ካንትስታያሱ ፍትኽፂ

ታደለ አጋጄ

ዲሪኒ አኹ ካናጛርጊ እስታማ እቑስቴ:: እንጃቢሪ ኬቴምዴስ ቻግኒሾ ካፃው ዳድዳ ሳንኪት ልዴታ ኬቤሊዳ አግስታው ላንቡሳኺስታ ሼውስታያሱ ፍትኽፂ ስፍሪያኽ:: እንፅኺስ ዴሬትኹሳ አንኩሌ ፍትኽፅጝስ ካሊፃውስታ ሚንችካስ ፍትኽ ንጝስ ጎሌልስታው ዙራሙሪያኽ:: ኬቴምስ ዲጊዳ አስፓልቱ ዳድ ናቕታዳ አግስታው እን ፍትሬትስ ጌሬምፃው ስፍሪ ቺውሲ ኬቤሊዳ አግስታው ዚንጊኒ አይኩሳ ማሊፌ ፃያ:: ዙሬ ካናኻፂስ ኬቤብስትኹ ያኹስ እሳን ጅቕጅቒስታ ልቓስ ዳሪዳ ባር ያኹኽ ስፍሪ ዝኮ:: ጅቕጅቒዳ ጉሺሪስታ ኪታሚ ዋጋው ዙራሙሪያኽ:: እን ስፍሪ ኬቤሊው ዝኩዋንትካስ ያኻ ወረዳው ባይሉስታ ቱሪዝሙ ፅፌት ጝናስ ትኩት እይሰታያሱ ስፍሪያኽ::

ኻሱሳ ቴርቶ ካስጝፃንኩ አቕ ዚንጊኒ ዙራሙሪሾ ካስጝስ ፍትኽ ናሺና:: ያኼስጉ ዚንጊኒ አይክ ፄትቲው ስጋት ዝኩኽ ዙራሙሪ ያኻኒ ዴሜካ ኻሱሳ ፕሮግራሞ ካስጝፃንኩ አራኹና ዲሪኒ አኹ ካናጛርጊ እስታው ዙራሙሪሾ ካስጝስ ፎቱሳ ቴርቶ ካስጝፃና::

ኻሱሳ ፕሮግራሞ ካስጝፅጝዴስ ድምክና ሚንችካ አቕ እንጃቢሪ ኬቴምዴስ ስፍሪሾ ካስጝስ ፍትኽ ናኑ ስፍሪያኽ::

ዎታትካስ እንፅኺውሳ ድሎ ፌቴራውስታ ኬቤሊስ ሚፂው አግፅፂ ያኻው እሺኹ ስፍሪ ኮራኮርስታማ ልማትስ እሼታ ታክሳው እምፕልታቕ እላ አኽጝስ ትኩት እይስታየሱ አኽⶓ ሳንኪት ልዴታ ኬቤሊው ዝኩዋንቲ አቶ አለምነህ አድማስ ድኹዌካ::

አቶ አለምነህ ዙመኑውስታጊ ዲጊሪ ካና ጛርጊ ድንጉሊ ካን ናቕታዳ ካናኻፂስ ሾፌንስታማ አግስታው እሳን ብቲዳ  ኪታሚስታ ጉሺሪው ስፍሪ አኽⶓ ድኹዌካ:: ሚንችካ ስፍሪሾ ይንቴካማ ጎቤናኑ ስፍሬ አኽⶓ ቶኬምካ::

ዲሪኒ ናቕታዳ ልቓ ባር ያኹኽ ስፍሪ ዝኮ:: ባሩ ናቕትዳ ዝኩኽ ጅቕጅቒ ብቲዳ ዋጉኽሳ ኪታሜስታ ጉሺሬ እምፕልታቕ አፄድካማ ዋይጝስ ቴኬምስታና:: ባር ካጋማጊ ካሳኒ ኩፅኒ እምፕልታቕ እን ስፍሪ ማንዲስታታ ፄውስትⶓ አቶ አለምነህ ዙሜካ::

