዜርስ ፌያፌይጝስ ካላው አኽⶓ እርዳትፅካ::

ዶ/ር እንየው ዙሙኑውስታጊ አካላቱ ቡዚትጝ፣ አልኮሎ ዝቕጝስታ ቸረሩ እክምኒ አንጉ ካንሰሩ ጉሽፅካ ምክንያትካኽ::  አንጉ ካንሰሩ ቑንዚው ምልኻት አንጉዳ ፅሊስ ጄሜራው እንቓሪ አኽⶓ ቶኬምካ:: ታፍስ እምስታኒ ካግጝንኹ እንቓሪ፣ ቻማጊ ዴሜካማጊ ካሳው ሚንቾ ጊዞ ቑንዳፃቲው ያኹኒጊ አንጉ ካንሰሩ ቑንዚው ምልኻት አኽጝስ ካላው አኽⶓ ጉሽካ::

ዶ/ር እንየው ኑኑውስታ ሚንችካ አቕ አንጎ ቑንዳስታኒ እክምኒዳ ይንታና:: ካንሰሩ ቑንዚስ እምስቱንኩ ኩፅኒ እንቓርጝ ጃጊ ቑንዳፅጝ እላቲው አኽጝስ እሜ እክምኒሾ ይንታኒስ ካንትስታላ:: እንቓሪ እላቲው ቑንዳፅጝ ይቪቺ ያኹኒጊ ካንሰር አኽጙ ድል ዜሬቕቲኒያኽ:: “አንጉዳ እንቓርኹጊ ውላ ካንሰር አኽጝስ ካላላ” ኑንኩ ዶ/ር እንየው አንጉ ካንሰር አንጎ ቑንዳፅጝ ይቪቺ ጋቲዊያኽ፤ አንጉዳ ፅሊ እንቓሪ ዝኩኒጊ ኩፅኒ እ ክ ምኒ ጝና ካንትስትጝስ ማራማርስትጝ ፋይፃው አኽⶓ ዙሜካ::

አንጉ እሉ ዙሪዳ ላኼንትጝ ዝኩዋኒ፣ አንጉዳ ባያማ ቑላቑሊዳ እንቓራማ ካንትስታኒ፣ አንጉዳ ዝኩኽ እንቓሪ ፅሊ ያኻውጃማ ቑላቑሊዳ ዝኩኽ ሚንቻማጊ ካሳው ያኹኒጊ፣ ብሬ ፄጌራው አንጉ እሉ ቻፊስ ፊⶓ ጄሜራኒ፣ አንጎ ፃኹፃቲንኩ ድሚ ኬፍ ኑንኩ ቹትካዳ አንጉ እልስ አኾ ፄጌራው ፉኒጊ አንጉ ካንሰሩ ቑንዚው ምልኻትካ አኽⶓ ዶ/ር እንየው ኽይትጝፄካ:: ሚንችካዳ ካንትስታው ምልኻት ኩፅኒ አንጉዳ እንቓርጝ አኽⶓ ቶኬምካ::

እምፕልታቕ ካንሰርስ እምስቱኒጊ ኬሽጝስ ካሊስታላ ናኑ ኬርትኹ ካንቲ ዝኩⶓ ቶኬሙንኩ ዶ/ር እንየው አንጉ ካንሰርስታ እሊኩ ካንሰሩ ቑንዚው አይኔትካ እሊው ቑንዚታጊ እክምኒስ ኬሽጝስ ካሊስታው አኽⶓ እርዳትፅካ:: ካንሰሩሳ ቑንዜ እሊው ቑንዚዴስ ሊሊታ ፄዋው ኩፅኒ እምፕላቺስ አኹኪ እሌትስ አኬምስትጝስ ዊድስታቲው አኽⶓ ጌሌፅካ::

ካንሰሩ እክምኒ ሚንቾ ጌርኮ ካፅጝስ ካሌ:: አሜቶ ያኻ ዋልቲ አርፋሳኺስታ እክምኒ እይስቴ:: ሊጊሲሜ ጊዞ ካፃው እክምኒው አይኔት አኽⶓ ቶኬምካ:: አንጉ ካንሰርስ ቑንዳስቱንኩስ እይስታው እክምኒ እምፕሎ አሜቶስታ እንዴስ ጃላ ፋይፃውስታ ዙራዙርካማ ሲፍጝጜ ፋያው እክምኒ እይስታው አኽⶓ ጉሽካ:: እሜ እክምኒሾ ይንታንኩ ቑንዳስቴንካ ዋኽስ ዋኾ አኬምስትካማ ኬሽጝስ ካላኑ ቑንዚ አኽⶓ ዙሜካ::

