ጋቻ ፅንጋኻ ያኹኽ ዜርፍ

ታደለ አጋጄ

ፌዩንኩ ሹኻ አሜትካዳ አማኻሪ ክልልታ ኬሴትስትኹ ጋቻዉ ምክንያታስ ሚንችካ ክንታንትካ ክንቲዴስ ሴጋ ያኼካማ እጂጝ ታክስስታዊያኽ:: ክንታንትካ ክንቲዴስ ሴጋ ያኼካማ እጂንኩ ጊዝካዳ ዎክትስ አግፅጝ ቱስታውሳ አቕቶስታ ካሌቕቶ አግፃኑላስ እጂካ:: ክንቲ ጝናዳ እሺንኩ ሚንችካ ክንትጝ ክንትፅጝስ ያኻንኩ አክኽካ አቤሌሽስትካ:: ኮምፒውተር፣ ክንትፂ ሜፃፍ፣ ክንትፂ ቤንካዳስታ እሊኩዳ ጉዳት ታምብጝስ ቻ አጌራዋ አሬኬብስታውሳ ክምንቶ ፌቴርጝስ ፅንጋኻ ያኻማ እጄ:: ሚንችካ ክንታንትካኪላ ክንቲዴስ ሴጋ አኽጝስ እሊው እንፅኺሾ ቱጝስ ጌዴድስትካ:: ጋያኪ ክልልታ ክንቲው ዜርፍዳ ሚንች ችግር ታምባማጊ ዝኩኽ ዙራሙርካዴስ እምፕል ጃዊ ወረዳኽ:: ዶንጌቱንኩ አይልካ እሳንስ ልቕልቓኑ ዙራሙሪ አኽጝስ ሚንችካ ጌፄርኩ ኬቤልካ አግስታንኩ ክንቲ ጝንካ ክንትጝ ክንትፅጙሳ አኺኔ ካስጝፄካማጊ ጋቲዊያኽ::

ወረዳዳ ሴዛ ላጛንቲ አች ክንቲ ጝንካ ዝኩና:: እን አሜትዳ ውላ ላጛንቲ አች ክንቲጝንካዳጊ ኩፅኒ ክንትጝ ክንትፅጙ አኺኒ ካስጛማጊ አግስቴ:: ፅክራ ላጛንቲ ቤንኩ ክንታንትካ አጌር አቡቑ ፍታኒስ ቤዴራ ቴርቶ ፄዌካማጊ አግስታንኩ ክንቲ ጝንካዴስ ፈንደካ ትክላሊ ላጛንቲ አች ክንቲ ጝና እምፕልያኽ::

ሰላሙስታ ፄትቲው ችግርስ ሚንች ጉዳት ታምቡኽ ፈንድካ ትክላሊ ላጛንቲ አች ክንቲ ጝና እንሳ ችግሮ ቲሪትጝጝስ 2018 ምሬት አሜታ አጌር አቡቑሳ ፍታኔ ፌቴንስታንኩ ክንታንትካ ኬሽኹሳ ዋይሜ ሜዜጌብፃንታ ክንትፃንትካ እርዳትካማጊያኽ::

ፈንድካ ትክላሊ ላጛንቲ አች ክንቲ ጝናዳ ፅክራ ላጛንቲ ቤኑ ክንታንታ ወርክነሽ አስማቸው አጌር አቡቑ ፍታኒስ ቴርቴታጊ አኽⶓ ድኹታ::

ክንቲ ጝናዳ ሰላሙስታ ፄትቲው ችግርስ ሚንች ጉዳት ታምብⶓ ቶኬምቱት ክንታንታ ወርክነሽ ክንቲሾ ዙርጝስ ክንትጝ ክንትፅጙ ካስት ካስጙስ እጂጝስ ኬሽኹሳ አቕቶ እምቴታ ፄውⶓ ዙሜ:: ላጛ አሜትካስ ክንቲዴስ ሴጋ አኽጝስ ፌይፅⶓስታ  ክንታንታ ወርክነሽ 12 ቤኑሳ ክንቴ አሌድጝስ አጌር አቡቑ ፍታኒስ ይስታታ ፂኒስታታጊያኽ:: አፄብካሊ እምፕልትስ ሜፃፍ ጝናዳ ፂኒስታታጊ አኽⶓ ቶኬምጝስ ኬሽኹሳ ዋይሜ ሚዚጊብፄታ ዩንቨርስቲሾ ቱጝስ ዝኩኽሳ ቴስፌ ድኹታ::

