ጊዞ ቱስቲስ ቴኬምስታንኩ

ታደለ አጋጄ

ክንቲ ሚኒስትሩ ንባር ቶኬማውስታጊ ፌዩንኩ ዋልቲ አሜትካዳ 2012 ዴስ 2017 ም/አሜታሳኺስታ 3 ሚሊዮን 950 ሻይዴስ ጃላ ክንታንትካ አጌር አቡቑ ፅክራ ላጛንቲ ቤኑሳ ፍታኔ ፌቴንስትካ:: እኒጛ ፌቴንስቱንኩ ክንታንትካ ክቻዴስ ኪንዲዴስ ጃላ ዋይሜ ሜዜጌብፁንኩ ኩፅኒ 545 ሻይ 340 ያኻንኩ ክንታንትካ ይቪችካኽ::

ዲጊ ጊዝዴስ ናቴ ዩኒቨርስቲውሳ ሚፅፄ ዋይሜ ሜዜጌብፃንኩ ክንታንትካው ቼፍ ኔኬታማጊ አንትጝ ክንቲው ፃንኩትዳ ዝኩኽሳ ችግሮ ካንትፅኹ ያኻ:: እምስትኹ ክንቲው ዝቤንዳ ሊሊትጙንኩ ላጛንቲ አች ክንቲ ጝንካ አጌር አቡቑ ፍታኒስ ቤዴራ ቴርቶ ፄዌካማጊ አግስታና:: አጌር አቡቑሳ ፍታኔ ፊቴንስታንኩ 12 ቤንኩ ክንታንትካ ኬሽኹሳ ዋይሜ ማዜጌብፅካማ ዩንቨርስቲሾ ቱዋንታ ሊሊቲ አኺኒስ እርዳቲ ፄውስታማጊያኽ:: ክንቲ ጝንካ ባጀቶ ሜዴብጝስ ክንቲውሳ ፃንኩቶ  ኬሽጝፅጝስ ፅሬት ፄዋማጊ አግስቴ:: እኒ ክንቲ ጝንካ ክቻዴስ አዮ ጉዋጉሲ ወረዳዳ አግስታው ቻጂለማ ላጛንቲ አች ክንቲ ጝና  እምፕልያኽ::ፅክራ ላጛንቲ ቤኑሳ ፍታኔ ካፃንኩ ክንታንትካስ እርዳቲ ፄውስታማጊ አኽⶓ ክንታንትካስታ ክንትፃንትካ ዙሜካ::

ቻጂለማ ትክላሊ ላጛንቲ አች ክንቲ ጝናዳ ክንታንታ ትግስት ሞላ አጌር አቡቑ ፍታኒዳ ኬሽኹሳ ዋይሜ ሜዜጌብፅካማ ዩንቨርስቲሾ ቱጝስ ቤዴራ ቴርቶ ፄውታታጊ አግስቴት አኽⶓ ድኹታ:: ክንትፃንትካ ውላ ክንቲው አይኔቱሳ እሜ አሌድጝስ ሴስታንቲዴስ ፅክራ እምፕላንቲ ቤኑሳ ክንቲውሳ እሜ ክዳማ አድጉዊስስታ እሊው ፉሪው ጊዝስ ክንትፄካማጊ አኽⶓ ዲብስታ::

ክንታንታ ትግስት ኒኹስታ አፄብካሊ እምፕልትስ ፂኒስቴ:: ሜፃፍ ጝናዳስታ ፕሮግራሞ ፍሽጝስ አፄብካሊ ፂኒስታት አኽⶓ ዙሜ:: “ፍታኒዳ ኬሽኹሳ ዋይሜ ሜዜጌብፅጝስ ቴርትናና አግስትኔ” ኒት ክንታንታ ትግስት ክንትፃንትካኪላ ፌይኹ አሜቱሳ  ሽቶ እንፃኽስትጝስ እርዳቴ ፄዋንኩ አኽⶓ ዲብስታ:: ክንትፃንትካ ክንታንትካዋ ሼው ፅንታስ ቴርታንታ ፄዌካማጊ አኽⶓ እንክርፄ::

“ጊዞ ቱስታው ዳድስ ቴኬምስትጝ ኬሽኹሳ ዋይሜ ሜዜጌብፅጝስ ካሊፃዊያኽ” ኒት ክንታንታ ትግስት ፂኒስታውሳ ፕሮግራም ፍሽታታ ኻሮ ጌርኮ ፂኒስጝስ ፌይፄት አኽⶓ ድኹታ:: ክንቲ ጝና ጌፄሩ ዙራሙሪዳ አግስታው አኽጝስ ሜብራት ዋኽትጛውላ ይጉጝ ክንታንትካ ቴክኖሎጂሊ አቕትጛቲንታ ፅንጋኻ አኽⶓ ጉሽታ:: “ኦንላይንስ ፍታኔ ካፅናኻ አኽኑኒጊ ኮምፒውተርሊ ዴስጝጜ ፄውጝስ ካሊናያ” ኒስ ዝኩኽሳ ችግሮ ድኹታ::

እሊት ቻጂለማ ላጛንቲ አች ክንቲ ጝናዳ 12ንቲ ቤኑ ክንታንታ ቤቴሌሄም ስሜነህ ክዳሚስታ አድጉዊስ እንቲታኪ ማቺዴስ አርቦኺስታ ዝኩኽ ጊዝዳ ክንትፃንትካ ክንታንትካስ እርዳቴ ፄዌካማጊ አኽⶓ ዙሜ:: ክንቲዴስ ሴጋ ሜፃፍ ጝናዳ ፂኒስጝስ ፌይፂ:: ክንታንትካ ቱዋያሱሳ እምፕልትስ ፂኒሳና:: ክንታንትካ ፌይኹ አሜቱሳ ሽቶ እምፕልዳ እንፃኽስትካማጊ አኽⶓ ድኹታ:: ፍታኒ ታምብምባ ኺስታ ጊዞ ቱስቲስ ቲኪምስቴታ ኬሽኹሳ ዋይሜ ሜዜጌብፅጝስ ቴርትⶓ ዙሜ::