ዲሪኒ አኹኪ ካናጛርጊው ዙራሙሪ ምንጊሱ ጊዝዳ ማንዲስታሺኹ አኽⶓስታ እንሴስካጊ ቱዋቲኑ ስፍሪ እሺⶓ እንክርፄካ:: ዲሪኒዳ ዋጋው ኪታሚስ እምፕልታቕ ጉዲሬ ግቤቴካማጊ ቴኬምስታሺኑ አኽⶓ ቶኬምካ:: ናካኪላ ያኹኒ ዲሪኒዴስ እምፕልታቕ ቾፌ አፄድጝስ ዋይካማጊ አሌትስ ቴኬምስታኑ ስፍሪ አኽⶓ ዲብስካ::

“ዲሪን አኹኪ ካናጛርጊ እስታው ስፍሪዳ እሺኹ ባር ካጋማጊ ይንታ፤ ኬሌልስታማ ማንዲስትጝ ቱስታው ስፍሪ እሺኾ”:: ናኒስ ካንቴ ታምፅካ::

አቶ አላምነህ ድኹኑውስታ ዲሪኒ አኹኪ ካናጛርጊው ዙራሙሪሾ ሊሊትጙንኩ እምፕልታቕ ጎቤናና:: ኻሱሳ ቴርቶ ካስጝፃንኩ ይንቴካማ ሻኪስስታ ጅሚስ ፍትኽ ናና:: ያኼስጉ ዙራሙሪኩ ዝኩዋንትካኪ ያኻ ዎታትካ አችትጜካማ እንፃኽስትጝስ ካሌካያሱ አኽⶓ ቶኬምካ::

ዲሪኒ አኹኪ ካናጛርጊ ውላ እዝቡ አኽጝታጊ ትኩት እይስታማ ማንዲስታታ ፄውስታያሱ አኽⶓ እርዳትፅጝስ ኬሽኹ ፍትኽፂው ስፍሪ ያኻታ እንፃኽስቱኒ ክርፂ አኽⶓ ዙሜካ::

ፍትሬትስ ማልጛ ግዲስታውስታ ዴስፃው ፍትሬቱ ፄጊ ዝኩኽሳ ዙራሙሬ ዋታትካው እንፅኺ ድሉ ፊቲርፂ ያኻማ እንፃኽስትጝ ቱስታው አኽⶓ ጉሽካ::

ዲሪኒ ናው ስም እይስትኹ አኽዳ ዋጋው ክይዴስ አኽⶓ ቶኬምካ:: አቶ አለምነህ ካናጛርጊ እስትኹ ዴሜካ ዲሪኒ ናቕታዳ አግስታው ካንዳ እምፕልታቕ ፅኻራዋ ስኹፅጝስ አንኪሜ ማቺፃሺኑ አኽⶓ ድኹዌካ:: ካን ናቕታዳ ዝኩኽ ድንጉሊ ካርጝዳ ፅኻሪ ቱዋማ ጛርጌ እያሺኾ:: አኽጝስኪላ “ካና ጛርጊ” እስታማ እቑስትኹ  አኽⶓ ዙሜካ::

አቕስቲዴስ ይጉዋማ ኬቤሊው ዝኩዋንትካስ ሚንቾ ትክሞ እያው እሺኹ ስፍሪ ትኩት እይስታማ እንፃኽስታውላ ይጉጝስ ጛርትስ ኬሌልስታማ ማንዲስታያሱ ስፍሪ ያኻ ንካ::

ዎታትካ ካጊ ብቲዳ ቴክሎ ቴክልጝስ ኬሌልካማ ቴኬምስታኑዴስ እንታኮውሳ ብቴ ሊሚፅጝስ እንፅኺው ድል ፌቴርስታታ ፄውጝ ቱስታው አኽⶓ ጉሽካ::

እምፕልታቕ እሌትስ እያው ትክምዴስ ኪቻ ፍትኽፂ ያኻማ እያውሳ ትክሞ እርዳትስትጝስ ኬሽኹ ፍትኽፂ ስፍሪ ያኻማ እንፃኽስትጝ ቱስታው አኽⶓ ዲብስካ::

