“እጂኹ ጚቓዴስ ካሜኔ”!

ደመላሽ መለሰ

37ንቲ ሶኼቱ እንግሊዝ ፕሪሜርሊጉ ሜረሀ ግብር በርንማውዞስታ ማንቼስተር ሲቲዋ ታምትጝፃ።

ላጊጊ ኬችካስ ዴሜካ ዋይሚ ፋይፃንቲ እሺኾ። እንኪላ ያኹኽ ሲቲ ፕሪሜርሊጉሳ ዋንቼ ጉሽጝስ እንክሬ አኮሜችኹ ያኹስ በርንማውዝ ጚሾስ አውሮፓው ሜንድሬኹሳ ቴሳትፎ ቼሜትጝፅጝስ ልኻ ዊድፄ ቡንካዋ ካስጝፄካ።

90 ዴኪካው ልኺትጚኪላ እምፕል ክቻ ዋይሚስ አሌድስታ።

ልኺትጜ ቤንጙንኩ ኬችካዴስ ፊቴ ፊቲስኹ እንክሬ ሴግዳ ያኻማ ካንቱስ ክምፅኹ አርሴናሊያኽ። አርሰናል ሲቲውሳ ዋይሜ ባይፅጞ ሲፋማ 22 አሜታዴስ ፋሌንጋ ዋንቺስ ቢካ።

በርንማውዝ ዊፃታ አኹኪ ክቻ አሌዳታ ሜካዶ ትክፃማ ሲቲውሳ ዊፅስታንቶ ማንዳኒስ ክምፁንኩ አርሰናልኩ ዴጌፋንትካ ዴስቲው ሚንቺትስ ሚንቻካ ሳቔኑውላ ቼካ።

አይጚኒ ክስቴትኪላ አርሴናል “ዋንቺውሳ ፃንቑናዋ “ኬዋታ ፄዌ። ሰሜን ለንደኑ ኬች አርሰናል 2004 አ/ዝ/ቼፍዴስ ፋሌንጋ ሊጉሳ ዋንቼ ጉሽⶓ ቼሜትጝፃ።

እንክሪውሳ ካስቶ አምናው ሴሌቴንፃንቲ ሚካኤል አርቴታስ ጉስስታው አርሰናል “እጂኹ ጚቓዴስ ካሜኔ “ናኒስታ ሚንች አሜቱሳ ድርትኔ ሳኪትጝፃ። ኬች ፌይፁክ ጊዝካዳ ፌቴንስትጝ ሚንችካ ዴጌፋንትካዋ ቴስፌ ኬውፅኹ እሺኾ።

ሴሌቴንፃንቲ አርቴታ 2025/26 ሊጉሳ ዋንቼ ጋርዲዮላ ዳሪዳ ቲሬማ ቻባቻባታ ፄውጝስ ላንጊጊ ታፍስ ዋንቼ ቼቤታ። እን ኬች እንስ ታምቡስ ሳሴርስ ጋቲዊያኽ ሚንችካ ኬቼቼላኒስ 37ንቲ ሶኼቱ እንክሪ ዴሜካ አንሳ ካንቴ ኪሳ።

22 አሜታዴስ ጃላ ሼዎ አሬሩስ እሺኹ አርሰናሉ ዴጌፋንቲ አይጚኒ እንክሪዳ ጛሬ ጉሻማ እንዜጛታ ፄውስታ።

22 አሜታሳ ዋንቻ ጋቲታ እንዜጝጝ አርሰናሎ ኮቴ ኽሳንቴ ኬቾ ግርቦ ዱንፃ።

ያኼስጉ እሳጊ ካንቴ ኪስኹ ዋይሚ ሜዜጌብስታ ።