ባኬንጝ ቱስታቲው ድምፅ

ጉንቤት 24/2018 ም/አ ካስጛውሳ 7ንቴ ትክላሌ አጌራዌ ጉላሌ ካስጝፅጝስ አጌርታ እምፕልታቕ ሜዜጌብስትካማ ካርዶ ፍሽጝ አቕስቴ:: ጉላሊው ካርድ አጌራዊ ጉላሊዳ ጐሌላንትካ ዲሞክራሲያዌ ሜብቶ ቴኬምስትጝስ ካሊፃው ሰነድያኽ::

ጉላሊው ካርድኪላ ጐሌላንትካው አቕፃ አኽጝስ ጐሌልጙሳ ሜብቶ ቱስቲ ዳድስ ቴኬምስትጝስ ካሊፃውያኽ::

እምፕላ አጌራዋ ቺፅጝፅጝስ ምንግስት ፋይፃንቲ አኽⶓ ውላጊ አምናው ጉዳያኽ:: እንስኪላ አንኩዋ አሜት ቺፋ እዝብ ፋያውሳ፣ እያዋ ቺፅጝፃውያኽ ናውሳ ምንግስቶ ጐሌልጝስ እይስትኹሳ ሜብቶ ቴኬምስታማ ጐሌልጝስ ካሊፃውሳ ካርዶ ሜዜጌብስትካማ ፍሽካ:: ጉላሊው ቴርትዳ አግስታማ ቺፅጝፃውሳ ምንግስቶ ጐሌልጝስ ካሊስታታ ዴሜካ አጌርታ ውላጊ ወሴንስትኹ ጊዝስ ሜዜጌብስታማ ካርዶ ፍሽጝ አቕስቴ:: ፍሽንኹሳ ካርዶ ዴሜካ ቱስቲስ እሜማ እጂጝስ ይው ድምፅ እያስኪ ያኻ አጌራስ ፋይፃዊያኽ ንጝስ ጉላሊው ጌርክ ታንባኒ ድምፆ ቱስቲስ ጉላሊዳ እሽፅጝ ፋይፄ::

አማኻሪ ሚዲያ ኮርፖሬሽንዳ እግ ቤናሱ ዳይሬክተር አቶ አቡየ ካሳሁን አውጚ ቴሌቪዥንስ ጌሌፁኑውስታጊ አሌምዳ ምንግስታ ጋቲታ ቺትጝጝስ ካሊስታቲው አኽጝ ካንትስታማጊያኽ:: አኽጝስኪ እምፕላ አጌራዋ ቺፅጝፅጝስ ዴሜካ ምንግስት ፋይፃንቲ አኽⶓስታ ሴሌቴኑንኩ አጌርካዳጊ ምንግስት ስልታንሾ ይንታውኪላ ጉላሊስ አኽⶓ ማሊጝ ፋይፃንቲ አኽⶓ ጉሽካ::

ምንግስታ ጋቲታ ቺትጛው አጌር እላቲው አኽⶓ ጉሽጝስ እንኪላ ይጉኺ ኽታዊኒ ጊዝዳ አኹኪ ትንታዊ ጋርዩሹ ቴርትዳ አኽⶓ አቶ አቡየ ቶኬምካ:: ምንግስት ቲሪትጝጝ ይጉዋቲው አኽጝስ ጉላሊው ቴርትዳ አሴቴፍጝጛኑውላ ይጉጝስ አን ጐሌላያሱ ምንግስት እንታ ፄዋማ ቤዴልኹ ንጝስ እንግርግራ ልውጝኪላ ቴኬማቲው አኽⶓ ጉሽካ:: እያዋ ቺፅጝፃውሳ ምንግስቶ ጐሌላኻኽ ንጝስ ፍሽንኹሳ ጉላሊውሳ ካርዶኪላ ፋናውሳ፣ ቺፅጝፄኽ እናውሳ ምንግስቶ ጐሌልጝስ እሽፅጝ ፋይፃንቲያኽ:: እን እያው ድምፅ ዋይሜ አጋቲውያኽ ናውሳ ታክስጜ ባይጝስ እይስትኹሳ ሜብቶ ቴኬምስትጝ ቱስቴ:: ጉላሊው ካርድ ካስፅጝስ ኒካማ ጐሌልጝኪላ ስልታኒው ምልኻትያኽ:: ጉላሊውሳ ካርዶ ቴኬማውያኽ እናውሳ ፓርቴ ጐሌልጝስ ዲሞክራሲያዌ ሜብቶ ቴኬምስትጝስ ዲሞክራሲው ቴርት አድርታታ አጌር አቑሳ ግዴቴ ፊትጝጝኪላኽ::