አለሚቱ የኔት
ዎታታ ወይኒ በየነ “ወይኗ ኩራሌው” መከሌ ኬቴምዳ ካሚንስቴታ ሌጌስቱት ናኬና አብት ዌናኽ:: “ችግር ኽዬ ክንትፄ” እስታውስታጊ ጝናቑ እሌታ እርባቲ ዝኩዊኒ ዙራሙሪው ሰላም ዳንጊዊጝሊ እምትጛማ ዝኩዊኔ ጉስጝስ ይዝኩዋ ያኻማ እጂⶓ ኢቢ ሲሊ ፄውትኹ እጂጚዳ ዙሜ:: ጝናቑሳ ዝኩዊኔ ኬሻንታ ፄውጝስኪላ ክንቲሊ ቴርቴራ ቻሞ ግዲትፅጙሳስታ ውፍቺጝናዳ ኪፂርስቴታ ፍችⶓኽስታ እንፃኽስቲስ እሽቲት አኽⶓ ዲብስታ::
“ወይኗ ኩራሌው” ክንቲዳ ይሴናስታ ጐቤዛ ክንታንታ እሽቲት አኽⶓ ታክስታት አንጚስ ሲፍታታ ክንቲስ ኽሳንቲ አችዳ ታምጝስ ችግር ፅንጋኻ አኽጝስ ክንቴ አሊዴውላ ይጉⶓ ዙሜ:: ፍንሾስ ዝኩኽሳ ኽሳንቲ አችዳ ታምብጙሳ አላሜ እምቴታ ኩፅኒ ሌጌስትኹሳ ዙራሙሬ ባይፄውላ እንፃኽስቴውሳ እንፅኼ ጄሜርጝሾ ቱⶓ እንክርፄ::
ዙራሙሪ ቺፋ እሬባቲው እንፅኺታስታ ላፋላፍጝስ አቖ አሬብሻኑውስታ ካንትናኩ “ኩራሌው” ንካማጊ ዙራንኩ እንፃኽስታንትካውሳ ውማዩ አሌቔትጝጝስኪላ ችግርዴስ ፊጝስ ሴሎ ኪስⶓ ዎታታ ወይኒ ዲብስታ:: አቫላምቲዳ ኪሽዳ ዝኩኽ ጌንዜብስ ዙራሙሪሾ ዙርታታ ጚውስ ግርብስ ቴኬማቲውሳ ቤሮ፣ ጐማዋ ኮንኩ አክኽካዋ፣ ዱንቱንኩ መኪናውሳ አክኽካዋስታ ቴርሙሱ ዋይምካዋጊ ኩችፅጝስ ጚጛርትጛሳ እንፅኺሾ ሚፅፅⶓኪላ ድኹታ:: ኩችፄውሳ ኩራሌውሳ አክኼ ኩፅኒ ኬፍኑንኩሳ አሬኬብፅጝስ ያኻውላ ጚ እሳንንኹሳ ብቴ ክራይቴታ ኩፕፅጝስ አኹኪ ኩችፅጝስ መኪናዋ ዋኻውሳ ኩፕፄታ ኽሳንትካ አብት ዌንካ ጚሾ ይንቴካማ ጄዋንታ ፄውጝሾ ቱⶓ እንክርፄ:: እንፅኺሾ ቱስቱስ ኩፅኒ እምፕላኒስ ፊቲዌና አኽጝስ ካሊስታቲውስታ እንፁኒ ላጚኒ ሹኺኒ ክሳሪ ጌቴማው አኽⶓኪላ ቶኬምታ:: ክሳሪዴስ ኩፅኒ ሚንቾ ክንቴ አግፅጝስ ፍንሾሱሳ እንፅኺውሳ ዳዶ ጉድጛ ማሌታ ፄውኽ አኽⶓኪላ ዲብስታ::
እንፃኽስቴውሳ እንፅኼ ናኪጝስ ዎታታ ጋማ እንት እንሳ እንፅኼ ባታጉጅ ናንኩጊ እሺⶓ ጉሽታ:: ያኼስጉ ትብ እያውሳ ካንቴ ቻቤልታውላ ጚው አላሚስ ፂኒⶓ ቶኬምታ:: “እንጚዳኪላ አቕናኑውስታጊ ይውሳ ክብሮ ፌይፃታ ጌንዜቦ አግፅጝዴስኪቻ ፋታውሳ እንፃኽስታታ ይውሳ ክብሮ ኬቤርፅጝስ ፋታኻ አኽጝስኪላ አቕ እያኑሳ ፊሪስፄ አሳቦ ቹኒታውላ ይው ይሴን እክድስታ አላሚስ ጉስስታታ ናካ እንዳ ታምጝስ ካላ” ኒስኪላ ዎታታ ወይኒ ድኹታ::
አቫላምቲዳ ጌቴምኹ ችግር ፅንጋኻ ያኻውላ ጚውሳ አንኩሌ ቲኪምስቴታ ፌቴርትኹ እንፅኺስ ናካዳ አብትዌና ታኻታ እንፅኺውሳ ድሎ ፌቴርⶓ እንክርፄ:: ናኺስዴስ ጁዋማ ናካዳ ጚጛስታ ኩራሌዋ ኩችፅጝስ አኹኪ ኩፕፅጝስ ታምባታ ፄውትኹ ዎታትኪላ ዝኩⶓ ዎታታ ወይኒ ዲብስታ:: ትቡሳ መኪናዋ እንጅኩዋማ ካንትጝስ ካሊትጝዴስ ኪቻ ወሺኔኪ እንፅኼ ጐሌላውላ እንፃኽስታማ አብትዌና አኽጝስስታ መኪናዋጊ ጄውጝስ ካሊስታው አኽⶓኪላ ካንቴ ይታ::
አሊዲዳኪላ ኩሬውስታ ኪቢርስቴታ ዝኬው እንፅኺስ “ወይኗ ኩራሌው” እስቴታ ስሞ እቑስቴኒ ፋታት አኽⶓ እንክርፄ:: ኹንኪ ያኼካ ጝርጃ እንፅኻ ጋቲታ እንጅኩጝዴስ እንፅኼ ናካኑውላ እንፃኽስትጝስ ዝኩዊኔ ኪስጝስ ካሊስታው አኽⶓኪላ እንፅኼንቶ ፌያፌይጝፄ::