ክንትፃንትካ ጛው አክምስጊ እርዳቴ ፄዌካማጊ አኽⶓ ዙሜ:: ክንታንታ ወርክነሽ አጌር አቡቑ ፍታኒዳ 450ዴስ ጃላ ዋይሜ ሜዜጌብፅጝስ አኬድታ:: እክዶ ሳኪትጝፅጝስኪላ አክም ፌኬዳውስጊ ፕሮግራሞ ፍሽጝስ ይስታታ ፂኒስታ አኽⶓ ዙሜ::

አጌር አቡቑሳ ፍታኔ ኦንላይንስ ፊቲንስቴንኻኽ እስትኑኒውላ ዴስጝጜ ፄውናናጊ ጋቲዊያኽ “ኒስ ዝኩኽሳ ችግሮ ድኹታ:: ውላ ኮምፒውተርካ ሰላሙ ችግርስ ዳዴኽስቱንኩ አኽጝስ ኮምፒውተሮ ቴኬምስትጝስ ካሌካያስኩ አኽⶓ ዲብስታ::

እሊት ፈንድካ ትክላሊ ላጛንቲ አች ክንቲ ጝናሱ ክንታንታ መስከረም ዘመን አጌር አቡቑ ፍታኒስ ፕሮግራሞ ፍሽታታ ፂኒስጝስ ቴርቴታጊ አግስቴት አኽⶓ ዙሜ:: ክንትፃንትካው እርዳቲ ማልጛ ኬፍንኹያኽ ኒት ክንታንታ መስከረም ፌይኹ አሜቱሳ ሽቶ እንፃኽስትጝስ፣ ቲቶሪያሎ እቑዌማ ክንትፅጝስስታ ክንቲውሳ እሜ ዎክትስ ሾፌንጝስ ክንትፃንትካ ፄዋኑ እርዳቲ ማልጛ ኬፍንኹ አኽⶓ ዲብስታ::

12ንቲ ቤኑ አጌር አቡቑ ፍታኒዳ ኬሽኹሳ ዋይሜ ሜዜጌብፅጝስ እክድ ዝኩⶓኪላ ቶኬምታ:: ክንታንታ መስከረም ፍታኒው ጊዝ ታምብምባኺስታ ጊዞ ቱስቲስ ቲኪምቴታጊ አኽⶓ ድኹታ::

አጌር አቡቑሳ ፍታኔ ፌቴንስታንኩ 12ንቲ ቤንኩ ክንታንትካስ ክንቲውሳ እሜ ሾፌንጝስስታ ፌይኹ አሜቱሳ ሽቶ እንፃኽስትጝስ ክንትፃንትካ እርዳቴ ፄዋካማጊ አኽⶓ  ዙሙንኩ ዴሜካ ፈንድካ ትክላሊ ላጛንቲ አች ክንቲ ጝናሱ አውጚው ክንትፃንቲ መሰረት ታገለኽ::

ክንቲ ጝናዳ ሚንችካ ክንትጝ ክንትፅጝስ ያኻንኩ አክኽካ አቤሌሽስትጝስ ክንታንትካ ክንቲስ ልኺትጛንትካ አኻቲንታ ፅንጋኻ አኽⶓ ቶኬምካ::

ፈንድካ ትክላሊ ላጛንቲ አች ክንቲ ጝናዳ ኮምፒውተር፣ ጄኔሬተር፣ ፎቶ ኮፒ ማሽንስታ እሊኩ ክንቲኩ ሜሳርካ ዜሬፍስትጝስ ክንቲ ጝናዳ ሚንች ችግር ታምብⶓ ዲብስካ:: እንኪላ ክንታንትካው ክንቲው ፃንኩትዳ ችግሮ ሲፍፅኹ አኽⶓ ድኹዌካ::  ክንታንትካ ኬሽኹሳ ዋይሜ ሜዜጌብፅጝስ ፌያንታ ፅሬቶ ፄውⶓ ቶኬምካ:: ሰላሙስታ ፄትቲው ችግር ምክንያታስ ሚንችካ ክንታንትካ እሊው ዙራሙሪሾ ካስጝስ ክንታንታ ፄውስትⶓ ጉሽካ::

