አጌራውሳ ሉዋላውቶ ማንዲፅጝስ ሜስዋቴ ኬይጝ ቱስታውያኽ እስትኾ

ንግስቴ ተስፋ

ቤዴራስኩ ቹዋ ታብል አጌራውሳ ሉዋላውቶ ማንዲፅጝስ ሜስዋቴ ኬየካማ ኔፃ ፄውጝስ እንፃኽስቱኑሳ እንፅኼ ናኪኒ ክምንትኪላ ካቢጝ ቱስታው አኽⶓ አዊ ብሄረሰብ ቺፅጝፂው ዝኩዋንትካ ዙሙና::

ታሊያን አፍሪካዴስ ኔፃኔቶ ኪቢሪፄታ ዝኬፃ ይቶፒያዋ ዎሬርጝስ ዝቤናዊዴስ ባይላዌ ዎሬሙሳ አይሎ ቴርሳማ ይቶፒያሾ ይንቴስጉ ጄግንካ ይቶፒያዊያንካ አርቤንካ ኩፅኒ አጌራዋ ዋኽስዋኾ ዎሬርፃኑላ ይጉፄካ::

አንኪሺ ጉዋጉሲ ወረዳ ቤኬፍቲ ኬቤሊው ዝኩዋንቲ አርቢኒ ተስፋ ሞገስ አርቤን እንቹ እንታሊ አጌራስ ኬዩኑሳ ሜስዋቴጊ ኬየካማ ወራሪዴስ ኔፃ ፄውጝስ ዲፊርስቲያስትፃ አጌራዋ አሬኬብፁኑሳ አዴሮ ቻቤልካማ ጛኪላ አጌራ እቑዌ ዲግስታው ወክትዳጊ ታምቦ ፊትጝⶓ ጉሽካ:: እንጚስኪላ ይትዮ-ኤርትራውስታ ይትዮ-ሱማሌው ወሬሙ ዎክትዳ አጌራውሳ እቑዌ ቻቤልካማ ዜሜችጝስ ይቶፒያው ሉዋላውትስ ሜስዋቴ ኬይⶓ ጉሽካ::

ይቶፒያውሳ ስሞ ድኪስ ጉሻውሳ አርቢኒ ተስፋ ኔፃኔትስ ኪቢርስቴታ እጂቲፃ አጌራዋ ናኪኒ ክምንት አጌራስ ፋይፃውሳ ቴግባሮ አኮሜችጝስ አጌራው ክብር ኬፍናታ አርቤንካ ቹዋታብልዴስ ክንቴ ካፅጝ ፋይፃንቲ አኽⶓ ኩስጜ ዲግስካ::

ክንትፃንታ ማንተግቦሽ ትላሁንኪላ አርቤንካውሳ ድሎስታ ታሪኮ ያቓማ አጌራው ሉዋላውትስስታ ልግስስ ታምቦ ፊትጛውሳ ክምንቶ ሲፍፅጝ ፋይፃንቲ አኽⶓ ዙሜካ::

ናኪኒ ክምንት ታሪኮ አቕጝዳስታ ዜኬርጝዳ ታምቦ ፊትጛማጊያኽ ናንኩ ክንትፃንታ ማንተግቦሽ ቴስፊዌናስታ ጄግኒ ክምንት አኽጝዳ ኩፅኒ ይጉዋው ጉዳይ ዝኩⶓ አሳቦ እይካ::

ክንትፃንታ ማንተግቦሽ እዩኑ ካንቲዳ ናኪኒ ክምንት ወክት ካሴው አርቤንቱ እንፅኺዳ አሴሜርጛማ ኬሻንቴ ድሎ ሜዜጌብፅጝ ፋይፃው አኽⶓ ዲብስካ:: አርቤንቱ ድል ጌሌፅስታው ወሬሙ ውታኺዳ ዊፅጝስ አኹኪ ዜሜችጝስ ይቪቺስ ያኻውላ ዎክቶ ማንዱኽ ሴሌቴንኹ ዝቤንሊ ካሳውሳ ቴግባሮ አኮሜችጝስ አኽⶓኪላ ጉሽካ::

እንጃቢሪ ዩኒቨርስቲዳ ታሪኩ ክንትፃንቲስታ ማራማርጛንቲ አበበ ፈንታሁን አሜት ቺፋ ማንዚ 27ታስ ኬቤርስታው ድሉ ባል፣ ልቓ አሜትካስ ይቶፒያው ሉዋላውት ታሊያንስ ዴፌርስታሺኹ አኽጝስ አጌራውሳ ኔፃኔቶ ኬቤርፅጝስ ካስጙኽሳ ቡንካዋስታ አግስቱኽሳ ድሎ ታክስጝስ አኽⶓ ስልኪስ ድኹዌካ::

ታሊያንካ ይቶፒየውሳ ድንቤሮ ዴፌርካማ ቱኒዴስ ፋሌንጋ አንኩዋ አሜታስ ሊሊትጙኽሳ ኬቴሞስታ ጌፄሩሳ ዙራሙሬ ቼፍጝጝስ ታሊያንኩ አሬሳቻንትካዋስታ እንፃኽስታንትካዋ ይቶፒያሾ ሚፅጝስ ይቶፒያውሳ አሉሞ ብቴ አሬሳንታ ፄውስታሺⶓ ጌሌፅካ::