ክንታንታ ቤቴሌሄም ዙሚኹስታ ጊዞ ቱስታ ጋቲታ  ፌይፃላ:: ዝኩኽ ልቓ ጊዞ ክችክቺስ ቴኬምስትጝስ ቴርቴ::

ቻጂለማ ትክላሊ ላጛንቲ አች ክንቲጝናሱ ይሳቡ ክንትፃንቲ ምንባለ ምናለ ክንቲውሳ ካሌንደሮ ቱስታው ዳድስ ቴኬምስትጝስ ውላ ክንቲውሳ እሜ ሾፌንጝስ ካሊⶓ ዙሜካ::

12ንቲ ቤኑሳ ክንቲውሳ እሜ ሾፌኑኒዴስ ፋሌንጋ 9ዴስ 11 ቤኖ ኺስታ ዝኩኽሳ ክንቲውሳ እሜ ክንትፅጝስ እርዳትካማጊ አግስታንኩ አኽⶓ ዲብስካ::

ሚዲቢኒ ክንቲው ጊዝዴስ ድምክና ክዳሚስታ አድጉዊስ አጌር አቡቑሳ ፍታኔ ካፃንኩ ክንታንትካስ እርዳቴ ፄዌካማጊ አኽⶓ ድኹዌካ:: ፍታኒው ጊዝ ታምብምባ ኺስታ ክንታንትካዋ እርዳት ሲፋንኩ አኽⶓ ቶኬሙንኩ ክንትፃንቲ ምንባለ ክንታንትካ ክንቲዴስ እቼቲንታ ክንቲ ጝናዳ ፂኒሳንታ ፄዌካማጊ አኽⶓ ጉሽካ:: ክንታንትካ ጊዞ ቱስቲስ ቴኬምስትካማ ኬሽኹሳ ዋይሜ ሜዜጌብፃንታ ክንትፃንትካው እርዳቲ ኬፍቲኔ ታምቦ ፊትጛው አኽⶓ ዙሜካ::

አዮ ጉዋጉሲ ወረዳው ክንቲው ፅፌት ጝናሱ አላፊ ወረዳ በየነ 2018 ም/አታሱ ክንቲው ዝቤንዳ ወረዳታጊ 5 ላጛንቲ አች ክንቲ ጝንካዳ አጌር አቡቑሳ ፍታኔ ፌቴንፃንኩ አኽⶓ ጌሌፅካ:: ውላ ክንቲ ጝንካ ፄትቲው ችግርዴስ ኔፃ አኽጝስ ክንትጝ ክንትፅጙሳ ካስቶ ካስጝፄካማጊ አግሰታንኩ አኽⶓ ቶኬምካ:: ትክላሊስ 605 ክንታንትካ አጌር አቡቑሰ ፍታኔ ፌቴንፅጝስ ሜዜጌብስቱንኩ አኽⶓ ጌሌፅካ::

ትክላሊስ ፍታኔ ፌቴንስታንኩ ክንታንትካዴስ ኪንዲዴስ ጃላ ዋይሜ ሜዜጌብፅካማ ፌያንታ ፄውጝስ ሊሊትጙንኩ እንፅኽካ እንፃኽስትⶓ ቶኬምካ::

2017 ም/አታዳ እሺኹ ፍታኒው ዋይሚውሳ ትንታኔ እንፃኽስትጝስ ይሴንስታ ኬሽጝጝ ቱስታውሳ ኬምፖ ሺሽጝስ ወረዳታ ኬሽኹ ዋይሚ ሜዜጌብስታታ እንፃኽስስታማጊ አኽⶓ ጉሽካ:: አቕት ዝኩክሳ ክንትፃንትካዋ ሜዴብጝስ ክንታንትካ ክንታንታ ፄውስትⶓ ቶኬምካ:: ፌቴንስታንትካ ክንታንትካዴስ 80 ታፋ ያኻንኩሳ ዩንቨርስቲውሳ ሚፅፄ ሜዜጌብፃንታ እክድ እንኩርስትⶓ ጌሌፅካ::

ክንቲ ጝንካ ዝኩኽሳ ባጀቶ ክንታንትካዋ ቢኪፅጝስ እሽፃው አኽⶓ ዙሚጝስ ዝኩኽ ዴዴጝ ጊዝዳ ክንታንትካ ክንቲ ጝናዴስ እቼኑላሰ እምፕልትስ ፂኒሳንታ ፄውስታማጊ አኽⶓ እርዳትፅካ::

ውላ ክንቲ ጝንካዳ ቼካማ ክንታንኩ ክንታንትካ ዝኩⶓኪላ ቶኬምካ:: እኒ ክንታንትካ እንፅኺዴስ ሴጋ አኽጝስ ጊዞ ቱስቲስ ቴኬምስትካማ ኬሽኹሳ ዋይሜ ሜዜጌብፅካማ እሊኩስ ምሳላ አኽⶓ ጌሌፅካ::

ክንታንትካ ኦንላይንስ ፍታኒውሳ ዴስጝጜ ፄውጝስ ጌፄሩ ክንቲ ጝንካዳ ሜብራቱ ችግር ዝኩⶓ ቶኬምካ:: አኽጝስኪላ ዎሬኬትስ ፍታኔ ፌቴንስታንኩ አኽⶓ ቶኬምካ::