አውጚ ስታ ቴሌቪጅን

ታደለ አጋጄ

ይቶፒያው ሚዲያው ዜርፉ ልግስኒዳ ሚንችካ አጌራኻዳ ዙሚስታንኩ ኮንክካ ራዲዮንስስታ ቴሌቪጅንስ ፌያፌይጜካማጊ አግስታና:: አዊው እምፕልታቕ እሳንስ ዙማው አውጚው ኮንኪ ራዲዮንስስታ ቴሌቪጅንስ ፌያፌይጝⶓ ጄሜሩኒዴስ ሚንችካ አሜትካዋ ቼፍፃ:: 1997 ም/አሜታዳ 15 ደኪካ አይሩ ሳትስ ራዲዮንስ ፌያፌይጝⶓ ጄሜርኹ አውጚው ኮንኪ 2008 ም/አሜታዳ ዴሜካ ሶኼትዴስ  እምፕል ሳቱ አየሩ ጊዝ አይስታማ ቴሌቪጅንስ ፌያፌይጝⶓ ጄሜራ::

ኮንኬ ሌጌፅጝስ፣ ባይል፣ ዎግስታ ታሪክ ድሳቲታ ፄውጝ፣ ባይልኩ እሴትካ ክምንትዴስ ክምንቶ ፌዬፌይጛንታ፣  እምፕልታቕ ክንቲውሳ፣ ፍትኽፂውሳስታ እሊኩሳ ንቫርካዋ አግፃንታ አውጚው ኮንኪ ሚዲያስ ፌያፌይጝጙ ቹዋ አላሚያኽ::

አውጚ ሚዲያስ ፌያፌይጝⶓ ጄሜርኹ ጊዝዴስ ጉሽፃማ ኮንኪው ልግስኒዳ፣ ባይሎስታ ታሪኮ አቕትጝፅጝዳ፣ ፖለቲካው፣ ማይቤራዊስታ ይኮኖሚው ጉዳይዳ ትኩቶ ፄውንኩ ንቫርካዋ እምፕልታቕስ ዲጋንታ ኬፍቲኔ ፍሺ ፄዋማጊ አግስቴ::

አውጚው ኮንኪ ናካዳ ራዲዮንስ፣ ቴሌቪጅንስ፣ ጋዚቲስስታ ዲጂታል ሚዲያስ እምፕልታቕስ ፌያፌይጛማጊ አግስቴ:: ኮንኪ ሚዲያስ ፌያፌይጝጝ ዴሜካ ኮንኪው ልግስስ ኬፍቲኔ ታምቦ ፊትጛ:: ኮንኪ እምፕልታቕ አይቱ ባይሉስታ ታሪኩ ጊሊፅፂ አኽጝስ እሳንስ ሚዲያስ ቴኬምስትጝስ ኮንኪው ልግስኒስ  እምፕሎ ፋንቲቴ ፍንሾ እንዜጛታ ፄዋ::

አውጚውሳ ኮንኬ ዙማንኩ እምፕልታቕስ አባላምቲ ንቫሩ አግፅፂ ያኹኽ አውጚው ቴሌቪጅን አብኖ ዲግስጝ፣ ክንቲው ፕሮግራምካዳ ትኩቱንኩ ጉዳይካዋ ዲግስጝስ እንቲታኪ ባይልዳስታ ፍትኽፂው ቴርትካ እምፕልታቕስ ታምባንታ ፄውስታ:: ጋያኪ ጌርክቺፋ ዲጋንኩ ቴርትካዴስ እምፕልታቕ ንቫሮ አግፃንታ ፄውጝዴስ ፌይኹስ አዉጚዉ ኮንኪ እሳንስ ዙሚስታታ  ፄዋስታ:: ዎታትካ ኮንኬ እሳንስ ዙማና::ኬቴምዳ ኮንኪ ሚንቺትስ ዙሚስታቲው እሺኹ ናካዳ ሚንችካ ዙማና:: አዉጚዉ ኮንኪ ቴሌቪጅንስ ፌያፌይጝጝ አዊውሳ ባይሎ ኬፍናማ አቕስታታ ኽሳንቴ ታምቦ ፊትጛ:: አውጚው ቴሌቪጅንስ እንፃኽስታንኩ  ቴርትካ  እሳንስ እንፃኽስታ አዊው ባይልዳ ትኩቶ ፄውጝስያኽ::

አዉጚዉ ቴሌቪጅን ባይል ድሳቲታ ፄውጝስ፣ ባይልዳ ኩራንታስታ ክምንትዴስ ክምንቶ ፌያፌይጛታ ኽሳንቴ ታምቦ ፊትጛማጊያኽ::

አውጚው ቴሌቪጅንስ እጂጜ ፄዉኽ  እንጃቢሪ ኬቴሙ ዝኩዋንቲ ማሞ አገኘሁ አውጚ ኮንኪስ ፌያፌይጛውሳ አብኖስታ ቴርቶ ኹሉ ቺፋ (ኑሮ) ሲፍጝጛው አኽⶓ ድኹዋ:: እምፕልታቕ አውጚዉ ኮንኪስ ራዲዮንስታ ቴሌቪጅንስ ጄሜራታ ካቪትጝፄካማ ካሴ ጉሻኒስ እሺⶓ ቶኬማ::

