ቹኒትጝጚ እሺኹ ካስት

ጉላሊ ዲሞክራሲያዌ ቴርቶ አድርፅጝስ ዝኩኽ ፍሺ ኬፍንኹያኽ:: ጉንቤት 24/2018 ም/አሜታዴስ ጄሜራማ ማንዚ 14/2018 ም/አሜታሳኺስታ ካርዶ ፍሽጙ ቴርት ካስጙስ እጄ:: እምፕልታቕኪላ እይስትኹሳ ሜብቶ ቴኬምስትካማ አጌርታ 54 ሚሊዮንዴስ ጃላ እዝብ ድምፆ እይጝስ ሜዜጌብስትⶓ ይቶፒያው ጉላሊ ቦርዱ ንቫር ቶኬማ::

አጌርታ ካንትስታኒ ዴሜካ ዝኩኽ ሰላሙ ዳንጉዋኒ ምክንያታስ ትግራይ ክልሉ እዝብ ዋኽስ ዋኾስታ አማኻሪ ክልልዴስ ሶኼታ ጉላሊው ጉትፕካዳ እምፕልታቕ ጉላሊዳ አሴቴፍጜካያላኪ::

እን ጉላሊ ካንትስታኒ ዳሜካ ካርዶ ፍሽጝዴስ ጄሜራማ እሺኹ እምፕልታቑ ካስጚ ዲሞክራሲውሳ ቴርቶ ዴስጝጝስ ዝኩኽሳ ፋዩ ካንትፃው እሺኾ:: ልኺትጛንትካ ፖለቲካው ፓርትካውሳ ሚንቺⶓ ኔኬትጝስ ታክስስታማ እይስትኹ ሜሜሪ ስሬታስ ዲግጛው ታክስጚስታ ፋይ ዝኩክ ፖለቲካው ፓርትካ እምፕልትጝስ ጛውሳ ማኒፌስቶ ቴርስካማ እዝብስ ዲግስጝዴስ ጉሽፃማ ክስካሴ ካስጝፅⶓ ኺስታ ክቻ አይሩ ሳት እይስታማ ሚዲያዋ ቴኬምስታኒስ እጂካ::

እን ካንትፃው ዴሜካ እዝብ ፋያውሳ ዲሞክራሲውሳ ቴርቶ ቴግባራዋ ፄውጝስ ዴስጝጚው ዳድሾ ቱጙዋኽ::

ላጜታንቴ ትክላሊ ጉላሊው ካስጚዳ እምፕልታቕኪላ ጉላሊ ሰላማዊ አኺኒስ ካስጛታ ዙራሙሪውሳ ሰላሞ ማንዲፅጝስ ፄውኽ ፍሺ ኬፍቲኒ እሺኾ:: እን ዴሜካ ጉላሊው ቴርት እንዳራኪ ሰላሙ ፅንጋኻ ጋቲታ ካስጛታ እርዳታ:: እን ኪላ እዝብ ዲሞክራሲውሳ ቴርቶ ዴስጝሾ ካንትፃ ያኻ::

ላጜታንቲ አጌራዊ ትክላሊ ጉላሊ ዲሞክራሲያዊ ያኻታ ካሊፅጝስ ውላውጊ ጉላሊው ጉትፕካዳ ልኺትጛንትካ ፖለቲካ ፓርትካ ታዜባንትካዋ ጉላሊው ቴርትዳ ዲጋንታ ፄውስታ:: እንስኪላ ካላንኩ ፖለቲካው ፓርትካ ጛዋ ዎኬላና ናንኩሳ ታዜባንትካዋ ወኬልⶓ ሼውንጝስ ካሊስታ::

አጌራዊ ጉላሊዳ ታዜብጝስ አግስቱንኩ ቤዴራሱ ኬንያው ፕሬዝዳንት አሁሩ ኬንያታ ካስጙኽ ሳኪትጙኽ ጉላሊ ይቶፒያስ ይቪቻ ያኻውላ ትክላሊ አፍሪካ ጄንጁ ኬቴኒው አሪጊግጚስስታ ልግስስኪላ ወሴናንቲ ፋንቲቲ አኽⶓ አምንⶓ ኢቢሲ ዜጌባ:: ቤዴራሱ ዩጋንዳው ትክትሊ ፕሬዝዳንትስስታ ኢጋዱ ታዜባንቲ ኬቹ ጉሳንቲ ዋዲራ ሶፔሲዎስ /ዶ/ር/ ጉላሊው ልግሱ ካስጚዳ ኽሳንቴ ፋንቲቴ ብስኹ አኽⶓ ጌሌፅካ::

አፍሪካው እምፕልቱ ታዜባንትካኪላ ጉላሊዴስ ታዜቡንኩ ጐሌላንትካውሳ ኩርፄንቶ፣ ፄትቲውሳስታ ሰላሙሳ አኺኔ፣ ጉላሊ ቦርዱሳ ይሴንቶ፣ ፖለቲካ ፓርትካውስታ ታሜትስታንትካ ሴኬኑንኩ አኽⶓጊ ጉሽካ::

ጉላሊዴስ ፋሌንጋ ይንታውሳ ዋይሜኪላ ዴስቲስ ቻቤላንኩ አኽⶓ እምፕልታቕ  ዙማኒስ ሼውስታ:: ጐሌልጝስ እይስትኹሳ ሜብቶ ቴኬምስታማ ዋይሜ ዴሜካ ዴስቲስ ቻቤልጝ ቱስቴ::

ዲሞክራሲው ቴርት ዴሜካ ዙሚጝስ ይቪቺ አንታቲው አኽⶓ ማላማ ዴስጝጚዴስ ፋሌንጋ አግስታው አኽⶓ አቕጝ ፋይፄ:: ስልታኑ ካይጝጚኪላ ድምፁ ኽስትጃጊ አይልስ አንታቲው አኽⶓ አቕጝኪላ ቱስቴ::