ዲሪኒ ፍትኽፂ ያኻማ አጌላጌላው ስፍሪ አኽጝዴስ ፌይኹስ አቓ ግብሪ አይክ ግቢትስትጝሰ ካላውስታ አሲው እሩብፂ ስፍሪ አኽጝስ ኬሽኹሳ ትክሞ እያው ያኹኒውላ ላንቡሳኺስታ ኩፅኒ ሼውስታማ ካንትስታያሱ ስፍሪያኽ::

እሊት ሳንኪት ልደታ ኬቤሊው ዝኩዋንታ ዊዛሩ አስረሳች ጌታሁን ዲሪኒ አኹኪ ካናጛርጊው ስፍሪ ሚንችካ ዎታትካ ይንቴካማ ጎቤናኑ ስፍሪ አኽⶓ ድኹዌካ::

ዲሪኒ አኸኪ ካናጛርጊ ዙሬ ካናኻፂስ ሾፌንስትኹስታ እምፕልታቕ እንሴስካዋ ማንዳኑ ስፍሪ አኽⶓ ዲብስካ:: ላንቡሳኺስታ እምፕልታቕስ እይኹ ሚፂ እላቲው አኽⶓ ቶኬምካ:: ስፍሬ ሊሚፅጝስ ካሲስቱኒውላ እምፕልታቕ ኩፅኒ ፍካዴና ጋቲንኩ አኽⶓ ድኹዌካ::

እምፕልታቕስ ኬሽኹሳ ትክሞ እያው ዳድስ ሊማማ ቴኬምስታንታ ፄዉጝ ቱስቴ ንካ:: እንታኮውሳ ፍትሬትስ ጌሬምፃውሳ ዙራሙሬ ይንቴካማ ጎቤናንታኪላ አቑዌ ፌያፌይጝፄ::

ባንጂ ወረዳዉ ባይልስታ ቱሪዝም ልማት ፅፌት ጝናዳ ቱሪዝም ልማቱ ውማይቲኒ አቶ አንዷለም ይግዛው ወረዳዳ ሊሊትጙንኩ ቱሪስታ ጉስፅካ ስፍርካ ዝኩንኩ አኽⶓ ጌሌፅካ:: ባርኾቼዴስጊ ይንቴካማ ጎቤናሺኑ ዚንጊኒ አይክ ናካዳ ፄትቲው ችግርስ ጎቤንስታማጊ ጋቲው አኽⶓ ቶኬምካ:: ዚንጊኒ አይክዴስ ድምክና ሳንኪት ልዴታ ኬቤሊዳ አግስታው ዲሪኒ እስታው ስፍሪ ሚንችካስ ፍትኽፂ ስፍሪ ያኻማ አጌላጌላማጊ አግስታው አኽⶓ እርዳትፅካ:: ወረዳው ባይልስታ ቱሪዝሙ ፅፌት ጝና እንሳ ፍትኽፄ ስፍሬ ኬሽኹስ ሊሚፅጝስ እንፃኽስስታው አኽⶓ ጉሽካ::

ዎታትካው እንፅኺውሳ  ድሎ ፌቴራውስታ ኬሽኹሳ ሚፄ አግፅፃውሳ ስፍሬ ሊሚፃማ ቴኬምስትጝስ ይንታውስ እክድስ እምስታማ እንፃኽስስታው አኽⶓ ጌሌፅካ::

ወረዳዳ አግስታንኩ ሊሊትጙንኩ ቱሪስታ ጉስፅካ ስፍርካዋ አቕትጝፅጝስ ጎቤናንትካ ይንቴካማ ጎቤናንታ ፄዋንኩ አኽⶓ ጉሽካ:: ቱሪስታ ጉስፅካ ስፍርካዋ ኬሽኹ አኺኒስ ሊሚፅጝስ ኬሽኹሳ ሚፄ አግፅጝስ እንፃኽስስታው አኽⶓ ቶኬምካ::