ዎታት ማሞ ዙሙኹስታ ማይቤራዊ፣ ፖለቲካዳስታ ይኮኖሚዳ ትኩታው ፕሮግራምካ አውጚ ቴሌቪጅንስ ፌያፌይጛማጊያኽ:: እዝብ ማልጛ ዴስናማ ሚዲያስ ፌያፌይጛውሳ ንቫሮ ሲፍጜ:: ጛው ኮንኪስ ፕሮግራምካ ቴሌቪጅንስ ፌያፌይጝጝ ኮንኪው ልግስስ ኽሳንቴ ታምቦ ፊትጝⶓ ዲብሳ:: “አውጚው ኮንኪ ብኖ ካይፃላ” እስታማ ኮንኪዉ ልግስዳ ቻኒስት  እሺኾ ንኹ ዎታት ማሞ አውጚ ሚዲያስ ፌያፌጝጝ ኮንኪ ሌጌሳታ ፄዉⶓ ድኹዋ::

አውጚው ቴሌቪጅን ሚንችካ ቱሪስትስ ጎቤንስታንኩ ስፍርካዋ አቕትጝፃማጊ ያኹኒውላ ፍትሬትኩሳስታ አቓ ግብርካ ያኹንኩ  ስፍርካዋ እሳንስ አቕትጝፅጝስ እንፃኽስትጝ ፋይፃው አኽⶓ ዲብሳ:: እምፕልታቑሳ ታሪኮ፣ ባይሎስታ እሴቶ እሳንስ ስፍሪዳ አግስትጝስ ፌያፌይጛታ ፄውጝ ቱስታው አኽⶓ ቶኬማ::አውጚ ቴሌቪጅንስ ፌያፌይጛው አይሩ ሳት እንፁኽ አኽጝስ ሚንች ሳት  ዴሜክስታማ እንፃኽስትጝ ፋይፃዉ አኽⶓ ዲብሳ :: እምፕልታቕስ ዲጊዳ ሚዲያው ኾት ብስስታማ  ንቫሮ አግፃንታ ፄውጝ ቱስታዉ  አኽⶓ ቶኬማ:: አውጚው ቴሌብጅን ኽሳንቲ አችዳ ታምባታ ዴሜካ እዝብ  እርዳትጝ ፋይፃዉ አኽⶓ እርዳትፃ::

አዊ ብሄረሰብ ቺፅጝፂው ምንግስት ኮምኒኬሽን ጉዳይካው ሜምሪ አላፋ ዊዛሩ የሻሽወርክ መላኩ አውጚ ኮንኪስ ቴሌቪጅን ፌያፌይጝጝ ሚንችካ ትክምካዋ እምፕልታቕስ እያማጊ አግስታው አኽⶓ ዲብስካ::

ማይቤራዊው፣ ይኮኖሚውስታ ፖለቲካው እንቲታኪ እምፕልታቑ ክርፂ ቺፅጝፂው ካሲ ዙርሜ አግፃታ ሚዲያ ኽሳንቴ ፍሼ ፄውⶓ ጉሽካ:: አውጚው ቴሌብጅን ፅካ አሜቱ እንዝጚዳ ኮንኪው ልግስዳ፣ ባይሎ አቕትጝፅጝዳ ባይልኩ እሴትካዳስታ ትቤቭ ፅንታው እንፅኽካ እሊኩስ አቕትጛንታ ኬፍ ንኹሳ ፍሼ ፊትጝⶓ ጉሽካ::

አዊ ብሄረሰቡ ቺፅጝፂው ባይል ቱሪዝምስታ ስፖርት ሜምሪዳ ባይሉ እሴትካው ኬቹ ጉሳንቲ ወላሊ ጌቴ አማኻሪ ማዲያ ኮርፖሬሽንስ ፌያፌይጛው አውጚው ቴሌቪጅን አዊውሳ ባይሎ፣ ኮንኬስታ ታሪኮ ሌጌፅጝስ ኽሳንቴ እንፅኼ እንፃኽስትⶓ ጌሌፅካ::::

አዊ ብሄረሰቡ ቺፅጝፂዳ አግስታንኩ ቱሪስትስ ጎቤንስታንኩ ስፍርካዋ እሳንስ አቕትጛንታ አውጚ ቴሌቪጅን ኽሳንቴ ታምቦ ፊትጝⶓ ቶኬምካ::

አገው ፌሬስቴኑ ባል ኬሽኹ አችዳ ታምባታ ፄውጝስ አውጚው ቴሌቪጅን ኽሳንቴ እርዳቴ ፄውⶓ ቶኬሙንኩ አቶ ወለሊ አዊውሳ ባይሎ እሊኩስ አቕትጝፅጝስ እንፃኽስስትኹ እንፅኺ ሳሴር ጋቲው አኽⶓ ኽይትጝፄካ:: ሜስኬሉ ባል፣ አሱሪቴው ባልስታ እሊኩ እንፅኽካዳ ፕሮግራምካዋ እንፃኽስትጝስ እምፕልታቕስ ታምባንታ አውጚው ቴሌቪጅን ኬፍ ንኹሳ ፍሼ ፄዉⶓ ዙሜካ::አውጚው ቴሌቪጅንስ ፌያፌይጛው ፕሮግራምዳ አይሩ ሳት እንፁኽ አኽጝስ አብንካስታ ፕሮግራምካ እሳንስ እንፃኽስታንታ ሳት ዴሜክስትጝ ቱስቴኪላ  ንካ::

አውጚ ቴሌቪጅንስ እሳንስ ፕሮግራምካ እንፃኽስትጝስ  ካንትስትካያስኩ ዲብካዳ ትኩቶ ፄውጝስ እንፃኽስትጝ ቱስታው አኽⶓ ቶኬሙንኩ አቶ ወለሊ ባይል፣ ቱሪዝምስታ ስፖርቱ ሜምሪ አውጚው ቴሌቪጅንሊ እምፕልትስ እንፃኽስታንኩ ጉዳይካዳ እምፕልትስ እንፃኽስትጝስ እክዶ እሚⶓ ዙሜካ::