ይቶፒያዊያንካ ካሌቕትስስታ ትቤብስ ሌጌሳቲንታ ክንቲጝናሳ ልምጝዴስ ጄሜራማ አጌራስ ቲሬንኩ አይማኖቱ ታብልካዋ አጌርኩ ሹማጌልካዋስታ እንቱ እስቱንኩ አርቤንካዋ ኩⶓ ክንትፃንቲ ጉሽካ:: እን ዴሜካ ይቶፒያዊያንካ ኔፃኔቱሳ ቡንካዋ ይስጝፄካማ ሲፍጝስ ድሎ ሜዜጌብፅጝስ ካላንታ ጌዴድፅⶓ ጌሌፅካ::

ወክትስ ታሊያኑሳ ውራሪ ሴብትጛንኩ ይቶፒያዊያንካ ጄግንካ አርቤንካዳ ታምባው ቤዴልስታ ውራሪው አሜት ሲፋታ ፄዋሺንኩ አጌራኻስኩ ካዳንትካዴስ ይጎ አርቤን ጄግንካ ካና ጋሜስታ ቤሬኺስ እቴካ ጁዌካማ ኔፃኔትስ ሜስዋቴ ኬይካ:: ኹን አርቤንካኪላ ላሜ ቴርስጝዴስስታ ዲግስጝዴስ ጃላ ዎሬምዳ አሴቴፍጜካማ ኬዩኑ ዋይሚ ካዲስታቲው አኽⶓ ታሪኩ ክንትፃንቲስታ ማራማርጛንቲ አበበ ኽይትጝፄካ::

ወክትስ እሺንኩ ይቶፒያው ንጉስ አፄ ሀይለ ስላሲኪላ ይቶፒያ አሌሙ ቴቬቬርጙንኩ ምንግስትካው አችቱ አባላ አኽጝስ ታሊያን ውራሪው ወክትዳ ታምፄኩ ቤዴል ቲሬታ አሌምስ አቕፅጝስ አጌርዴስ ፌካማ ዲፕሎማሲውሳ እንፅኼ እንፃኽስስታሺንኩ አኽⶓ ቶኬምካ::

ወክትስ ሌጌሱንኩ አጌርካዴስ እንግሊዝስታ ፈረንሳይ ወሬሙሳ ሜሳሬ አጌዳሺንኩ ያኹኒውላ ታሊያን ጀርመንሊ ቲቪቪርጜ ጄሜርታኒ ኩፅኒ እንግሊዝ ይቶፒያስ ድጋፎ ፄውጝስ ካሌታ ንጉስ ዲፕሎማሲውሳ እንፅኼ እንፃኽስትጝስ ካሊⶓ ታሪክ እርዳትፃው አኽⶓ ቶኬምካ:: እንጚስኪላ እንግሊዝ ፄውቱኽ ድጋፍስ ሀይለ ስላሲ አጌራኻሾ ቱጝስ ካሌካ::

ይቶፒያ ታሊያኑሳ ወራሬ ድላ ፄውቱኒዴስ ፋሌንጋኪላ አሌምስ ኪቢርስቲት ዲፊሪስቲያስቲ አጌራ አኽጝስ ካሊⶓ ጌሌፅካ:: ናኪኒ ክምንትኪላ ድላ ፄውጙ እንኩዋኽስትስስታ አጌራው እንካንስ ወክት ካሴውሳ አርቤንቶ ፊትጛታ ላማ አኽⶓ ታሪኩ ክንትፃንቲ ኽይትጝፄካ::

ኽታዌን እንቹ እንታል ጋኻኻዳስታ ካዌናኻዳ ቼካ እሺካማ አጌራዋ ወራሪዴስ ድላ ፄዌካማ ኪቢሪስቲፃ አጌራዋ አሬኬብፁኑውስታጊ ናኪኒ ክምንትኪላ አሴሜርጙኽ ዜርፍዳጊ አርቤና አኽጝስ አጌራውሳ እንካኖ ቴግባርስ ካንትፅጝ ፋይፃው አኽⶓ ጉሽካ::

አጌራዋ እንካናንኩ ይቶፒያዊያንካጊ ድኽትዴስ፣ እንግርግራ ይጉዊ ታክስጚዴስስታ አጌራኻሱ ጋቻዴስ ፊጝስ ፄውስታው ፅሬትዳ ታምቦ ፊትጛማ ኪስስትጝ ወክቱ አርቤንቱ ጊሊፂ አኽⶓ ኽትጝፄካ::

“ጄግንካ አርቤንካ ክምንትካዴስ አሬኬብስትንኹሳ ድሎ ቱስታውሳ ክብሮ እይጝስስታ ቴግባርስ ዴሜካ ክንቴ ካፅጝስ አጌራው እንካኑ እንኩዋኽስትስ አጌራውስታ ክምንቱ ውላቱዊ ልግሱስታ ሉዋላውቱ ክብርስ እምፕልታ ቲሪጝ ፋይፃው ወክትዳኽ አግስትናው” ናኒስኪላ ታሪኩ ክንትፃንቲስታ ማራማርጛንቲ ታክስፅካ::