ቔድፃማ አኬምጝስ፣ ካንሰሩሳ እጆ እይጝ፣ ቸረሩ እክምኒስታ ኬሞ ቴራፒው እክምኒ እይስታው አኽⶓ ዲብስካ::

አንጉ ካንሰሩሳ ቑንዜ ምርማሪስ ሺሽጝስ አባላምቴ ውማይስ ሴሌቴንኹ አኪም እንቓርኹሳ አንጎ ታፍስ ዳሴሳማ ሺሽጙ አች ዝኩⶓ ቶኬምካ:: ዶ/ር እንየው ኬፍንኹ እንቓሪ ዝኩኒጊ ታፍስ ዳሴስታማ ሺሽስትጝስ ካላው አኽⶓ ዙሜካ:: አንጉ እንቓሪ ታፍስ ይቪቺስ ዳሴስታማ ዋኽስ ዋኾ “እን ካንሰርያኽ” ንጝስ ካሊስታቲው ያኹኒውላ ካንሰር አኽⶓ ታራታርስታው እንቓሪስ ሺሽስታው አኽⶓ ቶኬምካ:: አልትራሳውድስታ ኤም አር አይ እስታው እክምኒው ሜሳሪስ እንቓሬ ሺሽጝስ ካላኑ ምርማሪው አይኔት አኽⶓ ዙሜካ::

አንጉዳ እንቓርኹ ካንሰር አኽⶓ ቼሜትጝፅጝስ እንቓሪዴስ ሜርፊስ ናሙኒ ካፅስታማ ማይክሮስኮፕስ ካንትስታው ፓቶሎጂው ምርማሪስ ጉድጛ ቑንዜ ሺሽጝሰ ካሊስታው ምርማሪው አይኔት ዝኩⶓኪላ ጉሽካ::

አንጉ ካንሰር አኬምስትጝስ ጚው ያኹኽ አች ዝኩⶓ ቶኬሙንኩ ዶ/ር እንየው ቑንዚ አባላምቲ፣ ላጛንቲ፣ ሹኻንቲስታ ሴዛንቲ አች እስታማ ቤንስታው አኽⶓ እርዳትፅካ:: አባላምቲ አች አንጉ ካንሰር ጌና ጄሜሩስ አግስታውያኽ:: ሴዛንቲ አች ኩፅኒ አንጉዴስ ጁዋማ እሊው አካሉ ቤንሾ እሳንጛኒ አኽⶓ ዲብስካ::

አባላምቲ አችዳ ዝኩኽ ጊዛይ ቔድፃማ አኬምጙ እክምኒ እይስቴ:: እንዴስ ፋሌንጋ ኬሞ ቴራፒ እስታው ኦፕሬሽንስ ፉኽ ቑንዚ ማራማርስታማ ካንትስቱኒዴስ ፋሌንጋ እይስታው ሆርሞኑ እጁ ዝኩⶓ ዲብስካ:: ቑንዚው አይኔትታ ካንትስታማጊ አንኮ አሜታሳኺስታ እይስታው ሆርሞኑ እጁ ዝኩⶓ ቶኬምካ:: ቑንዚ ላጛንቴስታ ሹኻንቴ አቾ ታምባኒ ዴሜካ ዋሺኒ እክምኒ ቤዴራው ናው አንትጝስ ካላው አኽⶓ ጉሽካ:: ሹኻንቲስታ ሴዛንቲ አችሾ ፌያፌይጙኽ አንጉ ካንሰርዳ ቔድፃማ አኬምጝዴስ ቤዴራማ እጁስ እይስታው እክምኒ ፋይፄ:: ኬሞ ቴራፒው እክምኒ እይስቴ:: እንዴስ ሲፍፃማ ኩፅኒ ቔድፃማ አኬምጝ ሲፋው አኽⶓ እርዳትፅካ:: እሳናማጊ ካሳኒ ዴሜካ ቸረሩ እክምኒ እንቓሩኽሳ አንጎ ታስስትጙ እክምኒ ፋይፃው አኽⶓ ጉሽካ::