እሊው ፈንድካ ትክላሊ ላጛንቲ አች ክንቲ ጝናዳ ኬሚስትሪው ክንትፃንቲ ደመከ በላይ ክንታንትካዋ ላጛ ሽፍትስ ክንትፅጝስ እርዳትካማጊ አኽⶓ ዙሜካ:: ክንቲውሳ እሜ ዎክትስ ሾፌንጝስ 9ንቲዴስ 11 ቤኖኺስታ ዝኩኽሳ ኬሚስትሪውሳ ክንቴ ክንትፅጝስ እርዳቴ ፄዋማጊ አኽⶓ ጌሌፅካ::ሰላሙስታ ፄትቲው ችግርሊ እምትጛማ ክንታንትካ ክንቲስ ዝኩኽ ፋይ ማልጛ ኔኬታማጊ አንትⶓ ጉሽካ::

እመቤት ወርኩ ፈንደካ ትክላሊ ላጛንቲ አች ክንቲ ጝናዳ ጛራኽ:: ክንቲ ጝናዳ ማይቤራዊ ሳይንሱስታ ፍትሬት ሳይንሱ 12ንቲ ቤንኩ ክንታንትካ 70ዴስ ጃላ ያኻንኩ አጌር አቡቑሳ ፍታኔ ፌቴንስትጝስ ሜዜጌብስቱንኩ አኽⶓ ጌሌፅካ:: ክንታንትካስ ዝኩኽ ዴዴጝ ጊዝዳ ክንትፃንትካ ክንቲውሳ እሜ ሾፌንጝስ ፍታኒስ ጉድጛ ቴርታንታ እርዳትካማጊ አኽⶓ ቶኬምካ:: ክንታንትካ ኦንላይንስ ፌቴንስታንኩዊያኽ እስቱኒውላ ዴስጝጜ ፄዋኑ ኮምፒውተር እላቲው አኽⶓ እርዳትፅካ::

ጃዊ ወረዳው ክንቲ ፅፌት ጝናሱ ትክትሊ አላፊ ሀ/ኢየሱስ መኩሪያው ወረዳታጊ ሴዛ ላጛንቲ አች ክንቲ ጝንካ ዝኩⶓ ቶኬምካማ አጌር አቡቑሳ ፍታኔ ፌቴንፃንኩ ኩፅኒ ላጛ ክንቲ ጝንካ አኽⶓ ጌሌፅካ:: ወርክ ሜዳስታ ፈንድካ ትክላሊ ላጛንቲ አች ክንቲ ጝንካዳ ክንታንኩ 125ዴስ ጃላ ክንታንትካ ፍታኔ ፌቴንስታንኩ አኽⶓ ጌሌፅካ:: ወረዳታጊ ፄትቲው ችግር ክንቲዳ ቻኒስቶ ታምፁኒውላ ችግሮ ቲሪትጝጝስ ክንት-ክንትፅጙ ካስት ካስጛማጊ አኽⶓ እርዳትፅካ::

ኬሽኹሳ ዋይሜ ሜዜጌብፃንኩ ክንታንትካስ ያኻ ክንትፃንትካስ ሽልማቲ እይስታው አኽⶓ ቶኬምካ:: ሚንችካ ክንቲኩ አክኽካ ዜሬፍስትጝ ክንቲው ፃንኩትዳ ችግሮ ታምፅⶓ እርዳትፅካ:: ክንታንትካ ኬሽኹሳ ዋይሜ ሜዜጌብፃንታ ዝኩኽ ጊዝዳ እርዳቴ ይስጝፄካማ ሲፋንኩ አኽⶓኪላ ጌሌፅካ::